Yehova shi Naija Kugarukamu Okushaba Kwangye?

1-2. Ahabw’enki nitubaasa kuteekateeka ngu Yehova tarikugarukamu okushaba kwaitu?

‘SHEMERERERWA omuri [Yehova], nawe naija kukuha ebi omutima gwawe gurikwetenga.’ (Zab. 37:4) Okwo ka n’okuraganisa kurikushemeza! Kwonka shi twine kuteekateeka ngu Yehova naija kutuha buri kimwe eki turikumushaba ahonaaho? Ahabw’enki nitubaasa kwebuuza tutyo? Teekateeka aha mbeera ezi. Ka tugire ngu munyaanyazi-itwe otari mu bushwere naashaba Yehova kumuhwera kuza omu Ishomero ry’Ababuurizi b’Obukama. Kwonka hahingura emyaka mingi atarikwetwa kuza omu ishomero eryo. Ow’eishe-emwe muto naashaba Yehova kugira ngu akire endwara y’amaani ei arwaire, reero abaase kuheereza omu bwijwire omu kibiina. Kwonka abura kukira. Omuzaire Omukristaayo naashaba ngu omwana we agume omu mazima. Kwonka omwana acwamu kurekyera aho kuheereza Yehova.

² Obundi naiwe haine eki oshabire Yehova, kwonka tokakitungire. N’ahabw’ekyo, noobaasa kutandika kuteekateeka ngu Yehova naagarukamu okushaba kw’abandi, beitu kutari kwawe. Nari noobaasa kuteekateeka ngu haine ekibi eki okozire. Munyaanyazi-itwe orikwetwa Janiceb akeehurira atyo. We na iba bakashaba aha bikwatiraine n’ekigyendererwa kyabo ky’okuza aha Beseeli. Naagira ati: “Nkaba nimpamiza kimwe ngu nituza kwetwa aha Beseeli omu bwire bukye.” Kwonka hakahinguraho emyaka mingi batakeetsirwe. Janice naagira ati: “Nkaguubwa kubi kandi naashoberwa. Nkebuuza eki naabaire nkozire ekyareeteire Yehova kuguubwa kubi. Nkaba mmushabire kumpwera omu nshonga egi. Ahabw’enki atakagarukiremu okushaba kwangye?”

3. Nituza kushwijuma ki omu kicweka eki?

³ Obumwe, nitubaasa kwebuuza yaaba Yehova naahurira okushaba kwaitu. Naagwa n’abashaija abeesigwa aba ira bakaba nibeehurira batyo. (Yob. 30:20; Zab. 22:2; Hab. 1:2) Niki ekirikubaasa kukuhamiza ngu Yehova naija kuhurira okushaba kwawe? (Zab. 65:2) Kubaasa kutunga eky’okugarukamu ky’ekibuuzo eki, ka tubanze twagarukamu ebibuuzo ebi: (1) Yehova naija kutukorera ki? (2) Yehova naayenda tukore ki? (3) Ahabw’enki obumwe twine kuhindura omu bi turikumushaba?

YEHOVA NAIJA KUTUKORERA KI?

4. Kurugiirira ahari Yeremia 29:12, Yehova naaraganisa ki?

⁴ Yehova naaraganisa kuhurira okushaba kwaitu. (Shoma Yeremia 29:12.) Ruhanga naakunda abaheereza be abeesigwa, n’ahabw’ekyo tarikubaasa kwehuzya okushaba kwabo. (Zab. 10:17; 37:28) Kwonka, ekyo tikirikumanyisa ngu butoosha naija kutuha eki turikumushaba. Obumwe nikibaasa kutwetengyesa kutegyereza ensi ensya kubaasa kutunga bimwe aha bi turikushaba hati.

5. Yehova naihirira ahari ki kugarukamu okushaba kwaitu? Shoboorora.

⁵ Yehova naateeraho kureeba oku okushaba kwaitu kurikuhikaana n’ekigyendererwa kye. (Isa. 55:8, 9) Ekigyendererwa kye nikitwariramu okwijuza ensi abashaija n’abakazi abaine okushemererwa n’obumwe ahansi y’obutegyeki bwe. Sitaane naagira ngu abantu nibabaasa kuba gye baaba nibeetegyeka. (Kut. 3:1-5) Yehova kubaasa kworeka ngu eki Omuregi yaagambire n’ekishuba, aikiriize abantu kwetegyeka. Kwonka, obutegyeki bw’abantu bureetsireho oburemeezi bwingi obu turikureeba hati. (Mub. 8:9) Nitumanya ngu Yehova tarikwija kwihaho oburemeezi obu bwona omu bwire obu. Ku yaakukozire atyo, abamwe bakateekateekire ngu obutegyeki bw’abantu ni burungi, kandi ngu nibubaasa kumaraho oburemeezi bw’abantu.

6. Ahabw’enki twine kuhamya ngu Yehova butoosha naakora ebintu omu muringo gwa rukundo kandi ogw’oburingaaniza?

⁶ Yehova naabaasa kugarukamu okushaba kwaitu omu miringo etari emwe. Nk’eky’okureeberaho, obu Omugabe Hezekia yaabaire arwaire munonga, akeeshengyereza Yehova ngu amukize. Kandi, Yehova akamukiza. (2 Bag. 20:1-6) Kwonka, obu entumwa Paulo yaayeshengyereza Yehova kumujuna “eihwa omu mubiri,” obundi eyaabaire eri endwara, Yehova tarakikozire. (2 Kor. 12:7-9) Teekateeka n’aha ky’okureeberaho ky’entumwa Yakobo na Petero. Bombi bakaba boorekyeire okwitwa Omugabe Heroode. Ekibiina kikashabira Petero, obundi na Yakobo. Kwonka, Yakobo akaitwa, kandi Petero akahonokaho omu muringo gw’eky’okutangaaza. (Byak. 12:1-11) Nitubaasa kwebuuza tuti: ‘Ahabw’enki Yehova yaajunire Petero, kwonka atarajunire Yakobo?’ Ekyo Baibuli terikukigamba.c Kwonka twine obuhame ngu omuringo ogu Yehova arikukoramu ebintu n’ogw’oburingaaniza. (Bir. 32:4) Kandi, nitumanya ngu Petero na Yakobo bakaba nibasiimwa Yehova. (Kush. 21:14) Obumwe, Yehova naabaasa kugarukamu okushaba kwaitu omu muringo ogu tutarikuteekateeka. Ahabw’okugira ngu twine obwesigye ngu Yehova naagarukamu okushaba kwaitu omu muringo gwa rukundo kandi ogw’oburingaaniza, titurikubanganisa aha muringo ogu arikucwamu kukugarukamu.​—Yob. 33:13.

7. Nituteeraho kwetantara ki, kandi ahabw’enki?

⁷ Nituteeraho kwetantara kwegyeragyeranisa n’abandi. Nk’eky’okureeberaho, nitubaasa kushaba Yehova kutuhwera omu muringo gw’omutaano, kwonka okushaba kwaitu kubure kugarukwamu. Bwanyima, nitubaasa kumanya ngu omuntu ondiijo ashabire ekintu nikyo kimwe, kandi nikireebeka ngu Yehova amugarukiremu. Ekyo nikyo kyahikire ahari munyaanyazi-itwe Anna. Akashaba ngu iba, Matthew akire ekookoro. Kandi omu bwire nibwo bumwe, banyaanyazi-itwe babiri abakuzire bakaba nibateganisibwa ekookoro. Anna akashabira munonga Matthew na banyaanyazi-itwe abo. Banyaanyazi-itwe bo bakakira, kwonka Matthew we akafa. Omu kubanza, Anna akeebuuza yaaba Yehova niwe yaabahweraire kukira. Ku kiraabe nikwo kiri, ahabw’enki ataragarukiremu okushaba kwe ngu iba akire? Amazima gari ngu, titurikubaasa kumanya ahabw’enki banyaanyazi-itwe abo babiri baakizire. Kwonka nitumanya ngu Yehova naija kumariraho kimwe ebirikutureetera kubonabona, kandi aine ekihika ky’okuzoora banywani be abaafiire.​—Yob. 14:15.

8. (a) Kurugiirira ahari Isaaya 43:2, Yehova naatushagika ata? (b) Okushaba nikutuhwera kuta twaba twine oburemeezi? (Reeba vidiyo Okushaba Nikutuhwera Kugumisiriza.)

⁸ Yehova naija kuguma naatushagika butoosha. Ahabw’okugira ngu Yehova ni Tataitwe oine rukundo, tikirikumushemeza kureeba twine obusaasi. (Isa. 63:9) N’obu kiraabe kiri kityo, tarikuzibira oburemeezi kutuhikaho, oburikugyeragyeranisibwa nk’emigyera n’omuriro. (Shoma Isaaya 43:2.) Kwonka, naaraganisa ngu naija kutuhwera ‘kuburabamu.’ Kandi ngu tarikwija kwikiriza oburemeezi obwo kutuhitsyaho akabi ak’obutwire. Yehova naaraganisa n’okutuha omwoyo gwe ogurikwera kutuhwera kugumisiriza. (Luk. 11:13; Fil. 4:13) N’ekirikurugamu, nitubaasa kugira obwesigye ngu butoosha nitwija kuba twine kyenyini ekirikwetengyesa kugumisiriza n’okuguma turi abeesigwa.d

YEHOVA NAAYENDA NGU TUKORE KI?

9. Kurugiirira ahari Yakobo 1:6, 7, ahabw’enki twine kugira obwesigye ngu Yehova naija kutuhwera?

⁹ Yehova naayenda ngu tumwesigye. (Heb. 11:6) Obumwe, oburemeezi bwaitu nibubaasa kureebeka nk’obugumire kwemera. Nitubaasa n’okutandika kubangaanisa yaaba araatuhwere kubusingura. Kwonka Baibuli neetuhamiza ngu twaba twine amaani ga Ruhanga nitubaasa “kuguruka orugo.” (Zab. 18:29) N’ahabw’ekyo omu mwanya gw’okubangaanisa, twine kushaba Yehova twine okwikiriza, kandi twine obwesigye ngu naaza kugarukamu okushaba kwaitu.​—Shoma Yakobo 1:​6, 7.

10. Ha eky’okureeberaho kworeka oku turikubaasa kukora ebirikuhikaana n’okushaba kwaitu.

¹⁰ Yehova naayenda ngu tukore ebirikuhikaana n’okushaba kwaitu. Nk’eky’okureeberaho, ow’eishe-emwe naabaasa kushaba Yehova kumuhwera kutunga obwire bw’okuza aha ruteerane oruhango orw’ebiro bishatu. Yehova naabaasa kugarukamu ata okushaba oku? Naabaasa kuhwera ow’eishe-emwe kutunga obumanzi bw’okugamba na mukama we. Kwonka ow’eishe-emwe nawe naaba aine kukora ebirikuhikaana n’okushaba kwe akashaba mukama we orusa. Nikibaasa n’okumwetengyesa kukikora emirundi mingi. Naabaasa n’okushaba omukozi mugyenzi we kukora omu mwanya gwe yaaba atariho. Nari naabaasa kucwamu kutashashurwa obwire obu araabe atariho.

11. Ahabw’enki twine kushaba emirundi mingi aha bikwatiraine n’ebirikutwerarikiriza?

¹¹ Yehova naayenda ngu tumushabe emirundi mingi aha bintu ebirikutwerarikiriza. (1 Tes. 5:17) Ebi Yesu yaagambire nibyoreka ngu okushaba kwaitu obumwe nikubaasa kutagarukwamu ahonaaho. (Luk. 11:9) N’ahabw’ekyo titwine kubirugaho! Twine kushaba emirundi mingi twihire aha mutima. (Luk. 18:1-7) Twagumizamu nitushaba Yehova ekintu, nitworeka ngu ni kikuru ahariitwe. Kandi nitworeka ngu twine obwesigye ngu naija kutuhwera.

AHABW’ENKI OBUMWE TWINE KUHINDURA OMU BI TURIKUSHABA?

12. (a) Ni kibuuzo ki eki twine kwebuuza aha bikwatiraine n’okushaba kwaitu, kandi ahabw’enki? (b) Nitubaasa kworeka tuta ngu nituha Yehova ekitiinisa omu kushaba? (Reeba akabokusi “Okushaba Kwangye Nikworeka ngu Nimpa Yehova Ekitiinisa?”)

¹² Okushaba kwaitu kwaba kutagarukirwemu, nitubaasa kwebuuza ebibuuzo bishatu ebi. Eky’okubanza, ‘Ninshaba ekintu ekihikire?’ Kaingi, nitukira kuteekateeka ngu nitumanya ekirikukirayo oburungi. Kwonka eki turikushaba nikibaasa kuba tikyo ekiraatugasire nikibaasa kutatugasira. Twaba twine oburemeezi obu turikwenda ngu burugyeho, nihabaasa kuba hariho omuringo murungi gw’okubushoboorora kukira ogu turikushaba. Kandi obumwe ebi turikushaba nibibaasa kuba bitarikuhikaana n’ebi Yehova arikukunda. (1 Yoh. 5:14) Nk’eky’okureeberaho, teekateeka aha bazaire abaaba baagambirweho. Bakashaba Yehova ngu omwana waabo agume omu mazima. Okwo nikubaasa kuba kwabaire nikureebeka nk’okushaba okuhikire. Kwonka, Yehova tarikugyema muntu weena kumuheereza. Naayenda ngu buri omwe ahariitwe ayecweremu kumuramya, otwariiremu n’abaana baitu. (Bir. 10:12, 13; 30:19, 20) N’ahabw’ekyo abazaire abo bakaba nibabaasa kushaba Yehova kubahwera kuhika omwana waabo aha mutima kugira ngu abaase kukunda Yehova kandi abe munywani we.​—Enf. 22:6; Efe. 6:4.

13. Kurugiirira aha Abaheburaayo 4:16, Yehova naija kutuhwera ryari? Shoboorora.

¹³ Ekibuuzo kya kabiri, ‘Obu n’obwire buhikire Yehova kugarukamu okushaba kwangye?’ Obumwe nitubaasa kuba nitwenda ngu okushaba kwaitu kugarukwemu ahonaaho. Kwonka, Yehova naamanya obwire obuhikire obw’okukugarukamu. (Shoma Abaheburaayo 4:16.) Ahonaaho twaba tutatungire eki tushabire, nitubaasa kuteekateeka ngu Yehova ‘tagarukiremu’ okushaba kwaitu. Kwonka, naabaasa kuba ‘atakakugarukiremu.’ Nk’eky’okureeberaho, teekateeka aha w’eishe-emwe muto ou twagambaho owaashabire Yehova kumuhwera kukira. Kuri Yehova yaamukirize omu muringo gw’eky’okutangaaza, Sitaane akaba naabaasa kugira ngu ow’eishe-emwe ogwo naagumizamu kuheereza Yehova ahabw’okugira ngu akamukiza. (Yob. 1:9-11; 2:4) Kandi, Yehova ataireho obwire obu araihireho kimwe endwara zoona. (Isa. 33:24; Kush. 21:3, 4) Ekyo kitakabaireho, titwine kuteekateeka ngu nituza kukizibwa omu muringo gw’eky’okutangaaza. N’ahabw’ekyo, ow’eishe-emwe ogwo akaba naabaasa kushaba Yehova kumuha amaani n’obusingye bw’omu biteekateeko kugumisiriza endwara ye, kandi akagumizamu naamuheereza omu bwesigwa.​—Zab. 29:11.

14. Nitwegyera ki ahari Janice?

¹⁴ Ijuka Janice, owaashabire aha bikwatiraine n’okuza kuheereza aha Beseeli. Hakahinguraho emyaka etaano yaabona kumanya oku Yehova yaabaire agarukiremu okushaba kwe. Naagira ati: “Omu bwire obwo Yehova akanyegyesa bingi, kandi yaampwera kuba Omukristaayo murungi. Nkaba nyine kwongyera kumwesiga n’okuboneza omu ku ndikweyegyesa. Kandi nkaba nyine kwega kugira okushemererwa kw’omu mutima, okutarikwegamira aha mbeera ezi ndimu.” Bwanyima, Janice na iba bakeetwa kuheereza omu buheereza bwa saketi. Janice ku arikuteekateeka aha by’enyima naagira ati: “Yehova akagarukamu okushaba kwangye, omu muringo ogu naabaire ntarikuteekateeka. Kikantwarira obwire kureeba ngu eky’okugarukamu kye kikaba kiri kirungi, nimusiima munonga ahabwa rukundo n’embabazi ebi anyorekire.”

15. Ahabw’enki obumwe tutaine kugamba obushonshorekye bwona omu kushaba? (Reeba n’ebishushani.)

¹⁵ Ekibuuzo kya kashatu, ‘Mbwenu shi nyine kushaba ekintu ekindi?’ N’obu kiraabe kiri kirungi kugamba kyenyini eki turikwenda omu kushaba, obumwe Titwine kushaba turikugamba obushonshorekye bwona, kubaasa kureeba ekigyendererwa eki Yehova atwiniire. Teekateeka ahari munyaanyazi-itwe otari mu bushwere, otwire naashaba aha bikwatiraine n’okuza omu Ishomero ry’Ababuurizi b’Obukama. Naayenda kuza omu ishomero eryo kugira ngu abaase kuza ahu ababuurizi barikwendwa munonga. N’obu araabe naabaasa kugumizamu naashaba kwetwa omu ishomero eryo, naabaasa n’okushaba Yehova kumuhwera kumanya oku arikubaasa kwongyera aha buheereza bwe. (Byak. 16:9, 10) Reero naabaasa kukora ebirikuhikaana n’okushaba kwe arikubuuza omureeberezi wa saketi yaaba haine ekibiina ekiri haihi ahu baapayoniya barikwendwa munonga. Nari naabaasa kuhandiikira ofiisi y’eitaagi arikubuuza ahu ababuurizi b’Obukama barikwendwa munonga.e

16. Nitubaasa kugira buhame ki?

¹⁶ Nk’oku twayega, nitubaasa kugira obwesigye ngu Yehova naaza kugarukamu okushaba kwaitu omu muringo gwa rukundo, kandi ogw’oburingaaniza. (Zab. 4:3; Isa. 30:18) Obumwe okushaba kwaitu nikubaasa kugarukwamu omu muringo ogu tutarikuteekateeka. Kwonka Yehova tarikubaasa kwehuzya okushaba kwaitu. Naatukunda munonga, kandi tarikwija kututsigaho. (Zab. 9:10) N’ahabw’ekyo gumizamu ‘noomwesiga buri kaanya,’ omugambire byona oihire aha mutima.​—Zab. 62:8.