Eki Ruhanga Akukoreire

Eki nikyo ekyahandiikirwe ekirikukirayo kumanywa omu Baibuli yoona. Abantu nibagira ngu “tihariho kyahandiikirwe ekiri nk’ekyo ekirikushoboorora omukago oguri ahagati ya Ruhanga n’abantu n’omuhanda gw’okujunwa.” N’ahabw’ekyo, omu mahanga agamwe Yohaana 3:16 nari ebiri omu kyahandiikirwe ekyo, abantu baingi nibakira kubikoresa aha mikoro, kubibamba aha motoka, omu maju n’omu myanya endiijo.

Omu mbeera ezo zoona, abo abarikukoresa ebigambo ebyo nibakimanya ngu rukundo ei Ruhanga abainiire niyo eraababaasise kutunga amagara agatahwaho. Kandi shi iwe? Rukundo ya Ruhanga neekukwataho eta? Niki eki Ruhanga atukoreire ekirikworeka rukundo ye?

“OKU NIKWO RUHANGA YAAKUNZIRE ATYO ENSI”

Abantu baingi nibasiima Ruhanga ahabw’okuhanga ensi n’ebigirimu. Obukooko bukye munonga buhangirwe omu muringo gurikutangaaza ekirikworeka ngu hariho omuhangi w’obwengye. Abantu baingi nibasiima Ruhanga buri izooba ahabw’ekiconco ky’amagara. Kandi nibakimanya ngu Ruhanga niwe arikubaha ebi barikwetenga nk’omwitsyo, amaizi, eby’okurya, kandi naabaasisa n’ensi kwegarura busya kugira ngu babeho bashemereirwe omu bi barikukora.

Nikiba kihikire kusiima Ruhanga ahabw’ebintu ebyo byona ahabw’okuba niwe yaatuhangire kandi niwe arikutureeberera. (Zaaburi 104:10-28; 145:15, 16; Ebyakozirwe 4:24) Nitusiima rukundo ei Ruhanga atwiniire twateekateeka aha bi arikukora kubaisaho amagara. Entumwa Paulo akakigambaho ati: “[Ruhanga] aha abantu boona amagara n’omwitsyo na buri kintu kyona. Ahakuba omuriwe, tuba abahuriire, tugyenda kandi tugumaho.”​—Ebyakozirwe 17:25, 28.

Ruhanga tarikutworeka rukundo ye arikutureeberera omu by’omubiri byonka. Akatuhanga omu muringo ogurikukira ogw’enyamaishwa, ahabw’okugira ngu twine ekyetengo ky’okumuramya kandi nitubaasa kukiigutsa. (Matayo 5:3) Omu muringo ogwo, abantu abeesigwa baine ekihika ky’okuba “abaana” ba Ruhanga.​—Abarooma 8:19-21.

Yohaana 3:16 neegumizamu egira ngu, Ruhanga akooreka ngu naatukunda arikwohereza omwana we Yesu omu nsi kutwegyesa ebirikumukwataho n’okutufeera. Baingi nibagira ngu tibarikwetegyereza ahabw’enki kyabaire nikyetengyesa Yesu kutufeera n’oku okufa kwe kurikworeka rukundo ya Ruhanga. Ka tureebe oku Baibuli erikushoboorora ahabw’enki kyabaire nikyetengyesa Yesu kutufeera n’obukuru bw’okufa kwe.

“AKAHAYO OMWANA WE OMWE NYAMUNEGYERE”

Abantu boona nibafa, ahabw’okurwara, na bukuru. Kwonka ekyo tikyo kyabaire kiri ekigyendererwa kya Ruhanga. Akaha abantu b’okubanza omugisha gw’okugumaho ebiro byona omu nsi. Kwonka akaba abaragiire kumworobera. Ruhanga akagira ngu baaba batakozire batyo, nibaija kufa. (Okutandika 2:17) Omuntu w’okubanza akagomera Ruhanga, kandi ekyo kikamurugiraho okufa hamwe n’abaijukuru. “Nk’oku ekibi kyaizire omu nsi ahabw’okushiisha kw’omuntu omwe, kandi kikarugamu okufa, nikwo n’okufa kwabugire omu bantu boona, ahakuba boona bakashiisha.”​—Abarooma 5:12.

Ruhanga naakunda oburinganiza. (Zaaburi 37:28) N’obu kiraabe kiri kityo, Ruhanga akaba atarikubaasa kwehuzya okushiisha kw’omuntu w’okubanza, kwonka tarikufubira bantu arikubareka kubonabona kandi bakaguma nibafa ahabw’omuntu omwe ogwo. Omu mwanya gw’ekyo, arikututeeraho omusingye ogurikugira ngu “amagara garyarihwa agandi,” akooreka ngu n’omuringaniza arikubaasisa abantu abarikumworobera kugaruka kutunga amagara agatahwaho. (Okuruga 21:23) Nitubaasa kwebuuza tuti: Nitubaasa kugaruka kutunga tuta amagara agu Adamu yaafeereirwe? Eky’okugarukamu: Kikaba nikyetengyesa omuntu omwe kwehayo nari kuhayo ekitambo ekirikwingaingana n’amagara agahikiriire agu Adamu yaabaire aine.

Buzima, tihariho n’omwe ahari baijukuru ba Adamu owaabaire naabaasa kuhayo ekitambo nk’ekyo, kwonka we Yesu akaba naabaasa. (Zaaburi 49:6-9) Ahabw’okugira ngu Yesu akazaarwa ataine kamogo, akaba ahikiriire nka Adamu. Yesu akacungura abantu kuruga omu buhuuku bw’ekibi arikuhayo amagara ge. Ekyo kikooreka ngu akaha baijukuru ba Adamu omugisha gw’okwija kutunga amagara agahikiriire nk’agu Adamu yaabaire aine. (Abarooma 3:23, 24; 6:23) Twine kukora ki kubaasa kugasirwa ahabw’ekikorwa kya rukundo ekyo?

“OMUNTU WEENA ORIKUMWIKIRIZA”

Omuri Yohaana 3:16, harimu ebigambo ebi: “Omuntu weena orikumwikiriza [Yesu] arekye kuhwerekyerera, kureka atungye amagara agatahwaho.” Eki nikimanyisa ngu abantu baine kugira eki baakora kubaasa kutunga ekiconco ky’amagara agatahwaho. Okubaasa kutunga “amagara agatahwaho,” twine kwikiririza omuri Yesu kandi tukamworobera.

Noobaasa kwebuuza oti: ‘Okumworobera nikwizira nkahi? Mbwenu shi Yesu taragizire ngu, omuntu weena orikumwikiriza naija kutunga amagara agatahwaho?’ N’amazima, okwikiriza nikwetengyesa. Kwonka, okwikiriza ngu Yesu ariho tikyo kyonka ekirikwetengyesa. Kurugiirira aha kitabo Vine’s Expository Dictionary of Old and New Testament Words, ekigambo eki Yohaana yaakoreise nikimanyisa “okwesiga beitu kutari kwikiriza kwonka.” Kubaasa kusiimwa Ruhanga, tikirikumara omuntu kwikiriza Yesu nk’omujuni. Orikwikiriza aine kuteeraho kugyendera aha bi Yesu yaayegyeise. Haaba hatariho bikorwa, okwikiriza okw’omuringo gwona nikuba kuri okwa busha. Baibuli neegira ngu: “Okwikiriza okutaine kukora kuba kufiire.” (Yakobo 2:26) Omu muringo ogundi, nitubaasa kugira ngu omuntu aine kukora ebirikuhikaana n’ebi arikwikiriza.

Entumwa Paulo naagira ati: “Okukunda kwa Kristo nikwo kutugyema, nitumanyira kimwe ngu omwe akafeera boona . . . Kandi eki yaafeereire ahabwa boona n’eki; akafa ngu abariho barekye kuguma bariho ahabwabo bonka, kureka ahabw’Ogwo owaabafeereire akabazookyera.” (2 Abakorinso 5:14, 15) Okworeka okusiima kwaitu ahabw’ekitambo kya Yesu kiine kutureetera kukora empindahinduka omu magara gaitu, tutarikubaho ahabwaitu beitu ahabwa Yesu owaatufeereire. Eki nikimanyisa ngu twine kwebembeza ebi Yesu yaayegyeise. Tushemereire kukora empindahinduka omu bi turikucwamu kukora buri izooba. Abo abarikwikiririza omuri Yesu nibaija kutunga migisha ki?

“AREKYE KUHWEREKYERERA, KUREKA ATUNGYE AMAGARA AGATAHWAHO”

Aha muheru gwa Yohaana 3:16 nihooreka oku Ruhanga arikuraganisa abo abarikwikiririza omu kitambo kya Yesu kandi bakagyendera aha mitindo ya Ruhanga. Ruhanga naayenda ngu abantu abeesigwa nk’abo ‘barekye kuhwerekyerera, kureka batungye amagara agatahwaho.’ Abo abarikugasirwa ahabwa rukundo ya Ruhanga baine amatsiko gatarikushushana.

Abamwe, Yesu akabaraganisa amagara agatahwaho omu iguru. Akagambira abeegi be ngu akaba naaza kubatebeekanisiza omwanya ngu babaase kutegyeka nawe omu kitiinisa. (Yohaana 14:2, 3; Abafilipi 3:20, 21) Abo abarikuzooka kutunga amagara agatahwaho omu iguru “baryaba abanyamurwa ba Ruhanga na Kristo, bategyekye nawe okumara emyaka rukumi.”​—Okushuuruurwa 20:6.

Bakye aha bakuratsi ba Kristo nibo baraatungye omugisha ogwo. Yesu akagira ati: “Mutatiina, imwe obusyo obukye, ahabw’okuba Shoimwe naasiima munonga kubaha obukama.” (Luka 12:32) “Obusyo obukye” omubaro gwabo nigwingana ki? Okushuuruurwa 14:1, 4 nihagira hati: “Ku naimukize amaisho, naareeba Omwana gw’entaama ayemereire aha rushozi Saayuuni hamwe n’abantu akasiriira n’obukumi buna n’enkumi ina, aha buso bwabo hahandiikirweho eiziina rye n’eiziina rya Ishe . . . Abo bakacungurwa omu bantu okuba omuganuro ahari Ruhanga n’aha Mwana gw’entaama.” Waagyeragyeranisa 144,000 n’abantu nyamwingi abarabaireho omu nsi, nooreeba ngu buzima ‘n’obusyo obukye.’ Abo nibagambwaho nk’abagabe. Mbwenu shi nibaija kutegyeka baahi?

Yesu akagamba aha bantu abandi abeesigwa abaraagasirwe omu Bukama bw’omu iguru. Nk’oku kirikworekwa omuri Yohaana 10:16, Yesu akagira ati: “Nyine entaama ezindi, ezitari z’omu itsibikiro eri; nazo nshemereire kuzireeta, zihurire eiraka ryangye, zibe obusyo bumwe, n’omuriisa abe omwe.” Aba baine amatsiko g’okutunga amagara agatahwaho omu nsi, nk’agu Adamu na Haawa baabaire baine. Ekyo nitukimanya tuta?

Emirundi mingi, Baibuli neegamba aha birungi ebiraabe omu nsi. Okubaasa kureeba eki, shuuruura Baibuli yaawe oshome ebyahandiikirwe ebi: Zaaburi 37:9-11; 46:8, 9; 72:7, 8, 16; Isaaya 35:5, 6; 65:21-23; Matayo 5:5; Yohaana 5:28, 29; Okushuuruurwa 21:4. Ebyahandiikirwe ebyo nibyoreka ngu entaro, enjara, endwara, n’okufa nibiija kuhwaho. Nibigamba aha bwire obu abantu abeesigwa baraayombekye amaju bakagatuuramu, bakahinga omu bibanja byabo, bakoorora abaana omu nsi nungi etarimu kubonabona.a Emigisha nk’egyo iwe terikukushemeza? Twine enshonga nungi ezirikutureteera kwikiriza ngu okuraganisa okwo nikwija kubaho.

RUHANGA AKUKOREIRE BINGI

Ku orikuteekateeka aha bi Ruhanga akukoreire hamwe n’abantu boona, nikireebwa butunu ngu Ruhanga akozire ebintu bingi. Twine amagara, obwengye, okwetegyereza, n’ebi turikwetenga kubaasa kubaho. N’okukira munonga, ekitambo kya Yesu owaatufeereire nikibaasa kutugasira munonga nk’oku kirikworekwa omu Yohaana 3:16.

Nihaija kubaho obusingye obutaine bugarukiro ku turaatungye amagara agatahwaho omu nsi etarimu, ndwara, entaro, enjara, nari okufa. Kubaasa kutunga emigisha egyo oshemereire kugira eki waakora. N’ahabw’ekyo, ekibuuzo kiri ngu, niki eki iwe orikukorera Ruhanga?