Guma Oine Okushemererwa Waaba Oine ou Orikureeberera

1-2. Yehova naareeba ata abarikureeberera abakuzire nari abarikureeberera abaine amagara mabi? (Enfumu 19:17) (Reeba n’ebishushani.)

OW’EISHE-EMWE orikwetwa Jin-yeol kuruga Korea naagira ati: “Nyowe n’omukazi wangye tumazire omu bushwere emyaka erikurenga 32. Ntwire nimureeberera kumara emyaka etaano ahakuba aine endwara ya Parkinson’s, n’ahabw’ekyo tarikubaasa kwegyendesa. Nimukunda munonga, kandi ninshemererwa kumureeberera. Naaba aine kubyama omu kitanda ky’abarwaire buri kiro. Niimbyama aha rubaju rwe reero turaara tukwataine omu ngaro.”

² Mbwenu shi oriyo nooreeberera omuntu ou orikukunda nk’omuzaire waawe, ou ori nawe omu bushwere, omwana, nari munywani waawe? Kyaba nikwo kiri, noobaasa kuba nooshemererwa ahabw’obujunaanizibwa bw’okureeberera omuntu ogwo omu muringo gw’omutaano. Okukora ekyo nooba nooyoreka ngu ohamiire ahari Yehova. (1 Tim. 5:​4, 8; Yak. 1:27) Kwonka nabwo noobaasa kuba noohikwaho oburemeezi obu abandi batarikureeba. Obumwe noobaasa kuteekateeka ngu niwe wenka oriyo naabonabona. Noobaasa kureebeka nk’oshemereirwe omu bantu, kwonka okiba ori wenka otandika kurira. (Zab. 6:6) N’obu abandi bakuba batarikumanya oburemeezi obu orikurabamu, Yehova we naareeba embeera yaawe. (Gyeragyeranisa Okuruga 3:7.) Amarira gaawe n’okwefeerereza kwawe n’eby’omuhendo ahariwe. (Zab. 56:8; 126:5) Naareeba kyona eki orikukora kuhwera omukundwa waawe. Eby’orikukora naabireeba nk’eibanja ahariwe, kandi naija kukushashura.—Shoma Enfumu 19:17.

3. Abrahamu na Saara nibabaasa kuba baatungire buremeezi ki obu baabaire nibareeberera Teera?

³ Omu Baibuli harimu abashaija n’abakazi baingi abaabaire baine abu barikureeberera. Teekateeka ahari Abrahamu na Saara. Obu baafuruka kuruga omuri Uri, ishebo Teera akaba aine emyaka nka 200. Akagyenda nabo orugyendo orurikwingana nka kiromita 960 kuhika Harani. (Kut. 11:​31, 32) Hatariho kubangaanisa Abrahamu na Saara bakaba nibakunda Teera, kwonka teekateeka aha ku kyabaire kigumire kumureeberera bari omu rugyendo orwo. Nibabaasa kuba baabaire nibakoresa engamira nari endogoya omu rugyendo rwabo ekirikubaasa kuba kyagumiire Teera owaabaire ari omugurusi. N’ahabw’ekyo, obumwe nibabaasa kuba baruhire munonga. Omu mbeera ezo zoona, Yehova akabaha amaani agaabaire nigetengyesa. N’ahabw’ekyo nk’oku Yehova yaahweraire Abrahamu na Saara, naiwe naija kukuha amaani agarikwetengyesa, kandi akuhwere.—Zab. 55:22.

4. Nituza kugamba ahari ki omu kicweka eki?

⁴ Okushemererwa nikubaasa kukuhwera kugumisiriza waaba oine ou orikureeberera. (Enf. 15:13) Omuntu oshemereirwe naabaasa kuraba omu mbeera n’obu yaakuba egumire eta. (Yak. 1:​2, 3) Mbwenu shi noobaasa kutunga ota okushemererwa okwo? Omuringo gumwe n’okwesiga Yehova kurabira omu kushaba kugira ngu akuhwere kuguma oine emiteekateekyere eringaniire aha mbeera yaawe. Omu kicweka eki, nituza kushwijuma ebi abarikureeberera abaine amagara mabi barikubaasa kukora kuguma baine okushemererwa. Nituza n’okureeba eki abandi barikubaasa kukora kubahwera. Kwonka ka tubanze tureebe ahabw’enki abarikureeberera abandi baine kuguma bashemereirwe, n’oburemeezi oburikubaasa kutuubya okushemererwa kwabo.

OKU OKUREEBERERA ABANDI KIRIKUKWATA AHA KUSHEMERERWA KWAWE

5. Ahabw’enki abarikureeberera abandi baine kuguma bashemereirwe?

⁵ Abarikureeberera abandi baaburwa okushemererwa, nibaruha juba. (Enf. 24:10) Ekyo kyabaho nibabaasa kurekyera aho kutwariza abu barikureeberera omu muringo gw’embabazi. Kwonka shi ni buremeezi oburikubaasa kutuubya okushemererwa kw’abarikureeberera abandi?

6. Ahabw’enki abarikureeberera abaine amagara mabi barikuruha munonga?

⁶ Abarikureeberera abandi nibabaasa kuruha munonga. Munyaanyazi-itwe orikwetwa Leah naagira ati: “Okureeberera abandi nikibaasa kukureetera kuruha omu biteekateeko n’omu nyehurira nangwa n’aha izooba rirungi. Aha muheru gw’eizooba ninkira kuhurira ntaine ekindi eki ndikubaasa kukora. Obumwe nimba ntaine n’amaani g’okugarukamu obutumwa aha simu.” Abandi nibagumirwa kutunga obwire burikumara bw’okuhuumuraho. Munyaanyazi-itwe orikwetwa Inés naagira ati: “Ninkira kugumirwa kubyama ekirikumara. Omu kiro ninkira kwimuka buri bwanyima y’eshaaha ibiri kureeberera maazaara. Nyowe na ibanyi tumazire emyaka mingi tutarikutunga akahuumuro.” Bamwe aha barikureeberera abandi tibarikubaasa kuba hamwe n’abanywani baabo, nari kukora emirimo y’ekibiina ahabw’okugira ngu baine kufa aha bakundwa baabo obwire bwona. N’ekirikurugamu, nibeehurira nk’abari bonka, kandi nk’abatarikubaasa kuruga omu mbeera yaabo.

7. Ahabw’enki bamwe aha barikureeberera abandi barikwecwera orubanja nari bakeehurira kubi?

⁷ Abarikureeberera abandi nibabaasa kwecwera orubanja nari beehurire kubi. Munyaanyazi-itwe orikwetwa Jessica naagira ati: “Ninkira kuteekateeka ngu nshemereire kukora ebirikukira aha bi ndikukora. Nangwa n’okugira akaire k’okuhuumuraho nikindeetera kwehurira nk’owaayeyendeza.” Bamwe aha barikureeberera abandi nibeecwera orubanja ahabw’okugira ngu obumwe nibaruha, kandi bahurira batakibaasa kuhikiiriza obujunaanizibwa bwabo. Abamwe nibeerarikirira ahabw’okuteekateeka ngu tibarikukora ekirikumara kuhwera abakundwa baabo abu barikureeberera. Kandi abandi nibeecwera orubanja ahabw’okugira ngu obumwe ku barikuruha nibagambira kubi ou barikureeberera. (Yak. 3:2) Kandi abamwe nibeehurira kubi ahabw’okureeba omukundwa waabo owaabaire aine amagara marungi arikweyongyera kuba kubi. Munyaanyazi-itwe orikwetwa Barbara naagira ati: “Bumwe aha buremeezi obu nyine n’okureeba omuntu ou ndikukunda arikweyongyera kureemba buri-izooba.”

8. Ha eky’okureeberaho ekirikworeka oku ebigambo bikye by’okusiima birikukwata aha barikureeberera abandi.

⁸ Bamwe aha barikureeberera abandi nibeehurira nk’abatarikusiimwa. Ahabw’enki? Ahabw’okugira ngu tibarikukira kusiimwa ahabw’okwefeerereza kwabo n’okukora n’amaani. Ebigambo by’okusiima n’obu byakuba biri bikye, nibibaasa kureetera omuntu kushemererwa n’okugarukwamu amaani. (1 Tes. 5:18) Munyaanyazi-itwe orikwetwa Melissa naagira ati: “Obumwe niindira ahabw’okuruha nari okuhwamu amaani. Kwonka abu ndikureeberera baangira ngu, ‘Yebare ahabwa byona ebi orikunkorera,’ nikinshemeza munonga! Ebigambo ebyo nibimpwera kugira ekihika n’amaani g’okugumizamu ndikubareeberera.” Ow’eishe-emwe orikwetwa Ahmadu naashoboorora oku ebigambo by’okumusiima birikumukwataho. We n’omukazi we nibareeberera omwana wa mukuru we, orikugwa entsimbo. Naagira ati: “N’obu araabe atarikwetegyereza byona ebi turikurabamu n’ebi turikwefeerereza kubaasa kumureeberera, ninshemererwa munonga ku arikutusiima nari ku arikuteeraho kuhandiika aha rupapura ati: ‘Nimbakunda.’”

OKU ORIKUBAASA KUGUMA OSHEMEREIRWE

9. Orikureeberera abaine amagara mabi naabaasa kuba ata omucureezi?

⁹ Ba omucureezi. (Enf. 11:2) Twena titwine maani g’okukora buri kimwe eki turikwenda. N’ahabw’ekyo manya obugarukiro bwawe kyahika aha bi orikubaasa kukora n’ebi otarikubaasa, kandi omu mbeera ezimwe oyegye kwanga. Buzima ekyo tikiine nshonga! Kandi nikiba nikyoreka ngu ori omucureezi. Ikiriza obuhwezi abu abandi barikukuha. Ow’eishe-emwe orikwetwa Jay naagira ati: “Titurikubaasa kukora bingi mukono gumwe. Okumanya obugarukiro bwawe n’okwetantara kukora ebi otarikubaasa nikiija kukuhwera kuguma oine okushemererwa.”

10. Ahabw’enki ni kikuru abarikureeberera abandi kuba abarikwetegyereza? (Enfumu 19:11)

¹⁰ Teeraho kuba orikwetegyereza. (Shoma Enfumu 19:11.) Waaba orikwetegyereza noija kuguma oikaikaine ou orikureeberera yaakugambira kubi. Omuntu orikwetegyereza naateeraho kumanya ahabw’enki omuntu naatwaza omu muringo nanka. Hatariho kubangaanisa, endwara ezimwe ezitarikurahuka kukira nizibaasa kureetera omuntu kutwaza omu muringo ogutari gwa butoosha. (Mub. 7:7) Nk’eky’okureeberaho, omuntu otwire ari omunyambabazi, kandi arikufayo aha bandi naabaasa kutandika kugira empaka n’okutongana. Nari naabaasa kuba entasiima, arahuke kugira ekiniga, n’okuyomba. Waaba noohwera omuntu oine oburwaire bw’amaani, nikibaasa kukuhwera waayega aha burwaire bwe. Waayega aha burwaire bwe, noija kwetegyereza ngu embeera ei arimu niyo erikumureetera kutwaza atyo.—Enf. 14:29.

11. Ni bintu ki ebikuru ebi abarikureeberera abandi baine kukora buri-izooba? (Zaaburi 132:​4, 5)

¹¹ Taho obwire bw’okuhamya omukago gwawe na Yehova. Obumwe nooba oine kurekaho emirimo yaawe emwe kubaasa kuta omutima aha ‘birikukira obukuru.’ (Fil. 1:10) Bimwe ahari ebyo, n’okuhamya omukago gwawe na Yehova. N’obu Omugabe Daudi araabe yaabaire aine bingi by’okukora, akaba naayebembeza okuramya Yehova. (Shoma Zaaburi 132:​4, 5.) Nikyo kimwe, naiwe ni kikuru kutaho obwire bw’okushaba n’okushoma Baibuli buri-izooba. Munyaanyazi-itwe orikwetwa Elisha naagira ati: “Mbaasize kuguma nyine okushemererwa ahabw’okushaba, okuteekateeka n’ebigambo ebirikuhuumuriza ebiri omu zaaburi. Okushaba nikyo kirikukirayo kumpwera. Ninkira kushaba Yehova emirundi mingi omu izooba kubaasa kuguma nyikaikaine.”

12. Ahabw’enki ni kikuru abarikureeberera abandi kwefaho omu by’omubiri?

¹² Taho obwire bw’okwereeberera omu by’omubiri. Abantu abaine bingi by’okukora otwariiremu abarikureeberera abandi, nikibaasa kubagumira kwereeberera omu by’omubiri, ahabw’okuba nibaba baine obwire bukye bw’okuza omu katare kugura eby’okurya bibisi ebiine ekiriisa n’okubiteeka. Kwonka okurya eby’okurya by’ekiriisa n’okukora ebisasayizi ni kirungi aha amagara gaawe n’ebiteekateeko byawe. N’ahabw’ekyo teeraho kukoresa gye akaire kakye aku oine, orye eby’okurya by’ekiriisa kandi okore ebisasayizi obutoosha. (Efe. 5:​15, 16) Ekindi, teeraho kubyama ekirikumara. (Mub. 4:6) Okucondooza nikworeka ngu okubyama nikubaasa kuhwera obwongo bwawe kwegarura busya. Ekicweka “How Sleep Can Affect Stress” ekyahandiikirwe aba Banner Health nikigira ngu waabyama ekirikumara nikikuhwera kuterarikirira munonga kandi nooguma oikaikaine waahikwaho oburemeezi. Kandi, oshemereire n’okutaho obwire bw’okwejumba omu by’okweshemeza. (Mub. 8:15) Omwe aha barikureeberera abandi akagamba ekirikukira kumuhwera kuguma ashemereirwe. Naagira ati: “Embeera y’obwire yaaba eri nungi, niinteeraho kuza aheeru omu kashana. Kandi omurundi gumwe omu kwezi nintaho entebeekanisa y’okumara izooba ryona na munywani wangye turikweshemeza.”

13. Ahabw’enki ni kirungi kusheka? (Enfumu 17:22)

¹³ Teeraho kutunga ebirikukushetsya. (Shoma Enfumu 17:22; Mub. 3:​1, 4) Okusheka ni kurungi aha mubiri gwawe n’obwongo bwawe. Waaba oine ou orikureeberera, ebintu nibibaasa kutagyenda nk’oku orikuba obitebeekaniise. Kwonka waaba noobaasa kutunga ekyakushemeza omu mbeera egyo, nikiija kukworobera kugumisiriza. Kandi waasheka n’omuntu ou orikureeberera nikibaasa kubahwera kwongyera kukundana.

14. Okugamba n’omunywani ou orikwesiga nikibaasa kukuhwera kita?

¹⁴ Gambira omunywani ou orikwesiga oku orikwehurira. N’obu orikuteeraho nk’oku orikubaasa kuguma oshemereirwe, obumwe noija kugira okwerarikirira. Ekyo kyabaho, ni kirungi kugambira munywani waawe ou orikwesiga kandi otaraije kukucwera orubanja oku orikwehurira. (Enf. 17:17) Naija kukuhurikiza kandi akugambire ebigambo ebirikugaruramu amaani, kikuhwere kugaruka kugira okushemererwa.—Enf. 12:25.

15. Okuta omutima aha matsiko ga nyentsya nikikuhwera kita kugira okushemererwa?

¹⁵ Teera akashushani ori n’ou orikureeberera omuri paradiso. Ijuka ngu obujunaanizibwa bwawe bw’okureeberera n’obw’akaanya bwanya, kandi Yehova akaba atagyendereire ngu abantu bakore omurimo ogwo. (2 Kor. 4:​16-18) Turi haihi kugira “amagara agaabuzima.” (1 Tim. 6:19) N’ahabw’ekyo iwe n’ou orikureeberera mwagaaniira aha bi muraakore hamwe omu paradiso, nikibahwera kugira okushemererwa. (Isa. 33:24; 65:21) Munyaanyazi-itwe orikwetwa Heather naagira ati: “Ninkira kugambira ou ndikuhwera ngu juba nitwija kubaziira hamwe, twirukye hamwe, kandi tuvuge obugaari hamwe. Nituza n’okuteeka omugaati hamwe kandi tuteekyere abakundwa baitu abaraazookye eby’okurya. Twena nitusiima Yehova ahabw’amatsiko gaitu.”

OKU TURIKUBAASA KUHWERA ABARIKUREEBERERA ABANDI

16. Abari omu kibiina nibabaasa kuhwera bata orikureeberera abaine amagara mabi? (Reeba n’ekishushani.)

¹⁶ Hwera abarikureeberera abandi kugira ngu batungye akaire k’okuhuumuraho. Itwe abari omu kibiina nitubaasa kuhwera orikureeberera omuntu turikwehayo kumara akaire n’ou arikureeberera. N’ekirikurugamu nituhwera orikureeberera omuntu kuruhuukaho omu biteekateeko n’okukora ebi arikukunda. (Gal. 6:2) Ababuurizi abamwe bataireho entebeekanisa y’okukora ekyo. Munyaanyazi-itwe orikwetwa Natalya orikureeberera iba oshanyariire omubiri gwona, naagira ati: “Ow’eishe-emwe omu kibiina naija rimwe nari kabiri omu saabiiti kuba hamwe na ibanyi. Nibeejumba hamwe omu kubuurira, bagaaniira, kandi obumwe bareeba hamwe filimu. Ibanyi naashemerererwa munonga obwire obwo kandi naanye nikimbaasisa kutunga obwire bw’okuhuumuraho n’okukora ebi ndikukunda nk’okutambura.” Obumwe noobaasa kwehayo kutsigara n’ou barikureeberera omu kiro kugira ngu orikumureeberera abaase kutunga akaire k’okubyama ekirikumara.

17. Nitubaasa kuhwera tuta abarikureeberera abandi omu bwire bw’enteerane?

¹⁷ Hwera abarikureeberera abandi omu bwire bw’enteerane. Abarikureeberera abandi nibabaasa kutagasirwa munonga omu nteerane eza buri saabiiti, n’enteerane empango, ahabw’okuba nibaba nibareeberera abakundwa baabo. Ab’omu kibiina nibabaasa kwehayo kushutama n’ou barikureeberera omu ruteerane rwona nari ekicweka kyarwo. Omuntu ou barikureeberera yaaba atarikubaasa kuruga omu ka, noobaasa kwehayo kuza omu ka ye kikubaasise kuza nawe omu nteerane murikukoresa esimu kugira ngu orikumureeberera abaase kuzizamu butunu.

18. Niki ekindi eki turikubaasa kukorera abarikureeberera abandi?

¹⁸ Siima abarikureeberera abandi kandi obashabire. Abareeberezi nibakora gye baagumya abarikureeberera abandi obutoosha. (Enf. 27:23) Kandi twena abari omu kibiina twine kuguma nitusiima abarikureeberera abandi. Nitubaasa n’okubashaba Yehova kugira ngu agumizemu kubagumya n’okubahwera kuguma baine okushemererwa.—2 Kor. 1:11.

19. Niki eki twine kugirira ekihika?

¹⁹ Juba, Yehova naija kuragaza amarira g’obusaasi goona aha maisho gaitu. Oburwaire n’okufa nibiija kuhwaho. (Kush. 21:​3, 4) ‘Abarema nibaija kuguruka nk’empara.’ (Isa. 35:​5, 6) Oburemeezi oburikureetwa emyaka ya bukuru n’obusaasi oburikuruga omu kureeberera abakundwa baitu abaine amagara mabi nibiija kuba bimwe aha ‘bya ira ebitaraije kwijukwa.’ (Isa. 65:17) Nangwa na hati obu tukitegyereize ebiraganiso birungi ebyo, Yehova taraije kututsigaho. Twagumizamu kumwesiga kutuha amaani, naija kutuhwera ‘kugumisiriza omuri byona n’okutaruha, twine okushemererwa.’—Kol. 1:11.