Gira Obwesigye ngu Yehova Naahuumuriza

1. Shoboorora embeera ei Abayudaaya enkwatwa baabaire barimu.

TEEKATEEKA aha ku Abayudaaya enkwatwa omuri Babulooni baine kuba baayehuriire. Bakareeba ensi yaabo erikucwekyerezibwa ahabw’ebibi byabo n’ebya baishenkurubo, kandi bakaihwa omu maka gaabo baatwarwa omu nsi endiijo. (2 Bus. 36:​15, 16, 20, 21) Enkwatwa omuri Babulooni bakaba baine obugabe buringaniire bw’okukora emirimo yaabo. (Yer. 29:​4-7) Kwonka, embeera zikaba zitoorobi, kandi bakaba nibagumirwa kuguma omu embeera egyo. Mbwenu shi bakaba nibeehurira bata? Omwe aha nkwatwa akagira ati: “Aha rubaju rw’emigyera ya Babulooni tukashutama, twarira ahabw’okwijuka Saayuuni.” (Zab. 137:1) Kwonka shi, n’oha owaabaire naija kuhuumuriza enkwatwa abaabaire baine obusaasi?

2-3. (a) Yehova akakorera ki Abayudaaya enkwatwa? (b) Nituza kureeba ki omu kicweka eki?

² Yehova ni ‘Ruhanga ow’okuhuumuriza kwona.’ (2 Kor. 1:3) Ahabw’okugira ngu ni Ruhanga wa rukundo, naafayo kuhuumuriza boona abarikumwirira haihi. Yehova akaba naamanya ngu bamwe aha nkwatwa bakaba nibaija kwikiriza okuhanwa kwe, kandi bamugarukire. (Isa. 59:20) Emyaka erikurenga 100 Abayudaaya batakatwirwe omu bukwatwa, akahwera nabi Isaaya kuhandiika ekitabo ekirikwetererwa eiziina rye. Ahabw’enki yaahandiikiise ekitabo ekyo? Ruhanga akagambira Isaaya ati: “Muhuumurize abantu bangye, mubahuumurize.” (Isa. 40:1) Buzima, Yehova akakoresa ebi nabi yaahandiikire kuhuumuriza Abayudaaya enkwatwa.

³ Obumwe naitwe nituba nitwenda kuhuumurizibwa nk’Abayudaaya abaabaire bari enkwatwa. Omu kicweka eki, nituza kureeba emiringo eshatu oku Yehova yaahuumuriize enkwatwa: (1) Akaraganisa kusaasira abarikweteisa, (2) akaha abantu be amatsiko, kandi (3) yaabahwera kutatiina. Twaba nitushwijuma enshonga ezi, teeraho kwetegyereza oku turikugasirwa omu bigambo bya Yehova ebirikuhuumuriza.

YEHOVA NAATUSAASIRA AHABW’EMBABAZI ZE

4. Yehova akooreka ata ngu ni Ruhanga orikusaasira? (Isaaya 55:7)

⁴ Yehova ni “Tataitwe ow’okusaasira.” (2 Kor. 1:3) Akooreka omutwarize ogwo obu yaaraganisa kusaasira enkwatwa abaabaire nibaija kweteisa. (Shoma Isaaya 55:7.) Akagira ati: ‘Ninyija kukugirira esaasi, nkwiniire rukundo etahwaho.’ (Isa. 54:8) Yehova akaba naija kworeka ata ngu aine esaasi? N’obu Abayudaaya baabaire nibaija kubonabona ahabw’ebyarugire omu bikorwa byabo, Yehova akaraganisa ngu bakaba batarikwija kuguma omuri Babulooni ebiro byona. Bakaba nibaija kuguma omu bukwatwa kumara obwire bukye. (Isa. 40:2) Ebigambo ebyo ka biine kuba byahuumurize Abayudaaya abaayeteisize!

5. Ahabw’enki twine enshonga nyingi kukira Abayudaaya enkwatwa ezirikutureetera kusiima okusaasira kwa Yehova?

⁵ Nitwega ki? Yehova ayeteekateekire kusaasirira kimwe abaheereza be. Hati twine enshonga nyingi okukira Abayudaaya abaabaire bari enkwatwa, ezirikutureetera kusiima okusaasira kwa Yehova. Ahabw’enki? Nitumanya eki Yehova arikwihiriraho kutusaasira. Bwanyima y’emyaka mingi obunabi bwa Isaaya buherize kuhandiikwa, Yehova akoohereza Omwana we omukundwa omu nsi kuhayo amagara ge nk’ekitambo ahabw’abasiisi boona abarikweteisa. Ahabw’ekitambo, ebibi ‘nibiragazibwa’ bihweraho kimwe. (Byak. 3:19; Isa. 1:18; Efe. 1:7) Buzima Yehova ka ni Ruhanga orikusaasira!

6. Nitugasirwa tuta twateekateeka aha kusaasira kwa Yehova? (Reeba n’ebishushani.)

⁶ Ebigambo bya Yehova ebiri omuri Isaaya 55:7 nibibaasa kutuhuumuriza twaba nitweshinja ekirenga. Abamwe omuriitwe nitubaasa kugumizamu nitweshinja ahabw’enshobe ezi twakozire enyima n’obu turikuba twayeteisize. Ekyo nikikira kubaho twaba nitubonabona ahabw’ebirikuruga omu nshobe zaitu. Kwonka, twaba twatwire ebibi byaitu, kandi tukarekyera aho kubikora, nitubaasa kuhamiza kimwe ngu Yehova atusaasire. Kandi Yehova ku arikutusaasira, naacwamu kutaijuka ebibi byaitu. (Gyeragyeranisa Yeremia 31:34.) N’ahabw’ekyo, naitwe titushemereire kuguma nitubiteetateekaho. Eki Yehova arikutaho omutima n’ebi turikukora hati, zitari nshobe ezi twakozire enyima. (Ezk. 33:​14-16) Kandi, Tataitwe ow’okusaasira ari haihi kwihaho oburemeezi bwona obu turikurabamu ahabw’enshobe zaitu.

7. Niki ekirikubaasa kutuhiga kugambira abareeberezi ngu tukozire ekibi ky’amaani?

⁷ Twine kukora ki twaba nitweshinja ahabw’okushereka ekibi ky’amaani? Baibuli neetuhiga kugambira abareeberezi kutuhwera. (Yak. 5:​14, 15) Kwonka, nitubaasa kugumirwa kubagambira ekibi eki tukozire. Twaba tweteisize, kandi tukaijuka ngu Yehova, n’abashaija abo abeesigwa abaatooraine kutuhwera beeteekateekire kutugirira embabazi, nikiija kutuhiga kubagambira. Teekateeka aha ku embabazi za Yehova zaahuumurize ow’eishe-mwe Arthura owaabaire naayeshinja ekirenga. Arthur akagira ati: “Nkamara omwaka nka gumwe, ndikureeba eby’enshoni. Bwanyima y’okuhurira orubazo orurikukwata aha muntu w’omunda, nkagambira omukazi wangye n’abareeberezi ekibi kyangye. Ekyo kikandeetera kwehurira gye, kwonka nkaba ninkyeshinja ahabw’eki naakozire. Abareeberezi bakanyijutsya ngu Yehova naakinkunda, kandi naatuhana ahabw’okugira ngu naatukunda. Ebigambo byabo by’embabazi bikampika aha mutima, byampwera kuhindura emiteekateekyere yangye.” Hati, Arthur ni payoniya, kandi omuheereza omu kibiina. Ka nikihuumuriza kumanya ngu Yehova naatugirira embabazi twayeteisa!

YEHOVA NAATUHA AMATSIKO

8. (a) Yehova akaha matsiko ki enkwatwa? (b) Kurugiirira ahari Isaaya 40:​29-31, Abayudaaya abaayeteisize bakaba nibaija kugasirwa bata omu matsiko?

⁸ Kurugiirira aha mireebere y’abantu, Abayudaaya enkwatwa bakaba bataine matsiko. Babulooni ekaba etarikukira kurekura enkwatwa zaayo. (Isa. 14:17) Kwonka, Yehova akaha abantu be amatsiko. Akaraganisa kucungura abantu be, kandi tihaine ekyabaire nikibaasa kumuremesa. (Isa. 44:26; 55:12) Yehova akaba naareeba Babulooni nk’omucuucu. (Isa. 40:15) Omuyaga gwahuha omucuucu nigutuuntumuka. Abayudaaya enkwatwa bakaba nibaija kugasirwa bata omu matsiko ago? Bakaba nibaija kuhuumurizibwa. Kwonka bakaba nibaza kugasirwa n’omu muringo ogundi. Isaaya akahandiika ati: ‘Abarikutegyereza [Yehova] nibaija kugarukwamu amaani.’ (Shoma Isaaya 40:​29-31.) Amatsiko gakaba nigaija kubahwera kugira amaani “batumbiikye ahaiguru n’amapapa nk’amashamba.”

9. Niki ekyabaire nikibaasa kureetera enkwatwa kugira obwesigye omu biraganiso bya Yehova?

⁹ Yehova akabagambira ahabw’enki baabaire nibabaasa kugira obwesigye omu kuraganisa kwe. Akabagambira ki? Teekateeka aha bunabi obwabaire bwahikiriire. Bakaba nibamanya ngu Abasiria baasingwire obugabe bw’Abaisraeli obw’enganda ikumi, kandi abatuuzi baayo batwairwe omu bukwatwa. (Isa. 8:4) Bakareeba Abababulooni barikucwekyereza Yerusaalemu, kandi baatwarwa nk’enkwatwa. (Isa. 39:​5-7) Bakareeba oku Omugabe Zedekia yaatondoirwemu amaisho, kandi akatwarwa Babulooni. (Yer. 39:7; Ezk. 12:​12, 13) Byona ebi Yehova yaabaire agambire bikahikiirira. (Isa. 42:9; 46:10) Ebyo byona ka biine kuba byahamize okwikiriza kwabo ngu okucungurwa oku Yehova yaabaraganiise kukaba nikwija kuhikiirira!

10. Niki ekirikubaasa kutuhwera kuguma twine amatsiko omu biro ebi eby’emperu?

¹⁰ Nitwega ki? Twaba tuhwairemu amaani, amatsiko nigabaasa kutuhuumuriza, kandi gatuhwere kugarukwamu amaani. Turi omu biro by’akabi kaingi, kandi twine abazigu b’amaani maingi. Kwonka titwine kutiina. Yehova atuhaire amatsiko g’omuhendo, ag’okutunga amagara agatahwaho twine obusingye n’oburinzi. Twine kuguma tutaire omutima aha matsiko gaitu, kandi tukagahamya. Twaba tutakozire tutyo, amatsiko gaitu nigabaasa kuba nk’omwanya murungi ogutarikureebeka gye ahabw’okugira ngu nitugureebera omu dirisa endofa. Nitubaasa “kuboneza tuta edirisa egyo,” nari kuhamya amatsiko gaitu? Butoosha nitubaasa kugira obwire bw’okuteekateeka aha ku embeera ziraabe ziri nungi omu nsi ensya. Nitubaasa kushoma ebicweka, tureebe vidiyo, kandi tuhurikize ebyeshongoro ebirikugamba aha matsiko gaitu. Kandi omu kushaba, nitubaasa kugambira Yehova ebiraganiso ebi twiniire ekihika.

11. Niki ekirikuhwera munyaanyazi-itwe oine endwara y’amaani kugaruka kugira amaani?

¹¹ Yetegyereze oku amatsiko gabaasiise munyaanyazi-itwe Joy oine endwara z’amaani kuhuumurizibwa n’okugira amaani. Naagira ati: “Ku ndikwehurira kubi, niingambira Yehova buri kimwe, ahakuba niimanya ngu naanyetegyereza. Omu bwire obwo Yehova naampa ‘amaani agarikukirira kimwe.’”(2 Kor. 4:7) Kandi, Joy naateera akashushani ari omu nsi ensya, ahu ‘abatuuzi baayo bataraije kugira ngu ndwaire.’ (Isa. 33:24) Twagambira Yehova ebiri aha mitima yaitu, kandi tukateekateeka aha matsiko gaitu nitwija kugaruka tugire amaani.

12. Twine nshonga ki ezirikutureetera kugira obwesigye omu bi Yehova arikuraganisa? (Reeba n’ekishushani.)

¹² Nk’oku Yehova yaahamiize Abayudaaya enkwatwa, naitwe atuhaire enshonga nyingi ahabw’enki twine kwesiga ebi arikuraganisa. Teekateeka aha bunabi obu turikureeba nibuhikiirira. Nk’eky’okureeberaho, nitureeba obutegyeki kirimaani obu “ekicweka kyabwo kigumire, n’ekindi kirikwatwa busha.” (Dan. 2:​42, 43) Nituhurira “n’emitsitsa omu myanya mingi,” kandi nitubuurira ‘omu nsi yoona.’ (Mat. 24:​7, 14) Obunabi obwo n’obundi bwingi nibuhamya obwesigye bwaitu omuri Yehova ngu ari hakye kuhikiiriza ebi arikuraganisa.

YEHOVA NAATWIKAIKANISA TWABA TUTIINIRE

13. (a) Abayudaaya bakaba nibaija kuhikwaho buremeezi ki bari hakye kucungurwa? (b) Nk’oku kirikworekwa omuri Isaaya 41:​10-13, Yehova akahuumuriza ata Abayudaaya enkwatwa?

¹³ N’obu Yehova araabe yaahaire enkwatwa amatsiko agaabahuumuriize, akaba naamanya ngu nibaija kugira oburemeezi barikucungurwa. Yehova akaba yaagizire ngu Abayudaaya baaba bari haihi kuruga omu bukwatwa, omugabe w’amaani naija kutaahirira amahanga agaabaire geehinguririize Babulooni, kandi agitiinatiinise. (Isa. 41:​2-5) Mbwenu shi Abayudaaya bakaba baine kwerarikirira? Enyima Yehova akaba yaahuumuriize abantu be ati: “Otatiina ahabw’okuba nkwine, otahahaaza omutima, ahabw’okuba ndi Ruhanga waawe.” (Shoma Isaaya 41:​10-13.) Akaba naamanyisa ki obu yaagira ngu “ndi Ruhanga waawe”? Akaba atarikwijutsya Abayudaaya kumuramya, ekyo bakaba nibakimanya. Kureka, akaba naabamanyisa ngu ari aha rubaju rwabo.—Zab. 118:6.

14. Niki ekindi eki Yehova yaakozire kuhuumuriza enkwatwa abaabaire batiinire?

¹⁴ Ekindi, Yehova akahuumuriza enkwatwa abaabaire batiinire arikubaijutysya amaani ge agataine bugarukiro n’obwengye bwe. Akagambira Abayudaaya enkwatwa kureeba enyonyoozi. Akabagambira ngu akahanga enyonyoozi ezo zoona, kandi ngu naamanya amaziina gaazo. (Isa. 40:​25-28) Ekyo nikituhamiza ngu naamanya eiziina rya buri omwe orikumuheereza. Kandi Yehova ku araabe yaabaire aine amaani g’okuhanga enyonyoozi, buzima aine amaani g’okuhwera abantu be. Abayudaaya enkwatwa bakaba bataine enshonga yoona y’okubareetera kutiina nari kwerarikirira.

15. Yehova akatebeekanisa ata Abayudaaya enkwatwa ahabw’ebyabaire nibiija kubaho?

¹⁵ Yehova akaba agambiire abantu be eky’okukora obwire bwabo bw’okucungurwa bwahika. Omu kitabo kya Isaaya, Ruhanga akabagambira ati: “Mutaahe omu bishengye byanyu, mube mwekingirainemu akaanya kakye, okuhitsya ahu ekiniga kiraahwere.” (Isa. 26:20) Ebigambo ebyo nibibaasa kuba byabandize kuhikiirira obu Babulooni yaataahirirwa Omugabe Kuuro. Omunyabyafaayo Omugriika akagira ngu obu Kuuro yaataahirira Babulooni, “akaragiira abaserukare be kwita buri omwe ou baashangire aheeru.” Teekateeka aha kutiina oku abatuuze ba Babulooni baagizire. Kwonka Abayudaaya enkwatwa nibabaasa kuba baahonokireho ahabw’okworobera obuhabuzi bwa Yehova.

16. Ahabw’enki tutaine kwerarikirira ekirenga ahabw’ebiraabeho omu biro by’omumaisho? (Reeba n’ekishushani.)

¹⁶ Nitwega ki? Omu bwire butari bwa hare nihaija kubaho okubonabona kwingi okutakabahoga omu byafaayo by’abantu. Kukuratandikye, abantu nibaija kushoberwa kandi batiine munonga. Kwonka abaheereza ba Yehova bo tibaraatiine. Nitumanya ngu Yehova ni Ruhanga waitu. Nitwija kwemerera, turikumanya ngu “ okucungurwa [kwaitu] kuri haihi.” (Luk. 21:28) Kandi, n’obu amahanga ageegaitsire hamwe garaatutaahirire, nitwija kugumizamu nitwesiga Yehova. Yehova naija kutuha oburinzi bwa baamaraika, n’obuhabuzi oburaarinde amagara gaitu. Naija kutuha ata obuhabuzi obwo? Twine kutegyereza tukareeba oku araakikore. Kwonka, nitubaasa kubutunga kurabira omu bibiina byaitu. Omu muringo gw’akamanyiso, nibibaasa kuba nibyo “bishengye,” ahu turaatungire oburinzi. Nitubaasa kwetebeekanisiza tuta ebiraabeho omu biro by’omumaisho? Twine kuba haihi ab’eishe-emwe na banyaanyazi-itwe, tukoorobera obuhabuzi bw’ekibiina, kandi tukagira obwesigye ngu Yehova naayebembera ekibiina kye.—Heb. 10:​24, 25; 13:17.

17. Nitubaasa kworeka tuta ngu twine obwesigye ngu Yehova naija kutuhuumuriza?

¹⁷ N’obu Abayudaaya enkwatwa baabaire bari omu mbeera egumire, Yehova akabahuumuriza nk’oku kyabaire nikyetengyesa. Naitwe naija kutuhuumuriza. N’ahabw’ekyo, kyona ekiraabeho omu biro by’omumaisho, gumizamu oine obwesigye ngu Yehova naija kukuhuumuriza. Gira okwikiriza ngu naasaasirira kimwe. Guma oine amatsiko gahamire. Ijuka ngu, Yehova yaaba ari Ruhanga waawe, tihaine ekishemereire kukutiinisa.