EISHOMO 15
Yesu n’Oha?
Yesu n’omwe aha bantu abarikukirayo kurangaanwa omu byafaayo. Kwonka abantu baingi nibamanya eiziina rye ryonka, tibarikumanya ebirikumukwataho, kandi abandi nibamugambaho ebitarikushushana. Baibuli neegamba ki ahari Yesu?
1. Yesu n’Oha?
Yesu n’ekihangirwe ky’omwoyo kandi naatuura omu iguru. Yehova Ruhanga niwe yaamuhangire atakahangire ekindi kintu. Niyo nshonga ahabw’enki naayetwa “omujigaijo omu byahangirwe byona.” (Abakolosai 1:15) Baibuli neeyeta Yesu ‘Omwana omwe nyamunegyere’ ahabw’okugira ngu Yehova niwe yaamwehangiire. (Yohaana 3:16) Yesu akahwera Ishe Yehova, omu kuhanga ebintu ebindi byona. (Shoma Enfumu 8:30.) Na hati Yesu akiine omukago guhami na Yehova. Naakora nk’omugambirizi wa Ruhanga nari “Kigambo,” arikureeta obutumwa n’obuhabuzi bwe.—Yohaana 1:14.
2. Ahabw’enki Yesu yaizire omu nsi?
Emyaka nka 2,000 ehingwire, omu muringo gw’eky’okutangaaza Yehova akafurura amagara ga Yesu kuruga omu iguru, yaagata omunda ya Mariamu omwishiki oshugaine. Reero yaazaarwa aine omubiri gw’abantu. (Shoma Luka 1:34, 35.) Yesu akaija omu nsi kworeka ngu niwe Mesia nari Kristo owaabaire araganisiibwe, n’okujuna abantu.a Obunabi bwa Baibuli bwona oburikukwata ahari Mesia bukahikiirira omuri Yesu, reero kyabaasisa abantu kumanya ngu niwe “Kristo, Omwana wa Ruhanga ohuriire.”—Matayo 16:16.
3. Yesu hati ari nkahi?
Bwanyima ya Yesu kufa, akazoorwa aine omubiri gw’omwoyo yaagaruka omu iguru. Reero, ‘Ruhanga akamukuza munonga’ yaamuha omwanya gw’ahaiguru. (Abafilipi 2:9) Hati, Yesu aine omwanya gw’obushoboorozi bwingi, niwe wa kabiri ahari Yehova.
SHWIJUMA GYE
Yongyera kumanya gye Yesu eki ari buzima n’enshonga ahabw’enki ni kikuru munonga kwega ebirikumukwataho.
4. Yesu ti Ruhanga ow’Obushoboorozi Bwona
Baibuli neeyegyesa ngu n’obu Yesu araabe ari ow’omwoyo kandi ow’amaani omu iguru, ari ahansi y’obushoboorozi bwa Ishe, Yehova Ruhanga. Ahabw’enki nitugira tutyo? Zaana VIDIYO kureeba oku Baibuli erikwegyesa ngu Yesu tarikwingana na Ruhanga ow’obushoboorozi bwona.
Ebyahandiikirwe ebi nibituhwera kwetegyereza omukago ogu Yehova aine na Yesu. Shoma buri kyahandiikirwe, kubaasa kugarukamu ebibuuzo ebirikukurataho:
Shoma Luka 1:30-32.
Maraika akashoboorora ata omukago ogu Yesu aine na Yehova Ruhanga “Rukira-boona”?
Shoma Matayo 3:16, 17.
Aha kubatizibwa kwa Yesu, eiraka kuruga omu iguru rikagamba ki?
Noogira ngu rikaba riri eiraka ry’oha?
Shoma Yohaana 14:28.
Omwana na Ishe n’oha orikukira obukuru, kandi oine obushoboorozi bwingi?
Yesu akaba naamanyisa ki okweta Yehova Ishe?
Shoma Yohaana 12:49.
Mbwenu shi Yesu naateekateeka ngu we na Ishe n’omuntu omwe? Iwe nooteekateeka ki?
5. Yesu akahamya gye ngu niwe Mesia
Baibuli erimu obunabi obwabaire nibwija kuhwera abantu kuhamya ngu Yesu niwe Mesia, ou Ruhanga yaatooraine kujuna abantu. Zaana VIDIYO ngufu erikworeka bumwe aha bunabi obu Yesu yaahikiriize obu yaabaire ari omu nsi.
Shoma obunabi bwa Baibuli obu, kubaasa kugarukamu ebibuuzo ebirikukurataho:
Shoma Miika 5:2 kumanya ei Mesia yaazaariirwe.b
Mbwenu shi okuzaarwa kwa Yesu kukahikiiriza obunabi obu?—Matayo 2:1.
Shoma Zaaburi 34:20 na Zekaria 12:10 kureeba obushonshorekye obwabaire nibugamba aha kufa kwa Mesia.
Mbwenu shi obunabi obu bukahikiirizibwa?—Yohaana 19:33-37.
Noogira ngu Yesu niwe yaareeteire obunabi obu kuhikiirira?
Mbwenu shi eki nikikuhamiza ki ahari Yesu?
6. Nitugasirwa twayega ebirikukwata ahari Yesu
Baibuli neeyoreka obukuru bw’okwega ebirikukwata ahari Yesu n’omwanya gwe. Shoma Yohaana 14:6 na 17:3, kubaasa kugarukamu ekibuuzo eki:
Ahabw’enki ni kikuru kwega ebirikukwata ahari Yesu?
Yesu akatuteeraho omuhanda gw’okuba banywani ba Ruhanga. Akeegyesa amazima agarikukwata ahari Yehova, kandi kurabira omuriwe nitubaasa kutunga amagara agatahwaho
ABAMWE NIBAGIRA NGU: “Abajurizi ba Yehova tibarikwikiririza omuri Yesu.”
Noobaasa kugarukamu ota?
OMU BUGUFU
Yesu n’ekihangirwe ky’omwoyo eky’amaani. Yesu n’Omwana wa Ruhanga kandi Mesia.
Okweijutsya
Ahabw’enki Yesu naayetwa “omujigaijo omu byahangirwe byona”?
Yesu akakora ki obu yaabaire atakaizire omu nsi?
Nitumanya tuta ngu Yesu niwe Mesia?
JUMBURA EBINDI
Yega ebirikukiraho ebirikukwata aha mwanya gwa Yesu nka Mesia.
“Obunabi shi Nibuhamya ngu Yesu Niwe Mesia?” (Eky’aha mukura)
Manya yaaba Baibuli neeyegyesa ngu Ruhanga akazaara Yesu butunu nk’oku abantu barikuzaara abaana baabo.
“Ahabw’enki Yesu Naayetwa Omwana wa Ruhanga?” (Eky’aha mukura)
Manya ahabw’enki enyegyesa y’Obushatu etarikwegamira ahari Baibuli.
“Mbwenu shi Yesu Niwe Ruhanga?” (Omunaara gw’Omurinzi, Apuri 1, 2009)
Shoma omanye oku embeera z’omukazi zaahindukire bwanyima y’okumanya eki Baibuli erikugamba ahari Yesu.
“Omuyudaayakazi Naashoboorora Ekyamureeteire Kushwijuma Okwikiriza Kwe” (Awake!, Mei 2013)
a Eishomo 26 na 27 nigaza kworeka ahabw’enki abantu baine kujunwa n’oku Yesu araatujune.
b Reeba Ebirikukiraho 2 kumanya obunabi oburikworeka obwire bwenyini obu Yesu yaabaire naija kureebeka omu nsi.