EISHOMO 22
Noobaasa Kubuurira Ota Abandi Amakuru Marungi?
Waaba nooyega amazima ga Baibuli, noobaasa kuteekateeka ngu, ‘buri omwe aine kugamanya!’ N’eky’amazima, buri muntu aine kugamanya! Kwonka, noobaasa kutiina kugambira abandi ebi oyegire. Ka tureebe oku orikubaasa kusingura okutiina okwo, reero okatandika kubuurira abandi amakuru marungi.
1. Ebi oyegire noobaasa kubigambira ota abu orikumanya?
Abeegi ba Yesu bakagira bati: “Titurikubaasa kuhunama kutagamba ebi twareebire, n’ebi twahuriire.” (Ebyakozirwe 4:20) Bakaba nibatwara amazima nk’ag’omuhendo munonga, kandi barikwenda kugagambira abantu baingi nk’oku kirikubaasika. Naiwe nikwo orikwehurira? Kyaba nikwo kiri, sherura oburyo bw’okugambira ab’eka yaawe nari banywani baawe ebi oyegire, omu muringo gw’ekitiinisa.—Shoma Abakolosai 4:6.
Oku orikubaasa kukikora
Waaba noogaaniira n’abanyabuzaare, noobaasa kwanjura enshonga oti: “Hariho ekintu eki nyegire saabiiti egi ekirikushemeza.”
Munywani waawe orwaire nari oyerarikiriire mushomere ekyahandiikirwe kirikuhuumuriza.
Abu orikukora nabo baakubuuza oku saabiiti ekugyendeire noobaasa kubagambira ebi oyegire obu obaire nooyega Baibuli, nari omu ruteerane rw’ekibiina.
Banywani baawe boorekye omukura jw.org/nyn.
Yeta abandi kukwegaitaho waaba nooyegyesibwa Baibuli, nari boorekye oku barikubaasa kushaba kwegyesibwa Baibuli kurabira aha jw.org/nyn.
2. Ahabw’enki okubuurira n’ekibiina kiri ekigyendererwa kirungi?
Abeegi ba Yesu bakakora ekirikukira aha kubuurira amakuru marungi agu baabaire nibamanya. Yesu ‘akabatuma babiri babiri, ngu bamwebembere bagyende omu tauni zoona’ kubuurira. (Luka 10:1) Entebeekanisa egyo ey’okubuurira ekahwera baingi kutunga omugisha gw’okuhurira amakuru marungi. Kandi abeegi bakashemererwa ahabw’okubuurira hamwe. (Luka 10:17) Mbwenu shi naiwe noobaasa kutaho ekigyendererwa ky’okubuurira n’abandi omu kibiina?
SHWIJUMA GYE
Yetegyereze oku orikubaasa kusingura okutiina, kandi okatunga okushemererwa okurikuruga omu kubuurira abandi amakuru marungi.
3. Yehova naija kukuhwera
Bamwe abarikwenda kubuurira nibabaasa kutiina oku abandi baraabareebe nari oku baraabatwarize omu kubuurira.
Ahabw’enki nootiina kugambira abandi ebi oyegire, nari otarikutiina?
Zaana VIDIYO, kubaasa kugarukamu ekibuuzo ekirikukurataho.
Abajurizi ba Yehova abato abo bakasingura bata okutiina kubuurira?
Shoma Isaaya 41:10, kubaasa kugarukamu ekibuuzo eki:
Waaba nootiina kubuurira, okushaba nikukuhwera kuta?
Eki waaba nookimanya?
Baingi obu baabaire batakabaire Abajurizi ba Yehova, bakaba nibeereeba nk’abatarikubaasa kubuurira abandi amakuru marungi. Nk’eky’okureeberaho, Sergey, akaba naayereeba nk’otaine mugasho, kandi arikugumirwa kugamba n’abantu. Kwonka bwanyima y’okwega Baibuli, naagira ati: “N’obu ndaabe naabaire nyine obwoba, nkatandika kugambira abandi ebi naabaire niinyega. Ekyantangaarize, okugambira abandi aha biri omu Baibuli kikampwera kwegiramu obwesigye. Kandi ebi naabaire niinyega bikoongyera kumpika aha mutima.”
4. Ha abandi ekitiinisa
Waaba noobuurira amakuru marungi, otateekateeka aha bi oraagambe byonka beitu n’oku oraabigambe. Shoma 2 Timoseo 2:24 na 1 Petero 3:15, kubaasa kugarukamu ebibuuzo ebi:
Noobaasa kugyendera ota aha byahandiikirwe ebi waaba noogaaniira n’abandi ahari Baibuli?
Bamwe aha b’eka yaawe nari banywani baawe nibabaasa kutaikirizana naiwe. Noija kukora ki? Niki eki otaine kukora?
Ahabw’enki ni kirungi kubuuza omu muringo gw’obwengye omu mwanya gw’okubagambira eky’okukora?
5. Okubuurira abandi amakuru marungi nikireeta okushemererwa
Yehova akaha Yesu omurimo gw’okubuurira amakuru marungi. Yesu akaba naatwara ata omurimo ogwo? Shoma Yohaana 4:34, kubaasa kugarukamu ebibuuzo ebi:
Okurya eby’okurya birungi nikituhwera kuguma tuhuriire kandi nikishemeza. Okukora ebi Ruhanga arikukunda, otwariiremu okubuurira amakuru marungi, ahabw’enki Yesu yaabigyeragyeraniise n’okurya eby’okurya?
Ni kushemererwa ki oku orikubaasa kutunga omu kubuurira amakuru marungi?
Obukoryo
Omu ruteerane rw’aha gati ya saabiiti, yega oku orikubaasa kutandika kubuurira abantu.
Teekateeka aha ky’okuba omwegi omu ruteerane rw’aha gati ya saabiiti. Embazo z’abeegi nizibaasa kukuhwera kwetebeekanisa kubuurira abandi ebi orikwega.
Koresa ebicweka “Abamwe Nibagira Ngu” nari “Omuntu Naabaasa Kubuuza Ati” ebiri omu kitabo eki kwegyezamu kumanya oku orikubaasa kugarukamu abarikubuuza n’abarikuhakanisa.
OMUNTU NAABAASA KUBUUZA ATI: “Ni bisya ki?”
Noobaasa kukoresa ota omugisha ogu kumugambira eki oyegire omu Baibuli?
OMU BUGUFU
Okubuurira abandi amakuru marungi nikireeta okushemererwa, kandi okutandika kukikora tikigumire nk’oku orikuteekateeka.
Okweijutsya
Ahabw’enki oine kubuurira abandi amakuru marungi?
Noobaasa kukikora ota omu muringo gw’ekitiinisa?
Noobaasa kusingura ota okutiina okubuurira?
JUMBURA EBINDI
Yetegyereze emiringo ena eyorobi oku orikubaasa kubuurira amakuru marungi orikukoresa kaada ya jw.org.
Manya emitwarize ena erikubaasa kukuhwera kubuurira abandi amakuru marungi.
“Oyeteekateekire Kuba Omujubi w’Abantu?” (Omunaara gw’Omurinzi, Seputemba 2020)
Reeba oku eky’okureeberaho ky’omu Baibuli kirikubaasa kukuhwera kugira obumanzi bw’okubuurira amakuru marungi, n’obu waakuba ori muto.
Manya oku orikubaasa kugaaniira n’ab’eka yaawe ahari Baibuli abataine ki baayegire ahari Yehova.
“Okuhika aha Mutima Abanyabuzaare Abatari Bakristaayo” (Omunaara gw’Omurinzi, Maaci 15, 2014)