“Mwirire haihi Ruhanga, nawe abone kubairira haihi.”—Yakobo 4:8
Ruhanga Naahurira Okushaba Kwaitu?
Oreebuurizeho yaaba Ruhanga naakuhurira waashaba? Kyaba nikwo kiri, tori wenka. Baingi nibashaba Ruhanga baaba baine oburemeezi, kwonka oburemeezi bukiriho. Ekyo shi nikimanyisa ngu Ruhanga naayehuzya okushaba kwaitu? Ngaaha! Baibuli neetuhamiza ngu Ruhanga naahurikiza twamushaba omu muringo oguhikire. Ka tureebe eki Baibuli erikugamba.
RUHANGA NAAHURIKIZA.
‘Iwe orikuhurira okushaba, abantu boona nibaija kwija ah’ori.’—Zaaburi 65:2.
Abamwe nibashaba ahabw’okwenda kwehurira gye, n’obu baraabe batarikwikiriza ngu hariho orikuhurira okushaba kwabo. Kwonka titurikushaba kwehurira gye kyonka twaba twine oburemeezi. Baibuli neetuhamiza ngu Yehovaa ‘ari haihi na boona abarikumutakira omu mazima,’ barikumushaba obuhwezi.—Zaaburi 145:18, 19.
N’ahabw’ekyo, nitubaasa kuhamya ngu Yehova Ruhanga naahurira okushaba kw’abaheereza be. Omu muringo gwa rukundo naagira ngu nimwija ‘kunshaba, naanye mbagarukyemu.’—Yeremia 29:12.
RUHANGA NAAYENDA NGU OMUSHABE.
‘Mugumizemu nimushaba.’—Abarooma 12:12.
Baibuli neetuhiga ‘kugumizamu nitushaba’ kandi tushabe n’omu mbeera zoona. Buzima, Yehova Ruhanga naayenda ngu tumushabe.—Matayo 26:41; Abaefeso 6:18.
Ahabw’enki Ruhanga naayenda ngu tumushabe? Teekateeka ahari eki: Ni muzaire ki otarikushemererwa omwana we muto yaamushaba ngu amuhwere? Omuzaire naabaasa kuba naamanya eki omwana arikwenda nari oku orikwehurira, kwonka ku arikumushaba obuhwezi, nikyoreka ngu naamwesiga kandi amuri haihi. Nikyo kimwe, twashaba Yehova Ruhanga, nitworeka ngu nitumwesiga kandi ngu nitwenda kumwirira haihi.—Enfumu 15:8; Yakobo 4:8.
RUHANGA BUZIMA NAAKUFAHO.
“Mumwegyekyerere okushoberwa kwanyu kwona, ahabw’okuba naabataho omutima.”—1 Petero 5:7.
Ruhanga naayenda ngu tumushabe ahakuba naatukunda kandi naatufaho. Naamanya gye ebirikutwerarikiriza, kandi naayenda kutuhwera.
Omugabe Daudi akaba naashaba Yehova Ruhanga kumuhwera, kandi amugambira n’ebiteekateeko bye n’enyehurira ze. (Zaaburi 23:1-6) Ruhanga akatwara ata okushaba kwa Daudi? Akaba naamukunda kandi akahurira okushaba kwe kwingi. (Ebyakozirwe 13:22) Nikyo kimwe, Ruhanga naahurira okushaba kwaitu ahabw’okutufaho.
‘NINKUNDA [YEHOVA] AHAKUBA NAAHURIRA EIRAKA RYANGYE’
Ebi n’ebigambo by’omuhandiiki omwe wa zaaburi eziri omu Baibuli. Akaba naahamya ngu Ruhanga akagarukamu okushaba kwe, kandi eki kikamukwataho munonga. Akahurira ari haihi na Ruhanga yaatunga n’amaani g’okwemera amaganya n’obujune.—Zaaburi 116:1-9.
Twaba nituhamya ngu Ruhanga naahurira okushaba kwaitu, nitwija kugumizamu nitumushaba. Yetegyereze ekyahikire ahari Pedro, orikutuura omuri Spain. Omutabani ow’emyaka 19 akafeera omuri butandu y’emotoka. Aine obusaasi bwingi, akagambira Yehova buri kimwe, kandi yaaguma naashaba hakye-hakye kutunga okuhuumurizibwa n’obushagiki. Niki ekyabaireho? “Yehova akagarukamu okushaba kwangye kurabira omu kuhuumurizibwa n’obushagiki ebi Abakristaayo bagyenzi baitu baatuhaire nyowe n’omukazi wangye,” Pedro nikwo arikugira.
Okushaba kwaitu nikukira kugarukwamu kurabira omuri banywani baitu abarikufayo kutuhuumuriza n’okutushagika
N’obu mutabani wa Pedro araabe atarazookire ahabw’okushaba, kukamuhwera we n’eka ye omu miringo mikuru. Omukazi we, María Carmen, naagira ati: “Okushaba kukampwera kugumisiriza amaganya gangye. Nkamanya ngu Ruhanga naanyetegyereza ahakuba ku naabaire mmushaba, nkaba mpurira naatunga obusingye n’obugwagye.”
Baibuli n’ebi abantu barabiremu nibyoreka gye ngu Ruhanga naahurira okushaba. Kwonka, nikyeyoreka gye ngu Ruhanga tarikugarukamu buri kushaba kwona. Ahabw’enki Ruhanga naagarukamu okushaba okumwe, kandi atarikugarukamu okundi?
a Yehova n’eiziina rya Ruhanga.—Zaaburi 83:18.