Ekitabo kya Yobu Nikibaasa Kukuhwera Waahikwaho Oburemeezi

1-2. Ahabw’enki ni kikuru ahariitwe kushoma ekitabo kya Yobu?

WAASHOMIRE ekitabo kya Yobu? N’obu kiraabe kyahandiikirwe nk’emyaka 3,500 enyima, baingi nibakireeba nka kimwe aha bitabo ebirikukirayo oburungi. Nibahimbisa owaakihandiikire ahabw’okugira ngu akakoresa ebigambo by’amaani, birungi, kandi ebyorobi kwetegyereza. N’obu Musa araabe niwe yaahandiikire ekitabo ky’omutaano ekyo, Yehova niwe yaakihandiikiise.—2 Tim. 3:16.

² Ekitabo kya Yobu ni kikuru munonga omu Baibuli. Ahabw’enki? Ahakuba nikisheeshuura enshonga enkuru, ey’okweza eiziina rya Yehova erikukwata aha bihangirwe byona ebiine obwengye. Nikitwegyesa aha mitwarize ya Yehova ey’omuhendo nka rukundo, obwengye, oburingaaniza n’amaani. Nk’eky’okureeberaho, ekitabo kya Yobu nikigamba ahari Yehova ‘nk’Ow’obushoboorozi Bwona’ emirundi 31 kukira ebyahandiikirwe ebindi byona obigaitsire hamwe. Kandi nikigarukamu ebibuuzo bingi ebi abantu barikukira kwebuuza, otwariiremu n’ekirikukira kuteganisa abantu baingi obunaku obu: Ahabw’enki Ruhanga naikiriza okubonabona kukabaho?

3. Nitugasirwa tuta twayega ekitabo kya Yobu?

³ Nk’oku turikubaasa kureeba gye ebitwehinguririize twaza aha mutwe gw’orushozi, ekitabo kya Yobu nikituhwera kureeba oburemeezi obu turikurabamu nk’oku Yehova arikubureeba. Ka tureebe oku ekitabo kya Yobu kirikubaasa kutuhwera twahikwaho okubonabona. Nituza kureeba oku ebyahikire ahari Yobu byabaire nibibaasa kugasira Abaisraeli n’oku birikubaasa kutugasira obunaku obu. Nituza n’okureeba oku turikubaasa kukoresa ekitabo kya Yobu kuhwera abandi.

RUHANGA OKWIKIRIZA YOBU KUBONABONESIBWA

4. Ni ntaaniso ki ey’amaani eyaabaire eriho ahagati ya Yobu n’Abaisraeli abaabaire nibatuura omuri Misri?

⁴ Obu Abaisraeli baabaire nibabonabonesibwa omuri Misri nk’abahuuku, omushaija orikwetwa Yobu akaba naatuura omu nsi ya Uuzi obundi eyaabaire neeshangwa burugwa izooba obw’Ensi Eyaraganisiibwe nka bukiizi bwa bumosho bwa Arabia. Okutaanira kimwe n’Abaisraeli abaabaire batandikire kuramya ebishushani omuri Misri, Yobu akaheereza Yehova omu bwesigwa. (Yos. 24:14; Ezk. 20:8) Yehova akagamba ahari Yobu ati: ‘Tihariho orikumushusha omu nsi.’a (Yob. 1:8) Yobu akaba ari omugaiga munonga, kandi akaba naarangaanwa okukira abantu boona abaabaire nibatuura omuri burugwa izooba. (Yob. 1:3) Hatariho kubangaanisa kikaba nikigwisa kubi Sitaane kureeba omushaija nk’ogwo arikuheereza Yehova omu bwesigwa.

5. Ahabw’enki Yehova yaikiriize Yobu kubonabona? (Yobu 1:​20-22; 2:​9, 10)

⁵ Sitaane akagira ngu Yobu akaba naabaasa kutsigaho okuramya okw’amazima yaahikwaho okubonabona. (Yob. 1:​7-11; 2:​2-5) N’obu Yehova araabe yaabaire naakunda Yobu munonga, ebi Sitaane yaagambire bikareetaho enshonga nkuru. N’ahabw’ekyo Yehova akaikiriza Sitaane kworeka yaaba ebi yaagambire byabaire bihikire nari biri ebishuba. (Yob. 1:​12-19; 2:​6-8) Sitaane akatwara amasyo ga Yobu, yaita abaana be 10, kandi yaamurwaza ebihuute kuruga aha mutwe kuhika aha bigyere. Kwonka n’obu Sitaane araabe yaamuhikizeho ebyo byona, akagumizamu naaheereza Yehova omu bwesigwa. (Shoma Yobu 1:​20-22; 2:​9, 10.) Bwanyima Yehova akagaruka yaaha Yobu amagara marungi, obugaiga, n’ekitiinisa. Kandi Yehova akamuha abaana 10 abandi. Akamwongyera emyaka 140 omu muringo gw’eky’okutangaaza, yaahangaara yaareeba abaijukuru n’abaijukuruza kuhika aha ruzaaro rwa kana. (Yob. 42:​10-13, 16) Ebyahikire ahari Yobu nibibaasa kuba byahweraire bita abaheereza ba Yehova aba ira, kandi nibibaasa kutuhwera bita obunaku obu?

6. Abaisraeli nibabaasa kuba baagasiirwe bata ahabw’okumanya ahabw’enki Ruhanga naikiriza okubonabona kukabaho? (Reeba n’ekishushani.)

⁶ Oku Abaisraeli barikubaasa kuba baagasiirwe. Embeera omuri Misri zikaba zitoorobeire Abaisraeli. Nk’eky’okureeberaho, Yoshua na Kalebu bakaba bamazire emyaka mingi bari abahuuku. Bwanyima bakazengyerera omu ihamba kumara emyaka 40 ahabw’enshobe ezi Abaisraeli abandi baakozire. Abaisraeli ku baraabe baamanyire oku Yobu yaabonaboine n’ekyarugiremu, hatariho kubangaanisa kikabahwera n’abaana baabo kwetegyereza owaabaire naajunaanizibwa aha kubonabona kwabo. Kandi bakaba nibabaasa kwetegyereza gye ahabw’enki Ruhanga naikiriza okubonabona kukabaho, n’oku arikureeba abarikumuheereza omu bwesigwa nk’ab’omuhendo.

7-8. Ekitabo kya Yobu nikibaasa kuhwera kita bamwe omuriitwe abarikubonabona? Ha eky’okureeberaho.

⁷ Oku turikubaasa kugasirwa. Eky’obusaasi, abantu baingi obunaku obu tibarikwikiririza omuri Ruhanga ahabw’okugira ngu tibarikwetegyereza ahabw’enki abantu barungi nibabonabona. Nk’eky’okureeberaho, teekateeka ahari Hazelb kuruga Rwanda. Obu yaabaire akiri muto akaba naikiririza omuri Ruhanga. Kwonka bwanyima buri kimwe kikahinduka. Abazaire be bakagaitururwa, nyina yaashwerwa omushaija ondiijo owaatandikire kumutwariza kubi. Obu yaabaire akiri omushogoyo bakamuhamba. Hazel ku yaagiire aha mwanya ogu yaabaire naashabiramu ngu atunge okuhuumurizibwa, tarakutungire. Bwanyima akahandiikira Ruhanga ebaruha arikugira ati: “Ruhanga nkushabire, kandi ngyerizeho kukora ebirungi, kwonka onshashwire ebibi. Hati tindagaruke kukuramya, kandi ninza kukora kyona ekirikunshemeza.” Buzima ka nikitusaasa kureeba abantu nka Hazel barikuhabisibwa ngu Ruhanga niwe arikubareetera okubonabona!

⁸ Kwonka itwe twegire omu kitabo kya Yobu ngu Ruhanga tiwe arikureetaho okubonabona, kureka ni Sitaane. Kandi twegire ngu titwine kuteekateeka ngu abantu baabonabona nibaba nibagyesha ebi baabibire. Ebyahandiikirwe nibigira ngu “obunaku n’ebihikiirizi” nibibaasa kutuhikaho twena obwire bwona. (Mub. 9:11; Yob. 4:​1, 8) Kandi twegire ngu twagumisiririza oburemeezi bwaitu omu bwesigwa, nituha Yehova eky’okugarukamu Sitaane orikumujuma. Twakora ekyo nitworeka ngu Sitaane n’omubeihi. (Yob. 2:3; Enf. 27:11) Titurikutwara ebi twegire nk’ebitaine mugasho ahabw’okuba nibituhwera kumanya amazima ahabw’enki itwe n’abakundwa baitu nituhikwaho okubonabona. Bwanyima, Hazel akeega Baibuli n’Abajurizi ba Yehova kandi yaayetegyereza ngu Ruhanga tiwe yaamureeteire kubonabona. Akagira ati: “Nkagaruka naashaba Ruhanga nyihire aha omutima. Nkagambira Yehova ngu obu naamugira ngu nkaba nimutsigaho buzima nkaba ntarikukimanyisa. Nkagamba ebyo byona ahabw’okuba nkaba ntarikumumanya. Hati ninyetegyereza ngu Yehova naankunda. Kandi nyine okushemererwa n’okumarwa.” Ka nikitushemeza kumanya ahabw’enki naikiriza okubonabona kukabaho! Hati ka tureebe oku ekitabo kya Yobu kirikubaasa kuhwera buri omwe ahariitwe yaahikwaho oburemeezi.

OKU EKITABO KYA YOBU KIRIKUTUHWERA KUGUMISIRIZA

9. Yobu akakora ki obu yaabaire naabonabona? (Yakobo 5:11)

⁹ Teekateeka ahari Yobu ashutami wenka omu iju, omubiri gwona gwijwire ebihuute, kandi ari omu busaasi bw’amaani. Omubiri gwe gukaba gutandikire kwiragura ahabw’oburwaire, kandi anyangaraire. Akaba ataine maani g’okugira eki yaakora, kureka okweyaguza orugusyo kyonka, n’okweyinamirira. Kwonka akaguma ahamiire ahari Yehova, kandi arikugumisiriza. (Shoma Yakobo 5:11.) Niki ekyahweraire Yobu kugumisiriza?

10. Niki ekirikworeka ngu Yobu akaba aine omukago guhami na Yehova? Shoboorora.

¹⁰ Yobu akagambira Yehova oku yaabaire naayehurira, kandi ekyo kikooreka ngu akaba aine omukago guhami nawe. (Yob. 10:1, 2; 16:20) Nk’eky’okureeberaho, eshuura 3 neetugira ngu Yobu akeetomboita munonga ahabw’oburemeezi obwamuhikireho, kandi akateekateeka ngu Yehova niwe yaabaire abumureeteire. Bwanyima omu kuhaajaana okwabaireho n’abanywani be bashatu, bakaguma nibagira ngu Yehova akaba naamufubira ahabw’ebibi bye, kwonka Yobu akaguma naayegambaho nk’omwesigwa. Ebigambo bya Yobu ebimwe bikooreka ngu akaba naayereeba nk’ohikiriire kukira Ruhanga. (Yob. 10:​1-3; 32:​1, 2; 35:​1, 2) Kwonka bwanyima akaikiriza ngu okuteeraho kwe kw’okujuririra obwesigwa bwe kukarugamu “okurahuka kugamba.” (Yob. 6:​3, 26) Omu shuura 31, nihagira ngu Yobu akaba naayenda Ruhanga amugarukyemu, kandi agire ngu akaba atashemereire kubonabona. (Yob. 31:35) Amazima gari ngu Yobu akaba atahikire kushaba Ruhanga ngu amugarukyemu omu muringo ogwo.

11. Yehova akatwariza ata Yobu ahabw’okujuririra obwesigwa bwe?

¹¹ Hati nitukyetegyereza ngu Yobu akagamba na Yehova omu muringo ogwo ahabw’okugira ngu akaba aine omukago murungi nawe, kandi aine obwesigye ngu naija kumutwariza gye. Aha muheru Yehova ku yaagarukiremu Yobu omu muyaga gw’amaani, taramushoboororeire ahabw’enki yaabaire naabonabona. Kandi taramucwereire orubanja ahabw’okwetomboita nari kujuririra obwesigwa bwe. Kureka, Yehova akagambira Yobu eki ashemereire kukora nk’oku omuzaire murungi arikutwariza omwana we. Kandi ogwo gukaba guri omuringo murungi gw’okuhweramu Yobu. N’ekyarugiremu, akeetegyereza ngu akaba naamanya bikye, reero yaayeteisa ahabw’okurahukiiriza kugamba. (Yob. 31:6; 40:​4, 5; 42:​1-6) Ebirikukwata ahari Yobu bikaba nibabaasa kugasira bita abantu aba ira, kandi nibibaasa kutugasira bita obunaku obu?

12. Ekitabo kya Yobu nikibaasa kuba kyahweraire kita Abaisraeli?

¹² Oku Abaisraeli barikubaasa kuba baagasiirwe. Abaisraeli nibabaasa kuba baayegyeire aha byahikire ahari Yobu. Nk’eky’okureeberaho, teekateeka ahari Musa. Akaba aine kugumisiririza oburemeezi bwingi obu yaabaire naayebembera eihanga rya Israeli. Abaisraeli bakagomera Yehova emirundi mingi, kandi baareebya na Musa. Kwonka okutaana n’Abaisraeli abagomi abaabaire betomboitera Yehova, Musa akaba agambira Yehova ebirikumwerarikiriza omu kushaba. (Kur. 16:​6-8; Kub. 11:​10-14; 14:​1-4, 11; 16:​41, 49; 17:5) Kandi, na Musa akaba aine kugumisiriza nka Yobu obu yaatunga okuhanwa. Nk’eky’okureeberaho, obu Abaisraeli baabaire bari Kadeshi, obundi nk’omu mwaka gwa 40 barikuzengyerera omu ihamba, Musa ‘akagamba ebitahikire’ kandi yaaremwa kuhaisa eiziina rya Yehova ekitiinisa ekimushemereire. (Zab. 106:​32, 33) N’ekyarugiremu, Yehova taraikiriize Musa kutaaha omu Nsi Eyaaraganisiibwe. (Bir. 32:​50-52) Okuhanwa okwo nikubaasa kuba kwamureeteire obusaasi bwingi, kwonka akaba omucureezi yaakwikiriza. Ebirikukwata ahari Yobu nibibaasa kuba byahweraire Abaisraeli abaazairwe bwanyima kugumisiririza oburemeezi obu baabugaine. Ku baabaire bateekateeka aha byahikire ahari Yobu, kikaba kibahwera kumanya oku barikubaasa kugambira Yehova enyehurira zaabo n’oku barikubaasa kwetantara kwereeba nk’abahikiriire kukira Yehova. Kandi bakaba nibabaasa kwega oku barikubaasa kwikiriza okuhana kwa Yehova omu bucureezi.

13. Ekitabo kya Yobu nikibaasa kutuhwera kita kugumisiriza? (Abaheburaayo 10:36)

¹³ Oku turikugasirwa. Obunaku obu, Abakristaayo twena nitwetenga okugumisiriza. (Shoma Abaheburaayo 10:36.) Nk’eky’okureeberaho, bamwe ahariitwe nitubaasa kuba turiyo nitugumisiriza amaganya, amagara mabi, oburemeezi omuka yaitu, okufeerwa omukundwa waitu nari oburemeezi obundi. Kandi obumwe ebi abandi barikukora nari ebi barikugamba nibibaasa kutureetera kugumirwa kugumisiriza oburemeezi bwaitu. (Enf. 12:18) Kwonka ekitabo kya Yobu nikitwegyesa ngu nitubaasa kugambira Yehova oku turikwehurira twine obwesigye ngu naija kutuhurira. (1 Yoh. 5:14) Tarikwija kutugirira ekiniga twamugambira eki turi aha mutima n’obu obumwe twakugamba eby’obushema nari ‘tukarahukiiriza kugamba’ nka Yobu. Omu mwanya gw’ekyo, Ruhanga naija kutuha amaani n’obwengye ebirikwetengyesa kutuhwera kugumisiriza. (2 Bus. 16:9; Yak. 1:5) Naabaasa kutuhwera kutereeza emiteekateekyere yaitu nk’oku yaahweraire Yobu. Kandi ekitabo kya Yobu nikitwegyesa oku turikubaasa kugumisiriza twaheebwa obuhabuzi nari twahanwa Ekigambo kya Ruhanga, ekibiina kye nari omunywani okuzire omu by’omwoyo. (Heb. 12:​5-7) Kandi nk’oku Yobu yaabaire omucureezi akagasirwa omu buhabuzi obu yaahairwe, naitwe nitugasirwa twikiriza obuhabuzi oburikutuheebwa. (2 Kor. 13:11) Ka nitwega amashomo makuru omu kitabo kya Yobu! Hati ka tureebe oku turikubaasa kukoresa ebirikukwata ahari Yobu kuhwera abandi.

KORESA EKITABO KYA YOBU KUHWERA ABANDI

14. Noobaasa kuhwera ota omuntu kwetegyereza ahabw’enki hariho okubonabona?

¹⁴ Haine obu oraabugaine omuntu omu kubuurira akakubuuza ahabw’enki hariho okubonabona omu nsi? Ekibuuzo ekyo okakigarukamu ota? Noobaasa kuba waagambire eki Baibuli erikugamba aha kyabaireho omu musiri Edeni. Obundi okatandika orikugamba oku Sitaane yaagambiire Adamu na Haawa ekishuba ekyabareetaire kugomera Ruhanga. (Kut. 3:​1-6) Reero noobaasa kuba waamugizire ngu ahabw’obugomi bwabo, ensi yoona ekaijura okubonabona n’okufa. (Rom. 5:12) Bwanyima noobaasa kuba waahendaire orikumushoboororera ngu Ruhanga aikiriize obwire kuhinguraho kugira ngu ayorekye ngu Sitaane n’omubeihi, n’okujanjaaza amakuru marungi ngu omu biro by’omumaisho abantu boona nibaija kugira amagara marungi. (Kush. 21:​3, 4) Ogwo n’omuringo murungi gw’okuhikaanisa ebiteekateeko n’abantu aha nshonga egyo, kandi nikibaasa kurugamu ebirungi.

15. Nitubaasa kukoresa tuta ekitabo kya Yobu haagira owaatubuuza ahabw’enki hariho okubonabona? (Reeba n’ebishushani.)

¹⁵ Omuringo ogundi oku turikubaasa kushoboororera abantu ahabw’enki hariho okubonabona, n’okubagambira ebyabaire ahari Yobu. Noobaasa kutandika orikusiima omuntu ogwo ahabw’okubuuza ekibuuzo kirungi. Reero omugire ngu Yobu omushaija owaabaire ari omwesigwa nawe akabuuza ekibuuzo nikyo kimwe ku yaahikirweho okubonabona. Nangwa naabaasa kuba yaateekateekire ngu obundi Ruhanga niwe yaabaire naamubonabonesa. (Yob. 7:​17-21) Omuntu ou orikuba noogaaniira nawe naabaasa kukwatwaho yaamanya ngu abantu batwire nibeebuuza ekibuuzo nikyo kimwe kuruga ira. Reero omu muringo gw’obwengye noobaasa kumushoboororera ngu Ruhanga tiwe yaabaire naabonabonesa Yobu. Kureka ni Sitaane orikuteeraho kworeka ngu abantu nibaheereza Yehova ahabw’ebi barikumwendaho. Kandi noobaasa kwongyeraho ngu Ruhanga okwikiriza Yobu kubonabona, akaba naayoreka ngu aine obwesigye omu bantu abeesigwa ngu nibabaasa kworeka ku Sitaane ari omubeihi. Noobaasa kuhendera orikumushobororera ngu Ruhanga akaha Yobu omugisha ahabw’okuguma ari omwesigwa. N’ahabw’ekyo nitubaasa kumuhuumuriza abandi ngu Yehova tiwe arikureetaho okubonabona.

16. Ha eky’okureeberaho ekirikworeka oku ekitabo kya Yobu kirikubaasa kuhwera omuntu orikubonabona.

¹⁶ Teekateeka aha oku ekitabo kya Yobu kyahweraire Mario. Eizooba rimwe omu mwaka 2021, munyaanyazi-itwe akaba naabuurira arikukoresa esimu. Ku yaateire esimu omurundi gw’okubanza ekakwatwa Mario, reero yaamushobororera ngu Ruhanga naaturaganisa nyentsya nungi, kandi naahurira n’okushaba kwaitu. Ku yaabuurize Mario eki arikuteekateeka aha nshonga egyo, akamugira ngu obu yaamuteerera esimu akaba ariyo naahandiikira eka ye obutumwa atakeyitsire. Akagira ati, “Niinyikiririza omuri Ruhanga kwonka akasheeshe aka naaba niinyebuuza yaaba naakinfaho.” Munyaanyazi-itwe ku yaagarukire kumuteerera esimu akamushoboororera ebyahikire ahari Yobu. Mario akacwamu kushoma ekitabo kya Yobu kyona. Munyaanyazi-itwe akamwoherereza linki ya New World Translation of the Holy Scriptures. N’ekyarugiremu, Mario akaikiriza kwegyesibwa Baibuli, kandi akashemererwa kwega bingi ebirikukwata ahari Ruhanga owa rukundo owaayorekire ngu naamufaho.

17. Ahabw’enki noosiima Yehova ahabw’okuhandiikisa ekitabo kya Yobu omu Baibuli? (Yobu 34:12)

¹⁷ Buzima Ekigambo kya Ruhanga kiine amaani g’okuhwera abantu otwariiremu n’abo abarikubonabona. (Heb. 4:12) Ka nitusiima Yehova ahabw’okuhandiikisa omu Baibuli ebirikukwata ahari Yobu! (Yob. 19:​23, 24) Ekitabo kya Yobu nikituhamiza kimwe ngu ‘buzimazima Ruhanga tarikukora kubi.’ (Shoma Yobu 34:12.) Nikitwegyesa ahabw’enki naikiriza okubonabona kukabaho n’oku turikubaasa kukwemera. Kandi nikituhwera kuhuumuriza abarikubonabona. Omu kicweka ekirikukurataho nitwija kureeba oku ekitabo kya Yobu kirikubaasa kutuhwera kuha abandi obuhabuzi oburikukora.