Sitaane shi n’Akamanyiso k’Ekibi?

Kyorobi kuteekateeka ngu Sitaane ou turikushomaho omu Baibuli n’akamanyiso akarikujwekyera ebintu byona ebibi. Kwonka shi buzima ekyo nikyo Baibuli erikwegyesa? Ku kiraabe nikwo kiri, ahabw’enki Baibuli neeyoreka ngu Sitaane akagamba na Yesu Kristo hamwe na Ruhanga ow’Obushoboorozi Bwona? Ka tushwijume emirundi ebiri obu yaakora eki.

OBU SITAANE YAAGAMBA NA YESU

Obu Yesu yaatandika kubuurira, Omuregi akateeraho emirundi eshatu kumureetera kwohibwa. Ogw’okubanza, Sitaane akateeraho kureetera Yesu kukoresa amaani agu yaahairwe Ruhanga omu muringo gw’okweyendeza kwigutsa enjara ye. Kandi, Omuregi akateeraho kureetera Yesu kuta amagara ge omu kabi n’okweteekateekaho. Bwanyima, Sitaane akagira ngu naija kuha Yesu obutegyeki bw’ensi bwona yainama akamuramya. Yesu akangira emitego eshatu egyo, buri murundi arikujuriza Ebyahandiikirwe.​—Matayo 4:1-11; Luka 4:1-13.

Mbwenu shi Yesu akaba naagamba n’oha? Akaba naagamba n’ekibi ekimurimu? Kurugiirira aha Byahandiikirwe, Yesu akoohibwa “omu miringo yoona nkaitwe kwonka We” tiyashiisha. (Abaheburaayo 4:15) Kandi Baibuli neegira ngu “tarakozire kibi; n’omu kanwa ke tihararugiremu bugobya.” (1 Petero 2:22) Yesu akaguma ahikiriire kandi ari omwesigwa. Taraikiriize kugira mutwarize gwona omubi. Yesu akaba atarikugamba n’ekibi ekimurimu, kureka akaba naagamba n’ekihangirwe kyenyine eky’omwoyo.

Okugaaniira okwo nikwongyera kuhamya ngu Sitaane n’ekihangirwe kyenyine ekiriho.

• Ijuka ngu Omuregi akagira ngu naija kuha Yesu obutegyeki bw’ensi bwona yainama akamuramya. (Matayo 4:8, 9) Sitaane kuri atari waabuzima tiyakubaasize kuha Yesu obutegyeki obwo. Kandi, Yesu tarabanganiise obushoboorozi bwa Sitaane.

• Yesu ku yaayangiire okwohibwa okwo, Omuregi “yaamurugaho, okuhitsya obu aribona ogundi mwanya.” (Luka 4:13) Sitaane ti kamanyiso k’ekibi, kureka n’omuzigu orikuremera aha nshonga.

• Yetegyereze ngu bwanyima “baamaraika” bakaija, baaheereza Yesu. (Matayo 4:11) Mbwenu shi baamaraika abo bakaba bari ebihangirwe by’omwoyo, barikugumya Yesu kandi bakamuhwera? Eego buzima. Mbwenu shi ahabw’enki twine kuteekateeka ngu Sitaane n’akamanyiso k’ekibi omu mwanya gw’okuba ekihangirwe ky’omwoyo?

OBU SITAANE YAAGAMBA NA RUHANGA

Obundi, n’obu Sitaane yaagamba na Ruhanga emirundi ebiri aha bikwatiraine na Yobu omuheereza we. Emirundi egi yombi, Ruhanga akaba asiima Yobu ahabw’obwesigwa bwe. Sitaane akagira ngu Yobu naaheereza Ruhanga ahabw’okweyendeza, arikworeka ngu Ruhanga akaba naagura Yobu kuba omwesigwa. Omuregi akaba naayetwara nk’orikwetegyereza gye Yobu okukira oku Ruhanga yaabaire naamwetegyereza. Yehova akaikiriza Sitaane kucwekyereza ebintu bya Yobu, abaana be, n’okumurwaza.a Bwanyima, kikeeyoreka gye ngu ebi Yehova yaagambire ahari Yobu bikaba bihikire kandi ngu Sitaane n’omubeihi. Ruhanga akaha Yobu emigisha ahabw’okuba omwesigwa.​—Yobu 1:6-12; 2:1-7.

Omu kugaaniira okwo, mbwenu shi Ruhanga akaba nagamba n’omutwarize mubi ogumurimu? Baibuli neegira eti: “Ruhanga ogwo, omuhanda gwe n’oguhikire.” (2 Samueli 22:31) Ekigambo kya Ruhanga nikyongyera kigira kiti: ‘Ruhanga ow’obushoboorozi bwona niwe Arikwera, Arikwera, Arikwera.’ (Okushuuruurwa 4:8) Ekigambo orikwera nikimanyisa ekishemeire, ekitaine kamogo, kandi ekitaanisiibwe n’ekibi. Yehova taine kamogo koona nari ekibi. Tarikubaasa kugira omutwarize gwona omubi.

Kwonka nabwo, abamwe nibabaasa kuteekateeka ngu Yobu akaba atari muntu owaabuzima, kureka ngu ebirikumukwataho n’omugane. Kwonka shi ekyo kihikire? Ebyahandiikirwe ebindi nibihamya ngu Yobu akaba ari omuntu owaabuzima. Nk’eky’okureeberaho, Yakobo 5:7-11, nitureeba ngu Yobu naagambwaho nk’ou Abakristaayo bashemereire kutooreza aha bikwatiraine n’okugumisiriza omu bwire bw’oburemeezi, kandi ngu Yehova naaha omugisha abo abarikugumisiriza. Mbwenu shi abantu bakabaasize kumutooreza ku ogire ngu akaba atari muntu owaabuzima, kandi n’okutaahirira kwa Sitaane ngu gukaba guri omugane? Kandi, omuri Ezekieli 14:14, 20, Yobu, Noa, na Danieli nibagambwaho nk’abashaija abahikiriire. Nka Noa na Danieli, Yobu akaba ari omuntu owaabuzima owaabaire aine okwikiriza kwingi. Yobu ku araabe yaabaire ari owaabuzima, mbwenu shi n’ogwo owaamutaahiriire kandi akamuhiiganisa tashemereire kuba yaabaire ari owaabuzima?

Hatariho kubangaanisa, Baibuli neeyoreka ngu Sitaane n’ekihangirwe ky’omwoyo. Kwonka noobaasa kwebuuza oti: ‘Naabaasa kundeetaho akabi n’ab’omu ka yangye obunaku obu?’

KANDI SHI OBUNAKU OBU?

Teera akashushani, abarikuhenda ebiragiro baataahirira ekicweka ekiri haihi n’orurembo oru orikutuuramu. Buzima, omu mwanya ogwo eby’okwerinda nibigaruka ahansi. Teekateeka aha ky’okureeberaho ekirikwenda kushushana n’ekyo: Sitaane na Baadaimoni be n’ebihangirwe eby’omwoyo ebyagomeire Ruhanga reero bikanagwa aha nsi. Niki ekyabaire nikiija kubaho? Teekateeka aha makuru agarikubaho omu kicweka kyanyu n’omu nsi yoona:

• Nooreeba ebikorwa bibi, n’obushaarizi birikweyongyera n’obu baraabe nibateeraho kubimaraho omu nsi yoona?

• Nooreeba eby’okweshemeza ebirimu eby’obufumu nibyeyongyera, n’obu abazaire baraabe nibafayo munonga aha baana baabo?

• Nooreeba obuhangwa nibucwekyerezibwa n’obu haraabe hariho abarikufayo munonga kuburinda?

• Nooreeba emitwarize y’abantu omu kicweka kyanyu esiisikaire, oshusha oti hariho amaani agarikureetera abantu kutwaza kubi?

Baibuli neegamba ahari ogwo orikureeta oburemeezi omu nsi eti: “Ekijoka ekyo ekihango ekya ira, ekirikwetwa Omuregi kandi Sitaane, orikugobeza ensi yoona, yaanagwa aha nsi na baamaraika be. . . . Iwe ensi, naiwe enyanja, muryareeba enaku ahabw’okuba omuregi yaabaizira n’ekiniga kingi, ahakuba naamanya ku aine omwanya mukye.” (Okushuuruurwa 12:9, 12) Bwanyima y’okwetegyereza enshonga egi, abantu baingi babaasize kuhamya ngu Sitaane n’ekihangirwe ky’omwoyo eky’akabi, ekirikugobeza ensi yoona.

Noobaasa kwebuuza ahu orikubaasa kwiha oburinzi. Buzima ekyo nikyo twine kwebuuza. Ekicweka ekirikukurataho nikiza kutuhwera.