EISHOMO 56
Reetaho Obumwe omu Kibiina
Twaba turi n’ab’eishe-emwe, nitwehurira nk’Omugabe Daudi owaagizire ngu ka ni “kirungi kandi ekirikushemeza, ab’eishe-emwe kutuura hamwe nibakwatanisa!” (Zaaburi 133:1) Obumwe bwaitu tiburikubaho bubaho. Hariho eki buri omwe arikukora kubureetaho.
1. Niki ekirikutaanisa abantu ba Ruhanga aha bandi?
Waaza omu ruteerane omu ihanga erindi, noobaasa kuba otarikumanya rurimi, kwonka noija kuhurira oikaikaine. Ahabw’enki? Ahabw’okuba nitwega Baibuli turikukoresa ebitabo nibyo bimwe omu nsi yoona. Kandi nitukundana. Yaaba nitutuura nkahi, twena nitugamba aha iziina rya Yehova, kandi ‘nitumuheereza n’omutima gumwe.’—Zefania 3:9.
2. Noobaasa kukora ki kureetaho obumwe?
“Mukundane munonga mwihire aha mutima.” (1 Petero 1:22) Noobaasa kugyendera ota aha buhabuzi obu? Omu mwanya gw’okuta omutima aha butahikiirira bw’abandi, bareebemu emitwarize mirungi. Omu mwanya gw’okushashaanuka n’abarikukunda ebi orikukunda bonka, teeraho kumanya Abakristaayo abatarikushushana naiwe. Kandi nituteeraho munonga kweihamu okushoroora kwona oku turikubaasa kuba twine.—Shoma 1 Petero 2:17.a
3. Noija kukora ki waagira obutaikirizana n’Omukristaayo mugyenzi waawe?
Twine obumwe, kwonka turi abatahikiriire. Obumwe nitureebyana, kandi tugwisana kubi. N’ahabw’ekyo Ekigambo kya Ruhanga nikigira ngu tugumizemu ‘nitusaasirana,’ nk’oku Yehova ‘yaatusaasiire tube nikwo twaguma nitutwaza.’ (Shoma Abakolosai 3:13.) Nitugwisa kubi Yehova emirundi mingi, kwonka naaguma naatusaasira. N’ahabw’ekyo naayenda ngu naitwe tusaasire ab’eishe-emwe bagyenzi baitu. Waamanya ngu haine ou okozire kubi, yehabure ogyende ogonjoore enshonga nawe.—Shoma Matayo 5:23, 24.b
SHWIJUMA GYE
Reeba oku orikubaasa kwongyera aha bumwe n’obusingye bw’ekibiina.
Noija kukora ki kugaruraho obusingye?
4. Singura okushoroora
Nitwenda kukunda ab’eishe-emwe boona. Kwonka nitubaasa kuba nitugumirwa kukunda abatarikushushana naitwe. Niki ekirikubaasa kutuhwera? Shoma Ebyakozirwe 10:34, 35, kubaasa kugarukamu ebibuuzo ebi:
Yehova naikiriza abantu b’emiringo yoona kuba Abajurizi be. Eki kishemereire kukwata kita aha ku orikureeba abandi ab’obukomooko burikutaana n’obwawe?
Ni miringo ki ey’okushoroora ei orikukira kureeba ei oine kwetantara?
Shoma 2 Abakorinso 6:11-13, kubaasa kugarukamu ekibuuzo eki:
Noobaasa kwirira ota haihi n’Abakristaayo abatarikushushana naiwe?
5. Saasira otataireho bushonshorekye, reero oreeteho n’obusingye
Yehova naatusaasirira busha n’obu we kiraabe kitarikumwetengyesa kutushaba okusaasirwa. Shoma Zaaburi 86:5, kubaasa kugarukamu ebibuuzo ebi:
Ekyahandiikirwe eki nikitwegyesa ki aha kusaasira kwa Yehova?
Ahabw’enki noosiima Yehova ahabw’okusaasira kwe?
Ni mbeera ki ezirikubaasa kutureetera kugumirwa kukwatanisa n’abandi?
Nitubaasa kutooreza tuta Yehova, kandi tukaguma twine obumwe n’ab’eishe-emwe na banyaanyazi-itwe? Shoma Enfumu 19:11, kubaasa kugarukamu ekibuuzo eki:
Omuntu yaakukora kubi, noobaasa kukora ki kugonjoora enshonga?
Obumwe nitugwisa kubi abandi. Ekyo kyabaho, nituba twine kukora ki? Zaana VIDIYO, kubaasa kugarukamu ekibuuzo ekirikukurataho.
Omu vidiyo egi, munyaanyazi-itwe akakora ki kureetaho obusingye?
6. Sherura ebirungi omu b’eishe-emwe na banyaanyako
Twamanya gye ab’eishe-emwe, nibwo turikumanya okubaasa kwabo n’obweremwa bwabo. Nitubaasa kuta omutima tuta aha mitwarize yaabo emirungi? Zaana VIDIYO, kubaasa kugarukamu ekibuuzo ekirikurataho.
Niki ekirikubaasa kukuhwera kureeba emitwarize mirungi y’ab’eishe-emwe na banyaanyako?
Yehova naata omutima aha mitwarize emirungi. Shoma 2 Obusingye 16:9a, kubaasa kugarukamu ekibuuzo eki:
Okumanya ngu Yehova naata omutima aha mitwarize yaawe emirungi nikikureetera kwehurira ota?
Nangwa n’empeta ya daimandi nungi neeba eine akamogo, kwonka nabwo neeguma eri ey’omuhendo. Nikyo kimwe, ab’eishe-emwe na banyaanyazi-itwe tibahikiriire, kwonka n’ab’omuhendo ahari Yehova
ABAMWE NIBAGIRA NGU: “Kubaasa kusaasirwa, oine kukoreerera okusaasirwa okwo.”
Ahabw’enki twine kuba tweteekateekire kusaasira abandi?
OMU BUGUFU
Noobaasa kureetaho obumwe omu kibiina orikusaasira ab’eishe-emwe na banyaanyako, kandi orikukunda boona.
Okweijutsya
Noobaasa kweihamu ota omutwarize gw’okushoroora?
Noija kukora ki waagira obutaikirizana n’Omukristaayo mugyenzi waawe?
Ahabw’enki nooyenda kutooreza Yehova omu kusaasira abandi?
JUMBURA EBINDI
Manya oku kimwe aha by’okureeberaho bya Yesu kirikubaasa kutuhwera kwetantara kucwera abandi orubanja.
Mbwenu shi oine kushaba okusaasirwa waaba noomanya ngu tiiwe oshobize?
“Okushaba Okusaasirwa ni Kikuru omu Kureetaho Obusingye” (Omunaara gw’Omurinzi, Novemba 1, 2002)
Reeba oku abamwe beegire kutashoroora bagyenzi baabo.
Yetegyereze oku orikubaasa kumaraho obutaikirizana na mugyenzi waawe, mutateganiise obusingye bw’ekibiina.
“Shoboorora Obutaikirizana omu Muringo gwa Rukundo” (Omunaara gw’Omurinzi, Mei 2016)
a Ebirikukiraho 6 nibyoreka oku rukundo erikuhiga Abakristaayo kwetantara kuturira abandi endwara.
b Ebirikukiraho 7 nibyoreka oku twine kugonjoora enshonga z’eby’obushuubuzi n’ez’ebiragiro.