Ekitabo kya Yobu Nikibaasa Kukuhwera omu Kuha Abandi Obuhabuzi

1-2. Ahabw’enki kyabaire kitoorobeire banywani ba Yobu bashatu na Elihu kuha Yobu obuhwezi?

YOBU omushaija owaabaire ari omutungi ku yaafeereirwe ebintu bye byona, ebyamuhikireho bikarahuka kujanjaara nk’omuriro gw’ekyanda omu bantu ba burugwa izooba. Banywani be bashatu Elifaazi, Biludaadi, na Zofari ku baamanyire ebyamuhikireho bakaija omuri Uuzi kubaasa kumuhuumuriza. Kwonka ku baahikireyo bakatangaara ahabw’ebi bareebire.

² Teekateeka aha byabaireho. Obutungi bwona obu Yobu yaabaire aine bukahwaho. Amasyo ge ag’entaama, endogoya, ente, n’engamira bikahwaho. Abaana be boona n’abaheereza be abaingi bakaitwa. Kandi enju ei abaana be baafereiremu ekaba amatongo. Kandi t’ekyo kyonka, Yobu nawe akarwara ebihuute omubiri gwona. Banywani be bashatu ku baijire kumureeba, bakashutama baamureebera hangahari obwo ashutami omu iju ayeyinamiriire. Mbwenu shi bakamutwariza bata? Kumara ebiro mushanju tihaine eki bagambiire omushaija ogwo owaabaire ari omu busaasi bw’amaani. (Yob. 2:​12, 13) Bwanyima, omushaija orikwetwa Elihu akaija reero yaashutama haihi nabo. Yobu akatandika kugamba arikukyeena eizooba eri yaazaariirweho arikwenda ngu afe. (Yob. 3:​1-3, 11) Buzima akaba naayenda obuhwezi bwa banywani be abo. N’ahabw’ekyo kikaba kitoorobeire abashaija abo ahakuba ebi baabaire nibaija kugamba n’oku baabaire nibaija kubigamba kikaba nikiija kworeka yaaba ni banywani be abaabuzima, nari baabaire nibafayo aha mbeera ye. Ka tureebe eki baakozire.

3. Niki eki turikuza kugambaho?

³ Yehova akahwera Musa kuhandiika ebi banywani ba Yobu bashatu na Elihu baagambire n’ebi baakozire. Nikireebeka ngu ebi Elifaazi yaagambire akabigambisibwa omwoyo mubi. Okutaana nawe, ebi Elihu yaagambire akabigamba arikuhwerwa omwoyo gwa Yehova. (Yob. 4:​12-16; 33:​24, 25) N’ahabw’ekyo tikirikututangaaza kureeba ngu n’obu omu kitabo kya Yobu haraabe harimu obuhabuzi burungi, harimu n’obuhabuzi obubi. Kwonka nituza kureeba oku ekitabo ekyo kirikubaasa kutuhwera twaba nituha abandi obuhabuzi. Ka tubanze tureebe eky’okureeberaho kibi ekya banywani ba Yobu bashatu, kandi bwanyima twegyere aha ky’okureeberaho kirungi ekya Elihu. Omu buri mbeera, nituza kureeba oku Abaisraeli barikubaasa kuba baagasirwe omu kitabo kya Yobu n’oku kirikubaasa kutugasira obunaku obu.

OKU BANYWANI BA YOBU BASHATU BAAMUHAIRE OBUHABUZI

4. Ahabw’enki banywani ba Yobu bashatu baaremirwe kumuhuumuriza? (Reeba n’ekishushani.)

⁴ Baibuli neegira ngu banywani ba Yobu bashatu bakaija “kumuyaagira n’okumugumya” bwanyima y’okuhurira ebyamuhikireho. (Yob. 2:11) Kwonka, bakaremwa kuhika aha kigyendererwa ekyo. Ahabw’enki? Ahabw’enshonga ishatu. Ey’okubanza, bakarahuka kumucwera orubanja. Nk’eky’okureeberaho, bakateekateeka ngu Yobu akaba naafubirwa ahabw’ebibi ebi yaakozire.a (Yob. 4:7; 11:14) Ekya kabiri, obuhabuzi obu abashaija abo baahaire Yobu bukaba butarikubaasa kumuhwera ahabw’okuba bukaba butari bw’embabazi, kandi bukamureetera obusaasi. Nk’eky’okureeberaho, abashaija bashatu abo boona bakagamba ebigambo ebyabaire nibireebeka nka birungi kwonka bitaine mugasho. (Yob. 13:12) Biludaadi akagambira Yobu emirundi ebiri ngu akaba naagambisibwa. (Yob. 8:2; 18:2) Kandi Zofari akagambira Yobu ngu akaba ataine bwengye. (Yob. 11:12) Ekya kashatu, n’obu barikubaasa kuba bataragambiire ahaiguru, ebi baagambire bakabigamba omu muringo ogurikumugarura ahansi, ogurikumurengyeza, kandi ogurikumwomesereza. (Yob. 15:​7-11) Abashaija abo bakaba bamaririire kworeka Yobu ngu akaba aine ekibi eki yaabaire akozire, omu mwanya gw’okumuhuumuriza n’okuhamya okwikiriza kwe.

5. Obuhabuzi obu banywani ba Yobu bashatu baamuhaire bukarugamu ki?

⁵ Tikirikututangaaza kureeba ngu obuhabuzi obu banywani ba Yobu baamuhaire tiburarugiremu birungi. Omu mwanya gw’okumuhuumuriza, akoongyera kugira amaganya. (Yob. 19:2) Ekyo nikitworeka ahabw’enki Yobu yaataireho kurwanirira eiziina rye. N’ekyarugiremu, emiteekateekyere ye ekagwera orubaju, kandi yaatandika kugamba eby’obushema. (Yob. 6:​3, 26) Emiteekateekyere ya banywani ba Yobu ekaba etarikuhikaana n’eya Yehova, kandi tibaratwariize Yobu omu muringo gw’embabazi. N’ahabw’ekyo, bakaba ebikoreso bya Sitaane batakimanyire. (Yob. 2:​4, 6) Ebyahikire ahari Yobu nibibaasa kuba byahweraire bita Abaisraeli, kandi itwe nibitugasira bita?

6. Abaramuzi omuri Israeli nibabaasa kuba baayegire mashomo ki aha ky’okureeberaho kibi eky’abanywani ba Yobu bashatu?

⁶ Oku Abaisraeli barikubaasa kuba baagasiirwe. Yehova ku yaaherize kutandikaho ihanga rya Israeli, akatoorana abashaija b’obujunaanizibwa, n’abakuru b’Abaisraeli kuba abaramuzi b’okucwa emanja omu muringo ogurikuhikaana n’emitindo ye ehikiriire. (Bir. 1:​15-18; 27:1) Abashaija abo bakaba baine kubanza baahurikiza gye batakahaire obuhabuzi nari kucwa orubanja. (2 Bus. 19:6) Bakaba baine kubanza baabuuza ebibuuzo omu mwanya gw’okuteekateeka ngu nibamanya buri kimwe. (Bir. 19:18) Bakaba baine kwetantara kugambira kubi abaabaire baija kubasheruraho obuhwezi. Ahabw’enki? Ahabw’okuba ekyo kikaba nikibaasa kureetera omuntu kutabagambira oku arikwehurira aihire aha mutima. (Kur. 22:​22-24) Abakuru omuri Israeli nibabaasa kuba baayegire amashomo makuru aha byahikire ahari Yobu.

7. Oyihireho abakuru omuri Israeli, ni baahi abandi abaabaire nibabaasa kuha obuhabuzi, kandi nibabaasa kuba baagasiirwe bata aha byahikire ahari Yobu? (Enfumu 27:9)

⁷ Amazima gari ngu, abakuru omuri Israeli tibo bonka abaabaire nibabaasa kuha abandi obuhabuzi. Buri Mwisraeli yaaba muto nari mukuru, omushaija nari omukazi, akaba naabaasa kuha mutaahi we obuhabuzi yaareeba ngu naayetenga obuhwezi omu kushemeza okuramya kwe nari emitwarize ye. (Zab. 141:5) Orikukuha buhabuzi nk’obwo naaba ari munywani waawe owaabuzima. (Shoma Enfumu 27:9.) Eky’okureeberaho kibi ekya banywani ba Yobu bashatu kikaba nikibaasa kuhwera Abaisraeli kumanya eki baabaire baine kugamba n’eki baine kukora baaba nibaha obuhabuzi.

8. Twine kwetantara ki twaba nituha abandi obuhabuzi? (Reeba n’ebishushani.)

⁸ Oku turikubaasa kugasirwa. Twena Abakristaayo nitwenda kuhwera ab’eishe-emwe na banyaanyazi-itwe omu buremeezi bwabo. Kwonka kubaasa kukikora, twine kwetantara enshobe ezi banywani ba Yobu bashatu bakozire. Eky’okubanza, twine kwetantara kurahuka kuteekateeka ngu nitumanya buri kimwe, kandi tuhamye ngu ebi turikuza kugamba n’amazima. Ekya kabiri, obuhabuzi obu turikuha titwine kubwegamiza aha bi turabiremu nk’oku Elifaazi yaatwarize, kureka twine kubwegamiza aha Kigambo kya Ruhanga. (Yob. 4:8; 5:​3, 27) Ekya kashatu, twine kwetantara ebigambo ebirikusaasa abandi nari ebirikubomesereza. Ijuka ngu bimwe aha bi Elifaazi na bagyenzi be baagambire bikaba bihikire, nangwa n’omwe aha baahandiikire Baibuli akajuriza bimwe aha bigambo byabo. (Gyeragyeranisa Yobu 5:13 na 1 Abakorinso 3:19.) Kwonka bingi aha bi baagambire bikaba bitarikuhikaana n’emiteekateekyere ya Yehova, kandi bikareetera Yobu obusaasi. N’ahabw’ekyo Yehova akagira ngu bikaba biri ebishuba. (Yob. 42:​7, 8) Obuhabuzi bwaba nibworeka ngu Yehova naatwariza kubi abaheereza be nari ngu tarikubakunda, nibuba butari burungi. Hati ka tushwijume ebi turikubaasa kwegyera ahari Elihu.

OKU ELIHU YAAHAIRE YOBU OBUHABUZI

9. Shoboorora ahabw’enki Yobu yaabaire naayetenga obuhwezi, banywani be bashatu ku baarekiire aho kugamba, n’oku Yehova yaabumuhaire.

⁹ Yobu na banywani be bashatu ku baaherize kuteera empaka, bashemereire kuba baabaire bagwirwe kubi munonga. Abashaija abo bakagamba ebigambo bingi ebyayijwize eshuura za Baibuli 28, kandi bingi aha bi baagambire bakabigambisa ekiniga. Tikirikututangaaza kureeba ngu Yobu akaguma aine obusaasi. Akaba naakyetenga okuhuumurizibwa n’okuhaburwa. Mbwenu shi Yehova akamuhwera ata? Akakoresa Elihu kumuha obuhabuzi. Ahabw’enki Elihu atararahukire kugamba? Akagira ati: “Ndi muto, imwe muri abagurusi, nikyo kindeeteire kutiina.” (Yob. 32:​6, 7) Elihu akeetegyereza eki baingi barikumanya obunaku obu, ngu abari omu myaka ya bukuru nibaba nibamanya bingi, n’ekirikurugamu nibaba baine obwengye oburikukira obu abato baine. Kwonka Elihu ku yaaherize kuhurikiza ebi Yobu na banywani be bashatu baagambire, akaba atakibaasa kuguma ahunami. Akagira ati: “Abahikire omu ngingo za bukuru tibo baine obwengye, n’abagurusi tibo barikumanya eby’oburyo.” (Yob. 32:9) Niki ekindi eki Elihu yaagambire, kandi akakigamba ata?

10. Elihu akabanza kukora ki atakahaire Yobu obuhabuzi? (Yobu 33:​6, 7)

¹⁰ Elihu akabanza kureetera Yobu kwikaikana atakatandikire kumuha obuhabuzi. Ekyo akakikora ata? Akabanza kutegyeka enyehurira ze. Ekyo nitukimanya ahabw’okuba Baibuli neegira ngu omu kubanza Elihu akaba aine ekiniga. (Yob. 32:​2-5) Kwonka nabwo taragambire na Yobu omu muringo mubi nari kumucwera orubanja. Kureka, akagamba nawe omu muringo ogurikuhuumuriza. Nk’eky’okureeberaho, akagambira Yobu ati: “Reeba, omu maisho ga Ruhanga nyowe naiwe nitwingana.” (Shoma Yobu 33:​6, 7.) Bwanyima akagambira Yobu ngu akahurikiza gye ebi yaagambire. Nangwa akagamba enshonga mukaaga omu bugufu ezaabaire ziri omu bi Yobu yaagambire. (Yob. 32:11; 33:​8-11) Elihu akakora nikyo kimwe omurundi ogundi obu yaaha Yobu obuhabuzi.—Yob. 34:​5, 6, 9; 35:​1-4.

11. Elihu akaha ata Yobu obuhabuzi? (Yobu 33:1)

¹¹ Elihu ku yaabaire naaha Yobu obuhabuzi, akabumuha omu muringo ogwamuhaisize ekitiinisa. Nk’eky’okureeberaho, akakoresa eiziina rya Yobu, eki banywani be bashatu baaremirwe kukora. (Shoma Yobu 33:1.) Obundi, Elihu akaijuka ngu akaba naayenda kugamba obu Yobu na banywani be baabaire nibateera empaka, n’ahabw’ekyo akaha Yobu omugisha gw’okugamba oku yaabaire naayehurira aha buhabuzi obu yaamuhaire. (Yob. 32:4; 33:32) Elihu akarabura Yobu aha kabi akaabaire nikabaasa kuruga omu miteekateekyere ye, kandi yaamwijutsya obwengye bwa Yehova, amaani ge, oburingaaniza na rukundo ye etarikuhinduka. (Yob. 36:​18, 21-26; 37:​23, 24) Obuhabuzi burungi obu Elihu yaahaire Yobu bukamuhwera kutebeekanisa omutima gwe kugira ngu aikirize obuhabuzi obu Omuhangi we yaabaire naija kumuha. (Yob. 38:​1-3) Eky’okureeberaho kya Elihu nikibaasa kuba kyahweraire kita Abaisraeli, kandi nikibaasa kutuhwera kita obunaku obu?

12. Yehova akakoresa ata baanabi kuhwera abantu be, kandi Abaisraeli nibabaasa kuba baagasiirwe bata omu ky’okureeberaho kirungi kya Elihu?

¹² Oku Abaisraeli barikubaasa kuba baagasiirwe. Omu byafaayo bya Israeli, Yehova akaba atoorana baanabi b’okumanyisa Abaisraeli ekigyendererwa kye. Nk’eky’okureeberaho, omu bwire bw’abaramuzi, Debora akahabura ihanga rya Israeli omu by’omwoyo nk’omuzaire, kandi Samueli akaheereza nk’omugambirizi wa Yehova kuruga omu buto bwe. (Bar. 4:​4-7; 5:7; 1 Sam. 3:​19, 20) Kandi n’omu bwire bw’abagabe, Yehova akakoresa baanabi baingi kuhwera abantu be omu by’omwoyo n’okuhabura abaahabire bakaruga omu kuramya okushemeire. (2 Sam. 12:​1-4; Byak. 3:24) Eky’okureeberaho kya Elihu ekiri omu kitabo kya Yobu kikaba nikibaasa kuhwera abashaija n’abakazi abeesigwa kumanya ebi baabaire baine kugamba n’oku baabaire baine kubigamba baaba nibaha abandi obuhabuzi.

13. Ab’eishe-emwe nibabaasa kugumya bata bagyenzi baabo obunaku obu?

¹³ Oku turikubaasa kugasirwa. Abakristaayo twena nituhwera abantu kumanya ekigyendererwa kya Ruhanga turikubeegyesa ebiri omu Kigambo kye Baibuli. Omuringo ogundi oku turikukikoramu n’okukoresa ebigambo ebirikuhuumuriza ab’eishe-emwe bagyenzi baitu, kandi bikabagaruramu amaani. (1 Kor. 14:3) Abareeberezi baine kwijuka kuteeraho kugumya ab’eishe-emwe na banyaanyazi-itwe “abahahaire emitima” nangwa n’abo ‘abarikurahuka kugamba’ ahabw’amaganya.—1 Tes. 5:14; Yob. 6:3.

14-15. Shoboorora oku omureeberezi arikubaasa kutooreza Elihu yaaba naaha obuhabuzi.

¹⁴ Teekateeka aha mbeera egi. Omureeberezi yaamanya ngu munyaanyazi-itwe omu kibiina ahwairemu amaani. Omureeberezi ogwo hamwe n’ow’eishe-emwe ondiijo bataayaayira munyaanyazi-itwe ogwo kumugaruramu amaani. Ku baaba nibagaaniira nawe, atandika kugamba enyehurira mbi ezi aine. Agira ngu takiine kushemererwa n’obu araabe naaza omu nteerane n’omu kubuurira. Omureeberezi naabaasa kutwaza ata omu mbeera egyo?

¹⁵ Eky’okubanza, naija kuteeraho kwetegyereza enshonga ahabw’enki munyaanyazi-itwe naayehurira atyo. Kubaasa kukora ekyo naaba aine kuhurikiza gye ebi munyaanyazi-itwe ogwo araagambe. Obundi naabaasa kuba naateekateeka ngu Ruhanga takimukunda? Nari ahwairemu amaani ‘ahabw’amaganya g’amagara aga’? (Luk. 21:34) Ekya kabiri, omureeberezi naija kuteeraho kusiima munyaanyazi-itwe ahabw’ebi arikukora, nk’okuza omu nteerane n’okwejumba omu kubuurira n’obu kiraabe kitarikumworobera. Kandi ekya kashatu, omureeberezi yaayetegyereza embeera ya munyaanyazi-itwe n’ekirikumureetera kuhwamu amaani, naija kukoresa Baibuli kumuhwera kwongyera kugira obwesigye omuri rukundo ei Ruhanga amwiniire.—Gal. 2:20.

GUMIZAMU NOOGASIRWA OMU KITABO KYA YOBU

16. Nitubaasa kugumizamu tuta nitugasirwa omu kitabo kya Yobu?

¹⁶ Nitugasirwa munonga twashwijuma ekitabo kya Yobu. Nk’oku tureebire omu kicweka eky’enyima, ekitabo eki nikitwegyesa ahabw’enki Ruhanga naikiriza okubonabona kukabaho n’oku turikubaasa kukwemera. Kandi omu kicweka eki, twayega ngu twena nitubaasa kuha abandi obuhabuzi burungi turikutooreza eky’okureeberaho kirungi kya Elihu, tukeetantara kutooreza banywani ba Yobu bashatu. N’ahabw’ekyo otakahaire omuntu obuhabuzi omu biro by’omumaisho, teeraho kweijutsya amashomo agu twayega omu kitabo kya Yobu. Kandi waaba obaire omazire obwire otarikushoma ekitabo kya Yobu, noobaasa kutaho obwire bw’okugaruka kushoma ekitabo ekyo ekirikushemeza. Noija kwetegyereza ngu ekitabo ekyo n’eky’omuhendo hati nk’oku kyabaire kiri obu kyahandiikwa.