Ni Mazima ki Agarikukwata Ahari Baamaraika?

Yehova naayenda ngu twegye ebirikukwata aha ka ye ey’omu iguru. Eka egyo erimu baamaraika, abarikwetwa ‘abaana ba Ruhanga.’ (Yobu 38:7) Baibuli neeyegyesa ki ahari baamaraika? Baamaraika nibatukwataho bata? Baamaraika boona shi bari omu ka ya Ruhanga?

1. Baamaraika ni baahi?

Yehova akahanga baamaraika atakahangire ensi. Baine omubiri nk’ogwe ogw’omwoyo, nibatuura omu iguru, kandi tibarikureebwa. (Abaheburaayo 1:14) Hariho obukaikuru bwa baamaraika, kandi buri omwe aharibo n’ow’omutaano. (Okushuuruurwa 5:11) ‘Nibakora ebi [Yehova] arikuragiira, nibahurira n’eiraka ry’ekigambo kye.’ (Zaaburi 103:20) Ira, Yehova obumwe akaba ayohereza baamaraika kureetera abantu obutumwa, kubashagika, n’okubajuna. Hati, baamaraika nibeebembera Abakristaayo kubahitsya aha bantu abarikwenda kwega ahari Ruhanga.

2. Sitaane na baadaimoni nibo baahi?

Baamaraika abamwe tibaragumire bari abeesigwa ahari Yehova. Maraika owaabandize kugoma naayetwa “Omuregi kandi Sitaane, [orikuhabisa] ensi yoona.” (Okushuuruurwa 12:9) Sitaane akaba naayenda kutegyeka abandi, n’ahabw’ekyo akagomesa abantu b’okubanza, kandi bwanyima akareetera na baamaraika abamwe kumwegaitaho. Baamaraika abo abagomi nibeetwa baadaimoni. Yehova akababinga omu iguru baija omu nsi, kandi nibaija kucwekyerezibwa.—Shoma Okushuuruurwa 12:9, 12.

3. Sitaane na baadaimoni nibateeraho kutuhabisa bata?

Sitaane na baadaimoni nibahabisa abantu kurabira omu by’obufumu, ekikorwa kibi ekirikutwariramu okuteeraho kuhurizana n’emyoyo emibi. Nk’eky’okureeberaho, abamwe nibateeraho kwebuuza aha barikuraguza enyonyoozi, abarangi, abarogi, n’abafumu. Abandi nibakoresa emiringo y’obujanjabi eine akakwate n’obufumu. Abantu nibabeihwabeihwa ngu nibabaasa kugamba n’abafu. Kwonka Yehova naaturabura ati: ‘[Murekye kusherura] abarikubandwa emizimu n’obu baakuba abarogi.’ (Abaleevi 19:31) Naatuha okurabura oku kuturinda Sitaane na baadaimoni. N’abazigu ba Ruhanga, kandi nibenda kutuhitsyaho akabi.

SHWIJUMA GYE

4. Baamaraika nibahwera abantu kwega ahari Yehova

Baamaraika ba Ruhanga tibarikubuurira abantu butunu. Kureka, nibahwera abaheereza ba Ruhanga kusherura abantu abarikwenda kwega ebirikumukwataho. Shoma Okushuuruurwa 14:6, 7, kubaasa kugarukamu ebibuuzo ebi:

• Ahabw’enki nitwenda ngu baamaraika batuhwere omu kubuurira?

• Ahabw’enki nikikugumya kumanya ngu baamaraika nibakuhwera kubona abarikwenda kwega Baibuli?

5. Yetantare obufumu

Sitaane na baadaimoni n’abazigu ba Yehova. Kandi naitwe n’abazigu baitu. Shoma Luka 9:38-42, kubaasa kugarukamu ekibuuzo eki:

• Baadaimoni nibatwariza bata abantu?

Titurikwenda kugira akakwate koona na baadaimoni. Shoma Eky’Ebiragiro 18:10-12, kubaasa kugarukamu ebibuuzo ebi:

• Abantu nibateeraho bata kukoragana na baadaimoni n’okugamba nabo? Ni bikorwa ki ebi abantu barikukira kwejumbamu ahu orikutuura?

• Ahabw’enki nooteekateeka ngu n’eky’obwengye Yehova kutuzibira kwejumba omu by’obufumu?

Zaana VIDIYO, kubaasa kugarukamu ebibuuzo ebirikukurataho.

VIDIYO: “Murwanise Sitaane” (5:02)

• Ahabw’enki nooteekateeka ngu akakomo aku muhara wa Palesa yaabaire ajwaire n’ak’akabi?

• Palesa akaba aine kukora ki kwerinda baadaimoni?

Abakristaayo abaabuzima batwire nibasingura baadaimoni. Shoma Ebyakozirwe 19:19 na 1 Abakorinso 10:21, kubaasa kugarukamu ekibuuzo eki:

• Ahabw’enki ni kikuru kucwekyereza ekintu kyona ekiine akakwate n’obufumu?

6. Ba omusinguzi omu kurwanisa Sitaane na baadaimoni

Baadaimoni nibategyekwa Sitaane. Kwonka baamaraika abeesigwa nibeebemberwa maraika omukuru Mikaeli, eiziina rya Yesu erindi. Mikaeli aine amaani garikwingana ki? Shoma Okushuuruurwa 12:7-9, kubaasa kugarukamu ebibuuzo ebi:

• N’oha orikukiza amaani? Ni Mikaeli na baamaraika be nari Sitaane na baadaimoni?

• Nooteekateeka ngu abakuratsi ba Yesu baine kutiina Sitaane na baadaimoni?

Noobaasa kusingura Sitaane na baadaimoni be. Shoma Yakobo 4:7, kubaasa kugarukamu ekibuuzo eki:

• Noobaasa kwerinda ota Sitaane na baadaimoni?

OMU BUGUFU

Baamaraika abeesigwa nibatuhwera. Sitaane na baadaimoni n’abazigu ba Yehova, kandi nibakoresa eby’obufumu kuhabisa abantu.

Okweijutsya

• Baamaraika ba Yehova nibahwera bata abantu kumwegaho?

• Sitaane na baadaimoni noobetegyereza ota?

• Ahabw’enki nooyenda kwetantarira kimwe eby’obufumu?

JUMBURA EBINDI

Reeba obuhame oburikworeka ngu Yesu niwe Mikaeli maraika omukuru.

“Mikaeli Maraika Omukuru n’Oha?” (Eky’aha mukura)

Yetegyereze obuhame oburikworeka ngu Sitaane Omuregi n’owaabuzima, beitu ti kibi ekiri omu bantu.

“Omuregi shi n’Owaabuzima?” (Eky’aha mukura)

Reeba oku omukazi yaayecwaire ahari baadaimoni.

“Akamanya Ekigyendererwa ky’Okugira Amagara” (Omunaara gw’Omurinzi, Gyuraayi 1, 1993)

Manya oku Sitaane arikukoresa eby’obufumu kubuzabuza abantu.

“Amazima Agarikukwata aha Burogi, Obucecezi, Okubandwa” (Oruguuto orw’Amagara Agatahwaho, ekicweka 5)