Obutumwa bukuru oburikugambwaho omu Baibuli n’Obukama bwa Ruhanga. Yehova naija kukoresa Obukama obwo kuhikiiriza ekigyendererwa kye eki yaabaire ainiire ensi omu kubanza. Obukama niki? Nitumanya tuta ngu buriyo nibutegyeka hati? Bwaherize kuhikiiriza ki? Kandi nibwija kukora ki omu biro by’omumaisho? Eishomo eri n’agandi abiri agarikukurataho nigagarukamu ebibuuzo ebi.

1. Obukama bwa Ruhanga niki, kandi Omugabe waabwo n’oha?

Obukama bwa Ruhanga ni gavumenti ei Yehova yaataireho. Omugabe waabwo ni Yesu Kristo, kandi naategyekyera omu iguru. (Matayo 4:17; Yohaana 18:36) Baibuli neeyoreka ngu Yesu naija kutegyeka nk’Omugabe “ebiro byona.” (Luka 1:32, 33) Yesu Omugabe w’Obukama bwa Ruhanga, naija kutegyeka buri omwe omu nsi.

2. Ni baahi abaraategyeke na Yesu?

Yesu tarikwija kutegyeka wenka. Abantu kuruga omu ‘nganda zoona n’endimi zoona n’amahanga goona,’ nibaija kutegyeka nawe ensi nk’abagabe. (Okushuuruurwa 5:9, 10) Ni bangahi abaraategyeke nawe? Kuruga obu Yesu yaabaire ari omu nsi, abantu nyamwingi baahindukire abakuratsi be. Kwonka abantu 144,000 bonka, nibo baraaze omu iguru kutegyeka nawe. (Shoma Okushuuruurwa 14:1-4.) Abakristaayo abandi boona nibaija kuguma omu nsi barikutegyekwa Obukama bwa Ruhanga.—Zaaburi 37:29.

3. Obukama bwa Ruhanga nibukira buta gavumenti z’abantu?

Nangwa n’obu abategyeki b’ensi barikuteeraho kukora ebintu birungi, tibaine maani g’okukora buri kimwe eki barikwenda. Kandi obunaku nibuhika abategyeki abandi abatarikufayo kuhwera abantu, baza omu bigyere byabo. Kwonka Yesu Omutegyeki w’Obukama bwa Ruhanga, tihaine oraamuhungurire. Ruhanga ‘akataho obundi bugabe, obutarikwija kucwekyerezibwa ebiro byona.’ (Danieli 2:44) Yesu naija kutegyeka ensi yoona, kandi tarikwija kushoroora omu bantu. Aine rukundo, embabazi, n’oburingaaniza, kandi naija kwegyesa abantu kutwariza bagyenzi baabo omu muringo nigwo gumwe.—Shoma Isaaya 11:9.

4. Gavumenti y’amaani neija kutegyeka ensi yoona

Yesu Kristo aine amaani maingi g’okutegyeka kukirira kimwe omutegyeki weena omu byafaayo. Shoma Matayo 28:18, kubaasa kugarukamu ekibuuzo eki:

• Obushoboorozi bwa Yesu nibukirira kimwe buta obw’abategyeki abandi?

Gavumenti z’abantu nizikira kuhinduka, kandi buri mutegyeki naaba naategyeka ekicweka kikye eky’ensi. Kandi shi Obukama bwa Ruhanga? Shoma Danieli 7:14, kubaasa kugarukamu ebibuuzo ebi:

• Ahabw’enki nikiija kuba kirungi Obukama bwa Ruhanga kugumaho ebiro byona?

• Ahabw’enki nikiija kuba kirungi Obukama bwa Ruhanga kutegyeka ensi yoona?

5. Obukama bwa Ruhanga bwine kuza omu mwanya gw’obw’abantu

Ahabw’enki Obukama bwa Ruhanga bwine kuza omu mwanya gwa gavumenti z’abantu? Zaana VIDIYO, kubaasa kugarukamu ekibuuzo ekirikukurataho.

VIDIYO: Obukama bwa Ruhanga Niki?—Ekicweka kya Vidiyo (1:41)

• Obutegyeki bw’abantu burugiremu ki?

Shoma Omubuurizi 8:9, kubaasa kugarukamu ekibuuzo eki:

• Ahabw’enki Obukama bwa Ruhanga bwine kuza omu mwanya gwa gavumenti z’abantu?

6. Abarikutegyeka omu Bukama bwa Ruhanga nibatwetegyereza gye

Ahabw’okugira ngu Omugabe waitu Yesu, akabaho omuntu naabaasa ‘kutusaasibwa’ omu bweremwa bwaitu. (Abaheburaayo 4:15) Yehova atooraine omu ‘nganda zoona n’endimi zoona n’abantu boona n’amahanga goona’ abashaija n’abakazi 144,000 abeesigwa kutegyeka na Yesu.—Okushuuruurwa 5:9.

• Ahabw’enki nikihuumuriza kumanya ngu Yesu n’abu araategyeke nabo nibeetegyereza obweremwa bw’abantu?

7. Obukama bwa Ruhanga bwine ebiragiro ebirikukirayo oburungi

Gavumenti z’abantu zishemereire kuba ziine ebiragiro ebirikugasira abantu n’okubarinda. Obukama bwa Ruhanga nabwo bwine ebiragiro ebi abantu baraabe niboorobera. Shoma 1 Abakorinso 6:9-11, kubaasa kugarukamu ebibuuzo ebi:

• Nooteekateeka ngu ensi neija kushusha ki buri omwe yaaba naayorobera emitindo ya Ruhanga ey’emicwe?a

• Ahabw’enki nooteekateeka ngu n’eky’oburyo Yehova kwenda ngu abarikutegyekwa Obukama bwe boorobere ebiragiro ebi?

• Niki ekirikworeka ngu abantu abatarikworobera ebiragiro ebi nibabaasa kuhinduka?—Reeba omushororongo 11.

OMU BUGUFU

Obukama bwa Ruhanga ni gavumenti eyaabuzima eri omu iguru eraategyeke ensi yoona.

Okweijutsya

• Ni baahi abarikutegyeka omu Bukama bwa Ruhanga?

• Obukama bwa Ruhanga nibukira buta gavumenti z’abantu?

• Yehova naayenda ngu abaraategyekwe Obukama bwe batwaze bata?

JUMBURA EBINDI

Yetegyereze ahu Yesu yaagizire ngu Obukama bwa Ruhanga buri.

“Obukama bwa Ruhanga shi Buri omu Mutima Gwawe?” (Eky’aha mukura)

Ahabw’enki Abajurizi ba Yehova nibashagika Obukama bwa Ruhanga beitu butari obw’abantu?

Okuhamira aha Bukama bwa Ruhanga (1:43)

Shwijuma eki Baibuli erikugamba aha bantu 144,000, abu Yehova atooraine kuza kutegyeka na Yesu.

“Ni Baahi Abarikuza omu Iguru?” (Eky’aha mukura)

Niki ekyahamiize omukazi owaabaire ari omu kihome ngu Obukama bwa Ruhanga nibwo bwonka oburaareeteho oburingaaniza omu nsi?

“Oku Naazoire Ahabw’enki Hariho Obutari buringaaniza” (Awake!, Novemba 2011)

Obukama bwa Ruhanga bukatandika kutegyekyera omu iguru omuri 1914. Obwo nibwo n’ebiro by’emperu eby’obutegyeki bw’abantu byatandika. Nitukimanya tuta? Yetegyereze obunabi bwa Baibuli, embeera omu nsi, n’oku abantu batwire nibatwaza kuruga 1914.

1. Obunabi bwa Baibuli nibworeka ki?

Ekitabo kya Baibuli ekya Danieli nikyoreka ngu Obukama bwa Ruhanga bukaba nibwija kutandika kutegyeka aha muheru gw’obwire oburikwetwa ‘omwanya gw’emyaka mushanju.’ (Danieli 4:16, 17) Bwanyima y’ebyasha bingi, Yesu akagamba aha bwire obwo ‘nk’obusingye bw’amahanga,’ kandi akooreka ngu bukaba butakahendeire. (Luka 21:24) Nk’oku turikuza kureeba, omwanya gw’emyaka mushanju gukahendera omuri 1914.

2. Ni mbeera ki na mitwarize ki etwire neereebwa butunu kuruga 1914?

Abeegi ba Yesu bakamubuuza bati: Ni ‘kamanyiso ki ak’okwija kwawe, [n’ak’okuhendera kw’entebeekanisa] y’ensi egi?’ (Matayo 24:3) Yesu akabagarukamu arikubagambira ebintu bingi ebyabaire nibiija kubaho bwanyima y’okutandika kutegyeka omu iguru nk’Omugabe w’Obukama bwa Ruhanga. Ebintu ebi nibitwariramu entaro, eibura ry’eby’okurya, n’emitsitsa. (Shoma Matayo 24:7.) Kandi Baibuli ekagira ngu entwaza y’abantu omu ‘biro by’emperu’ ekaba neija kureetera embeera kuba ezigumire kwemera. (2 Timoseo 3:1-5) Embeera ezi n’emitwarize nk’egi bitwire biriho kuruga 1914.

3. Ahabw’enki embeera zeeyongyeire kuba mbi omu nsi kuruga obu Obukama bwa Ruhanga bwatandika kutegyeka?

Yesu aherize kuba Omugabe w’Obukama bwa Ruhanga, akarwana orutaro na Sitaane na baadaimoni. Omu rutaro orwo Sitaane akasingurwa. Baibuli neegira ngu ‘akanagwa aha nsi na baamaraika be.’ (Okushuuruurwa 12:9, 10, 12) Sitaane aine ekiniga kingi ahabw’okuba naamanya ngu naaza kucwekyerezibwa. N’ahabw’ekyo, Sitaane naareeta obusaasi n’okubonabona omu nsi yoona. Tikirikutangaaza kureeba ngu embeera omu nsi ni mbi munonga! Obukama bwa Ruhanga nibwija kwihaho oburemeezi obu.

SHWIJUMA GYE

4. Kurugiirira ahari Baibuli Obukama bwa Ruhanga bukatandika kutegyeka 1914

VIDIYO: Obukama bwa Ruhanga Bukatandika Kutegyeka 1914 (5:02)

Ruhanga akareetera Omugabe Nebukadeneeza owa Babulooni eya ira kuroota ekirooto ky’obunabi. Ekirooto ekyo n’enshoboorora yaakyo ei Danieli yaahaire nibyoreka ngu kikaba nikikwata aha butegyeki bwa Nebukadeneeza hamwe n’Obukama bwa Ruhanga.—Shoma Danieli 4:17.a

Shoma Danieli 4:20-26, kandi okorese kyati kugarukamu ebibuuzo ebirikukurataho:

• (A) Nebukadeneeza akareeba ki omu kirooto?—Reeba omushororongo 20 na 21.

• (B) Niki ekyabaire nikiija kuhika aha muti?—Reeba omushororongo 23.

• (C) Niki ekyabaire nikiija kubaho aha muheru ‘gw’omwanya gw’emyaka mushanju’?—Reeba omushororongo 26.

Oku Ekirooto ky’Omuti Kirikukwata aha Bukama bwa Ruhanga

OBUNABI (Danieli 4:20-36)

Obutegyeki

(A) Omuti muhango munonga

Obutegyeki kuteganisibwa

(B) ‘Tema ogwo muti,’ reero hahingureho ‘omwanya gw’emyaka mushanju’

Obutegyeki kugarurwaho

(C) ‘Obugabe bwawe nibwija’ kukugarurirwa

Okuhikiirira kw’okubanza okw’obunabi obu . . .

• (D) Omuti gukaba nigujwekyera oha?—Reeba omushororongo 22.

• (E) Obutegyeki bwe bukateganisibwa buta? —Shoma Danieli 4:29-33.

• (F) Niki ekyahikire ahari Nebukadeneeza ‘omwanya gw’emyaka mushanju’ ku gwahendeire? —Shoma Danieli 4:34-36.

OKUHIKIIRIRA OKW’OKUBANZA

Obutegyeki

(D) Nebukadeneeza, Omugabe wa Babulooni

Obutegyeki kuteganisibwa

(E) Bwanyima ya 606 Y.A., Nebukadeneeza akagwa eiraro yaamara emyaka mushanju atarikutegyeka

Obutegyeki kugarurwaho

(F) Nebukadeneeza akakira eiraro yaagaruka omu butegyeki bwe

Okuhikiirira kwa kabiri okw’obunabi obu . . .

• (G) Omuti gukaba nigujwekyera baahi? —Shoma 1 Obusingye 29:23.

• (H) Obutegyeki bwabo bukateganisibwa buta? Nitumanya tuta ngu bakaba batarikutegyeka, obu Yesu yaabaire ari omu nsi?—Shoma Luka 21:24.

• (I) Obutegyeki obu bukagarurwaho ryari kandi nkahi?

OKUHIKIIRIRA OKWA KABIRI

Obutegyeki

(G) Abagabe ba Israeli abaabaire nibajwekyera obutegyeki bwa Ruhanga

Obutegyeki kuteganisibwa

(H) Yerusaalemu ekacwekyerezibwa, kyateganisa orunyiriri rw’abagabe ba Israeli kumara emyaka 2,520

Obutegyeki kugarurwaho

(I) Yesu akatandika kutegyeka omu iguru nk’Omugabe

5. Ensi ekahinduka kuruga 1914

Zaana VIDIYO.

VIDIYO: Ensi Ekahinduka Kuruga 1914 (1:10)

Yesu akagamba oku embeera zaabaire niziija kuba, yaaheza kuba Omugabe. Shoma Luka 21:9-11, kubaasa kugarukamu ekibuuzo eki:

• Iwe ni mbeera ki ezi orikureeba nizibaho, nari ezi orikuhurira?

Entumwa Paulo akashoboorora oku abantu baabaire nibaija kuba nibatwaza omu biro by’emperu eby’obutegyeki bw’abantu. Shoma 2 Timoseo 3:1-5, kubaasa kugarukamu ekibuuzo eki:

• Ni mitwarize ki ei orikukira kureeba omu bantu ebiro ebi?

6. Tushemereire kugira eki twakora kushagika Obukama bwa Ruhanga

Shoma Matayo 24:3, 14, kubaasa kugarukamu ebibuuzo ebi:

• Ni murimo ki omukuru ogurikworeka ngu Obukama bwa Ruhanga buriyo nibutegyeka hati?

• Noobaasa kwejumba ota omu murimo ogu?

Obukama bwa Ruhanga buriyo nibutegyeka hati, kandi buri haihi kutandika kutegyeka ensi omu bwijwire. Shoma Abaheburaayo 10:24, 25, kubaasa kugarukamu ekibuuzo eki:

• Buri omwe ahariitwe aine kukora ki obu turikureeba ekiro ky’emperu kiri haihi kuhika?

OMU BUGUFU

Obunabi, ebyabaireho, n’embeera, nibihamya ngu Obukama bwa Ruhanga buriyo nibutegyeka hati. Nitworeka ngu nitwikiriza eki, turikububuuriraho, turikuza n’omu nteerane.

Okweijutsya

• Hakabaho ki aha muheru gw’omwanya gw’emyaka mushanju eyaagambirweho omu kitabo kya Danieli?

• Niki ekirikukuhamiza ngu Obukama bwa Ruhanga bukatandika kutegyeka omuri 1914?

• Noobaasa kworeka ota ngu noikiriza ngu Obukama bwa Ruhanga buriyo nibutegyeka hati?

JUMBURA EBINDI

Yetegyereze eki ab’ebyafaayo n’abandi barikugamba aha mpinduka ezitwire niziba omu nsi kuruga 1914.

“Obu Emicwe Yaasiisikara Munonga” (Awake!, Apuri 2007)

Shoma oreebe oku obunabi oburi omuri Matayo 24:14 bwakwatsire aha mushaija omwe.

“Nkaba Ninkunda Omuzaano gwa Baseball Kukira Ebindi Byona!” (Omunaara gw’Omurinzi Na. 3 2017)

Nitumanya tuta ngu obunabi oburi omu Danieli eshuura 4 nibukwata aha Bukama bwa Ruhanga?

“Obukama bwa Ruhanga Bukatandika Kutegyeka Ryari? (Ekicweka 1)” (Omunaara gw’Omurinzi, Okitoba 1, 2014)

Niki ekirikworeka ngu ‘omwanya gw’emyaka mushanju’ ogurikugambwaho omu Danieli eshuura 4 gukahendera omuri 1914?

“Obukama bwa Ruhanga Bukatandika Kutegyeka Ryari? (Ekicweka 2)” (Omunaara gw’Omurinzi, Novemba 1, 2014)

Obukama bwa Ruhanga bwatandikire kutegyeka. Juba nibwija kureetaho empinduka mpango omu nsi. Ka tureebe ebirungi ebi Obukama bwa Ruhanga buraareete, ebi orikubaasa kugirira ekihika.

1. Obukama bwa Ruhanga nibwija kugaruraho buta obusingye n’oburingaaniza omu nsi?

Yesu, Omugabe w’Obukama bwa Ruhanga, naija kucwekyereza ababi na gavumenti z’abantu, omu rutaro rwa Haramagedoni. (Okushuuruurwa 16:14, 16) Obwire obwo ku buraahikye, eki Baibuli erikuraganisa nikiija kuhikiirira, ngu “bwanyima y’akaanya kakye omubi [naija kuba] atakiriho.” (Zaaburi 37:10) Yesu naija kukoresa Obukama obwo kureeta obusingye n’oburingaaniza omu nsi.—Shoma Isaaya 11:4.

2. Nihaija kubaho mbeera ki ebi Ruhanga arikukunda ku biraakorwe omu nsi?

Obukama bwa Ruhanga bwaba nibutegyeka ensi omu bwijwire, ‘abahikiriire nibaija kuhungura ensi, bagituuremu ebiro byona.’ (Zaaburi 37:29) Teera akashushani orikutuura omu nsi erimu abantu abahikiriire bonka, abarikukundana kandi abarikukunda na Yehova! Endwara niziija kuhwaho, kandi buri omwe naija kutuuraho ebiro byona.

3. Obukama bwa Ruhanga nibwija kuhikiiriza ki bwanyima y’ababi kucwekyerera?

Yesu yaaheza kucwekyereza ababi, naija kuba Omugabe kumara emyaka 1,000. Omu bwire obwo, Yesu n’abu araategyeke nabo 144,000, nibaija kuhwera abantu omu nsi kuba abahikiriire. Bwanyima y’emyaka 1000, ensi neija kuba eri paradiso nungi munonga, erimu abantu abashemereirwe abarikworobera ebiragiro bya Yehova. Bwanyima, Yesu naija kugarurira Yehova obutegyeki. Kandi eiziina rya Yehova ‘niriija kwezibwa,’ okukira obundi bwona. (Matayo 6:9, 10) Nikiija kuba kyayorekirwe butunu ngu Yehova n’omutegyeki murungi orikufayo aha bu arikutegyeka. Reero Yehova naija kucwekyereza Sitaane, baadaimoni, n’abandi abaraacwemu kuhakanisa obutegyeki bwe. (Okushuuruurwa 20:7-10) Embeera ezihikiriire eziraareetweho Obukama bwa Ruhanga niziija kugumaho ebiro byona.

SHWIJUMA GYE

4. Obukama bwa Ruhanga nibwija kumaraho gavumenti z’abantu

“Omuntu naayekuriza ahari mugyenzi we kumukora kubi.” (Omubuurizi 8:9) Yehova naija kukoresa Obukama bwe kumaraho obutari buringaaniza.

Shoma Danieli 2:44 na 2 Abatesalonika 1:6-8, kubaasa kugarukamu ebibuuzo ebi:

• Yehova n’Omwana we Yesu, nibaija kufubira bata gavumenti z’abantu n’abarikuzishagika?

• Ebi oyegire ahari Yehova na Yesu nibikuhamiza bita ngu ebi baraakore nibiija kuba bihikire kandi biri eby’oburingaaniza?

5. Yesu niwe Mugabe ohikire kutegyeka

Yesu Omugabe w’Obukama bwa Ruhanga, naija kukora bingi ebiraagasire abantu omu nsi. Zaana VIDIYO kureeba oku Yesu yaaherize kworeka ngu aine amaani kuruga ahari Ruhanga, n’ekihika ky’okuhwera abantu.

VIDIYO: Yesu Akooreka Eki Obukama Buraakore (1:13)

Ebi Yesu yaakozire obu yaabaire ari omu nsi, bikaba nibyoreka eki Obukama bwa Ruhanga buraakore. Aha migisha egi ni guuha ogu oiniire ekihika? Shoma Ebyahandiikirwe, ebirikuhikaana n’emigisha egyo.

6. Obukama bwa Ruhanga nibwija kureetaho nyentsya nungi

VIDIYO: Okuranzya omu Biro by’Omumaisho (4:38)

Shoma Zaaburi 145:16, kubaasa kugarukamu ekibuuzo eki:

• Nikikureetera kwehurira ota kumanya ngu Yehova naija ‘kuhaazya ebyetengo bya buri kintu kyona ekihuriire’?

OMU BUGUFU

Ruhanga naija kukoresa Obukama bwe kuhikiiriza ekigyendererwa kye. Nibwija kuhindura ensi yoona paradiso, eraabe erimu abantu barungi abarikuramya Yehova ebiro byona.

Okweijutsya

• Obukama bwa Ruhanga nibwija kweza buta eiziina rya Yehova?

• Ahabw’enki nituhamya ngu Obukama bwa Ruhanga nibwija kuhikiiriza ebi Baibuli erikuraganisa?

• Aha bintu ebi Obukama bwa Ruhanga buraahikiirize ni kiiha eki oiniire ekihika?

JUMBURA EBINDI

Manya eki Haramagedoni kirikumanyisa.

“Orutaro rwa Haramagedoni Niki?” (Eky’aha mukura)

Yetegyereze ebiraabeho omu ‘kubonabona kwingi.’—Matayo 24:21.

“Okubonabona Kwingi Niki?” (Eky’aha mukura)

Reeba oku amaka garikubaasa kuteekateeka hamwe aha migisha eraareetweho Obukama omu biro by’omumaisho.

Yereebe omu Nsi Ensya (1:50)

Omu kicweka “Nkaba Nyine Ebibuuzo Bingi,” reeba oku omuheekyera yaaboine eki yaabaire naasherura.

“Baibuli Neehindura Emitwarize y’Abantu” (Omunaara gw’Omurinzi, Jenwari 1, 2012)