Baibuli Neegamba ki aha Kutuura Hamwe Mutagaitsirwe?

Eki Baibuli erikugarukamu

Baibuli neegira ngu n’ekigyendererwa kya Ruhanga n’abantu ‘kwezibira, n’okwerinda obushambani.’ (1 Abatesalonika 4:3) Ekigambo “obushambani” nk’oku kirikukoresibwa omu Baibuli nikitwariramu kuteerana aheeru y’obushwere, ebikorwa by’obutingwa, n’okuteerana kw’omushaija n’omukazi batagaitsirwe.

Ahabw’enki Ruhanga naafayo yaaba omushaija n’omukazi bagaitwa nari banga?

Ruhanga niwe yaatandikireho obushwere. Ekyo akakikora obu yaagaita omushaija n’omukazi ab’okubanza. (Okutanidka 2:22-24) Akaba atarikwenda ngu omushaija n’omukazi batuure hamwe batagaitsirwe.
Ruhanga naamanya eky’oburungi bw’abantu. Akatandikaho obushwere kuba entebeekanisa y’obutwire ey’omushaija n’omukazi ey’okugasira ab’eka boona n’okubarinda. Teekateeka aha ky’okureeberaho eki ekyorobi. Nk’oku omuntu arikukuha engyenderwaho erikworeka oku oine kukwatanisa gye ekibaizirwe, nikwo na Ruhanga arikutuha obuhabuzi oburikutuhwera kuba abasinguzi omu maka gaitu. Butoosha emitindo ya Yehova neegasira abarikugigyenderaho.—Isaaya 48:17, 18.

Engyenderwaho y’omubaizi neeyoreka oku ekibaizirwe kirikuba kiine kukwatanisibwa. Obuhabuzi bwa Ruhanga nibworeka oku twine kugira amaka amasinguzi
Okuteerana aheeru y’obushwere nikubaasa kurugamu akabi kaingi. Nk’eky’okureeberaho, noobaasa kutwara enda ei otarikwenda, endwara z’obushambani, n’okugira amaganya maingi.a
Ruhanga akaha abashaija n’abakazi okubaasa kw’okuzaara kurabira omu kuteerana. Ruhanga naatwara amagara nk’agarikwera, kandi okuzaara n’ekiconco ky’omuhendo. N’ahabw’ekyo Ruhanga naayenda ngu ekiconco kyo tukikwate gye, turikuha entebeekanisa y’obushwere ekitiinisa.—Abaheburaayo 13:4.

Kandi shi okutuura hamwe batagaitsirwe kugyezesa kureeba yaaba nibabaasikana?

Tikirikwetengyesa omushaija n’omukazi kubanza kugyezesa kureeba yaaba nibabaasa kutuura hamwe. Kureka, omukago niguhama omushaija n’omukazi we baahamiranaho kandi bakakorera hamwe kushoboorora oburemeezi.b Obushwere nibuhamya okuhamiranaho.—Matayo 19:6.

Abashweraine nibabaasa kuhamya bata obushwere baabo?

Tihariho bushwere buhikiriire. Kwonka, omushaija n’omukazi we, nibabaasa kuba abasinguzi omu bushwere barikugyendera aha buhabuzi bwa Baibuli. Ebi n’eby’okureeberaho bimwe:

Yebeembeze eby’omukundwa waawe kukira ebyawe.—1 Abakorinso 7:3-5; Abafilipi 2:3, 4.
Mugirirane rukundo kandi muhaane ekitiinisa.—Abaefeso 5:25, 33.
Yega kurinda emigambire yaawe.—Enfumu 12:18.
Ba omugumisiriza kandi rahuka kusaasira.—Abakolosai 3:13, 14.

a Reeba ekicweka “Eminyeeto Nibabuuza . . . Ku Naakuba niingyemeserezibwa Kuteerana?”

b Reeba ekicweka “Amaka Amasinguzi—Okuhamiranaho.”