Kodi Mboni za Yahova Zimbawona Tani Msinda wa Nkhawa?
Timbacita nyongo yakuteweza bzomwe Bibliya limbalewa pakulewa bza msinda wa nkhawa. Onani bzomwe Bibliya limbalewa pa nkhani imweyi:
Nkuphonyeka lini kusunama munthu omwe timbamufuna akafa. Anyakupfunza wa Jezu adalira pomwe wanthu omwe akhawafuna adafa. (Juwau 11:33-35, 38; Mabasa 8:2; 9:39) Ndipopa ifepano timbawona lini nthawe ya nkhawa ninga mpata wakuti tikondwe. (Mpalizi 3:1, 4; 7:1-4) M’mbuto mwace timbawona kuti imweyi ni nthawe yakulatiza ntsisi. — Aroma 12:15.
Anyakufa ambadziwa lini cinthu ciri-centse. Bziribe basa cikhalidwe cathu ayai komwe tidacokera, timbatcenkha bzipfunziso bzakuti anyakufa ambapitiriza kukhala na moyo, nakuti bzomwe iwo ambacita bzingatokonye moyo wathu. (Mpalizi 9:5, 6, 10) Timbacitambo lini miyambo ninga iyi: kulindira nkhawa, kucita phwando la kukumbukira ntsiku yomwe munthuyo adafa, kupereka mtsembe kwa anyakufa, kulewalewa na anyakufa, kukumbira thandizo kwa anyakufa, na kupita nthaka. Ifepano timbacita lini miyambo imweyi thangwe timbateweza lamulo la m’Bibliya lakuti: “Cokani pakati pawo, . . . ndipo lekani kukhuya cinthu cakupswipa.” — 2 Akolinto 6:17.
Wanthu omwe adafa an’dzakhala pomwe na moyo. Bibliya limbalewa kuti wanthu omwe adafa an’dzakhala pomwe na moyo ndipo infa in’dzawoneka lini pomwe. (Mabasa 24:15; Apocalipse 21:4) Pakuti tikudikhirira bzimwebzi, ifepano timbatcenkha kukhala wakusunama mwakupitirira malire ndipo timbatcenkhambo kucita miyambo yomwe imbabverana lini na kufuna kwa Yahova, ninga momwe Akristau wakuyambirira adacitirambo. — 1 Atesalonika 4:13.
Bibliya limbalewa kuti tin’funika lini kumbabziwonesera. (Mimwani 11:2) Ifepano timbawona lini msinda wa nkhawa ninga mpata wa “kubziwonesera” kuti tina kobiri zizinji. (1 Juwau 2:16) Timbacita lini miyambo yakundofuna kukondwesa wanthu ayai kugula kaxau yakuumira kwene-kwene na kubvala bzakubvala bzakuumira pakundofuna kuti wanthu adabwe nafe.
Timbangingimiza lini wanthu kuti abvume bzomwe timbakhulupira pakulewa bza msinda wa nkhawa. Kulewa cadidi, ifepano timbateweza mtemo wakuti: “Munthu ali-wentse payekha an’dzabzitawirira yekha kwa Mulungu.” (Aroma 14:12) Tsono wanthu akatibvunza bzomwe ifepano timbakhulupira, timbacita nyongo yakuwafotokozera “mwakubzicepesa na ulemu bukulu.” — 1 Pedru 3:15.
Kodi msinda wa nkhawa wa Mboni za Yahova umbacitika tani?
Mbuto: Banja lomwe laferedwa, ndiro lomwe lingasankhule mbuto yomwe inkacitikira msinda wa nkhawayo. Mwaciratizo, winango angasankhule kuti msindayo ukacitikire pa Nyumba ya Umambo, ku nyumba yakukoyera mitembo (casa mortuária), kumui kwawo, ku mbuto yakutethera mitembo ayai ku thenje.
Pa msindapo: Pa msindayu pambafotokozedwa nkhani ya m’Bibliya yomwe imbakhala ikulewa bza infa na bzakuti wanthu wakufa an’dzalamusidwa. (Juwau 11:25; Aroma 5:12; 2 Pedru 3:13) Nkhaniyo ingafotokozembo makhalidwe yabwino yomwe munthuyo akhanayo pabodzi na bzomwe tingapfunze na ciratizo cace. — 2 Samuyeli 1:17-27.
Pa msindayu pangaimbidwembo nyimbo yakucokera m’Bibliya. (Akolose 3:16) Msindayo umbamalizidwa na mpembo wakutsangalaza. — Afilipi 4:6, 7.
Kobiri: Bzinthu bzomwe Mboni za Yahova zimbacita pa msinda wa nkhawa ninga kufotokoza nkhani ya nkhawa, nyimbo, mipembo na mabasa yentse yomwe timbacita, timbapagalisi lini. Mpsibodzi-bodzimbo na bzomwe bzimbacitika pa mitsonkhano yathu, pambafambisidwa lini ntsengwa ayai palato yakukumbirira kobiri. — Mateu 10:8.
Wanthu omwe angagumanike pa msindayo: Ninga momwe bzimbakhalira na mitsonkhano yathu, wanthu wentse omwe ni Mboni lini za Yahova angagumanikembo pa msinda wa nkhawa omwe ungacitikire pa Nyumba ya Umambo.
Kodi Mboni za Yahova zimbagumanikambo pa misinda ya nkhawa yomwe imbatsogoleredwa na magereja manango?
Mboni ya Yahova iri-yentse imbasankhula bzomwe ingacite mwakubverana na bzomwe idapfunza m’Bibliya. (1 Timotio 1:19) Tsono ifepano timbacita lini miyambo iri-yentse yomwe imbabverana lini na bzomwe Bibliya limbalewa. — 2 Akolinto 6:14-17.