Eki Abantu Barikugamba aha Kushaba
“Naayehurira nk’ohabire reero nkashaba, nimpurira nk’ori aha rubaju rwa Ruhanga ankwaitse omukono arikumpabura.”—MARÍA.
“Omukazi wangye akafa bwanyima y’okumara emyaka 13 aine ekookoro. Ninyijuka ndikushaba Ruhanga buri izooba reero nkahurira ngu buzima yaahurira obusaasi bwangye. Nkahurira naagira obusingye.”—RAÚL.
“Okushaba n’ekiconco kirungi eki Ruhanga ahaire abantu.”—ARNE.
María, Raúl, Arne, n’abandi baingi, nibareeba ngu okushaba n’ekiconco ky’omutaano. Nibamanya ngu kurabira omu kushaba nibabaasa kugambira Ruhanga, kumwebaza, n’okumushaba obuhwezi. Nibaikiririza kimwe eki Baibuli erikugamba aha kushaba Ruhanga eti: ‘Obu nibwo bumanzi obu twine omuriwe, ngu twashaba ekintu kyona nk’oku arikukunda, naatuhurira.’—1 Yohaana 5:14.
Kwonka, baingi nikibagumira kwikiriza eki Baibuli erikugamba aha kushaba. Steve naagamba oku yaabaire naatwara okushaba. “Obu naabaire nyine emyaka 17, banywani bangye bashatu bakafeera omuri butandu, omwe akagwa omuri butandu y’emotoka, kandi babiri bakagwa omu maizi.” Steve akakora ki? “Nkashaba Ruhanga kungarukamu ahabw’enki ebi byabaireho, kwonka tindatungire ky’okugarukamu. N’ahabw’ekyo nkebuuza nti: ‘Ninshabira ki?’” Okushaba okurikureebeka nk’okutarikugarukwamu kureetaire baingi kwebuuza yaaba buzima kiine amakuru kugumizamu nibashaba.
Kandi abantu nibeebuuza aha bukuru bw’okushaba ahabw’enshonga ezindi. Abamwe nibagira ngu obu Ruhanga arikumanya ebintu byona, naaba naamanya ebi turikwenda nari oburemeezi bwaitu, ti kikuru kubimugambira.
Abamwe nibateekateeka ngu Ruhanga naayanga kuhurira okushaba kwabo ahabw’enshobe ezi baakozire ira. Jenny naagira ati: “Oburemeezi bwangye obuhango, ninyehurira nk’otaine mugasho. Ntwire ninkora ebintu ebi ndikwefuuza, n’ahabw’ekyo Ruhanga tashemereire kuba naagarukamu okushaba kwangye.”
Iwe nootwara ota okushaba? Ku oraabe oreehuriireho otyo nari okabangaanisa, noobaasa kugira obuhame ngu Baibuli neekugarukamu omarwa. Nitubaasa kwesiga eki Baibuli erikugamba aha kushaba.a Neebaasa kutuhwera kutunga eby’okugarukamu by’ebibuuzo nk’ebi:
Buzima Ruhanga naahurira okushaba kwaitu?
Ahabw’enki okushaba okumwe kutarikugarukwamu?
Noobaasa kushaba ota kubaasa kuhurirwa Ruhanga?
Noogasirwa ota waashaba?
a Baibuli erimu okushaba kw’abaheereza ba Ruhanga baingi, otwariiremu okwa Yesu Kristo. Ebyahandiikirwe eby’Oruheburaayo, ebirikukira kwetwa Endagaano Enkuru birimu okushaba okurengire 150.