EKICWEKA EKY’OKWEGA 15
EKYESHONGORO 30 Taata, Ruhanga Kandi Munywani Wangye
‘Okwirira Haihi Ruhanga’ n’eky’Oburungi Bwaitu!
“Kwonka ekirungi ahariinye n’okwirira haihi Ruhanga.”—ZAB. 73:28.
ENTIMA
Oku turikubaasa kwongyera kwirira haihi Yehova n’oku turikugasirwa twakikora.
1-2. (a) Nikyetengyesa ki okugira omukago guhami n’omuntu? (b) Nituza kugamba ahari ki omu kicweka eki?
OINE omunywani ow’ahamara? Okamunywana ota? Obundi okamara obwire bwingi nawe, waamanya oburemeezi bwe, kandi okeega ebi arikukunda n’ebi arikwanga. Okeetegyereza ngu aine emitwarize mirungi ei orikubaasa kutooreza. Ekyo kikakureetera kukunda munywani waawe ogwo.
2 Okugira omukago guhami n’omuntu nikyetengyesa obwire n’okuteeraho. Nikyo kimwe n’okugira omukago guhami na Yehova Ruhanga. Ekicweka eki nikiza kugamba aha ku turikubaasa kwirira haihi Ruhanga, n’oku turikugasirwa twakora ekyo. Ka tubanze tureebe ahabw’enki ni kirungi kwirira haihi Yehova, Munywani waitu orikukirayo.
3. Ahabw’enki twine kuteekateeka aha birungi ebirikuruga omu kwirira haihi Yehova? Ha eky’okureeberaho.
3 Hatariho kubangaanisa noikiriza ngu ni kirungi kwirira haihi Yehova. Okuteekateeka aha ku kiri kirungi munonga nikibaasa kukuhiga kugumizamu noomwirira haihi. (Zab. 63:6-8) Nk’eky’okureeberaho, nitumanya ngu okurya eby’okurya by’ekiriisa, okukora ebisasayizi, okuhuumura ekirikumara, n’okunywa amaizi garikumara byona ni birungi ahariitwe. Kwonka, baingi tibarikubitaho omutima, kandi tibarikufayo aha magara gaabo. Kwonka, twateekateeka aha ku birikugasira amagara gaitu, nikituhiga kugumizamu nitubikora. Nikyo kimwe, nitubaasa kuba nitumanya ngu okwirira haihi Yehova n’eky’oburungi bwaitu, kwonka twateekateeka aha ku turikugasirwa twakora ekyo nikiija kutuhiga kugumizamu nitumwirira haihi.—Zab. 119:27-30.
4. Nk’oku kirikworekwa omuri Zaaburi 73:28, omuhandiiki wa zaaburi akooreka nyehurira ki?
4 Shoma Zaaburi 73:28. Omuhandiiki wa Zaaburi 73 akaba ari Omuleevi owaabaire atoorainwe kweshongora aha hekalu ya Yehova. Naabaasa kuba yaaheereize Yehova omu bwesigwa kumara obwire buraingwa. Kwonka nabwo akaba aine kweijutsya, n’okwijutsya abandi ngu ‘okwirira haihi Ruhanga’ n’eky’oburungi ahariwe n’ahari bo. Ni birungi ki ebiri omu kukora ekyo?
‘OKWIRIRA HAIHI RUHANGA’ NIKIREETA OKUSHEMERERWA
5. (a) Ahabw’enki okwirira haihi Yehova nikireeta okushemererwa? (b) Kurugiirira aha Enfumu 2:6-16, ha eby’okureeberaho ebirikworeka oku obwengye bwa Yehova burikubaasa kukugasira n’okukurinda.
5 Oku turikwongyera kwirira haihi Yehova, nikwo turikwongyera kushemererwa. (Zab. 65:4) Hariho enshonga nyingi ahabw’enki ekyo nikibaho. Nk’eky’okureeberaho, nitugasirwa twagyendera aha buhabuzi oburi omu Kigambo kya Ruhanga Baibuli. Obuhabuzi obwo nibutuhwera kwetantara abanywani babi, n’okukora enshobe z’amaani. (Shoma Enfumu 2:6-16.) N’ahabw’ekyo Baibuli neegira eti: “Ohiiriirwe n’omuntu ozoora obwengye, kandi n’omuntu otunga okwetegyereza.”—Enf. 3:13.
6. Niki ekyareeteire Omuhandiiki wa zaaburi kuburwa okushemererwa?
6 Amazima gari ngu, na banywani ba Yehova nibahikwaho obusaasi. Omuhandiiki wa Zaaburi 73 ku yaataire omutima aha biteekateeko bibi akaburwa okushemererwa. Akaguubwa kubi, kandi yaagira eihari ahabw’okuba akateekateeka ngu abantu babi, abatarikufayo ahari Ruhanga n’emitindo ye bakaba bari gye. Akaba agwire kuteekateeka ngu abantu enshaarizi n’abanyamaryo butoosha bakaba bari abagaiga, baine amagara marungi, kandi batarikuhikwaho okubonabona. (Zab. 73:3-7, 12) Omuhandiiki wa zaaburi ogwo akahika n’aha kuteekateeka ngu okuteeraho kwe kuheereza Yehova n’okwa busha. Ahabw’amaganya maingi akagira ati: “Nkeeruhiza busha kushemeza omutima gwangye, n’okunaabisa engaro zangye omu kutashiisha.”—Zab. 73:13.
7. Nitubaasa kusingura tuta amaganya agarikubaasa kushiisha okushemererwa kwaitu? (Reeba n’ekishushani.)
7 Omuhandiiki wa zaaburi taraikiriize amaganya agu yaabaire aine kumumaramu amaani. Kureka akagira eki yaakora. Akaza “omu Mwanya gwa Ruhanga ogurikwera,” ahu Yehova yaahinduriire emiteekateekyere ye. (Zab. 73:17-19) Twaba twine amaganya, Yehova munywani waitu orikukirayo, naakimanya. Twamushaba kutuhwera, kandi tukaikiriza obuhwezi obu arikutuha kurabira omu Kigambo kye n’ekibiina, nitutunga amaani g’okwemera amaganya. N’obu twakugira okwerarikirira kwingi, Yehova naatuhuumuriza.—Zab. 94:19.a
Omuleevi owaahandiikire Zaaburi 73, ayemereire omu “Mwanya gwa Ruhanga ogurikwera” (Reeba akacweka 7)
‘OKWIRIRA HAIHI RUHANGA’ NIKITUREETERA KUGIRA EKIGYENDERERWA N’AMATSIKO
8. Ni mu miringo ki endiijo mikuru oku okwirira haihi Yehova kiri eky’oburungi bwaitu?
8 Okwirira haihi Ruhanga n’eky’oburungi bwaitu omu miringo ebiri mikuru. Ogw’okubanza, nikituhwera kugira ekigyendererwa. Ogwa kabiri, nikitureetera kugira amatsiko gahami aga nyentsya. (Yer. 29:11) Ka tushwijume enshonga ezo.
9. Okwirira haihi Yehova nikituhwera kita kugira ekigyendererwa?
9 Okwirira haihi Yehova nikituhwera kugira ekigyendererwa. Obwire obu, baingi abatarikwikiriza ngu Ruhanga ariho nibateekateeka ngu amagara tigaine kigyendererwa, kandi ngu eizooba rimwe abantu nibaija kuhwaho. Kwonka, ahabw’okweyegyesa Ekigambo kya Ruhanga, nituhamiza kimwe ngu ‘naaha ebihembo abarikumusherura.’ (Heb. 11:6) Na hati, nitugira okushemererwa ahabw’okugira ngu nitukora eki tushemereire kukora, nikwo kuheereza Tataitwe ow’omu iguru Yehova.—Bir. 10:12, 13.
10. Zaaburi 37:29 neegamba ki ahari nyentsya y‘abaine amatsiko omuri Yehova?
10 Abantu abaingi tibarikuteekateeka ahari Ruhanga, n’ahabw’ekyo amatsiko gaabo bagataire aha kukora, okugira eka, n’okubiika esente ezi baraakorese baahuumura aha murimo. Kwonka abaheereza ba Yehova bamwinemu amatsiko. (Zab. 25:3-5; 1 Tim. 6:17) Nitwesiga Ruhanga, kandi twine obwesigye omu bi arikuraganisa. Twine ekihika ky’okugumizamu nitumuramya ebiro byona omuri Paradiso.—Shoma Zaaburi 37:29.
11. Okwirira haihi Yehova nikitukwataho kita, kandi we nikimukwataho kita?
11 Okwirira haihi Ruhanga n’eky’oburungi bwaitu omu miringo mingi endiijo. Nk’eky’okureeberaho, Yehova naaraganisa kusaasira ebibi by’abarikweteisa bakamwirira haihi. (Isa. 1:18) N’ekirikurugamu, titurikweshinja ahabw’ebibi eby’enyima. (Zab. 32:1-5) Kandi twine n’omugisha gw’okureetera Yehova kushemererwa. (Enf. 23:15) Noobaasa kuteekateeka n’aha migisha endiijo erikuruga omu kugira omukago murungi na Ruhanga. Kwonka shi noobaasa kugumizamu ota noirira haihi Ruhanga?
OKU TURIKUBAASA KUGUMIZAMU ‘NITWIRIRA HAIHI RUHANGA’
12. Okozire ki kubaasa kwirira haihi Yehova?
12 Waaba ori Omukristaayo obatiziibwe, noobaasa kuba okozire kihango kwirira haihi Yehova. Oyegire amazima maingi agarikukwata ahari Yehova Ruhanga na Kristo Yesu, oyeteisize ebibi byawe eby’enyima, waagira okwikiriza kuhami omuri Ruhanga, kandi otaireho kukora ebirikuhikaana n’ebi arikukunda. Kwonka kubaasa kwirira haihi Ruhanga, twine kugumizamu nitukora ebintu ebyo.—Kol. 2:6.
13. Ni bintu ki bishatu ebirikubaasa kutuhwera kugumizamu nitwirira haihi Yehova?
13 Niki ekirikubaasa kutuhwera kugumizamu nitwirira haihi Yehova? (1) Twine kugumizamu nitushoma, kandi nitweyegyesa Baibuli. Twaba nitweyegyesa, ekigyendererwa kyaitu tikiine kugarukira aha kumanya ebirikukwata ahari Ruhanga eby’okubandizaho. N’ahabw’ekyo, twine kuteeraho kumanya ebi Ruhanga arikwenda ngu tukore, n’okwikiriza kwebemberwa emisingye eri omu Kigambo kye. (Efe. 5:15-17) (2) Twine kuhamya okwikiriza kwaitu turikuteekateeka ahari rukundo nyingi ei Yehova atwiniire. (3) Twine kugumizamu nitwanga ebintu ebirikugwisa kubi Yehova, kandi tukeetantara kunywana abarikukora ebintu nk’ebyo.—Zab. 1:1; 101:3.
14. Okuhikaana n’ebiri omu 1 Abakorinso 10:31, ni bintu ki ebimwe ebi turikubaasa kukora kushemeza Yehova? (Reeba n’ebishushani.)
14 Shoma 1 Abakorinso 10:31. Ni kikuru kugumizamu nituta omutima aha kukora ebirikushemeza Yehova. Twine kukora ekirikukira aha kubuurira n’okuza omu nteerane z’ekibiina. Ebikorwa ebirungi ebirikushemeza Yehova nibitwariramu ebi turikukora buri izooba. Nk’eky’okureeberaho, twaba ab’amazima omu bintu byona, kandi tukaha abandi aha bi twine, nitushemeza Yehova. (2 Kor. 8:21; 9:7) Naayenda ngu tworekye ngu nitusiima ekiconco ky’amagara. N’ahabw’ekyo twaringaaniza emiriire n’eminywere yaitu, kandi tukareeberera amagara gaitu nk’oku kirikubaasika, nitwirira haihi owaagatuhaire. Buri murundi ogu turikuteeraho kushemeza Yehova, n’omu nshonga enkye, nitwirira haihi nawe.—Luk. 16:10.
Emwe aha miringo oku turikushemeza Yehova neetwariramu okuvuga n’obwegyendesereza, okwereeberera turikukora ebisasayizi, tukarya eby’okurya by’ekiriisa, kandi tukaba efura (Reeba akacweka 14)
15. Yehova naayenda ngu tutwarize tuta abandi?
15 Yehova n’omunyambabazi aha bahikiriire n’abatahikiriire. (Mat. 5:45) Kandi naayenda ngu naitwe tugirire abandi embabazi. Nk’eky’okureeberaho, titwine ‘kugira ou twagambaho kubi, kutongana, kureka . . . nitworeka obucureezi bwingi aha bantu boona.’ (Tit. 3:2) Ahabw’enshonga ezo, titurikugaya abandi ahabw’okugira ngu tibaine nyikiriza nk’ezaitu. (2 Tim. 2:23-25) Nitwirira haihi Yehova butoosha turikuba abanyambabazi, kandi tukafayo aha bantu boona.
NITUBAASA KWIRIRA “HAIHI RUHANGA” N’OBU TWAKUTEERA ENTSIBO
16. Omuhandiiki wa Zaaburi 73 akatandika kwehurira ata bwanyima y’obwire?
16 Kwonka shi bwanyima y’obwire ku waakutandika kwehurira ngu rukundo ya Yehova tekushemereire? Nk’oku twareeba, ekintu nk’ekyo kikaba aha muhandiiki wa Zaaburi 73. Akagira ati: “Ebigyere byangye bikaba byatereire, nkaba ndi haihi kugwa.” (Zab. 73:2) Akaikiriza ngu ‘akaguubwa kubi,’ kandi yaaba “omushema” “nk’enyamaishwa” omu maisho ga Yehova. (Zab. 73:21, 22) Mbwenu shi akateekateeka ngu ahabw’enshobe ye akaba atakikundwa Yehova?
17. (a) Obu omuhandiiki wa zaaburi yaabaire ahwairemu amaani, akakora ki? (b) Ekyo nitukyegyeraho eishomo ki? (Reeba n’ebishushani.)
17 Omuhandiiki wa zaaburi ku araabe yaayehuriire nk’otakikundwa Yehova, enyehurira egyo neebaasa kuba yaabaire eri ey’akaanya kakye. Nikireebeka ngu omu bwire obwo akeetegyereza obukuru bw’okwirira haihi Ruhanga, nk’oku kirikworekwa omu bigambo bye ebi: “Kwonka nyowe ndi hamwe naiwe obutoosha, okwaitse omukono gwangye gwa buryo. Oryampabura n’obwengye bwawe, kandi aha muheru oryantaatsya omu kitiinisa.” (Zab. 73:23, 24) Naitwe twine kushaba Yehova kutuhwera twahurira tuhwiremu amaani. (Zab. 73:26; 94:18) N’obu ebigyere byaitu byakuterera, nitubaasa kugarukira Yehova twine obwesigye ngu ayeteekateekire ‘kutusaasira.’ (Zab. 86:5) Okukira munonga twaba tuhwairemu amaani, twine kwirira haihi Ruhanga.—Zab. 103:13, 14.
Twahurira tutaine maani omu by’omwoyo, twine kwirira haihi Yehova turikugira bingi by’okukora omu kumuramya (Reeba akacweka 17)
OKUGUMA ‘NITWIRIRA HAIHI RUHANGA’ EBIRO BYONA
18. Ahabw’enki hatariho bugarukiro omu kwirira haihi Yehova?
18 Tihariho bugarukiro aha kwirira haihi Yehova, n’okwongyera kumumanya. Baibuli neegira ngu emihanda ya Yehova, obwengye bwe, n’okumanya kwe “tibirikubaasa kumanywa.”—Rom. 11:33.
19. Ebiri omuri Zaaburi nibituhamiza ki?
19 Zaaburi 79:13 neegira eti: “Naitwe abantu baawe, entaama z’omu iriisizo ryawe, turyakusiima ebiro byona, tumanyise ab’obusingye bwona okuhimbisibwa kwawe.” Waaguma noirira haihi Ruhanga noobaasa kugira obwesigye bw’okutunga emigisha y’ebiro n’ebiro. Kandi ogire oti: “Ruhanga niwe rukiri oru omutima gwangye guhungiraho, kandi niwe mugabo gwangye ebiro n’ebiro.”—Zab. 73:26.
EKYESHONGORO 32 Guma Ohamiire Ahari Yehova!
a Bamwe abarikumara obwire buraingwa barikuteganisibwa amaganya, okwerarikirira, nari okwehurira kubi nibabaasa kwetenga obuhwezi bw’abashaho abakugu. Kumanya ebirikukiraho, reeba Omunaara gw’Omurinzi, Na. 1 2023.