“Mutoorane ou Muraaheereze”

1. Twine kukora ki kubaasa kutunga okushemererwa okwabuzima, kandi ahabw’enki? (Isaaya 48:​17, 18)

TATAITWE ow’omu iguru naatukunda munonga, kandi naayenda ngu twesiimire amagara hati n’omu biro by’omumaisho. (Mub. 3:​12, 13) Akatuhanga twine etalanta z’omutaano, kwonka taratuhaire okubaasa kw’okwetegyeka nari kwecweramu ekihikire n’ekigwire. (Mub. 8:9; Yer. 10:23) Naamanya ngu twine kumuheereza, kandi tukagyendera aha mitindo ye kubaasa kutunga okushemererwa okwabuzima.—Shoma Isaaya 48:​17, 18.

2. Sitaane naayenda ngu twikirize ki, kandi Yehova atwarize ata ahabw’ebishuba ebyo?

² Sitaane akagira ngu abantu nibabaasa kushemererwa baaba bataine Yehova, kandi ngu nibabaasa kwetegyeka gye. (Kut. 3:​4, 5) Yehova akooreka ngu ekyo tikihikire arikwikiriza abantu abagomi kwetegyeka kumara akaire. Nikireebwa butunu ngu obutegyeki bw’abantu buremirwe. Kwonka, Ebyahandiikirwe birimu abashaija n’abakazi abaatungire okumarwa omu kuheereza Yehova. Omwe aharibo ni Yesu Kristo. Ka tubanze tureebe ahabw’enki yaacwiremu kuheereza Yehova. Bwanyima, nituza kushwijuma ahabw’enki Tataitwe ow’omu iguru niwe tushemereire kuramya. Nituza kuhendera turikweijutsya enshonga ezirikutureetera kucwamu kuheereza Yehova.

ENSHONGA AHABW’ENKI YESU YAACWIREMU KUHEEREZA YEHOVA

3. Yesu akaraganisibwa ki, kandi akacwamu kukora ki?

³ Obu Yesu yaabaire ari omu nsi, akaba aine kucwamu ou araaheereze. Ku yaaherize kubatizibwa, Sitaane akaraganisa kumuha obugabe bwona obw’omu nsi kugira ngu amuramye. Yesu akamugarukamu ati: “Rugaho, Sitaane, ahabw’okuba kikahandiikwa ngu: Oramye [Yehova] Ruhanga waawe, obe niwe waaheereza wenka.” (Mat. 4:​8-10) Ahabw’enki Yesu yaacwiremu atyo? Yetegyereze zimwe aha nshonga.

4-5. Niki ekyareeteire Yesu kucwamu kuheereza Yehova?

⁴ Enshonga enkuru ahabw’enki Yesu yaacwiremu kuheereza Yehova ni rukundo. Naakunda munonga Ishe kandi naamuhamiraho. (Yoh. 14:31) Ekindi, Yesu naaheereza Yehova ahakuba nikyo ashemereire kukora. (Yoh. 8:​28, 29; Kush. 4:11) Naamanya ngu Yehova niwe bukomooko bw’amagara, n’orikwesigwa, kandi n’efura. (Zab. 33:4; 36:9; Yak. 1:17) Yehova akaba atwire naagambira Yesu amazima, kandi niwe yaamuhaire buri kimwe eki yaabaire aine. (Yoh. 1:14) Kwonka, Sitaane, akareetera abantu kufa. N’omunyabishuba, aine omururu, kandi naayeyendeza. (Yoh. 8:44) Okumanya amazima ago, kikahwera Yesu kwetantara kutooreza Sitaane owaagomeire Yehova.—Fil. 2:​5-8.

⁵ Enshonga endiijo ahabw’enki Yesu yaacwiremu kuheereza Yehova n’ahabw’okugira ngu akaba ainiire ekihika ebyabaire nibiija kuruga omu kuheereza kwe omu bwesigwa. (Heb. 12:2) Akaba naamanya ngu okuguma ari omwesigwa, nikiija kweza eiziina rya Ishe, kandi kiteho oburyo bw’okwihaho okubonabona kwona okwareetsirweho Omuregi.

ENSHONGA AHABW’ENKI YEHOVA NIWE TWINE KURAMYA

6-7. Ahabw’enki baingi obunaku obu batarikuheereza Yehova, kandi ahabw’enki niwe tushemereire kuramya?

⁶ Baingi obunaku obu tibarikuheereza Yehova ahabw’okugira tibarikumanya emitwarize ye erikushemeza n’ebi abakoreire. Okwo nikwo abantu ba Aseene abu entumwa Paulo yaabuuriire baabaire bari.—Byak. 17:​19, 20, 30, 34.

⁷ Paulo akashoboororera abaabaire bamuhurikiize ngu Ruhanga ow’amazima ‘naaha abantu boona amagara n’omwitsyo na buri kintu kyona.’ Akoongyeraho ati: “Omuriwe, tuba abahuriire, tugyenda kandi tugumaho.” Ruhanga “akahanga amahanga goona ag’abantu, naabakomoora aha muntu omwe,” n’ahabw’ekyo niwe tushemereire kuramya.—Byak. 17:​25, 26, 28.

8. Niki eki Yehova atarikubaasa kukora? Shoboorora

⁸ Ahabw’okugira ngu Yehova niwe Muhangi kandi Omutegyeki w’ebintu byona eby’omu iguru n’omu nsi, akaba naabaasa kugyema abantu kumuheereza. Kwonka, ekyo tarikubaasa kukikora. Kureka, naatuhwera kutunga obuhame ngu ariho kandi ngu naakunda munonga buri omwe ahariitwe. Naayenda ngu abantu baingi babe banywani be nk’oku kirikubaasika. (1 Tim. 2:​3, 4) Ekyo kubaasa kubaho, Yehova atutendekire kwegyesa abandi aha bigyendererwa bye n’ebirungi ebi arikwenda kukorera abantu. (Mat. 10:​11-13; 28:​19, 20) Ataireho ebibiina, kandi yaatoorana abareeberezi abarikutukunda kutureeberera.—Byak. 20:28.

9. Rukundo ya Yehova neereebekyera omuri ki?

⁹ Rukundo ya Yehova neereebekyera omu ku arikutwariza abatarikwikiriza ngu ariho. Teekateeka aha buhame obu: Kumara ebyasha bingi, abantu nyamwingi batwire nibeecweramu emitindo eyaabo erikukwata aha kihikire n’ekigwire. N’obu kiraabe kiri kityo, Yehova naabaha eby’okubabaisaho ebirikwetengyesa kugira ngu beesiimire amagara. (Mat. 5:​44, 45; Byak. 14:​16, 17) Naabaha okubaasa kw’okugira abanywani, kugira eka, n’okushemerererwa omu bi barikukora. (Zab. 127:3; Mub. 2:24) Eki nikituhamiza ngu Tataitwe ow’omu iguru naakunda abantu boona. (Kur. 34:6) Hati ka tweyijutsye zimwe aha nshonga ahabw’enki nitucwamu kuheereza Yehova, n’emigisha ei turikutunga.

ENSHONGA AHABW’ENKI NITUCWAMU KUHEEREZA YEHOVA

10. (a) Ni nshonga ki enkuru erikutureetera kuheereza Yehova? (Matayo 22:37) (b) Obaasize kugasirwa ota omu kugumisiriza kwa Yehova? (Zaaburi 103:​13, 14)

¹⁰ Nka Yesu, enshonga enkuru erikutureetera kuheereza Yehova ni rukundo mpango ei tumwiniire. (Shoma Matayo 22:37.) Twayega emitwarize ya Yehova nikitureetera kwenda kumwirira haihi. Nk’eky’okureeberaho, teekateeka aha ku Yehova arikutugumisiririza. Abaisraeli ku baamugomiire, akabeeshengyereza arikugira ati: “Nyabura ‘mwe, nimugarukye, buri muntu arugye omu muhanda gwe omubi.” (Yer. 18:11) Yehova naamanya ngu tituhikiriire, kandi turi omucuucu. (Shoma Zaaburi 103:​13, 14.) Waateekateeka munonga aha kugumisiriza kwe n’aha mitwarize ye endiijo, tikirikukuhiga kwenda kumuheereza ebiro byona?

11. Ni nshonga ki ezindi ezirikutureetera kucwamu kuheereza Yehova?

¹¹ Kandi nituheereza Yehova ahabw’okugira ngu nikyo twine kukora. (Mat. 4:10) Nitumanya ngu twaguma turi abeesigwa omu buheereza bwaitu nikirugamu ebirungi. Twaba abeesigwa omu buheereza bwaitu nikyeza eiziina rya Yehova, kihamya ngu Sitaane n’omubeihi, kandi kishemeza omutima gwa Tataitwe. Kandi twacwamu kuheereza Yehova obunaku obu, nitugira amatsiko g’okumuheereza ebiro byona!—Yoh. 17:3.

12-13. Nitwegyera ki ahari Jane na Pam?

¹² Twaba turi bato, nitubaasa kwega kugirira Yehova rukundo y’amaani, kandi ku turikugumizamu kukura, rukundo egyo neeyeyongyera kuhama. Yetegyereze banyaanyazi-itwe babiri enyinemwe Jane na Pam.a Jane akaba aine emyaka 11 kandi Pam aine 10 obu baatandika kwega Baibuli. N’obu abazaire baabo baabaire batarikwenda kwega, bakaha Jane na Pam orusa rw’okukwatanisa n’Abajurizi ba Yehova, kwonka bakaba baine kuguma nibaza omu kanisa n’eka yoona aha wiikenda. Jane naagira ati: “Ebi Abajurizi ba Yehova baanyegyeise kuruga omu Baibuli, bikampwera kwangira okugyemeserezibwa ab’orwingano rwangye kwejumba omu kukoresa emibazi y’ekitokooza bwongo, n’obushambani.”

¹³ Ku haarabireho emyaka mikye, abaishiki bombi bakaba ababuurizi. Bwanyima, bakaba baapayoniya obwo barikureeberera abazaire baabo. Jane ku arikuteekateeka aha by’enyima, naagira ati: “Nyereebiire oku Yehova arikureeberera banywani be omu bwesigwa, kandi nk’oku 2 Timoseo 2:19 harikugira, ‘Yehova naamanya abe.’” Hatariho kubangaanisa, Yehova naareeberera abarikucwamu kumukunda kandi bakamuheereza!

14. Ebigambo n’ebikorwa byaitu nibihwera bita omu kweza eiziina rya Yehova? (Reeba n’ebishushani.)

¹⁴ Nitwenda kuhwera omu kushemeza iziina rya Yehova. Teekateeka ahari eki: Ka tugire ngu oine omunywani ow’ahamara omunyambabazi, efura, kandi orikusaasira. Eizooba rimwe, ohurira omuntu arikumwomesereza ngu taine saasi kandi ngu ti w’amazima. Noobaasa kutwaza ota? N’omujuririra. Nikyo kimwe, Sitaane n’abarikumushagika nibateeraho kushiisha eiziina rya Yehova barikumugambaho ebishuba, kwonka itwe nitugamba amazima agarikukwata ahari Yehova, turikujuririra eiziina rye n’amaani gaitu goona. (Zab. 34:1; Isa. 43:10) Nitworeka ngu nitwenda kuheereza Yehova n’amaani gaitu goona omu bigambo n’omu bikorwa.

15. Entumwa Paulo akagasirwa ata ku yaakozire empinduka omu bigyendererwa bye? (Abafilipi 3:​7, 8)

¹⁵ Nituhindura ebigyendererwa byaitu twekundiire kugira ngu tubaase kuheereza Yehova omu muringo ogu arikusiima. Nk’eky’okureeberaho, entumwa Paulo akatsigaho omwanya mukuru omu kyanga kye kugira ngu abaase kukuratira Kristo, kandi aheereze Yehova. (Gal. 1:14) N’ekyarugiremu, akatunga ebirungi bingi n’omugisha gw’okutegyeka na Kristo omu iguru. Tarefuurize ahabw’okucwamu kuheereza Yehova, kandi naitwe tituraije kwefuuza.—Shoma Abafilipi 3:​7, 8.

16. Julia nitumwegyeraho ki? (Reeba n’ebishushani.)

¹⁶ Twata omutima aha kuheereza Yehova, naija kutushumbuusha hati n’omu biro by’omumaisho. Teekateeka aha byahikire ahari munyaanyazi-itwe orikwetwa Julia. Atakeegire amazima, akaba ari omweshongozi omu kanisa kuruga omu buto. Omweshongozi omwe omuhangu akareeba etalanta ei yaabaire aine yaatandika kumutendeka. Julia akarangaanwa, kandi yaatandika kweshongorera omu myanya erikumanywa munonga. Ku yaabaire ari omu ishomero ry’amaani eririkutendeka abeeshongozi, omwegi mugyenzi we akatandika kugamba nawe ebirikukwata ahari Ruhanga kandi yaamushoboororera ngu Ruhanga aine eiziina, Yehova. Bwanyima y’obwire bukye, Julia akatandika kwega Baibuli emirundi ebiri omu saabiiti. Reero, akacwamu kuta omutima aha kuheereza Yehova omu mwanya gw’okugumizamu naayeshongora. Kikaba kitoorobi kucwamu atyo. Naagira ati: “Abantu baingi bakangira ngu nkaba ninshiisha ekiconco kyangye, kwonka nyowe nkaba niinyenda kuheereza Yehova omu bwijwiire.” Mbwenu shi naayehurira ata hati ahabw’eki yaacwiremu emyaka erikurenga 30 enyima? Naagira ati: “Hati nyine obusingye bw’omu biteekateeko, kandi nyine obwesigye ngu Yehova naija kuhikiiriza ebyetengo byangye byona omu biro by’omumaisho.”—Zab. 145:16.

GUMIZAMU NOOHEEREZA YEHOVA

17. Okumanya ngu turi omu bwire bw’emperu nikikwata kita aha baacwiremu kuheereza Yehova n’abatakacwiremu?

¹⁷ Emperu y’obusingye obu eri haihi. Entumwa Paulo akahandiika ati: ‘Hatsigaire akaanya kakye, orikwija akaija, tariikarayo.’ (Heb. 10:37) Ekyo nikimanyisa ki? Nikyoreka ngu abantu basigaizeyo bwire bukye bw’okucwamu kuheereza Yehova. (1 Kor. 7:29) Kandi ku turaabe twacwiremu kuheereza Ruhanga, nitumanya ngu na twatunga oburemeezi, ‘n’obw’akaanya kakye.’

18. Yehova na Yesu nibenda ngu tukore ki?

¹⁸ Yesu tarahigire abeegi be kutandika kumukuratira kyonka, kureka kugumizamu barikumukuratira. (Mat. 16:24) N’ahabw’ekyo, ku turaabe tumazire emyaka turikuheereza Yehova, ka tumariirire kutahanika. Twine kukora n’amaani kubaasa kuhamira aha kucwamu kwaitu kw’okuheereza Yehova. Nikibaasa kuba kitoorobi, kwonka nitutunga emigisha mingi n’okumarwa!—Zab. 35:27.

19. Gene nitumwegyeraho ki?

¹⁹ Abamwe nibateekateeka ngu okuheereza Yehova nikitwariramu okwefeereza ekirenga. Ku oraabe ori muto, nooteekateeka ngu noija kugira eki waafeerwa waacwamu kuheereza Yehova? Ow’eishe-emwe omwe omuto orikwetwa Gene naagira ati: “Nkateekateeka ngu okuba omwe aha Bajurizi ba Yehova nikindemesa kukora ebi ndikwenda. Okaba nooshusha ngu abaana baingi abu naakuzire nabo bakaba baine okushemererwa ahabw’okuza omu magyenyi, kuriima, nari kuzaana vidiyo z’obushaarizi, kandi obwo nyowe nkaba nyine kumara obwire bwangye omu nteerane n’omu buheereza.” Gene akakwatwaho ata emiteekateekyere egyo? Naagira ati: “Nkatandika kutwaza nk’ekirumira habiri, kandi nkehurira nk’oshemereirwe kumara akaire. Kwonka okushemererwa okwo tikuramazire bwire buraingwa. Nkatandika kuteekateeka aha mazima ga Baibuli agu naabaire nyehugize kandi naacwamu kuheereza Yehova n’omutima gwangye gwona. Kuruga obwo, nooshusha ngu Yehova atwire naagarukamu okushaba kwangye kwona.”

20. Twine kumariirira kukora ki?

²⁰ Omuhandiiki wa Zaaburi akeeshongorera Yehova ati: “Aine [okushemererwa] ou otoorana, okamwiriza haihi, kuguma omu bikaari byawe.” (Zab. 65:4) Ka tumariirire nka Yoshua owaagizire ati: ‘Kwonka nyowe n’eka yangye nitwija kuguma nituheereza Yehova.’—Yos. 24:15.