Oku Turikubaasa Kusingura Okubangaanisa

1-2. (a) Obumwe abaheereza ba Yehova nibabaasa kugira kubangaanisa ki? (b) Nituza kugamba ahari omu kicweka eki?

TWENA abakuru n’abato obumwe nitugira okubangaanisa.a Nk’eky’okureeberaho, teekateeka aha Mujurizi wa Yehova muto orikwebuuza yaaba Yehova naamufaho. Ahabw’enshonga egyo naabaasa kuba atarikuhamya yaaba aine kubatizibwa. Nari teekateeka aha w’eishe-emwe owaacwiremu ari omunyeeto kwebembeza eby’Obukama omu mwanya gw’okukora esente nyingi. Hati akuzire, kwonka aine esente zonka ezirikwetengyesa kureeberera eka ye. Ekyo nikibaasa kumureetera kubangaanisa yaaba yaacwiremu gye obu yaabaire ari omunyeeto. Nari hariho munyaanyazi-itwe okuzire otakiine maani. Naabaasa kuhwamu amaani ahabw’okugira ngu tarikubaasa kukora ebi yaabaire naakora. Oreebuurizeho ebibuuzo nk’ebi: ‘Yehova naanfaho? Okuheereza Yehova nikukira ebi naayefeerereize? Nkiri ow’omugasho ahari Yehova?’

² Twaba tutatungire eby’okugarukamu by’ebibuuzo nk’ebyo, okwikiriza kwaitu nikutuuba, kandi turekyere aho n’okuheereza Yehova. Omu kicweka eki, nituza kureeba oku okuteekateeka aha misingye ya Baibuli kirikutuhwera twaba nitubangaanisa (1) ngu Yehova tarikutufaho, (2) ngu tukacwamu kubi enyima, nari (3) ngu tituri b’omugasho ahari Yehova.

OKU ORIKUBAASA KUSINGURA OKUBANGAANISA

3. Ni muringo ki gumwe oku turikubaasa kusingura okubangaanisa?

³ Omuringo gumwe oku turikubaasa kusingura okubangaanisa n’okusherura eby’okugarukamu by’ebibuuzo byaitu omu Kigambo kya Ruhanga. Twakora tutyo, nitwija kugumibwa, tukure omu by’omwoyo, kandi tugume ‘tuhamire omu kwikiriza.’—1 Kor. 16:13.

4. ‘Nitugyeza byona’ tuta? (1 Abatesalonika 5:21)

⁴ Shoma 1 Abatesalonika 5:21. Yetegyereze ngu Baibuli neetuhiga ‘kugyeza byona.’ Ekyo nitubaasa kukikora tuta? Nitubaasa kuhamya ngu ebi turikwikiriza bihikire turikubigyeragyeranisa n’eki Baibuli erikwegyesa. Nk’eky’okureeberaho, teekateeka aha munyeeto orikubangaanisa yaaba n’ow’omuhendo omu maisho ga Yehova. Mbwenu shi aine kumara agaikiriza ngu eki arikuteekateeka kihikire? Ngaaha, aine ‘kugyeza byona’ arikusherura emiteekateekyere ya Yehova aha nshonga egyo.

5. “Nituhurira” tuta Yehova arikugarukamu ebibuuzo byaitu?

⁵ Twaba nitushoma Ekigambo kya Ruhanga, “nituhurira” Yehova arikugamba naitwe. Kwonka, kumanya eki buzima arikuteekateeka aha kibuuzo kyaitu nituba twine kuteeraho munonga. Twine kushoma ebyahandiikirwe ebiraatuhwere kutunga eby’okugarukamu by’ebibuuzo byaitu. Nitubaasa kucondooza turikukoresa ebikoreso ebi ekibiina kya Yehova kirikutuha. (Enf. 2:​3-6) Nitubaasa kushaba ngu Yehova atuhwere omu kucondooza, kandi atubaasise kutunga eky’okugarukamu. Reero, nitubaasa kusherura emisingye ya Baibuli n’obundi buhabuzi oburikutuhwera. Kandi nitubaasa n’okugasirwa twashwijuma abarikugambwaho omu Baibuli abaabaire bari omu mbeera nk’ezaitu.

6. Enteerane nizituhwera zita kusingura okubangaanisa?

⁶ “Nituhurira” Yehova arikugamba naitwe twaba turi omu nteerane zaitu. Twaza omu nteerane obutoosha, nituhurira enshonga omu rubazo nari omu ky’okugarukamu erikubaasa kutuhwera kusingura okubangaanisa. (Enf. 27:17) Hati ka tureebe oku turikubaasa kusingura okubangaanisa okumwe.

WAABA NOOBANGAANISA NGU YEHOVA TARIKUKUFAHO

7. Abamwe nibabaasa kwebuuza ki?

⁷ Oreebuurize oti: ‘Buzima Yehova naanfaho?’ Waaba nooyereeba nk’otaine mugasho, noobaasa kuteekateeka ngu okuba munywani w’omuhangi w’ensi na iguru tikirikubaasika. Omugabe Daudi nawe naabaasa kuba yaayehuriire atyo. Okumanya ngu Yehova naafayo aha bantu kikamutangaaza, yaabuuza ati: “[Ai Yehova], omuntu ni kintu ki Iwe okumwijuka, nari shi omwana w’omuntu Iwe okumuteekateekaho?” (Zab. 144:3) Noobaasa kwiha nkahi eky’okugarukamu ky’ekibuuzo ekyo?

8. Kurugiirira ahari 1 Samueli 16:​6, 7, 10-12, niki eki Yehova arikureeba omu bantu?

⁸ Baibuli neeyoreka ngu Yehova naafayo ahari abo abarikureebeka nk’abatari b’omugasho aha bandi. Nk’eky’okureeberaho, Yehova akoohereza Samueli omu ka ya Yese kushuka amajuta ahari omwe aha batabani, owaabaire naija kuba Omugabe wa Israeli. Yese akareeta abatabani mushanju kubugana Samueli, oyihireho Daudi owaabaire naakirayo obuto.b Kwonka, Yehova akatoorana Daudi. (Shoma 1 Samueli 16:​6, 7, 10-12.) Yehova akareeba eki Daudi buzima yaabaire ari. Akaba ari omutsigazi owaabaire naata omutima aha by’omwoyo.

9. Ahabw’enki orikubaasa kuhamya ngu Yehova naakufaho? (Reeba n’ekishushani.)

⁹ Teekateeka aha ku Yehova ayorekire ngu naakufaho. Naakuha obuhabuzi oburikuhikaana n’embeera ei orimu. (Zab. 32:8) Ekyo naabaasa kukikora ahabw’okugira ngu naakumanya gye. (Zab. 139:1) Waagyendera aha buhabuzi bwe, kandi okareeba oku orikugasirwa, noija kuhamiza kimwe ngu Yehova naakufaho. (1 Bus. 28:9; Byak. 17:​26, 27) Naareeba okuteeraho kwawe n’emitwarize yaawe, kandi ekyo nikimuhiga kukwirira haihi. (Yer. 17:10) Naayenda ngu naiwe obe munywani we.—1 Yoh. 4:19.

WAABA NOOBANGAANISA NGU OKACWAMU KUBI

10. Nitubaasa kwebuuza bibuuzo ki, twateekateeka aha bi twacwiremu?

¹⁰ Bwanyima y’obwire, abamwe nibabaasa kubangaanisa yaaba baacwiremu gye. Obundi bakareka emirimo eyaabaire neeshashura gye, nari bizinesi zaabo kubaasa kuheereza Yehova omu bwijwire. Kwonka hati hahingwireho emyaka mingi. Kandi nibareeba bagyenzi baabo abaagumiizemu nibakora, baine entaatsya nungi, kandi bari gye. N’ahabw’ekyo nibabaasa kwebuuza bati: ‘Okuheereza Yehova nikukira ebi naayefeerereize? Nari nkaba nyine kugumizamu ninkora kubaasa kutunga esente nyingi?’

11. Niki ekyabaire nikiteganisa omuhandiiki wa Zaaburi 73?

¹¹ Waaba nooteganisibwa ebibuuzo nk’ebyo, teekateeka aha ku omuhandiiki wa Zaaburi ya 73 yaayehuriire. Akareeba abatarikuheereza Yehova baine amagara marungi, bari abatungi, kandi bataine kirikubeerarikiriza. (Zab. 73:​3-5, 12) Ku yaareebire embeera nungi ei baabaire barimu, akateekateeka ngu okuteeraho kwe kuheereza Yehova kukaba kuri okucwamu kubi. ‘Akarenzya eizooba arikubonabonesibwa’ emiteekateekyere egyo etahikire. (Zab. 73:​13, 14) Akagisingura ata?

12. Kurugiirira ahari Zaaburi 73:​16-18, omuhandiiki waayo akasingura ata emiteekateekyere ye etahikire?

¹² Shoma Zaaburi 73:​16-18. Omuhandiiki wa Zaaburi akaza omu mwanya gwa Yehova ogurikwera. Omu mwanya ogwo akaba naabaasa kuteekateeka gye. Akeetegyereza ngu n’obu embeera za bamwe zaabaire nizireebeka nka nungi, bakaba bataine matsiko ga nyentsya. Ekyo kikamuhwera kugira obusingye bw’omu biteekateeko, ahakuba akamanya ngu okwebembeza eby’omwoyo n’okucwamu okurikukirayo oburungi. N’ekyarugiremu, akagaruka yaamariirira kugumizamu naaheereza Yehova.—Zab. 73:​23-28.

13. Noobaasa kugira ota obusingye bw’omu biteekateeko waaba noobangaanisa aha bi waacwiremu? (Reeba n’ekishushani.)

¹³ Naiwe noobaasa kugira obusingye bw’omu biteekateeko orikuhwerwa Ekigambo kya Ruhanga. Ota shi? Teekateeka aha birungi byona ebi oine, n’emigisha ei Yehova akuhaire, kandi obigyeragyeranise n’ebi abatarikuheereza Yehova barikutunga omu nsi egi. Obwesigye bwabo bwona buri omu bi bakozire ahabw’okugira ngu tibaine matsiko g’ebiro by’omumaisho. Kwonka iwe Yehova naakuraganisa emigisha erikukira ekintu kyona eki orikubaasa kuteekateeka. (Zab. 145:16) Kandi, teekateeka ahari eki: Mbwenu shi nitubaasa kumanya embeera ezi twakubaire turimu kuri twacwiremu omu muringo ogundi? Eki turikumanya n’eki: Abarikucwamu barikwegamira ahari rukundo ei bainiire Ruhanga n’abataahi, tihaine ekirungi eki barikufeerwa.

WAABA NOOBANGAANISA NGU TORI W’OMUGASHO AHARI YEHOVA

14. Abamwe bari mu mbeera ki, kandi nibabaasa kuba nibeebuuza ki?

¹⁴ Abaheereza ba Yehova abamwe nibateganisibwa emyaka ya bukuru, baine amagara mabi, nari obumuga. Ekyo nikibaasa kubareetera kubangaanisa yaaba n’ab’omuhendo omu maisho ga Yehova. Nibabaasa kwebuuza bati: ‘Mbwenu shi nkiri ow’omugasho ahari Yehova?’

15. Omuhandiiki wa Zaaburi ya 71 akaba aine bwesigye ki?

¹⁵ Omuhandiiki wa Zaaburi ya 71 nawe akaba aine enyehurira nk’ezo. Akashaba ati: “Ku ndihwamu amaani, otarintsigaho.” (Zab. 71:​9, 18) Kwonka nabwo, akaba aine obwesigye ngu yaaheereza Yehova omu bwesigwa, naija kumwebembera, kandi amushagike. Nk’oku omuhandiiki wa Zaaburi yaayetegyereize, Yehova naasiima abarikukora kyona eki barikubaasa kumuheereza n’obu barikuba baine oburemeezi.—Zab. 37:​23-25.

16. Ni miringo ki ei abakuzire bari ab’omugasho ahari Yehova? (Zaaburi 92:​12-15)

¹⁶ Waaba okuzire, yereebe nk’oku Yehova arikukureeba. Naabaasa kukuhwera kubeengyeya omu by’omwoyo n’obu waakuba oine amaani makye. (Shoma Zaaburi 92:​12-15.) Omutima otaguta aha bi otakibaasa kukora, kureka aha bi orikubaasa. Nk’eky’okureeberaho, noobaasa kugumya abandi ahabw’eky’okureeberaho kyawe ky’okuheereza omu bwesigwa, n’okufayo aha bandi. Noobaasa kugamba aha ku Yehova akuhweraire emyaka egyo yoona, n’amatsiko agu oine aha bi Yehova arikuraganisa nyentsya. Ekindi, ijuka ngu okushaba kwawe okurikuruga aha mutima nikuhwera abandi. (1 Pet. 3:12) N’obu twakuba turi mu mbeera ki, twena twine eki turikubaasa kuha Yehova n’abandi.

17. Ahabw’enki twine kwangira okwegyeragyeranisa n’abandi?

¹⁷ Waaba nooyehurira kubi ahabw’okugira ngu tokikora bingi omu kuheereza Yehova, gira obwesigye ngu naasiima ebi orikukora. Noobaasa kwenda kugyeragyeranisa ebi orikukora n’eby’abandi. Yetantare kukora ekyo! Ahabw’enki? Ahakuba Yehova tarikutugyeragyeranisa. (Gal. 6:4) Nk’eky’okureeberaho, Mariamu akaha Yesu ekiconco ky’amajuta g’obuguzi bwingi. (Yoh. 12:​3-5) Kandi, efakaazi omworo akahayo otunushu tubiri tw’omuhendo mukye. (Luk. 21:​1-4) Kwonka, Yesu akareeba ebiconco by’abakazi abo bombi nk’ebirikworeka okwikiriza kwabo. Ishe Yehova naasiima kyona eki orikukora orikuhigwa rukundo ei omwiniire, n’okwikiriza n’obu waakuba nookireeba nka kikye.

18. Niki ekiraatuhwere kusingura okubangaanisa? (Reeba n’akabokusi “Ekigambo kya Yehova Nikibaasa Kukuhwera Kusingura Okubangaanisa.”)

¹⁸ Twena obumwe nitubangaanisa. Kwonka nk’oku twareeba, Ekigambo kya Ruhanga nikibaasa kutuhwera kusingura okubangaanisa. N’ahabw’ekyo, teeraho kukusingura okubangaanisa orikutunga eby’okugarukamu by’ebibuuzo byawe. Ijuka ngu Yehova naakufaho, naakusiima ahabw’okwefeerereza, kandi naija kukuha emigisha. Gira obwesigye ngu Yehova naakunda abaheereza be boona abeesigwa, kandi naabafaho.