Omuze Ogurikwita Abantu Baingi omu Nsi

Ab’eby’obushoboorozi nibateebereza ngu abantu baaba batahindwire aha mitwarize yaabo, omwaka 2030 gwaza kuhika, abarikwitwa okureetsa buri mwaka nibaija kurenga aha 8,000,000. Kandi nibateebereza ngu ekyasha kya 21 ahu kiraaze kuhwera, okureetsa nikwija kuba kwitsire abantu 1,000,000,000.

Abarikureetsa tibo bonka abu etaabe erikuhitsyaho akabi. Okureetsa nikuteganisa n’amaka agarikufeerwa abantu ahabw’okureetsa, abarikwehurira kubi n’abarikufeerwa esente zaabo, hamwe n’abantu 600,000 abatarikureetsa abarikufa buri mwaka ahabw’okwitsya omwika gw’etaabe kuruga aha barikureetsa. Oburemeezi obu nibukwata ahari buri omwe ahabw’okugira ngu esente z’eby’obujanjabi nizeeyongyera kutemba.

Okutashushana n’endwara ezindi ezirikwetengyesa ngu abashaho babanze bacondooze kubaasa kusherura omubazi ogurikuzitamba, okureetsa kwo kwine omubazi kandi nigumanywa. Dokita Margaret Chan, orikwebembera ekitongore ky’eby’obujanjabi omu nsi yoona, naagira ati: “Omuze ogu ogurikwita munonga abantu, nigutandikwaho abantu n’ahabw’ekyo gavumenti zaaba nizenda nizibaasa kuguhezaho.”

Amahanga omu nsi tigarikwikirizana aha bikwatiraine n’okutuubya omuze ogu. Omuri Agusto 2012, amahanga nka 175 gakaikirizana kugira eki gaakora kutuubya omuze gw’okukoresa etaabe.a Kwonka, hariho ebitongore by’amaani ebirikwenegyeza omuze ogu. Buri mwaka, amakorero ga tsigara nigashohoza obuhumbi bwa doora garikuranga kugira ngu gatungye abaguzi abasya, na munonga abaana, n’eminyeeto abarikutuura omu mahanga agakirikutunguuka. Aha bantu akahumbi kamwe abarikureetsa, baingi nibagumizamu nibareetsa ahabw’okugira ngu omuze gw’okureetsa gugumire eicwa. Abarikureetsa baaba batarekyeire aho, omuhendo gw’abo abarikwitwa etaabe nigwija kweyongyera omu myaka makumi ana erikwija.

Okuranga n’okugumirwa kucwa omuze ogwo, nibiremesa abantu kucwa omuze ogu baakubaire nibenda kucwa. Ekyo nikyo kyahikire ahari Naoko. Akatandika kureetsa akiri omunyeeto. Okutooreza abantu abaabaire niboorekwa omu birango, kikamureetera kwehurira nk’ori aha murembe. N’obu araabe yaareebire abazaire be barikwitwa ekokoro y’ebihaha, akagumizamu naareetsa kandi obwo arikworora abahara babiri. Naagira ati: “Nkaba nintiina kurwara ekokoro y’ebihaha kandi ndikwerarikirira n’aha magara g’abaana bangye.” Naayongyeraho ati: “Kwonka nkaba ntarikubaasa kurekyera aho. Nkaba ninteekateeka ngu tindikubaasa kucwa okureetsa.”

Kwonka, Naoko akacwa okureetsa. Ekintu ekihwereire abantu baingi kucwa okureetsa, nawe nikyo kyamuhwereire kukucwa. Ni kintu ki ekyo? Nyabura ‘we shoma ekicweka ekirikukurataho.