Guma Oine Okushemererwa n’omu Myaka ya Bukuru

1-2. Yehova naareeba ata ab’eishe-emwe na banyaanyazi-itwe abeesigwa abakuzire? (Zaaburi 92:​12-14; reeba n’ekishushani.)

ABANTU baingi nibeehurira omu miringo etarikushushana baatandika kuhika omu myaka ya bukuru. Nk’eky’okureeberaho teekateeka ahari eki: Noijuka obu waabanza kureeba enju omu eishokye ryawe? Noobaasa kuba waateireho kuzihamu kugira ngu hatagira owaazireeba. Kwonka bwanyima okeetegyereza ngu okuzihamu tikirikwija kuremesa ezindi kumera. Eky’okureeberaho ekyo nikyoreka oku baingi barikuteeraho munonga kugira ngu batakaakaikura.

² Kwonka, Tataitwe ow’omu iguru tikwo arikureeba abaheereza be abari omu myaka ya bukuru. (Enf. 16:31) Naabagyeragyeranisa n’emiti erikubengyeya. (Shoma Zaaburi 92:​12-14.) Ahabw’enki? Ahakuba emiti neekira kugira amababi mingi n’ebirabyo ebirikuhuumura gye bwanyima y’okuhangaara emyaka mingi. Omuti gumwe ahari egyo ni Cherry ogwa Japan, ogurikwana ebirabyo nyamwingi. Emwe aha miti mirungi egyo neebaasa kuhangaara emyaka erikurenga omuri rukumi. Yehova naareeba abari omu myaka ya bukuru nk’ab’omuhendo, nk’emiti egyo erikureebeka gye. Naareeba emitwarize yaabo emirungi, okugumisiriza kwabo, n’okumuheereza omu bwesigwa kumara emyaka mingi.

3. Ha eby’okureeberaho oku Yehova yaakoreise abari omu myaka ya bukuru kuhikiiriza ekigyendererwa kye.

³ Omuntu yaakura tikirikumanyisa ngu Yehova naamureeba nk’otaine mugasho.a Amazima gari ngu Yehova naakira kukoresa abakuzire kuhikiiriza ekigyendererwa kye. Nk’eky’okureeberaho, Saara akaba akaikwire obu Yehova yaamugira ngu akaba naija kurugwamu eihanga rihango, kandi abe nyinenkuru wa Mesia. (Kut. 17:​15-19) Musa akaba ari omu myaka ya bukuru obu Yehova yaamutoorana kwebembera eihanga rya Israeli kuruga omuri Misri. (Kur. 7:​6, 7) Kandi entumwa Yohaana akaba ari omugurusi obu Yehova yaamuhwera kuhandiika ebitabo bitaano bya Baibuli.

4. Kurugiirira aha Enfumu 15:​15, niki ekirikubaasa kuhwera abakuzire kugumisiriza oburemeezi obu barikurabamu? (Reeba n’ekishushani.)

⁴ Abakuzire nibahikwaho oburemeezi oburikureetwa emyaka ya bukuru. Munyaanyazi-itwe omwe akagira ngu “tikyorobi kuba omu myaka ya bukuru.” Kwonka okushemererwab nikubaasa kuhwera abakuzire kugumisiriza oburemeezi oburikureetwa emyaka ya bukuru. (Shoma Enfumu 15:15.) Omu kicweka eki, nituza kureeba ebi abakuzire barikubaasa kukora kuguma bashemereirwe. Nituza n’okureeba oku abandi barikubaasa kuhwera ab’eishe-emwe na banyaanyazi-itwe abakuzire omu kibiina. Kwonka, ka tubanze tureebe ahabw’enki kitoorobi kuguma tushemereirwe twahika omu myaka ya bukuru.

OKU EMYAKA YA BUKURU ERIKUBAASA KUKWATA AHA KUSHEMERERWA KWAWE

5. Niki ekirikubaasa kureetera abakuzire kuhwamu amaani?

⁵ Niki ekirikubaasa kukumaramu amaani? Obundi nooyehurira kubi ahabw’okugira ngu tokibaasa kukora ebi waabaire nookora enyima. Noobaasa kuba nooyegomba obwire obu waabaire okiri muto, kandi oine amagara marungi. (Mub. 7:10) Nk’eky’okureeberaho, munyaanyazi-itwe Ruby naagira ati: “Okujwara emyenda nikiba kitoorobi ahakuba nooba nooshaasha omubiri gwona, kandi nooba otakibaasa kugyenda gye. N’ebintu ebyorobi nk’okwimutsya ekigyere kujwara sokusi nikiba kigumire munonga. Nyine obuhuruzi omu mikono, n’engaro zangye zigangaire, kandi eki nikindeetera kugumirwa kukora emirimo n’obu yaakuba eri mikye.” Kandi Harold, owaaheereizeho aha Beseeli naagira ati: “Obumwe nikingwisa kubi kureeba ngu tinkibaasa kukora ebintu ebi naabaire nkunda kukora. Nkaba nkira kwiruka, kandi nkaba ninkunda munonga omuzaano gwa baseball. Abu naabaire nzaana nabo bakaba nibakira kugira bati: ‘Omupiira muguhe Harold ahakuba tarikukira kuremwa kuteeba.’ Kwonka hati tindikuhamya yaaba nimbaasa n’okurekyera omupiira.”

6. (a) Ni nshonga ki ezindi ezirikubaasa kureetera abari omu myaka ya bukuru kuhwamu amaani? (b) Niki ekirikubaasa kuhwera abakuzire kumanya yaaba bashemereire kurekyera aho kuvuga? (Reeba ekicweka omu magaziini egi ekiine omutwe “Ndekyere aho Kuvuga?”)

⁶ Obumwe noobaasa kwehurira kubi ahabw’okugira ngu tihaine eki orikubaasa kukora otaine buhwezi bw’abandi. Noobaasa kuba nooyetenga omuntu w’okukureeberera, nari kufuruka okaza kutuura n’omwe aha baana baawe. Obundi nooyehurira kubi ahabw’amagara mabi, kandi ahabw’okugira ngu tokihweza gye, torikubaasa kwetwara ahu orikwenda, nari kuvuga. Buzima ekyo nikimaramu amaani! Kwonka ni kikuru kwijuka ngu omuhendo gwaitu ahari Yehova n’ah’abandi tigurikurugiirira aha kubaasa kwaitu kw’okwereeberera, kutuura twenka, nari okuvuga. Kandi nitubaasa kuhamiza kimwe ngu Yehova naayetegyereza enyehurira zaitu, kandi ekirikukira obukuru ahariwe n’eki turi omunda. Naayetegyereza rukundo ei tumwiniire, n’ei twiniire ab’eishe-emwe na banyaanyazi-itwe, kandi ekyo nikimushemeza munonga.—1 Sam. 16:7.

7. Niki ekirikubaasa kuhwera abakuzire abarikwehurira kubi ahabw’okuteekateeka ngu nibabaasa kufa batareebire emperu y’ensi egi?

⁷ Obundi nooyehurira kubi ahabw’okuteekateeka ngu noobaasa kufa otareebire emperu y’ensi egi. Ku oraabe nikwo orikwehurira, niki ekirikubaasa kukuhwera? Ijuka ngu Yehova akigumisiriize kureetaho emperu y’ensi egi embi. (Isa. 30:18) Kandi hariho enshonga ahabw’enki akigumisiriize. Okugumisiriza kwe nikuhwera abantu nyamwingi kutunga omugisha gw’okumumanya, reero bakacwamu kumuheereza. (2 Pet. 3:9) N’ahabw’ekyo waahwamu amaani, teeraho kuteekateeka aha ku abantu baingi baraagasirwe omu kugumisiriza kwa Yehova emperu etakahikire. Omuri abo nihabaasa kutwariramu n’ab’eka yaawe.

8. Oburemeezi oburikureetwa bukuru nibubaasa kureetera omuntu kutwaza ata?

⁸ Amazima gari ngu twaba tutarikwehurira gye nitubaasa kugamba, nari tukore ekintu eki turikubaasa kwefuuza. (Mub. 7:7; Yak. 3:2) Nk’eky’okureeberaho, omushaija omwesigwa Yobu ku yaahikirweho oburemeezi, akarahukiiriza kugamba. (Yob. 6:​1-3) Okwongyera ahari ekyo, oburwaire nibubaasa kureetera abakuzire kugamba, nari kukora ebintu batakigyendereire. Kwonka ekyo tikishemereire kuba rwekwatso y’okugambira abandi omu muringo mubi n’okubatwariza kubi okigyendereire. N’ahabw’ekyo waayetegyereza ngu haine ou ogambiire kubi, oteeziringa kumushaba okusaasirwa.—Mat. 5:​23, 24.

OKU ORIKUBAASA KUGUMA OSHEMEREIRWE

9. Ahabw’enki oine kwikiriza obuhwezi bw’abandi? (Reeba n’ebishushani.)

⁹ Ikiriza abandi kukuhwera. (Gal. 6:2) Obumwe ekyo nikibaasa kukugumira. Munyaanyazi-itwe orikwetwa Gretl naagira ati: “Obumwe nikigumira kwikiriza obuhwezi ahabw’okuteekateeka ngu ninyija kuba naaba omugugu aha abandi. Kintwariire obwire kuhindura emiteekateekyere yangye kubaasa kwikiriza obuhwezi.” Waikiriza obuhwezi bw’abandi, nikiija kubareetera kugira okushemerererwa okurikuruga omu kugaba. (Byak. 20:35) Kandi noija kushemererwa kureeba oku abandi barikukukunda n’oku barikukufaho.

10. Ahabw’enki oshemereire kworeka ngu noosiima? (Reeba n’ebishushani.)

¹⁰ Yoreka ngu noosiima. (Kol. 3:15; 1 Tes. 5:18) Abandi baatukorera ebirungi, obumwe nitubasiimira aha mutima kwonka twebwa kukyoreka. Kwonka, twamwenya, kandi tukabeebaza, nikibareetera kwehurira nk’ab’omuhendo kandi abarikusiimwa. Leah, orikureeberera abakuzire omu myaka aha Beseeli, naagira ati: “Munyaanyazi-itwe ou ndikureeberera naakira kumpandiikira kaada arikunsiima. Kaada egyo neeba etarimu bigambo bingi, kwonka neendeetera kwehurira gye. Buzima ninkunda kutunga kaada ezo, kandi nikinshemeza kumanya ngu naasiima ebi ndikumukorera.”

11. Noobaasa kuhwera ota abandi? (Reeba n’ebishushani.)

¹¹ Teeraho kuhwera abandi. Waateekateeka aha bandi, kandi okateeraho kubahwera, torikwija kuta omutima aha buremeezi bwawe. Enfumu ya Afrika emwe neegyeragyeranisa abari omu myaka ya bukuru n’ebitabo ebijwire obwengye. Kwonka ebitabo byaguma bibiikirwe omu madaara, tibirikubaasa kwegyesa abantu. N’ahabw’ekyo, waaba otagambiire abato ebi orikumanya, tibarikubaasa kukwegyeraho amashomo makuru. Babuuze ebibuuzo, reero obahurikirize baaba nibakugarukamu. Beegyese ahabw’enki okugyendera aha mitindo ya Yehova nikyo kirikukirayo oburungi, n’oku kiraabareetere okushemererwa. Hatariho kubangaanisa noija kutunga okushemererwa waahuumuriza banywani baawe abato, kandi okabagumya.—Zab. 71:18.

12. Kurugiirira ahari Isaaya 46:​4, Yehova naaraganisa kukorera ki abari omu myaka ya bukuru? (Reeba n’ebishushani.)

¹² Shaba Yehova amaani. N’obu oraabe noohurira oruhire omu mubiri n’omu nyehurira, Yehova we “tagwa nshazi, n’obu kwakuba okuruha.” (Isa. 40:28) Yehova naakoresa ata amaani ge agataine bugarukiro? Omuringo gumwe, n’okugumya abaheereza be abeesigwa abari omu myaka ya bukuru. (Isa. 40:​29-31) Nangwa, naaraganisa kubahwera. (Shoma Isaaya 46:4.) Kandi butoosha Yehova naahikiiriza ebi arikuraganisa. (Yos. 23:14; Isa. 55:​10, 11) Waamushaba, naija kukuha obuhwezi oburikwetengyesa, oreebe oku arikukukunda, kandi ekyo nikiija kukuhwera kugira okushemererwa.

13. Kurugiirira aha 2 Abakorinso 4:​16-18, tushemereire kwijuka ki? (Reeba n’ebishushani.)

¹³ Yeijutsye ngu embeera yaawe teraagumeho ebiro byona. Twaijuka ngu oburemeezi obu twine n’obw’akaire kakye, nikibaasa kutuhwera kubugumisiriza. Kandi Baibuli neetuhamiza ngu bukuru n’amagara mabi nibiija kuhwaho. (Yob. 33:25; Isa. 33:24) N’ahabw’ekyo, noobaasa kugira okushemererwa waamanya ngu embeera niziija kuba nungi omu biro by’omumaisho kukira ebiro eby’enyima. (Shoma 2 Abakorinso 4:​16-18.) Kwonka shi niki eki abandi barikubaasa kukora kuhwera abakuzire?

OKU ABANDI BARIKUBAASA KUHWERA ABAKUZIRE

14. Ahabw’enki ni kikuru kutaayaayira abari omu myaka ya bukuru n’okubateerera esimu?

¹⁴ Butoosha taayaayira ab’eishe-emwe na banyaanyazi-itwe abakuzire, kandi obateerere esimu. (Heb. 13:16) Abari omu myaka ya bukuru nibabaasa kwehurira nk’abatsigirweho. Ow’eishe-emwe otakibaasa kuruga omuka orikwetwa Camille naagira ati: “Nimba nyine kuguma omu nju kuruga omu kasheeshe kuhika omu mwabazyo. N’ahabw’ekyo ninkira kuba nyine ihamba. Obumwe ninyehurira nk’ekicuncu eki basibiraine omu kaju. Ninkira kutiina kandi obumwe nguubwa kubi.” Twataayaayira abakuzire, nitubahamiza ngu n’ab’omuhendo ahariitwe, kandi ngu nitubakunda munonga. Obundi nitubaasa kuba twarateekateekire kutaayaayira okuzire omu kibiina nari kumuteerera esimu, kwonka turemwa kukita omu nkora. Buzima twena twine bingi by’okukora. Mbwenu shi niki ekirikubaasa kutuhwera kumanya ebirikukira obukuru otwariiremu n’okutaayaayira abari omu myaka ya bukuru? (Fil. 1:10) Nikibaasa kukuhwera waahandiika aha rupapura nari omu karenda yaawe ngu obaase kwijuka kwoherereza abakuzire omu kibiina obutumwa nari kubateerera esimu. Noobaasa kutaho obwire bw’okubataayaayira kugira ngu otakaayebwa.

15. Abato nibabaasa kukora ki baaba bari hamwe n’abari omu myaka ya bukuru?

¹⁵ Waaba okiri muto, noobaasa kwebuuza ebi orikubaasa kugamba nari ebi orikubaasa kukora waaba ori n’abari omu myaka ya bukuru. Kwonka ekyo tikiine kukwerarikiriza. Ekikuru, teeraho kubanywana. (Enf. 17:17) Gaaniira nabo oruteerane rutakatandikire nari rwahendera. Obundi noobaasa kubabuuza ekyahandiikirwe eki barikukunda, nari ekintu ekirikushesya eki baakozire bakiri bato. Noobaasa n’okubeeta owaawe kureeba hamwe puroguraamu ya JW Broadcasting^®. Noobaasa n’okuhwera abakuzire omu miringo endiijo erikureebwa butunu. Nk’eky’okureeberaho, noobaasa kubahwera kukoresa gye esimu zaabo nk’okutamu ebitabo ebisya eby’okweshomesa n’eby’okukoresa omu nteerane. Munyaanyazi-itwe orikwetwa Carol naagira ati: “Yeheyo kukora ebintu ebi orikukunda ori hamwe n’abari omu myaka ya bukuru. N’obu ndaabe nkuzire, niinkyenda kwesiimira amagara. Ninkunda kuza kurambura, kurya hamwe na banywani bangye, n’okugira ebi naagura.” Kandi munyaanyazi-itwe orikwetwa Maira naagira ati: “Omwe ahari banywani bangye aine emyaka 90, kandi naankiza emyaka 57. Kwonka ekyo ninkira kukyehuzya ahabw’okuba nitukira kusheka hamwe n’okureeba hamwe za filimu. Kandi buri omwe naayehanuuza ahari mugyenzi we yaahikwaho oburemeezi.”

16. Ahabw’enki nikihwera abari omu myaka ya bukuru waagyenda nabo omu irwariro?

¹⁶ Gyenda nabo omu irwariro. Waagyenda nabo, teeraho kuhamya ngu abashaho baabatwariza gye, kandi ngu nibabafaho nk’oku kirikwetengyesa. (Isa. 1:17) Noobaasa kubahwera orikuhandiika ebi omushaho yaabagambira kuta omu nkora. Munyaanyazi-itwe okuzire orikwetwa Ruth naagira ati: “Obwire obwingi ku ndikuza omu irwariro nyenka, abashaho nibaandabyamu amaisho. Abashaho nibabaasa kungira ngu, ‘Toine ndwara yoona kureka nooteebereza ngu orwaire kyonka.’ Kwonka naaba ngyenzire n’omuntu ondiijo, abashaho nibanfaho munonga. Ninsiima ab’eishe-emwe na banyaanyazi-itwe abarikwehayo kugyenda naanye naaba ninza omu irwariro.”

17. Ni miringo ki y’okubuurira ei orikubaasa kwejumbamu n’abakuzire?

¹⁷ Kora nabo omu kubuurira. Bamwe aha bari omu myaka ya bukuru nibabaasa kuba bataine maani g’okuza kubuurira enju aha nju. Mbwenu shi noobaasa kweta munyaanyazi-itwe okuzire kukwegaitaho omu kubuurira murikukoresa akagaari? Noobaasa n’okumureetera entebe kugira ngu abaase kushutama haihi n’akagaari. Nari noobaasa kugyenda n’ow’eishe-emwe okuzire aha mwegi waawe wa Baibuli nari obundi oreete omwegi omuka y’ow’eishe-emwe ogwo kugira ngu mube niyo mwamwegyeseza. Abareeberezi nibabaasa kutaho entebeekanisa y’okugirira oruteerane rw’okuza omu kubuurira omu ka y’abakuzire kugira ngu kibaase kuboorobera kuzeejumbamu. Buri kyona eki turikukora kuha ekitiinisa abari omu myaka ya bukuru nikirugamu ebirungi.—Enf. 3:27; Rom. 12:10.

18. Nitwija kureeba ki omu kicweka ekirikukurataho?

¹⁸ Omu kicweka eki, twaijukibwa ngu Yehova naakunda abakuzire kandi naabatwara nk’ab’omuhendo. Naitwe nikwo twine kubatwariza. Emyaka ya bukuru neereeta oburemeezi, kwonka ahabw’obuhwezi bwa Yehova noobaasa kuguma oine okushemererwa. (Zab. 37:25) Noobaasa kugirira ekihika ebiro birungi ebi oraagire omu biro by’omumaisho. Kandi shi bamwe omuriitwe abarikureeberera abakuzire, omwana nari omunywani orwaire omu ka yaitu? Niki ekirikubaasa kukuhwera kuguma oine okushemererwa? Nituza kugarukamu ekibuuzo ekyo omu kicweka ekirikukurataho.