Thandizani Mwakamfulumize Omwe Akufuna Kudziwa Mulungu

1. Kodi n’ciyani comwe wanthu ambacita akabva mafala yabwino? (Mabasa 13:47, 48; 16:14, 15)

MU NTHAWE ya Akristau wakuyambirira, wanthu azinji adabvuma cadidi pomwe adabva kakuyamba mafala yabwino. (Werengani Mabasa 13:47, 48; 16:14, 15.) Ntsiku zino, wanthu winango ambakomedwambo akabva kakuyamba mafala yabwino. Pakuyamba winango ambalatiza lini kuti akufuna kudziwa bzizinji bza mafalayo, tsono na kupita kwa nthawe iwo ambadzafuna kudziwa bzizinji bza mafalayo. N’ciyani comwe tingacite tikagumana na wanthu omwe ana “makumbukidwe yabwino” mu upalizi?

2. Thangwe ranyi basa lakupalizira lidandendemezeredwa na basa lomwe mulimi ambacita?

² Basa lathu lakupalizira tingalindendemezere na basa lomwe mulimi ambacita. Mulimi akawona bzisapo bzakufuira m’muti ambabzicoseratu. Tsono iye ambapitiriza kulima na kusamalira miti minango yomwe ina bzisapo bzomwe bzikanati kufuira. Mwa njira ibodzi-bodziyi, tikagumana na munthu omwe akufuna kudziwa bzizinji, tin’funika kumuthandiza mwakamfulumize kuti akhale nyakupfunza wa Jezu. Tsono kwa wale omwe ambalatiza kuti akufuna lini kudziwa bzizinji timbawasiya lini tenepo. Ifepano timbapitiriza kuwathandiza kubvesesa phindu la kupfunza bza Mulungu na bza Bibliya. (Juwau 4:35, 36) Tikakwanisa kuzindikira penu munthu akufuna kupfunza bzizinji bza mafala yabwino ayai ne, bzimbakhala bzakupusa kugumana njira yabwino yakumuthandizira. Mu nkhani ino, tiniwona bzomwe tingacite pa ulendo bwakuyamba kuti tithandize omwe akufuna kutitetekera. Tin’pfunzambo momwe tingawathandizire kupitiriza kukula mwauzimu.

MOMWE TINGATHANDIZIRE WANTHU OMWE AKUFUNA KUDZIWA BZIZINJI

3. N’ciyani comwe tin’funika kucita tikagumana na munthu omwe akufuna kudziwa bzizinji mu upalizi? (1 Akolinto 9:26)

³ Mu upalizi, tikagumana na munthu omwe akufuna kudziwa bzizinji, tin’funika kumuthandiza mwakamfulumize kupfunza bza Yahova acikhala pa uxamwali na iye. Ndipopa pa ulendo bwakuyamba, tin’funika kuyambisa pfunziro la Bibliya ticimucemera kuti abwere ku mitsonkhano yathu. — Werengani 1 Akolinto 9:26.

4. Kodi mtsikana munango adalatiza tani kuti akhafunisisa kupfunza Bibliya?

⁴ Yambisani pfunziro. Wanthu winango omwe timbayamba kuceza nayo ambakhala wakukonzeka kupfunza Bibliya mwakamfulumize. Mwa ciratizo, pa cinai, mtsikana munango ku Canadá adafenderera kangolo ka mabukhu ndipo adatenga broxura lakuti Khalani na Moyo Wakukondwa Mpaka Kale-kale!. Mpfumakazi yomwe ikhali pa kangolopo idamuuza kuti broxura limweri lingadamuthandiza kupfunza Bibliya fovolo. Mtsikanayo adafuna kudziwa bzizinji ndipo adapasana numero za telefoni. Patsogolo pace, ntsiku ibodzi-bodziyo mtsikanayo adatumizira mensaje mpfumakaziyo aciibvunza bza pfunziro la Bibliyalo. Pomwe mpfumakaziyo idabvunza mtsikanayo penu bzingadakwanisika kuti agumane kuphampha kwa sumana, mtsikanayo adatawira kuti: “Tani ticigumana mangwana? Nin’dzakhala ndiribe bzakucita.” Iwo adayamba kupfunza Bibliya pa cixanu sumana imweyo. Mtsikanayo adayenda kakuyamba ku mitsonkhano sumana imweyo ndipo mwakamfulumize adapitiriza kukula mwauzimu.

5. N’ciyani comwe tin’funika kucita nthawe zinango pomwe tikanati kuyambisa pfunziro la Bibliya? (Onanimbo bzithunzi-thunzi.)

⁵ Kulewa cadidi, ni wanthu lini wentse omwe an’dzabvuma kupfunza Bibliya mwakamfulumize ninga momwe mtsikana ule adacitira. Wanthu winango angafunikire nthawe. Tingacitise munthu kufuna kudziwa bzizinji mwakulewa nkhani yomwe iye angakomedwe nayo. Tikakhala na makumbukidwe yabwino na kupitiriza kulatiza kuti timbacita thupo na munthuyo, mu nthawe ing’ono-ng’ono pinango tingamucitise kufuna kuyamba kupfunza Bibliya. Kodi n’ciyani comwe tingalewe tikafuna kuyambisa pfunziro la Bibliya? Tidacita mbvunzo umweyu abale na mpfumakazi zakusiyana-siyana omwe bzimbawanesa lini kuyambisa mapfunziro ya Bibliya. Mbatiwoneni bzomwe iwo adalewa.

6. N’ciyani comwe tingacite kuti munthu afune kupitiriza na maceza?

⁶ Abale omwe adabvunzidwa bza kuyambisa mapfunziro ya Bibliya wale, adalewa kuti ku mbuto zinango, tikafuna kulewa bza pfunziro bzingakhale bwino kutcenkha kuphatisa basa mafala ninga “pfunziro,” “pfunziro la Bibliya” ayai “inepano nin’kupfunzisani.” Iwo adazindikira kuti mafala yabwino yomwe tingaphatise basa njakuti “maceza” na “kubvesesa Bibliya.” Kuti mucitise munthu kufuna kupitiriza na macezayo, imwepo mungalewe kuti: “Mpsakudabwisa momwe Bibliya limbatawirira mibvunzo yakufunika kwene-kwene pa moyo wathu” ayai “Bibliya ni bukhu lini la gereja basi, koma limbatipasambo malango yomwe yangatithandize ntsiku na ntsiku.” Ndipo mungalewembo kuti: “Tin’dzamala lini nthawe ikulu ndipo mu nthawe yakucepa imwepo mun’dzapfunza cinthu comwe cingadzakuthandizeni pa moyo wanu.” Kuti muleke kugopswa munthuyo mungacite bwino kuleka kumucitisa kubva ninga kuti “ngwakumangika” ayai kuti mun’dzacita naye bzimwebzi “sumana yentse.”

7. Ni pa nthawe iponi yomwe winango adazindikira kuti akhapfunza cadidi? (1 Akolinto 14:23-25)

⁷ Acemereni kuti abwere pa mitsonkhano. Mu ntsiku za mpostolo Paulo bzikuwoneka kuti wanthu winango adazindikira kuti akhapfunza cadidi pomwe adayenda ku mitsonkhano. (Werengani 1 Akolinto 14:23-25.) Kazinji-kazinji, bzimwebzi bzimbacitikambo ntsiku zino. Anyakupfunza wa Bibliya azinji ambakula mwauzimu mwakamfulumize akayamba kufika pa mitsonkhano. Kodi ni pa nthawe iponi yomwe mungawacemere kuti abwere ku mitsonkhano? Bukhu lakuti Khalani na Moyo Wakukondwa Mpaka Kale-kale! lina mcemo pa pfunziro 10. Tsono imwepo mun’funika lini kudikhirira kuti mufike pa pfunziro limweri kuti mucemere munthu kuti abwere ku mitsonkhano. Pa maceza yakuyamba, imwepo mungamucemere munthuyo kuti abwere pa mitsonkhano ya kuphampha kwa sumana. Pinango imwepo mungamuuze msolo wa nkhani ya wentse yomwe in’kafotokozedwa ayai nfundo yakufunika yomwe in’kapfunzidwa pa Pfunziro la Ntsanza ya Mulindiri.

8. N’ciyani comwe tingauze munthu omwe tamucemera kuti abwere pa mitsonkhano? (Zaiya 54:13)

⁸ Pomwe mukucemera munthu omwe akufuna kudziwa bzizinji kuti abwere ku mitsonkhano, mufotokozereni momwe mitsonkhano yathu njakusiyanira na bzomwe iye pinango adawona m’magereja manango. Nyakupfunza wa Bibliya munango omwe adagumanika kakuyamba pa Pfunziro la Ntsanza ya Mulindiri, adabvunza mpfunzisi wace wa Bibliya kuti: “Kodi nyakutsogolerayu ambadziwa madzina ya wanthu wentse?” Mpfunzisiyo adamuuza kuti ninga momwe timbadziwira madzina ya wanthu wa m’banja mwathu, ifepano timbacitambo nyongo yakudziwa madzina ya abale na mpfumakazi. Nyakupfunzayo adalewa kuti ku gereja kwace bzimwebzi bzikhambacitika lini. Tingamufotokozerembo cakulinga ca mitsonkhano yathu. (Werengani Zaiya 54:13.) Ifepano timbatsonkhana kuti tinamate Yahova, kupfunza bza iye na kulimbikisana. (Ahebereu 2:12; 10:24, 25) Ndipopa mitsonkhano yathu idalinganizidwa kuti itithandize kudziwa bzinthu sikuti kucita miyambo. (1 Akolinto 14:40) Ndipo mbuto zathu zakunamatira ziribe kudekesedwa mu njira yakupambulika, koma zidakonzedwa na cakulinga cakuti bzikhale bzakupusa kupfunza. Pakuti timbapitira lini nkhani za ndale, ifepano timbacezerana lini bza ndalezo. Cinthu comwe cingathandize nyakupfunzayo ndico kumuwoneseratu vidiyo yakuti N’ciyani Cimbacitika mu Nyumba ya Umambo? Mwa njira imweyi, iye an’dzayenda ku mitsonkhanoko akudziwa kale momwe bzin’kakhalira.

9-10. N’ciyani comwe tingauze munthu omwe akuzeza kuyenda ku mitsonkhano? (Onanimbo cithunzi-thunzi.)

⁹ Wanthu winango ambazeza kuyenda ku mitsonkhano thangwe ambakumbuka kuti “an’dzakhala Mboni ya Yahova.” Ndipopa mutsimikizireni munthuyo kuti ifepano timbakomedwa kutambira alendo pa mitsonkhano yathu nakuti timbawangingimiza lini kuti alewelewe ayai kucita cinthu cinango pa mitsonkhanoyo ayai kuti akhale Mboni ya Yahova. Mabanja yambatambiridwa na manja mawiri kuphatanidzambo wana. Ndipo pa mitsonkhano yathu wana ambapfunzisidwa lini pawokha. M’mbuto mwace, abereki pabodzi na wana wawo ambakhala pabodzi ndipo ambapfunzambo pabodzi. Mwa njira imweyi, abereki ambadziwa kuti wana wawo mbakukhotcerereka na bzomwe akupfunzisidwa. (Deuteronomiyo 31:12) Timbafambisa lini palato kuti wanthu aikhe kobiri ayai kukumbira kobiri pa mitsonkhano yathu. M’mbuto mwace, timbateweza malango ya Jezu yakuti: “Mudatambira fovolo, perekanimbo fovolo.” (Mateu 10:8) Imwepo mungamuuzembo munthuyo kuti an’funika lini kukhala na bzakubvala bzakuumira kuti abwere pa mitsonkhano yathu. Mulungu ambawona lini mawonekedwe koma ambawona mu mtima. — 1 Samuyeli 16:7.

¹⁰ Munthuyo akabwera pa mitsonkhano yathu, citisani kuti abzibve kuti watambiridwa. M’dziwikiseni kwa akulu na kwa abale winango. Iye akabzibva kuti watambiridwa, bzimwebzi bzingacitise kuti afune kudzabwerera pomwe. Penu iye alibe kubweresa Bibliya, mbawonani naye pabodzi mavesi m’Bibliya mwanu. Kuthumizira bzimwebzi, muthandizeni kubvesesa nkhani yomwe ikufotokozedwayo na bzentse bzomwe bzikupfunzidwa.

MOMWE TINGATHANDIZIRE MUNTHU OMWE WAYAMBA KUPFUNZA BIBLIYA

11. N’ciyani comwe mungacite kuti mulatize kuti mumbalemekeza nthawe na ndondomeko yomwe nyakupfunza wanu akhazikisa?

¹¹ Pomwe tikupfunza Bibliya na munthu, n’ciyani comwe tin’funika kukumbukira? Mbalemekezani nthawe na ndondomeko ya munthuyo. Imwepo mukapangana na munthuyo nthawe kuti mudzapfunze, mbafikani pa nthawe imweyo napo kuti winango wa komwe mumbakhalako ana cizolowezi ca kumbacedwa. Kuthumizira bzimwebzi, pinango bzingakhale bwino kuti pa pfunziro lakuyamba muleke kudzamala nthawe ikulu kwene-kwene mukupfunza. Abale na mpfumakazi omwe adapfunza Bibliya na wanthu wakusiyana-siyana adalewa kuti mpsabwino kuleka kumbamala nthawe ikulu mukupfunza napo kuti munthuyo angawoneke kuti akufuna kudziwa bzizinji. Tcenkhani kumbalewalewa kwene-kwene. Mbapasani nthawe nyakupfunzayo kuti ambafotokoze momwe akubvera na bzomwe akukumbuka. — Mimwani 10:19.

12. Kodi cakulinga cathu cin’funika kukhala ciponi kuyambira pa nthawe yomwe tayamba kupfunza Bibliya na munthu?

¹² Kuyambira pa ntsiku yomwe muniyamba kupfunza Bibliya na munthu, imwepo mun’funika kumuthandiza kudziwa Yahova na Jezu na kukulisa lufoyi lace kwa iwo. Njira ibodzi ya momwe mungacitire bzimwebzi ndiyo kumbamulatiza bzomwe Bibliya limbalewa nthawe zentse sikuti kumbamuuza bzomwe imwepo mumbakumbuka. (Mabasa 10:25, 26) Mpostolo Paulo akhali ciratizo cabwino pa nkhani imweyi. Pomwe iye akhapfunzisa wanthu, akhaikha nzeru zace pa Jezu omwe adabwera pa dziko pano kudzatithandiza kudziwa Yahova na kumufuna. (1 Akolinto 2:1, 2) Kuthumizira bzimwebzi, Paulo adawathandizambo kubvesesa kufunika kwa kukulisa makhalidwe yabwino yomwe yangandendemezeredwe na oro, prata na minyala yakufunika. (1 Akolinto 3:11-15) Makhalidwe yamweya yambaphatanidza cikhulupiro, nzeru, kuzindikira na kugopa Yahova. (Salimo 19:9, 10; Mimwani 3:13-15; 1 Pedru 1:7) Tewezerani momwe Paulo akhapfunzisira ndipo thandizani anyakupfunza wanu kukhala na cikhulupiro cakulimba na uxamwali bwakulimba na Baba wawo wa kudzulu. — 2 Akolinto 1:24.

13. Kodi tingakhale tani wakupirira na wakusaya kungingimira nzeru zathu pomwe tikuthandiza nyakupfunza wa Bibliya? (2 Akolinto 10:4, 5) (Onanimbo cithunzi-thunzi.)

¹³ Pomwe mukupfunzisa, tewezerani Jezu mwa kukhala wakupirira na wakuleka kungingimira nzeru zanu. Tcenkhani kucita mibvunzo yomwe ingacitise kuti munthuyo acite manyazi. Penu bzikumunesa kubvesesa nfundo inango, pitirizani pfunzirolo ndipo dzacezeni bza nkhaniyo pa nthawe inango. M’mbuto mwa kungingimira kuti nyakupfunzayo abvume nfundo inango, mupaseni nthawe kuti aikumbukire acicinja nzeru zace. (Juwau 16:12; Akolose 2:6, 7) Bibliya limbalewa kuti bzipfunziso bzakunama bziri ninga bzinthu bzakuzika kwene-kwene bzomwe bzin’funika kupfudzidwa. Mu cirewedwe cace caico, pakulewa bza bzipfunziso bzakunama, Bibliya lidaphatisa basa mafala yakuti muro omwe un’funika kugwesedwa. (Werengani 2 Akolinto 10:4, 5.) Bzingakhale lini bzakupusa kwa nyakupfunza kusiya kukhulupira cinthu comwe akhacikhulupira kuyambira kale-kale. Ndipopa tin’funika kumuthandiza kumanga pomwe muro upsa ayai kumuthandiza kuthemba Yahova ninga mbuto yace yakuthawira. — Salimo 91:9.

MOMWE TINGATHANDIZIRE MUNTHU OMWE WAYAMBA KUBWERA PA MITSONKHANO

14. Kodi tin’funika kucita tani bzinthu na wale omwe ayamba kubwera pa mitsonkhano?

¹⁴ Yahova akufuna kuti timbacitire bzinthu mwakudeka mtima wanthu wentse. Bziribe basa komwe iwo adacokera, cikhalidwe cawo ayai penu ana kobiri ayai ne. (Tiyago 2:1-4, 9) Kodi tingalatize tani lufoyi wale omwe ayamba kubwera pa mitsonkhano?

15-16. Kodi tingathandize tani wale omwe n’kuyamba kubwera pa mitsonkhano kubzibva kuti atambiridwa bwino?

¹⁵ Wanthu winango ambabwera pa mitsonkhano yathu thangwe rakuti akufuna kuwona bzomwe bzimbacitika ayai thangwe rakuti acita kuuzidwa na munthu wa gwere linango. Mukawona munthu omwe wabwera kudzatizungira ku Nyumba ya Umambo, cezani naye ndipo mutambireni na manja mawiri. Citani naye bzinthu mwa uxamwali, koma tcenkhani kumucitisa kuti aleke kubzibva bwino. Mukumbireni kuti mukhale naye pabodzi. Mbawonani naye pabodzi Bibliya lanu, mabukhu yanu ayai mukumbirireni mabukhuyo. Kuthumizira bzimwebzi, yezerani kubvesesa momwe iye akubvera. Mwamuna munango omwe adazungira Nyumba ya Umambo adauza m’bale omwe adamutambira kuti akhacita thupo thangwe akhalibe kubvala bzakubvala bzabwino ninga momwe wentse akhadabvalira. M’baleyo adamuthandiza kuti akhale wakutsudzuka ndipo adamuuza kuti Mboni za Yahovafe tiri ninga wanthu wentse. Na kupita kwa nthawe, mwamunayo adadzabatizidwa, tsono alibe kuyebwa bzomwe m’bale ule adamuuza. Na tenepo, pomwe tikuceza na wanthu omwe akubwera kudzatizungira, tin’funika kutcenkha kucita mibvunzo yomwe ingawacitise kucita manyazi ayai kuwabvunza bzinthu bzomwe tingafunikire lini kudziwa. — 1 Pedru 4:15.

¹⁶ Ifepano tingathandizire kuti wanthu omwe abwera kudzatizungira pa mitsonkhano yathu abzibve kuti atambiridwa bwino mwa kulewalewa nawo mwaulemu, kupereka mitawiro yakulimbikisa ayai kulewalewa mwa ulemu pomwe tikufotokoza bza wanthu omwe ni Mboni lini ayai bzomwe timbakhulupira. Tcenkhani kulewa bzinthu bzomwe bzingawasunamise ayai bzomwe bzingawacitise kuti aleke kudzafuna kubwera pomwe pa mitsonkhano yathu. (Tito 2:8; 3:2) Tin’funika lini kumbatsutsa ayai kumbalewa kuipa bzomwe winango ambakhulupira. (2 Akolinto 6:3) Abale omwe ambafotokoza nkhani ya wentse an’funika kucita mphole kwene-kwene na nkhani imweyi. Abale amwewa ambalatizambo kuti ambakumbukira wale omwe ni Mboni lini za Yahova mwa kumbaphatisa basa mafala yakusaya kunesa kuti wanthu omwe abwera kudzatizungirawo abvesese.

17. N’ciyani comwe tin’funika kucita tikagumana wanthu omwe akufuna kudziwa bzizinji?

¹⁷ Pomwe ntsiku zikupita, basa lakupalizira likufunika kucitidwa mwakamfulumize. Ndipo ifepano tin’pitiriza kugumana wanthu omwe ana makumbukidwe yabwino yomwe yangawathandize “kugumana moyo wakusaya kumala.” (Mabasa 13:48) Bzimwebzi bzikacitika, tin’funika lini kuzeza kuyambisa pfunziro la Bibliya ayai kuwacemera kuti abwere pa mitsonkhano yathu. Tikambacita bzimwebzi, tin’dzawathandiza kuti ayambe ‘kufamba mu mseu omwe umbayendesa ku moyo.’ — Mateu 7:14.