Ahabw’enki Twine Kushaba Kurabira omu Iziina rya Yesu?

Yesu akeegyesa aha kushaba emirundi mingi. Obu yaabaire ari omu nsi abeebembezi b’ediini y’Ekiyudaaya, bakaba nibashabira “omu mateeraniro g’enguuto.” Ahabw’enki? Kugira ngu ‘bareebwe abantu.’ Bakaba nibenda kworeka okuhikiirira kwabo. Baingi bakaba nibashaba kumara obwire oburaingwa, nibagarukagaruka omu bigambo oshusha oti nibwo okushaba kwabo kuraahurirwe. (Matayo 6:5-8) Yesu akoreka ngu ebikorwa nk’ebi bikaba bitaine mugasho, kugira ngu abacureezi bamanye ebi baine kwetantara omu kushaba. Kwonka, akakora ekirikukira aha kubagambira ebi batashemereire kugambaho omu kushaba.

Yesu akeegyesa ngu okushaba kwaitu nikworeka ngu twine ekihika ky’okureeba eiziina rya Ruhanga niryeziibwa, Obukama bwe nibwija n’ebi arikukunda nibikorwa. Kandi Yesu akeegyesa ngu n’eky’oburyo kushaba Ruhanga kutuhwera kutunga eby’okutubaisaho. (Matayo 6:9-13; Luka 11:2-4) Yesu arikukoresa eby’okureeberaho, akooreka ngu titwine kuhanika, twine kugira okwikiriza kandi tube abacureezi twaba nitwenda ngu okushaba kwaitu kugarukwemu. (Luka 11:5-13; 18:1-14) Kandi eky’okureeberaho kye omu kushaba kikoongyera kuhamiiriza enshonga egyo.—Matayo 14:23; Mako 1:35.

Hatariho kubangaanisa obuhabuzi obwo bukahwera abeegi ba Yesu kwongyera kushaba gye. Kwonka, Yesu akagumisiririza abeegi be kuhitsya aha kiro ekyahereerukireyo ari omu nsi kubaasa kubeegyesa eishomo rikuru ry’okushaba.

“Obu Okushaba Kwahindukira Kimwe omu Byafaayo”

Yesu akamara ekiro ekyahereerukireyo ari omu nsi arikugumya entumwa ze abeesigwa. Nibwo bwabaire buri obwire burungi bw’okubashuuruurira ekintu kisya ngu, “niinye muhanda, n’amazima, n’amagara. Tihariho oija ahari Isheboona, atarabire muriinye.” Bwanyima akabahamiza arikubaraganisa ati: ‘Kyona eki murishaba omu iziina ryangye, ndyakikora, Isheboona abone kuhimbisibwa omu Mwana. Ku murishaba ekintu kyona omu iziina ryangye, ninyija kukikora.’ Akahendera ekigaaniiro kye arikugira ati: ‘Okuhitsya hati tihariho ki mwashabire omu iziina ryangye, mushabe, nimwija kuheebwa, okushemererwa kwanyu kubone kuhikiirira.’—Yohaana 14:6, 13, 14; 16:24.

Ebigambo ebi bikabahika aha mutima. Okucondooza kumwe nikugira kuti: “Obu nibwo okushaba kwahindukira kimwe omu byafaayo.” Yesu akaba atagyendereire kuzibira abeegi be kushaba Ruhanga. Kureka, akaba naatandikaho omuringo musya gw’okushaba Yehova Ruhanga.

Amazima gari ngu, butoosha Ruhanga atwire naahurira okushaba kw’abaheereza be abeesigwa. (1 Samueli 1:9-19; Zaaburi 65:2) Kwonka, kuruga obu yaakora endagaano n’eihanga rya Israeli, abaabaire nibenda ngu okushaba kwabo kuhurirwe bakaba baine kwetegyereza ngu Israeli n’eihanga rya Ruhanga eritoorainwe. Kandi bwanyima, omu bwire bwa Sulemaani bakaba baine hekalu mwanya gw’okuheramu Ruhanga ebitambo. (Eby’Ebiragiro 9:29; 2 Obusingye 6:32, 33) Kwonka, entebeekanisa egi ekaba eri ey’akaanya bwanya. Entumwa Paulo akahandiika aha biragiro ebyahairwe Abaisraeli n’aha bitambo ebyabaire nibiheebwayo aha hekalu ngu bikaba nibijwekyera “ebirungi ebyabaire nibyenda kwija, bitari byo buzima.” (Abaheburaayo 10:1, 2) Bikateeraho omuhanda okwija kw’ebintu ebyaabuzima. (Abakolosai 2:17) Kuruga 33 Y.A.K., okugira omukago murungi na Yehova kukaba kutarikwegamira aha kworobera Ebiragiro bya Musa. Kureka, aha kworobera ou ebiragiro byagambireho, niwe Kristo Yesu.—Yohaana 15:14-16; Abagalatia 3:24, 25.

Eiziina “Eririkukira Amaziina Goona”

Yesu akatandikaho omuringo ogurikukirayo ogw’okushabamu Yehova, ogurikutuhwera kumureeba nk’omunywani, owaatwiguriireho omuhanda kugira ngu okushaba kwaitu kuhurirwe Ruhanga. Ahabw’enki Yesu yaatukoreire ekintu ekyo?

N’ahabw’okugira ngu twena nituzaarwa tutahikiriire, tihaine orikubaasa kukora ekintu nari kuhayo ebitambo ebirikubaasa kutuhwera kushemera nari kugira omukago murungi na Yehova orikwera. (Abarooma 3:20, 24; Abaheburaayo 1:3, 4) Kwonka, Yesu akahayo amagara ge agahikiriire kubaasa kucungura abantu kuruga omu kibi. (Abarooma 5:12, 18, 19) Hati twena twine omugisha gw’okuba abashemeire omu maisho ga Ruhanga kandi twine obumanzi n’obwesigye okuhika ahari Ruhanga, kandi eki nikibaasika twaikiririza omu kitambo kya Yesu kandi tukashaba kurabira omuriwe.—Abaefeso 3:11, 12.

Twashaba turikukoresa eiziina rya Yesu, nitworeka ngu nitwikiririza omu mwanya gwe omu kuhikiriza ekigyendererwa kya Ruhanga: (1) Niwe “mwana gw’entaama wa Ruhanga,” ou ekitambo kye kirikutubaasisa kusaasirwa ebibi. (2) Yehova akamuzoora kandi hati n’omunyamurwa omukuru orikuhayo omuhendo gw’ekitambo. (3) Niwe wenka owaatuteraireho omuhanda gw’okuhika ahari Yehova kurabira omu kushaba.—Yohaana 1:29; 14:6; Abaheburaayo 4:14, 15.

Nituhaisa Yesu ekitiinisa twashaba turikukoresa eiziina rye. Kandi ekyo kihikire, ahakuba n’ekigyendererwa kya Yehova ngu “boona abari omu iguru n’omu nsi n’okuzimu batsimbire amaju eiziina rya Yesu. . . , kandi endimi zoona zaature ku Yesu Kristo ari Mukama, Ruhanga Tataitwe ahimbisibwe.” (Abafilipi 2:10, 11) Okukira byona, okushaba omu iziina rya Yesu, nikihimbisisa Yehova, owaahaireyo Omwana we ngu tugasirwe.​—Yohaana 3:16.

Baibuli neekoresa ebitiinisa n’amaziina gatari gamwe kutuhwera kwetegyereza omwanya mukuru gwa Yesu. Ebi nibituhwera kumanya emigisha mingi ei turikutunga ahabw’eki Yesu yaatukoreire, eki ariyo naatukorera, n’eki ari haihi kutukorera. (Reeba akabokusi “Omwanya Mukuru Gwa Yesu”.) Kandi Yesu akaheebwa eiziinaa “eririkukira amaziina goona.” Akaheebwa obushoboorozi bwona omu iguru n’omu nsi.—Abafilipi 2:9; Matayo 28:18.

Nikikira aha Kuba Omugyenzo

Eego, twine kukoresa eiziina rya Yesu twaba nitwenda ngu Yehova ahurire okushaba kwaitu. (Yohaana 14:13, 14) Kwonka titushemereire kugarukagarukamu ebigambo “omu iziina rya Yesu” nk’omugyenzo. Ahabw’enki?

Teekateeka aha ky’okureeberaho eki. Omushaija omushuubuzi yaakwoherereza ebaruha, neebaasa kuba neehendera n’ebigambo “nyowe munywani waawe owaabuzima.” Tugire ngu shi ebigambo ebi nibyoreka ngu omushuubuzi ogwo akwiniire enyehurira eyaabuzima, nari naakoresa ebigambo ebirikukira kukoresibwa kuhendera ebaruha? Buzima, okukoresa eiziina rya Yesu, kiine amakuru maingi munonga okukira ebigambo ebi omushuubuzi arikukoresa omu baruha. N’obu turaabe twine ‘kushaba butoosha,’ ekyo nitukikora twihire aha mutima, omu muringo gwaitu ogwa butoosha.​—1 Abatesalonika 5:17; Zaaburi 119:145.

Noobaasa kwetantara ota kutwara ebigambo “omu iziina rya Yesu” nk’ebigambo bugambo? Ahabw’enki otarikuteekateeka aha mitwarize ya Yesu erikushemeza? Teekateeka aha ebi yaaherize kukora n’ebi arikwenda kukukorera. Waaba nooshaba, siima Yehova kandi omuhimbise ahabw’omuringo murungi ogu yaakoreisemu Omwana we. Waakikora, noija kwongyera kugira obwesigye omu kuragaanisa kwe oku: ’Ku muraashabe Isheboona ekintu kyona omu iziina ryangye, naija kukibaha.’​—Yohaana 16:23.