Eshuura Ya Ikumi Na Mukaaga
Hwera Eka Yaawe Kugira Ebiro by’Omumaisho Ebirungi
1. Ni kigyendererwa ki eki Yehova yaabaire aine omu kutaho entebeekanisa y’amaka?
OBU Yehova yaagaita Adamu na Haawa omu bushwere, Adamu akooreka ngu akashemererwa arikugamba ebigambo ebiri omu kyahandiikirwe eki. (Okutandika 2:22, 23) Kwonka, Omuhangi haine ekindi eki yaabaire agyendereire oyihireho okureetera abantu okushemererwa. Akaba naayenda ngu abashweraine n’ab’omu maka gaabo bakore ebi akunda. Akagambira abantu babiri ab’okubanza ati: “Muzaare, mukanye, mwijure ensi, ebe eyaanyu; mutegyekye eby’omu nyanja, n’ebirikuguruka omu mwanya, na byona ebiine amagara ebirikwegyendesa ahansi.” (Okutandika 1:28) Ogwo ka gwabaire guri omurimo murungi munonga! Bo n’abaana baabo ab’omu biro by’omumaisho ka baabaire nibaza kushemererwa kuri Adamu na Haawa baayorobeire Yehova!
2, 3. Amaka nigabaasa kutunga gata okushemererwa ebiro ebi?
2 Omu bunaku obu nabwo, ab’omu maka boona nibashemererwa baakora ebi Ruhanga akunda. Entumwa Paulo akahandiika ati: “Okwemanyiiza okutiina Ruhanga nikugasha omu muringo gwona ahakuba kwine eki kuturaganisa aha magara g’ebiro ebi n’ag’ebiro ebiriija.” (1 Timoseo 4:8) Eka erimu okutiina Ruhanga kandi erikugyendera aha buhabuzi oburi omu Baibuli neegira okushemererwa omu ‘biro ebi.’ (Zaaburi 1:1-3; 119:105; 2 Timoseo 3:16) N’obu omwe aha b’omu ka yaakuba niwe yaagyendera aha misingye ya Baibuli, embeera niziba nungi okukira haaba hataine n’omwe omu ka orikugigyenderaho.
3 Akatabo aka kagambire aha misingye mingi ya Baibuli erikubaasa kwongyera kuhwera ab’omu ka kushemererwa. Obundi oreebire ngu emwe negambwaho emirundi mingi omu katabo aka. Ahabw’enki? Ahakuba neeyoreka amazima agarikuhwera boona omu ka omu mbeera zitari zimwe na zimwe. Eka erikuteeraho kugyenderera aha misingye ya Baibuli neeshanga ngu okutiina Ruhanga buzima “kwine eki kuturaganisa aha magara g’ebiro ebi.” Ka tugarukye tureebe emisingye ena ahari egyo emikuru.
OBUKURU BW’OKUBA OMWERINZI
4. Ahabw’enki okwerinda ni kukuru omu bushwere?
4 Omugabe Sulemaani akagira ati: “Omuntu otarikubaasa kwezibira, ni nk’orurembo orusheenyirwe, rukagumira aho, rutaine rugo.” (Enfumu 25:28; 29:11) ‘Okwezibira,’ nari okwerinda ni kikuru ahari abo abarikwenda kugira obushwere oburimu okushemererwa. Okwikiriza ebintu bibi kukutaaha omu biteekateeko, nk’ekiniga nari okurigira okubi, nikiija kukureetaho obuhuta obutarikukira juba—beitu obwo ku bwakuba nibubaasa kukira.
5. Abantu abatahikiriire nibabaasa kugira bata omutwarize gw’okwerinda kandi ni birungi ki ebirikurugamu?
5 Kwonka, tihariho mwijukuru wa Adamu orikubaasa kutegyekyera kimwe omubiri gwe ogutahikiriire. (Abarooma 7:21, 22) Kwonka, okwerinda n’omutwarize gumwe ogu turikugira ahabw’omwoyo gurikwera. (Abagalatia 5:22, 23) N’ahabw’ekyo, omwoyo gwa Ruhanga ogurikwera nigutuhwera kuba abeerinzi twamushaba ngu agutuhe, twagyendera aha buhabuzi obuhikire oburikushangwa omu Byahandiikirwe, kandi twaguma nitukunda okuba n’abandi abaine omutwarize ogwo kandi tuketantara abo abatagwine. (Zaaburi 119:100, 101, 130; Enfumu 13:20; 1 Petero 4:7) Okukora tutyo nikiija kutuhwera ‘kwetantara obushambani,’ nangwa n’obu twakwohibwa. (1 Abakorinso 6:18) Nitwija kwetantara obushaarizi kandi twetantare n’obusinzi nari tubusingure. N’obucureezi nitwija kushoboorora embeera erikutugwisa kubi nari egumire. Twena hamwe otwariremu n’abaana, ka tuteereho kugira omutwarize ogwo ogu omwoyo gwa Ruhanga gurikutuhwera kugira.—Zaaburi 119:1, 2.
EMITEEKATEEKYERE MIRUNGI AHA BWEBEMBEZI
6. (a) Ni ntebeekanisa ki etairweho Ruhanga ey’obwebembezi? (b) Omushaija aine kwijuka ki obwebembezi bwe bwaba buri obw’okureeta okushemererwa omu ka ye?
6 Omusingye gwa kabiri mukuru n’okworobera obwebembezi. Paulo akashoboorora omuringo ogu ebintu bishemereire kugyendamu obu yaagira ati: “Niinyenda ngu imwe mumanye ku omutwe gw’omushaija ari Kristo, n’omutwe gw’omukazi ku ari iba, kandi omutwe gwa Kristo ku ari Ruhanga.” (1 Abakorinso 11:3) Eki nikimanyisa ngu omushaija niwe arikwebembera eka, omukazi we akamushagika, n’abaana bakoorobera abazaire baabo. (Abaefeso 5:22-25, 28-33; 6:1-4) Yetegyereze ngu omuntu yaayebembera omu muringo murungi nihabaho okushemererwa. Abashaija baanyineeka abarikworeka okutiina Ruhanga nibamanya ngu okuba omutwe gw’eka tikirikumanyisa okuba ngamba nyenka. Nibatooreza Yesu ori omutwe gwabo. N’obu araabe yaabaire naija ‘kutegyeka byona,’ Yesu ‘ta[ra]izire kuheerezibwa, kureka okuheereza abandi.’ (Abaefeso 1:22; Matayo 20:28) Omu muringo nk’ogwo, omushaija Omukristaayo tarikwebembera ka ye, ahabw’okweyendeza, kureka ahabw’okwenda kureeberera omukazi we n’abaana.—1 Abakorinso 13:4, 5.
7. Ni misingye ki y’omu Byahandiikirwe erikwija kuhwera omukazi kuhikiiriza obujunaanizibwa bwe omu ka?
7 Omukazi orikutiina Ruhanga tarikuhayahayana na iba nari kwenda kumutegyeka. Naashemererwa okuhwera iba n’okukwatanisa nawe. Baibuli neeyoreka gye ngu “omushaija niwe mutwe gw’omukazi.” (Abaefeso 5:23) Kurabira omu bushwere naaza ahansi ‘y’ekiragiro kya iba.’ (Abarooma 7:2) Kandi na Baibuli neemweta “omuhwezi.” (Okutandika 2:20) Naayoreka emitwarize ei omushaija we ataine, kandi naamuhwera. (Enfumu 31:10-31) Kandi Baibuli neegira ngu omukazi ni “mugyenzi” we orikukorera hamwe nawe. (Malaki 2:14) Emisingye y’omu Byahandiikirwe egi neehwera abashaija hamwe n’abakazi kwetegyereza gye omwanya ogu buri omwe aine n’okuhaana ekitiinisa.
‘ORAHUKYE KUHURIRA’
8, 9. Gamba emisingye emwe erikwija kuhwera boona omu ka kwongyera kushemeza omuringo ogu barikugaaniiramu.
8 Omu katabo aka, obukuru bw’okugaaniira nibugambwaho munonga. Ahabw’enki? Ahabw’okuba enshonga nizirahuka kushoboororwa abantu baagaaniira hamwe kandi bakahurikizana. Kigambirweho munonga ngu okugaaniira nikumanyisa buri omwe okugamba kandi akahurikiza mugyenzi we. Entumwa Yakobo akagira ati: “Omuntu weena arahukye kuhurira, kwonka atarahukiiriza kugamba.”—Yakobo 1:19.
9 Kandi ni kikuru ngu twegyendesereze omu bi turikugamba. Okurahukiiriza kugamba, entongane, nari okucwera abandi orubanja tibirikubaasisa okugaaniira kurungi kubaho. (Enfumu 15:1; 21:9; 29:11, 20) Nangwa n’obu ebi twakuba nitugamba byakuba bihikire, byagambwa omu muringo gw’obushaarizi, gw’amaryo, nari ogutarikworeka okufayo aha bandi, ekyo nikibaasa kusiisira kimwe embeera. Ebigambo byaitu bishemereire kuba birungi, “nk’ebirimu omwonyo.” (Abakolosai 4:6) Kandi bishemereire kuba “nk’amapeera g’ezaabu agari omu kiibo ky’efeeza.” (Enfumu 25:11) Amaka ageegire kugaaniira gye hamwe, nigaba gataire orutambwe ruhango omu kutunga okushemererwa.
OMUGASHO MUKURU OGWA RUKUNDO
10. Ni rukundo ya muringo ki eri nkuru omu bushwere?
10 Ekigambo “rukundo” omu katabo aka kirimu emirundi mingi. Noijuka omuringo gwa rukundo omukuru ogurikugambwaho omu katabo aka? N’eky’amazima ngu rukundo erikuba einwe abashweraine (Orugriika, eʹros) neehwera kihango omu bushwere, kandi omu bushwere oburungi, omukago guhami n’obunywani (Orugriika, phi·liʹa) nibyeyongyera kubaho ahagati y’omushaija n’omukazi we. Kwonka ekirikukira obukuru ni rukundo erikujwekyerwa ekigambo ky’Orugriika a·gaʹpe. Egi niyo rukundo ei twiniire Yehova, Yesu hamwe n’abataahi baitu. (Matayo 22:37-39) Niyo rukundo ei Yehova arikworeka abantu. (Yohaana 3:16) Ka ni kirungi okureeba ngu nitubaasa kworeka rukundo nk’egyo abu turi nabo omu bushwere hamwe n’abaana baitu!—1 Yohaana 4:19.
11. Rukundo neehwera eta abari omu bushwere kusingura?
11 Omu bushwere rukundo egi erikukirayo buzima niyo ‘ekomerana byona.’ (Abakolosai 3:14) Neekwataanisa hamwe abashweraine kandi ebareetera kwenda kukorerana ebirungi hamwe n’abaana baabo. Ab’omu ka ku barikutunga oburemeezi, rukundo neebahwera kubushoboorora bakwataniise. Nk’oku abashweraine barikugyenda nibakura, rukundo neebahwera kukwatanisa na buri omwe kusiima mugyenzi we. ‘Okukunda . . . tikwesherurira byakwo. . . . Kwemera byona, kwikiriza byona, kugira amatsiko ahari byona, kugumisiririza byona. Okukunda tikuremwa.’—1 Abakorinso 13:4-8.
12. Ahabw’enki abashweraine baaba nibakunda Yehova kirikuhamya obushwere bwabo?
12 Obushwere nibuhama na munonga abashweraine bombi baaba nibakunda Yehova. (Omubuurizi 4:9-12) Ahabw’enki? Entumwa Yohaana akahandiika ati: “Oku nikwo kukunda Ruhanga, itwe okworobera ebiragiro bye.” (1 Yohaana 5:3) N’ahabw’ekyo, abashweraine bashemereire kutendeka abaana baabo, ti habw’okugira ngu nibabakunda munonga, kwonka ahabw’okugira ngu Yehova naabaragiira kukikora. (Eky’Ebiragiro 6:6, 7) Bashemereire kwetantara eby’obushambani ti habw’okugira ngu nibakundana kwonka, kureka ahabw’okugira ngu nibakunda Yehova, ‘orikwija kucwera abashambani orubanja.’ (Abaheburaayo 13:4) N’obu omwe aha bashweraine yaakureeta oburemeezi bw’amaani omu bushwere, mutaahi we yaaba naakunda Yehova buzima naija kuguma naakuratira emisingye ya Baibuli. Kandi buzima, amaka agarimu okushemererwa n’ago agu abagarimu barikukundira kimwe Yehova!
EKA ERIKUKORA EBI RUHANGA AKUNDA
13. Okumariirira kukora ebi Ruhanga akunda nikuhwera kuta omuntu kwebembeza ebirikukirira kimwe obukuru?
13 Amagara g’Omukristaayo goona gashemereire kwetoororera aha kukora ebi Ruhanga akunda. (Zaaburi 143:10) Ekyo nikyo okutiina Ruhanga kirikumanyisa buzima. Okukora ebi Ruhanga akunda nikihwera amaka kuta omutima aha bintu ebikuru munonga. (Abafilipi 1:9, 10) Nk’eky’okureeberaho, Yesu akarabura ati: “Nkaija kutaanisa omwojo na ishe, omwishiki na nyina, omukazi na nyinazaara; abazigu b’omuntu baryaba ab’omu ka ye.” (Matayo 10:35, 36) Kandi kwo nk’oku Yesu yaagizire, abakuratsi be baingi bahiiganisiibwe ab’omu maka gaabo. Ka n’eky’obusaasi! N’obu kiraabe kiri kityo, rukundo ei twiniire abanyabuzaare teshemereire kukira ei twiniire Yehova Ruhanga na Yesu Kristo. (Matayo 10:37-39) Omuntu yaagumisiriza n’obu yaakuba nahakanisibwa ab’omu ka yaabo, abarikumuhiiganisa nibabaasa kuhinduka baareeba ebirungi ebirikuruga omu kutiina Ruhanga kwe. (1 Abakorinso 7:12-16; 1 Petero 3:1, 2) N’obu kyakuba kitabaire kityo, tihaine karungi akarikuruga omu kureka kuheereza Yehova ahabw’okuhakanisibwa.
14. Okukora ebi Ruhanga akunda nikiija kuhwera kita abazaire kutwaza omu muringo oguraagasire abaana baabo?
14 Okukora ebi Ruhanga akunda nikuhwera abazaire kucwamu gye. Nk’eky’okureeberaho, omu bicweka ebimwe abazaire nibatwara abaana nk’eky’eitungo, baine amatsiko ngu abaana baabo abo nibaija kubareeberera baakaikura. N’obu kiraabe kihikire abazaire kuteekateeka batyo, tibashemereire kuhiga abaana baabo kwemarira aha kusherura eby’obutungi. Nikiba kitari ky’omugasho aha baana, abazaire baabo baabareetera kureeba eby’obutungi nk’ebirikukira eby’omwoyo.—1 Timoseo 6:9.
15. Nyina wa Timoseo, Yunike akaba eky’okureeberaho kirungi ata omu kukora ebi Ruhanga akunda nk’omuzaire?
15 Eky’okureeberaho kirungi omu nshonga egyo ni Yunike, nyina Timoseo munywani wa Paulo. (2 Timoseo 1:5) N’obu iba araabe yaabaire atari mwikiriza, Yunike hamwe na Loisi nyineenkuru Timoseo bakatendeka Timoseo kutiina Ruhanga. (2 Timoseo 3:14, 15) Timoseo ku yaakuzire, Yunike akamwikiriza kuruga omu ka kugyenda kuhwera Paulo omu murimo gw’obumisani. (Ebyakozirwe 16:1-5) Yunike ka aine kuba yaashemereirwe omutabani ku yaahindukire omumisani murungi! Okwemarira ahari Ruhanga kwe kukaruga omu kutendekwa gye akiri muto. Buzima, Yunike akatunga okushemererwa n’okumarwa ku yaabaire ahurira oku Timoseo yaabaire naakora gye omu buheereza n’obu araabe yaabaire aba amwiniire orushusho.—Abafilipi 2:19, 20.
EKA HAMWE N’EBIRO BYAWE EBY’OMUMAISHO
16. Nk’omwana, Yesu akooreka kufayo ki okurungi, kwonka ekigyendererwa kye ekikuru kikaba kiri kiiha?
16 Yesu akakurira omu ka erikutiina Ruhanga, kandi ku yaakuzire yaayoreka ngu akaba naafayo ahari nyina. (Luka 2:51, 52; Yohaana 19:26) Kwonka ekigyendererwa kya Yesu ekikuru kikaba kiri okuhikiiriza ebi Ruhanga akunda, kandi ahariwe, eki kikaba nikitwariramu okuteeraho abantu omuhanda gw’okutunga amagara agatahwaho. Ekyo akakikora obu yaahayo amagara ge agahikiriire nk’ekitambo ahabw’abantu abasiisi.—Mako 10:45; Yohaana 5:28, 29.
17. Yesu okuguma ari omwesigwa kikabaasisa abo abarikukora ebi Ruhanga akunda kugira matsiko ki?
17 Yesu ku yaafiire, Yehova yaamuzoora yaamuha amagara n’obushoboorozi bwingi omu iguru, bwanyima yaamwemeka nk’Omugabe omu Bukama bw’omu iguru. (Matayo 28:18; Abarooma 14:9; Okushuuruurwa 11:15) Ekitambo kya Yesu kikabaasisa abantu abamwe kutooranwa kutegyeka nawe omu Bukama obwo. Kikateeraho n’abantu abandi ab’emitima egororokire omuhanda gw’okutunga amagara agahikiriire omuri paradiso omu nsi. (Okushuuruurwa 5:9, 10; 14:1, 4; 21:3-5; 22:1-4) Gumwe aha migisha mikuru ei twine ebiro ebi n’okubuurira bataahi baitu amakuru marungi ago.—Matayo 24:14.
18. Ni buhabuzi ki oburikuheebwa amaka na buri muntu okwe?
18 Nk’oku entumwa Paulo yaayorekire, okutiina Ruhanga nikuha abantu amatsiko ngu nibabaasa kutunga emigisha egyo omu magara ‘ag’ebiro ebiriija.’ Buzima ogwo nigwo muhanda ogurikukirayo oburungi ogw’okutungamu okushemererwa! Ijuka, ngu “ensi egi neehwaho n’okwetenga kwayo; kwonka okora ebi Ruhanga akunda, agumaho ebiro byona.” (1 Yohaana 2:17) N’ahabw’ekyo, yaaba ori omwana, omuzaire, omushaija nari omukazi, otakataahire mu bushwere oine abaana nari otabaine, teeraho kukora ebi Ruhanga akunda. Nangwa n’obu waakuba oine oburemeezi bw’amaani, otakaayebwa ngu ori omuheereza wa Ruhanga. Ebi orikukora ka bireetere Yehova okushemererwa. (Enfumu 27:11) Kandi teeraho kureeba ngu emitwarize yaawe neekureetera okushemererwa hati kandi eije ekuhaise n’amagara agatahwaho omu nsi ensya eri haihi kubaho.
EMISINGYE YA BAIBULI EGI NEEBAASA KUHWERA ETA . . . EKA YAAWE KUGIRA OKUSHEMERERWA?
Okwerinda n’omutwarize ogu turikubaasa kuteeraho kugira.—Abagalatia 5:22, 23.
Omushaija n’omukazi we baaba baine emiteekateekyere mirungi aha bwebembezi, nibafayo aha burungi bw’eka.—Abaefeso 5:22-25, 28-33; 6:4.
Okugaaniira nikutwariramu okuhurikiza.—Yakobo 1:19.
Okukunda Yehova nikuhamya obushwere.—1 Yohaana 5:3.
Okukora ebi Ruhanga akunda nikyo kigyendererwa kikuru eky’eka.—Zaaburi 143:10; 1 Timoseo 4:8.
[Akabokisi aha rupapura 188]
EKICONCO KY’OKUGUMA OTASHWEIRWE NARI OTASHWEIRE
Ti buri omwe ngu naashwerwa nari naashwera. Kandi ti boona abari omu bushwere ngu nibacwamu kuzaara abaana. Yesu owaabaire atashweire akagamba aha kutashwerwa nari kutashwera nk’ekiconco, kyakorwa “ahabw’obukama bw’omu iguru.” (Matayo 19:11, 12) Entumwa Paulo nawe akacwamu kutashwera. Akagamba aha kutaaha omu bushwere nari okutabutaahamu ‘nk’ekiconco.’ (1 Abakorinso 7:7, 8, 25-28) N’ahabw’ekyo, n’obu akatabo aka karaabe nikagamba aha bikwatiraine n’obushwere hamwe n’okworora abaana, titushemereire kwebwa emigisha erikuruga omu kuguma otashweirwe nari otashweire nari otazaire baana.