Omugabe Yosia ku yaakuzire akatandika kuhunduuza hekalu. Ku baabaire nibakora omurimo ogwo, bakabona “ekitabo ky’Ebiragiro bya [Yehova], ekyahandiikirwe Musa.” Omugabe ku yaahuriire ebyabaire birimu, ahonaaho akakora empinduka kubyorobera. (2 Bus. 34:​14, 19-21) Nooshoma Baibuli butoosha? Ku kiraabe nikwo kiri, nookunda kugishoma? Nooteeraho kumanya emishororongo erikubaasa kukuhwera? Obu Yosia yaabaire aine 39, akakora enshobe eyaamurugiiremu okufa. Akeeyesiga omu mwanya gw’okushaba Yehova obuhabuzi. (2 Bus. 35:​20-25) Haine eki turikubaasa kukyegyeraho. Yaaba tukuzire kirikwingana ki nari tutwire nitushoma Baibuli, twine kugumizamu nitusherura Yehova. Ekyo nikitwariramu okushaba Yehova obuhabuzi butoosha, okushoma Ekigambo kye, kandi tukahurikiza obuhabuzi bw’Abakristaayo abakuzire omu by’omwoyo. Ekyo nikiija kutuhwera kutakora enshobe z’amaani, kandi tushemererwe.—Yak. 1:25. w23.09 12 ¶15-16

Baibuli neegamba aha bakazi baingi abaabaire nibakunda Yehova kandi abaamuheereize. Bakaba ‘baringaniire omu micwe,’ kandi bakaba ‘nibeesigwa omu bintu byona.’ (1 Tim. 3:11) Ekindi, banyaanyazi-itwe nibabaasa kutooreza abakazi Abakristaayo abakuzire omu by’omwoyo omu kibiina kyabo. Banyaanyazi-itwe abato, nimumanya banyaanyazi-itwe abakuzire omu by’omwoyo abu murikubaasa kutooreza? Mwetegyereze emitwarize yaabo mirungi, reero muteereho kubatooreza. Omutwarize mukuru ogurikworeka ngu Omukristaayo akuzire omu by’omwoyo, n’obucureezi. Munyaanyazi-itwe yaaba ari omucureezi, naagira omukago murungi na Yehova n’abandi. Nk’eky’okureeberaho, omukazi orikukunda Yehova omu bucureezi naakuratira omusingye oguri omu 1 Abakorinso 11:​3, ahu Yehova arikworeka oine obujunaanizibwa bw’okwebembera ekibiina n’eka. w23.12 18-19 ¶3-5

Yehova naayenda ngu omushaija akunde omukazi we, amureeberere omu by’omubiri, omu nyehurira n’omu by’omwoyo. Okugira okubaasa kw’okuteekateeka, okutwariza abakazi omu muringo gw’ekitiinisa, n’okuba orikwesigwa, nibiija kukuhwera omu bushwere. Waataaha omu bushwere, noobaasa kuzaara abaana. Noobaasa kwegyera ki ahari Yehova aha bikwatiraine n’okuba omuzaire murungi? (Efe. 6:4) Yehova akagambira omwana we Yesu butunu ngu naamukunda, kandi naamusiima. (Mat. 3:17) Ku oraazaare abaana, butoosha bahamize ngu noobakunda. Basiime ahabw’ebirungi ebi barikukora. Abazaire abarikutooreza Yehova nibahwera abaana baabo kuba Abakristaayo abakuzire omu by’omwoyo. Noobaasa kwetebeekanisiza obujunaanizibwa obwo hati, orikufayo aha b’eka yaawe, n’ab’omu kibiina orikworeka ngu noobakunda kandi orikubatwara nk’ab’omuhendo.—Yoh. 15:9. w23.12 28-29 ¶17-18