Teekateeka Ahari Yesu Omunyamurwa Waitu Omukuru ow’Esaasi

1-2. (a) Ahabw’enki Yehova yaayohereize Omwana we omu nsi? (b) Nituza kureeba ki omu kicweka eki? (Abaheburaayo 5:​7-9)

EMYAKA nka 2,000 ehingwire, Ruhanga akoohereza Omwana we omukundwa omu nsi. Ahabw’enki? Kimwe aha byamureetsire omu nsi, n’okucungura abantu kuruga omu mukyeeno gw’ekibi, okufa, n’okumaraho oburemeezi obwaretsirweho Sitaane. (Yoh. 3:16; 1 Yoh. 3:8) Kandi Yesu akaba naamanya ngu ebi yaabaire naija kurabamu omu nsi bikaba nibiija kumutebeekanisa kuba Omunyamurwa waitu Omukuru ow’esaasi. Ekyo kikabaho omu 29 Y.A.K.a

² Omu kicweka eki, nituza kureeba oku ebi Yesu yaarabiremu omu nsi byamuhweraire kuba Omunyamurwa Omukuru ow’esaasi. Twaba nituteeraho kwetegyereza oku Yesu yaatebeekanisiibwe kuheebwa obujunaanizibwa obwo, nikiija kutworobera kushaba Yehova, n’obu twakuba tuhwairemu amaani ahabw’ebibi byaitu nari obweremwa.—Shoma Abaheburaayo 5:​7-9.

OMWANA WA RUHANGA OMUKUNDWA OKWIJA OMU NSI

3-4. Yesu akahikwaho mpinduka ki obu yaija omu nsi?

³ Baingi ahariitwe turaagizireho empinduka omu mbeera zaitu, nk’okufuruka tukatsigaho eka yaitu n’abanywani. Empinduka nk’ezo nizibaasa kureetaho emirabanamu. Kwonka tihaine omuntu orahikirweho empinduka z’amaani nka Yesu. Obu yaabaire ari omu iguru, akaba aine omwanya mukuru munonga omu baana ba Yehova. Akaba naayesiimira omuri rukundo ya Yehova, kandi butoosha akaba atuura naaheereza ashemereirwe ari aha ‘mukono gwa buryo’ gwa Ruhanga. (Zab. 16:11; Enf. 8:30) Kwonka, Abafilipi 2:7 nihooreka ngu akaba ayeteekateekire ‘kweihaho ekitiinisa,’ nigwo mwanya mukuru omu iguru kubaasa kutuura omu nsi n’abantu abatahikiriire.

⁴ Ekindi, teekateeka aha mbeera ezi Yesu yaazaariirwemu n’ezi yaakuriiremu. Akazaarirwa omu ka y’enyoro, kurugiirira aha mpongano ei abazaire be baahaireyo obu yaazaarwa. (Lev. 12:8; Luk. 2:24) Omugabe mubi Heroode ku yaamanyire ebirikukwata aha kuzaarwa kwa Yesu, akateeraho kumwita. N’ahabw’ekyo abazaire be bakacwamu kuhungira omuri Misri kumara obwire. (Mat. 2:​13, 15) Buzima ezo zikaba ziri empinduka z’amaani ahari Yesu!

5. Ni bintu ki ebi Yesu yaareebire ari omu nsi, kandi ebyamuhikireho bikamutebeekanisa bita kuhikiiriza obujunaanizibwa bwe nk’Omunyamurwa Omukuru? (Reeba n’ekishushani.)

⁵ Obu Yesu yaabaire ari omu nsi, akareeba abantu barikubonabona. Hatariho kubangaanisa, akagira obusaasi ahabw’okufeerwa abantu abu yaabaire naakunda, obundi otwariiremu na Yosefu ishe owaamworoire. Kandi akareeba abantu abaabaire baine ebibembe, empumi, abamugire, n’abazaire abaabaire nibaganya ahabw’okufeerwa abaana baabo, reero yaabagirira esaasi. (Mat. 9:​2, 6; 15:30; 20:34; Mak. 1:​40, 41; Luk. 7:13) Amazima gari ngu, akaba yaareebire abantu nk’abo akiri omu iguru. Kwonka, ku yaizire omu nsi akoongyera kwetegyereza gye obusaasi obu baabaire nibarabamu n’oku baabaire nibeehurira. (Isa. 53:4) Kandi nawe akagira enyehurira nk’ez’abantu nk’okuguubwa kubi, okuruha, n’amaganya.

YESU AKAGIRIRA ABANTU ESAASI

6. Obunabi bwa Isaaya bukagamba ki aha ku Yesu yaabaire naija kugirira abantu esaasi? (Isaaya 42:3)

⁶ Omu buheereza bwa Yesu bwona, akagirira esaasi abantu abaabaire nibatwarizibwa kubi. Omu kukora ekyo, akaba naahikiiriza obunabi. Omu Byahandiikirwe by’Oruheburaayo, abantu abari gye omu by’omwoyo obumwe nibagyeragyeranisibwa n’omusiri ogwine orwezo, nari emiti mihango kandi miraingwa. (Zab. 92:12; Isa. 61:3; Yer. 31:12) Kwonka abooro n’abarikutuntuzibwa bari nk’orubingo orushatukire nari orutambi rw’etaara oruri haihi kuraara. (Shoma Isaaya 42:3; Mat. 12:20) Nabi Isaaya arikuhwerwa omwoyo gurikwera akakoresa eby’okureeberaho ebyo, kugamba obunabi oburikukwata ahari rukundo n’esaasi, ebi Yesu yaabaire naija kugirira abantu baabutoosha abarikutwarwa nk’abataine mugasho.

7-8. Yesu akahikiiriza ata obunabi bwa Isaaya?

⁷ Ekitabo kya Matayo kikooreka ngu Yesu niwe yaahikiriize ebigambo bya Isaaya kirikugira kiti: “Orubingo orushatukire tariruhenda, kandi n’orumuri orurikwaka kubi tariruraaza.” Bimwe aha by’okutangaaza ebi Yesu yaakozire bikagasira abantu abaabaire nibatwarizibwa kubi kandi abaabaire nibeehurira nk’orubingo rushatukire, n’abataine matsiko abari nk’orutambi rw’etaara oruri haihi kuraara. Omwe aharibo akaba ari omushaija owaabaire arengyeirwe ebibembe. Naabaasa kuba yaabaire ataine amatsiko g’okukira n’okugaruka kuba n’ab’eka ye na banywani be. (Luk. 5:​12, 13) Hakaba hariho n’omushaija owaabaire afiire amatu kandi ari omuteta. Teera akashushani oku yaabaire ayehurira yaareeba abandi nibagaaniira obwo we atarikubaasa kumanya ebi barikugamba. (Mak. 7:​32, 33) Kwonka ezo tizo mbeera zonka ezaabaire ziriho.

⁸ Omu bwire bwa Yesu, Abayudaaya baingi bakaba nibaikiriza ngu abaabaire baine obumogo nk’obwo, bakaba nibabonabona ahabw’ebibi ebi baakozire nari eby’abazaire baabo. (Yoh. 9:2) Ahabw’enyikiriza egyo etahikire, abantu nk’abo bakaba nibeereeba nk’abataine mugasho. N’ahabw’ekyo Yesu akahikiiriza obunabi bwa Isaaya arikukiza abantu abaabaire barwaire kandi yaabahwera kugaruka kugira amatsiko omuri Ruhanga. Eki nikitwegyesa ki ahari Yesu?

9. Abaheburaayo 4:​15, 16 nihooreka ki aha ku Omunyamurwa waitu Omukuru arikugirira abantu abatahikiriire esaasi?

⁹ Shoma Abaheburaayo 4:​15, 16. Nitubaasa kugira obwesigye ngu Yesu naija kuguma naatugirira esaasi. Ekyo nikimanyisa ki? Omuntu oine esaasi naakwatwaho yaareeba omuntu ondiijo arikubonabona nari arikwehurira kubi. Ekigambo ky’Orugriika “esaasi” nikimanyisa okwetegyereza embeera ei abandi barikurabamu n’oku barikwehurira. (Reeba na Abaheburaayo 10:​34, ahu Paulo arikukoresa ekigambo nikyo kimwe.) Eby’okutangaaza ebi Yesu yaakozire nibyoreka oku yaabaire naayehurira yaareeba abantu nibabonabona. Tarakirize abantu ahabw’okugira ngu nikyo yaabaire ashemereire kukora, kureka akaba naabafaho kandi arikwenda kubahwera. Nk’eky’okureeberaho, obu yaakiza omubembe, kikaba kitarikumwetengyesa kumukwataho, kwonka akakikora. Obundi ogwo nigubaasa kuba gwabaire guri omurundi gw’okubanza omuntu kukwata aha mubembe ogwo bwanyima y’emyaka! Ekindi, Yesu akabanza yaakiika aha rubaju omushaija owaabaire afiire amatu reero yaamukiza. Kandi teekateeka aha mukazi owaabaire ayeteisize ebibi obu yaanaabisa ebigyere bya Yesu n’amarira ge, kandi akabisiimura n’eishokye rye. Omufarisaayo akamucwera orubanja, kwonka we Yesu akamugambaho gye. (Mat. 8:3; Mak. 7:33; Luk. 7:44) Yesu akaba atarikwehuzya abantu abaabaire barwaire nari abaabaire bakozire ebibi by’amaani. Kureka, akaba abaakiira, kandi abagirira esaasi. Buzima nitubaasa kugira obwesigye ngu naitwe atwiniire esaasi.

OKU TURIKUTOOREZA OMUNYAMURWA WAITU OMUKURU HATI

10. Ni ntebeekanisa ki ezitairweho obunaku obu kuhwera empumi n’abateta omu by’omwoyo? (Reeba n’ebishushani.)

¹⁰ Nk’abakuratsi ba Kristo abeesigwa, nituteeraho kumutooreza turikugirira abandi rukundo n’esaasi. (1 Pet. 2:21; 3:8) N’obu turaabe tutarikubaasa kukiza abateta n’empumi, nitubaasa kuhwera abantu abo omu by’omwoyo. Nk’eky’okureeberaho, ebitabo by’orurimi rw’abateta biriho omu ndimi ezirikurenga 100. Kandi kubaasa kuhwera abatarikuhweza, ebitabo ebya braille biriho omu ndimi ezirikurenga 60, n’amaraka agarikushoboorora ebirikworekwa omu vidiyo gariho omu ndimi ezirikurenga 100. Entebeekanisa ezi nizihwera abateta n’empumi kwirira haihi Yehova n’Omwana we.

11. Ekibiina kya Yehova nikitooreza kita Yesu omu kufayo aha bantu b’obukomooko butarikushushana? (Ebyakozirwe 2:​5-7, 33) (Reeba n’ebishushani.)

¹¹ Ekibiina kya Yehova nikifayo aha bantu b’obukomooko butarikushushana. Ijuka ngu bwanyima y’okuzooka kwa Yesu, akashuka omwoyo ogurikwera aha bakuratsi be kugira ngu abantu abaabaire bariho aha Pentekoote babaase kuhurira amakuru marungi, buri omwe “omu rurimi rw’owaabo.” (Shoma Ebyakozirwe 2:​5-7, 33.) Nikyo kimwe n’obunaku obu, ekibiina kya Yehova nikishohoza ebitabo ebirikwegamira ahari Baibuli omu ndimi ezirikurenga 1000. Zimwe aha ndimi ezi nizikoresibwa abantu bakye. Nk’eky’okureeberaho, zimwe aha ndimi za Amerindia nizigambwa abantu bakye munonga omuri North America na South America. Kwonka ebitabo byaitu bibaasize kuvunuurwa omu ndimi ezo ezirikurenga 160, kugira ngu abantu baingi bamanye amakuru marungi. Kandi ebitabo byaitu biriho omu ndimi za Romany ezirikurenga 20. Enkumi n’enkumi z’abantu abarikugamba endimi ezo babaasize kwija omu mazima.

12. Ni buhwezi ki obundi obu ekibiina kya Yehova kirikutuha obunaku obu?

¹² Oyihireho ekibiina kya Yehova okureeberera omurimo gw’okubuurira amakuru marungi, nikihwera abahikirweho ebihikiirizi. Omu mbeera nk’ezo, ab’eishe-emwe na banyaanyazi-itwe nibeehayo beekundiire kwirukangirira bataahi baabo abarikwetenga obuhwezi. Kandi ekibiina nikyombeka ebyombeko biringaniire ahu abantu barikubaasa kwegyera ebirikukwata ahari rukundo ei Ruhanga abainiire.

OMUNYAMURWA WAITU OMUKURU NAABAASA KUKUHWERA

13. Yesu naakoresa miringo ki endiijo kutuhwera?

¹³ Yesu omuriisa waitu omurungi naafayo aha kyetengo kyaitu ky’eby’omwoyo. (Yoh. 10:14; Efe. 4:7) Obumwe embeera ezi turikurabamu nizitureetera kuba nk’orubingo orushatukire nari orutambi rw’etaara oruri haihi kuraara. Nitubaasa kwehurira kubi ahabw’endwara y’amaani, enshobe zaitu, nari ahabw’okugira obutaikirizana n’Omukristaayo mugyenzi waitu. Nitubaasa kuta omutima aha busaasi obu twine reero turemwe kuguta aha matsiko g’ebi Yehova arikuturaganisa omu biro by’omumaisho. Ijuka ngu Yesu naareeba embeera ezi orikurabamu, kandi naayetegyereza oku orikwehurira. Esaasi ezi akwiniire nizimuhiga kugira eki yaakora kukuhwera. Nk’eky’okureeberaho, naabaasa kukoresa omwoyo ogurikwera kukugumya waaba ohwairemu amaani. (Yoh. 16:7; Tit. 3:6) Ekindi, naakoresa Abakristaayo bagyenzi baawe, ‘n’ebiconco omu bantu’ nibo bareeberezi kukushagika n’okukuhwera.—Efe. 4:8.

14. Nitubaasa kukora ki twahwamu amaani?

¹⁴ Waaba ohwairemu amaani, teekateeka aha bujunaanizibwa obu Yesu aine nk’Omunyamurwa waitu Omukuru. Ijuka ngu Yehova akamwohereza omu nsi kuhayo amagara ge nk’ekitambo, n’okwetegyereza gye oburemeezi obu abantu abatahikiriire barikurabamu. N’ahabw’ekyo waahwamu amaani ahabw’ebibi nari obweremwa bwawe, ijuka ngu Yesu ayeteekateekire kukuhwera omu bwire obuhikire.—Heb. 4:​15, 16.

15. Ha eky’okureeberaho aha ku omuntu ohabire akaruga omu kibiina arikubaasa kuhwerwa kugaruka.

¹⁵ Yesu naahwera abakuratsi be omu kuteeraho kusherura n’okuhwera abahabire bakaruga ahari Yehova. (Mat. 18:​12, 13) Teekateeka aha ky’okureeberaho ky’ow’eishe-emwe Stefano.b Bwanyima y’emyaka 12 aihirwe omu kibiina, akacwamu kwija omu nteerane. Naagira ati: “Kikaba kitoorobi, kwonka nkaba niinyenda kugaruka kuba n’eka ya Yehova erikukundana. Abareeberezi abaagaaniire naanye bakampwera kwikaikana. Obumwe nkaba nyehurira nk’otaine mugasho, kandi nyenda kuhanika. Kwonka ab’eishe-emwe bakanyijutsya ngu Yehova na Yesu nibenda ngu ntakahanika. Ku naagarukire omu kibiina, ab’eishe-emwe na banyaanyazi-itwe boona bakanyakiira n’eka yangye. Empereruka, omukazi wangye akaikiriza kwegyesibwa Baibuli, kandi hati nituheereza Yehova nk’eka.” Hatariho okubangaanisa, Omunyamurwa waitu Omukuru owa rukundo naashemererwa yaareeba abarikweteisa barikutunga obuhwezi oburikwetengyesa kugaruka omu kibiina.

16. Ahabw’enki nikikushemeza kugira Omunyamurwa Omukuru ow’esaasi?

¹⁶ Obu Yesu yaabaire ari omu nsi, akahwera abantu nyamwingi omu bwire obuhikire. N’obunaku obu nitubaasa kugira obwesigye ngu naija kutuha obuhwezi twaba nitubwetenga. Kandi omu nsi ensya eri haihi kwija, Yesu naija kuhwera abantu abarikumworobera arikwihiraho kimwe byona ebireetsirweho ekibi n’obutahikiirira. Buzima nitusiima munonga Yehova Ruhanga waitu ahabw’okuhigwa rukundo n’embabazi ze, akatoorana omwana we kuba Omunyamurwa waitu Omukuru ow’esaasi.