EKICWEKA EKY’OKWEGA 47
EKYESHONGORO 38 Naija Kukugumya
‘Ori ow’Omuhendo Munonga’
‘Ori ow’omuhendo munonga.’—DAN. 9:23.
ENTIMA
Okuhamiza abarikwereeba nk’abataine mugasho ngu n’ab’omuhendo ahari Yehova.
1-2. Niki ekirikubaasa kukuhwera kugira obwesigye ngu ori ow’omuhendo ahari Yehova?
BAMWE aha baheereza ba Yehova b’omuhendo, nibeereeba nk’abataine mugasho. Obundi nihabaasa kuba haine obareetaire kwehurira batyo. Haine obu ekyo kiraakubaireho? Ku kiraabe nikwo kiri, niki ekirikubaasa kukuhwera kugira obwesigye ngu ori ow’omuhendo ahari Yehova?
2 Noobaasa kusingura enyehurira ezo waateekateeka aha ku Yehova yaahweraire abantu abarikugambwaho omu Baibuli abaabaire nibeehurira batyo. Yesu omwana we akaba naatwariza abantu omu muringo gw’ekitiinisa, kandi ogw’embabazi. Omu kukora atyo, akooreka ngu we na ishe nibatwara abantu abacureezi nk’ab’omuhendo n’obu bakuba nibeereeba nk’ab’ahansi. (Yoh. 5:19; Heb. 1:3) Omu kicweka eki nituza kwetegyereza: (1) oku Yesu yaahweraire abantu kwetegyereza oku bari ab’omuhendo, kandi (2) n’oku turikubaasa kuhamiza kimwe ngu buzima turi ab’omuhendo omu maisho ga Ruhanga.—Hag. 2:7.
OKU YESU YAAHWERAIRE ABANTU KUMANYA NGU N’AB’OMUHENDO
3. Yesu akatwariza ata Abagalilaaya abaabaire nibenda obuhwezi?
3 Obu Yesu yaabuurira omuri Galilaaya omurundi gwa kashatu, abantu nyamwingi kuruga omu myanya etari emwe bakaija ahari kumuhurikiza n’okutambirwa endwara zaabo. Yesu akagira ngu “bakaba baburaburiirwe, bashobeirwe nk’entaama ezitaine muriisa.”(Mat. 9:36) Abeebembezi b’ediini bakaba nibatwara abantu abo nk’abataine mugasho, obumwe bahika n’aha kubeeta ‘abakyeenirwe.’ (Yoh. 7:47-49) Kwonka Yesu akabatwara nk’ab’omuhendo, arikubeegyesa, n’okubakiza endwara zaabo. (Mat. 9:35) Ekindi, kubaasa kuhwera abantu baingi, akatendeka entumwa ze kwejumba omu murimo gw’okubuurira, kandi yaabaha n’amaani g’okukiza endwara n’obumuga.—Mat. 10:5-8.
4. Nitubaasa kwegyera ki aha ku Yesu yaatwariize abantu abacureezi abaabaire nibamuhurikiza?
4 Yesu akooreka oku we na Yehova barikutwara abantu abarikureebwa nk’ab’ahansi, arikubatwariza omu muringo gw’ekitiinisa kandi akabafaho. Ku oraabe nooheereza Yehova kwonka orikubangaanisa yaaba ori ow’omuhendo, teekateeka aha ku Yesu yaabaire naafayo aha bantu abacureezi abaabaire nibenda kumwegyeraho. Okukora ekyo nikibaasa kukuhwera kureeba oku ori ow’omuhendo omu maisho ga Yehova.
5. Shoboorora embeera ei omukazi ou Yesu yaabugaine omuri Galilaaya yaabaire arimu.
5 Oyihireho okwegyesa abantu nka guruupu, Yesu akaba naafayo ahari buri muntu. Nk’eky’okureeberaho, obu yaabaire naabuurira omuri Galilaaya, akabugana omukazi owaabaire arwaire ekyejweiso kumara emyaka 12. (Mak. 5:25) Ahabw’embeera ye, akaba atashemeire, kandi weena owaabaire amukwataho akaba ahinduka otashemeire. Ekyo kiine kuba kyabaire nikimureetera kweshoroora aha bantu. N’ekindi akaba atarikubaasa kuba omu rweteeraine kuramya n’abandi nari okukuza amagyenyi omuri Israeli. (Lev. 15:19, 25) Hatariho okubangaanisa, omukazi ogwo akaba naabonabona omu mubiri n’omu nyehurira.—Mak. 5:26.
6. Omukazi owaabaire arwaire ekyejweiso akakizibwa mu muringo ki?
6 Omukazi ogwo owaabaire aine obusaasi akaba naayenda ngu Yesu amukize. Kwonka taramubuurize butunu ngu amutambire. Ahabw’enki? Obundi akaba naashwara ahabw’embeera ye, nari akaba naatiina ngu Yesu naija kwanga kumukiza, ahabw’okugira ngu akaija omu rweteeraine atashemeire. N’ahabw’ekyo akacwamu kukwata aha kijwaro kye aine obwesigye ngu ekyo kyonka kikaba nikiza kumuhwera kukira. (Mak. 5:27, 28) Kandi okwikiriza kwe kukamubaasisa kukira. Ahonaaho Yesu akabuuza yaaba haine owamukwataho. N’ahabw’ekyo omukazi ogwo akamugambira eki yaakora. Mbwenu shi Yesu akamutwariza ata?
7. Yesu akatwariza ata omukazi owaabaire aine obusaasi? (Mako 5:34)
7 Yesu akatwariza omukazi ogwo omu muringo gw’embabazi, kandi ogw’ekitiinisa. Akeetegyereza ngu omukazi ogwo akaba ‘aine obwoba [kandi] arikutetema.’ (Mak. 5:33) Akafayo aha nyehurira ze, kandi yaakoresa ebigambo by’embabazi. Nangwa, Yesu akamugira ati:“Mwana wangye,” ebigambo ebirikworeka esaasi, rukundo, n’okutwara omuntu nk’ow’omuhendo. (Shoma Mako 5:34.) Ogu nigwo murundi gwonka omu Baibuli ahu Yesu yaayetsire omukazi “mwana wangye.” Naabaasa kuba yaakoreise ebigambo ebyo omu mbeera egyo ahabw’okureeba ngu omukazi ogwo akaba atiinire munonga. Omukazi ogwo ka aine kuba yaagizire oburuhuuko! Ku ogire ngu Yesu taragambire nawe omu muringo gw’embabazi, akaba naija kugyenda akizire, kwonka arikwehurira kubi aha mutima. Yesu akahwera omukazi ogwo kumanya ngu Yehova naamukunda, kandi ngu naamutwara nk’ow’omuhendo.
8. Ni buremeezi ki obu munyaanyazi-itwe kuruga Brazil yaabaire aine kwemera?
8 N’obunaku obu, bamwe aha baheereza ba Ruhanga baine amagara mabi, agarikubareetera kwehurira kubi. Maria,a payoniya ow’obutwire kuruga omuri Brazil, akazaarwa ataine maguru n’omukono ogwa bumosho. Naashoboorora ati: “Nkaba ninkira kurahurwa ah’eishomero ahabw’embeera yangye. Bakaba baankubya amaziina agaabaire gandeetera kwehurira kubi. Nangwa n’ab’omuka bakaba nibanshoroora.”
9. Maria akahwerwa ata kwereeba ngu n’ow’omuhendo ahari Yehova?
9 Maria akatunga buhwezi ki? Ku yaahindukire omwe aha Bajurizi ba Yehova, Abakristaayo bagyenzi be bakamuhwera kwereeba nk’oku Yehova arikumureeba. Naagira ati: “Naayenda kuhandiika eiziina rya buri omwe obaasize kumpwera, akatabo kangye nikabaasa kwijura! Ninsiima Yehova kuruga aha mutima ahabw’okumpa eka nungi ey’Abakristaayo bagyenzi bangye.” Hatariho okubangaanisa ab’eishe-emwe na banyaanyazi-itwe bakahwera Maria kwetegyereza ngu n’ow’omuhendo omu maisho ga Yehova.
10. Mariamu Magadaleene akaba naateganisibwa buremeezi ki? (Reeba n’ebishushani.)
10 Mariamu Magadaleene n’omuntu ondiijo ou Yesu yaahweraire. Akaba ariho baadaimoni mushanju! (Luk. 8:2) Baadaimoni nibabaasa kuba baamureeteire kutwaza omu muringo gutari gwa butoosha, n’ekyarugiremu, abantu bakaba nibamwetantara. Obu yaabaire ari omu mbeera egyo naabaasa kuba yaabaire naayereeba nk’otarikukundwa, otaine buhwezi n’oburinzi. Kwonka Yesu akamubingaho baadaimoni abo abaabaire nibamubonabonesa, kandi yaahinduka omwegi we omwesigwa. Ni mu muringo ki ogundi ogu Yesu yaahwerairemu omukazi ogwo kwetegyereza ngu n’ow’omuhendo ahari Ruhanga?
Yesu akahamiza ata Mariamu Magadaleene ngu akaba ari ow’omuhendo ahari Yehova? (Reeba akacweka 10-11)
11. Yesu akahamiza ata Mariamu Magadaleene ngu n’ow’omuhendo ahari Ruhanga? (Reeba n’ebishushani)
11 Yesu akeeta Mariamu Magadaleene kugyenda nawe omu myanya ei yaabaire naaza kubuuriramu.b N’ekyarugiremu, akagumizamu naagasirwa omu bi Yesu yaayegyeise abantu. Kandi Yesu akamweyoreka aha izooba eri yaazookiireho. Akaba ari omwe aha beegi abu yaabandize kugamba nabo aha izooba eryo. Kandi akamuha obujunaanizibwa bw’okumanyisa entumwa ze ngu azookire. Buzima ebyo bikamureetera kwereeba nk’ow’omuhendo ahari Yehova.—Yoh. 20:11-18.
12. Shoboorora ahabw’enki embeera ei Lidia yaakuriiremu yaamureetaire kwehurira nk’otaine mugasho.
12 Baingi obunaku obu bari nka Mariamu Magadaleene ahabw’okwehurira nk’abataine mugasho. Lidia, munyaanyazi-itwe kuruga Spain, naagira ngu obu yaabaire atakazairwe, nyina akaba naayenda kwihamu enda ye. Nangwa naijuka n’oku nyina yaabaire atarikumufaho kandi arikumujuma obu yaabaire akiri muto. Naayongyeraho ati: “Butoosha nkaba niinyenda kuhurira ngu ninsiimwa, kandi ngu ninkundwa. Okaba nooshusha ngu tindikubaasa kukundwa, ahakuba maawe akaba akozire kyona ekirikubaasika kundeetera kwehurira nk’omuntu mubi.”
13. Niki ekyahweraire Lidia kwereeba nk’ow’omuhendo ahari Yehova?
13 Lidia ku yaayegire amazima, akagasirwa omu okushaba n’okweyegyesa Baibuli. Kandi ebigambo by’embabazi n’ebikorwa by’Abakristaayo bagyenzi be bikamuhwera kwetegyereza oku ari ow’omuhendo ahari Yehova. Naagira ati: “Ibanyi butoosha naangambira oku arikunkunda. Butoosha naanyijutsya emitwarize mirungi ei nyine, kandi na banywani bangye abandi bakozire nikyo kimwe.” Mbwenu shi noobaasa kuteekateeka aha muntu orikwetenga obuhwezi okwetegyereza ngu n’ow’omuhendo ahari Yehova?
OKU TURIKUBAASA KWEREEBA NK’OKU YEHOVA ARIKUTUREEBA
14. 1 Samueli 16:7 nihatuhwera hata kwereeba nk’oku Yehova arikutureeba? (Reeba n’akabokusi “Ahabw’enki Yehova Naatwara Abantu be nk’ab’Omuhendo?”)
14 Ijuka ngu Yehova tarikukureeba nk’oku abantu barikukureeba. (Shoma 1 Samueli 16:7.) Tarikureeba omuhendo gwaitu arikwihirira aha ndeebeka yaitu, obwegyese bwaitu, nari okurangaanwa kwaitu. (Isa. 55:8, 9) N’ahabw’ekyo teeraho kwereeba nk’oku arikukureeba beitu kutari oku abantu barikukureeba. Noobaasa kushoma aha barikugambwaho omu Baibuli abaabaire nibeereeba nk’abataine mugasho nka Eliya, Naomi, na Hanna. Noobaasa n’okuhandiika ebi orabiremu ebirikukuhamiza ngu Yehova naakukunda, kandi naakutwara nk’ow’omuhendo. Ekindi, noobaasa kweijutsya ebirikukwata aha kwereeba nk’otaine mugasho ebiri omu bitabo by’ekibiina.c
15. Ahabw’enki Yehova yaabaire naareeba Danieli ‘nk’orikukundwa munonga’ nari ow’omuhendo? (Danieli 9:23)
15 Ijuka ngu waaguma ori omwesigwa nooba ori ow’omuhendo ahari Yehova. Obu nabi Danieli yaabaire ari myaka ya 90 akeehurira nk’oruhire munonga, kandi ohwairemu amaani. (Dan. 9:20, 21) Yehova akamugumya ata? Akoohereza maraika Gaburieli kumwijutsya ngu n’omuntu “orikukundwa munonga” kandi ngu Ruhanga akaba ahuriire okushaba kwe. (Shoma Danieli 9:23.) Ahabw’enki Ruhanga yaabaire naatwara Danieli nk’ow’omuhendo? Akaba naakunda eby’okuhikiirira kandi ari omwesigwa. (Ezk. 14:14) Yehova akahandiikisa omu Baibuli ebirikukwata aha mushaija ogwo kubaasa kutugumya. (Rom. 15:4) Niiwe Yehova naakutwara nk’ow’omuhendo, kandi naahurikiza okushaba kwawe, ahabw’okugira ngu nookunda ebihikire, kandi noomuheereza omu bwesigwa.—Mik. 6:8; Heb. 6:10.
16. Niki ekirikubaasa kukuhwera kureeba Yehova nka Sho orikukunda?
16 Reeba Yehova nka Sho orikukunda. Naayenda kukuhwera beitu kutari kukureebamu enshobe. (Zab. 130:3; Mat. 7:11; Luk. 12:6, 7) Okuteekateeka ahari ekyo kihweraire baingi kwereeba nk’ab’omuhendo. Nk’eky’okureeberaho munyaanyazi-itwe Michelle, akaba naayehurira nk’otarikukundwa kandi nk’otaine mugasho ahabw’okugira ngu iba akaba naamujuma kumara emyaka mingi. Naagira ati: “Buri murundi ogu ndikwehurira nk’otaine mugasho, niinteera akashushani Yehova ankikiire omu mikono ye. Ekyo nikindeetera kwehurira nk’orikukundwa, kandi oine oburinzi.” (Zab. 28:9) Munyaanyazi-itwe Lauren kuruga South Africa, naayeijutsya ati: “Yehova ku araabe yaanyiriize haihi, akaguma naanye kumara emyaka egi yoona kandi arikunkoresa kwegyesa abandi, hatariho kubangaanisa naantwara nk’ow’omuhendo kandi ow’omugasho.”—Hos. 11:4.
17. Niki ekirikubaasa kukuhwera kuhamya ngu Yehova naakusiima? (Zaaburi 5:12) (Reeba n’ekishushani)
17 Gira obwesigye ngu noosiimwa Yehova. (Shoma Zaaburi 5:12.) Daudi akagyeragyeranisa okusiimwa Yehova “nk’engabo” mpango erikurinda abantu abahikiriire. Okumanya ngu Yehova naakusiima kandi ngu oine obushagiki bwe nikibaasa kukuhwera kweihamu okubangaanisa yaaba ori ow’omuhendo. Mbwenu shi noobaasa kumanya ota yaaba Yehova naakusiima? Nk’oku twaba twareebire, Yehova naakuhamiza arikukoresa ekigambo kye Baibuli. Kandi t’ekyo kyonka, naakoresa abareeberezi, abanywani ab’ahamara, hamwe n’abandi kukwijutsya ngu ori ow’omuhendo omu maisho ge. Nooyehurira ota abandi baakugambira ebigambo ebirikukugumya?
Okumanya ngu Yehova naatusiima nikibaasa kutuhwera kwereeba nk’ab’omuhendo (Reeba akacweka 17)
18. Ahabw’enki oine kwikiriza abandi baakusiima?
18 Abantu abarikukukunda kandi abarikukumanya gye, baakugambira ebigambo by’okukusiima otateekateeka ngu bagwire. Guma noijuka ngu Yehova naabaasa kuba ariyo naabakoresa kukuhwera kwetegyereza ngu naakusiima. Michelle, owaaba yaagambirweho naagira: “Ndiyo niinyega kwikiriza aha mutima ebigambo by’embabazi ebi abandi barikungambira. Tikyorobi ahariinye, kwonka niimanya ngu ekyo nikyo Yehova arikwenda ngu nkore.” Kandi Michelle agasiirwe omu buhwezi bw’abareeberezi. Hati naaheereza nka payoniya, kandi naakora emirimo ya Beseeli ari omuka.
19. Ahabw’enki turikubaasa kugira obwesigye ngu turi ab’omuhendo omu maisho ga Ruhanga?
19 Yesu naatwijutsya omu muringo gw’embabazi ngu turi ab’omuhendo ahari Tataitwe ow’omu iguru. (Luk. 12:24) N’ahabw’ekyo nitubaasa kugira obwesigye ngu Yehova naatutwara nk’ab’omuhendo. Buzima twine kuguma nitwijuka ekyo! Kandi ka tukore kyona ekirikubaasika kuhwera abandi kwereeba nk’ab’omuhendo omu maisho ga Ruhanga!
EKYESHONGORO 139 Yereebe omu Nsi Ensya
a Amaziina agamwe gahindwirwe.
b Mariamu Magadaleene akaba ari omwe aha bakazi abaabaire bagyenda na Yesu. Abakazi abo bakaba bakoresa ebintu byabo, kubaasa kureeberera Yesu n’entumwa ze.—Mat. 27:55, 56; Luk. 8:1-3.