Orwakataano, Okitoba 24
Okukira byona, mukundane munonga, ahabw’okuba okukunda nikushweka ebibi bingi.—1 Pet. 4:8.
Ekigambo “munonga” eki entumwa Petero yaakoreise kiine amakuru ‘g’okunanuura.’ Omushororongo ogwo niguhendera gurikworeka ekirikuruga omu kukundana munonga. Nikushweka ebibi by’ab’eishe-emwe bagyenzi baitu. Kiteekateekyeho omu muringo ogu: Nituba turi nk’abarikunanuura rukundo nk’omwenda, kuhitsya obu erikushweka “ebibi bingi,” beitu kitari kimwe nari bibiri byonka. Okushweka nikyo kimwe n’okusaasira. Nk’oku omwenda gurikushweka akamogo, nikwo na rukundo erikushweka obweremwa bw’abandi n’obutahikiirira bwabo. Rukundo ei twiniire ab’eishe-emwe yaaba ehamire neija kutuhiga kubasaasira obutahikiirira bwabo, n’obu eki obumwe kiraabe nikyetengyesa okutamu amaani. (Kol. 3:13) Twasaasira abandi, nitworeka ngu twine rukundo ehamire, kandi ngu nitwenda kushemeza Yehova. w23.11 11-12 ¶13-15
Orwamukaaga, Okitoba 25
[Shafani] akakishomera omugabe.—2 Bus. 34:18.
Omugabe Yosia ku yaakuzire akatandika kuhunduuza hekalu. Ku baabaire nibakora omurimo ogwo, bakabona “ekitabo ky’Ebiragiro bya [Yehova], ekyahandiikirwe Musa.” Omugabe ku yaahuriire ebyabaire birimu, ahonaaho akakora empinduka kubyorobera. (2 Bus. 34:14, 19-21) Nooshoma Baibuli butoosha? Ku kiraabe nikwo kiri, nookunda kugishoma? Nooteeraho kumanya emishororongo erikubaasa kukuhwera? Obu Yosia yaabaire aine 39, akakora enshobe eyaamurugiiremu okufa. Akeeyesiga omu mwanya gw’okushaba Yehova obuhabuzi. (2 Bus. 35:20-25) Haine eki turikubaasa kukyegyeraho. Yaaba tukuzire kirikwingana ki nari tutwire nitushoma Baibuli, twine kugumizamu nitusherura Yehova. Ekyo nikitwariramu okushaba Yehova obuhabuzi butoosha, okushoma Ekigambo kye, kandi tukahurikiza obuhabuzi bw’Abakristaayo abakuzire omu by’omwoyo. Ekyo nikiija kutuhwera kutakora enshobe z’amaani, kandi tushemererwe.—Yak. 1:25. w23.09 12 ¶15-16
Sande, Okitoba 26
Ruhanga naarwanisa abaine amaryo, kwonka abacureezi naabaha omugisha.—Yak. 4:6.
Baibuli neegamba aha bakazi baingi abaabaire nibakunda Yehova kandi abaamuheereize. Bakaba ‘baringaniire omu micwe,’ kandi bakaba ‘nibeesigwa omu bintu byona.’ (1 Tim. 3:11) Ekindi, banyaanyazi-itwe nibabaasa kutooreza abakazi Abakristaayo abakuzire omu by’omwoyo omu kibiina kyabo. Banyaanyazi-itwe abato, nimumanya banyaanyazi-itwe abakuzire omu by’omwoyo abu murikubaasa kutooreza? Mwetegyereze emitwarize yaabo mirungi, reero muteereho kubatooreza. Omutwarize mukuru ogurikworeka ngu Omukristaayo akuzire omu by’omwoyo, n’obucureezi. Munyaanyazi-itwe yaaba ari omucureezi, naagira omukago murungi na Yehova n’abandi. Nk’eky’okureeberaho, omukazi orikukunda Yehova omu bucureezi naakuratira omusingye oguri omu 1 Abakorinso 11:3, ahu Yehova arikworeka oine obujunaanizibwa bw’okwebembera ekibiina n’eka. w23.12 18-19 ¶3-5