Seputembala

Kyala ampele Yesu amaka aghakumasya indamyo syosa sya bandu. Ukwendela mfika, Yesu anangisyagha amaka ghake ukuti abaghile ukumasya indamyo syosa isi tukabaghila ukumalana nasyo patwibene. Mwakifwanikisyo, umwene ali namaka aghakutwabula kubutulanongwa ubu twalyambwile kangi nindamyo isi tukwaghana nasyo panongwa yabutulanongwa bo, ububine ninifwa. (Mat. 9:​1-6; Rom. 5:​12, 18, 19) Ifika fyake fyanangisyagha ukuti abaghile ukubumbulusya imbungo “syosa” nukusyusya abandu aba bafwile. (Mat. 4:23; Yoh. 11:​43, 44) Kangi ali namaka aghakubatamisya umbelo wamaka nukubabumbulusya abandu kumbepo inyali. (Mar. 4:​37-39; Luka 8:2) Syakukasya fiyo ukumanya ukuti Yehova ampele umwanake amaka bo agha. tubaghile ukuya nulusubilo losa ukuti ifindu ifinunu ifi afingile nkyeni mu Bunyafyale bwa Kyala fisakufwanisiwa. Ifika ifi Yesu abombagha bo ali pakisu, fikutumanyisya isi isakubomba pakisu kyosa panongwa yakuti umwene Mwalafyale wa Bunyafyale bwa Kyala kumwanya. w23.04 3 ¶5-7

Linga ikipanga kyinu kili nabafumusi bingi, kangi mukuketa ukuti batikubasala, mubaghile ukuleka ukwinusya. Loli mungawagha amaka mukulondiwa ukughelaghela ukuti mwamulengepo. Mwitendekisye ifundo nyingi isyakuti mukamulepo. Linga batikubasala kubwandilo bwa kimanyilo, mubaghile ukuya nulusako ulwakwamulapo kubumalilo. Bo mukwitendekesya Ingasya ya Ndindilili, mwinong’oneleghe muno ipalagilafu yiliyosa yikukolelana numutu wa nkhani. Linga mubombile isi, mukuya pakuya nifundo inunu isyakuti mwamulepo pakimanyilo kyosa. Mwakongelelapo, mubaghile ukwitendekesya ukuti mukamule ifundo inywamu isya mu Baibolo isi sikuya ngafu ukusilingania. Nongwa yafiki? Panongwa yakuti abandu abakwamulapo babaghile ukuya banandi pakighaba iki. Bule linga mukuketa ukuti pangomano nyingi mutikuya nulusako ulwakwamulapo? Mubaghile ukuyobesania na uyu ikulongosya bo ingomano sikali ukwanda nukumbula ilalusyo ili mukulonda ukwamula. w23.04 21-22 ¶9-10

Yosefu akongile kanunu ubulongosi bwa Yehova, kangi isi syalimpangisye ukuya nnyambala nnunu fiyo. Umwene alyambilile ubulongosi ubwakufwana nimbumba yake amabulendo matatu ukufuma kwa Kyala. Yosefu apilikilagha mwanakalinga ubulongosi nalinga ukuti kwali kukafu ukubomba isi kumyake. (Mat. 1:20; 2:​13-15, 19-21) Mwakukonga ubulongosi bwa Kyala, umwene amfighililagha Maria, antulagha, nukumpasikisya. Isi Yosefu abombagha syantulagha Maria ukuti anganeghe nu kungindika fiyo. Mwe banyambala, mubaghile ukunkonga Yosefu mwakupilikila ubulongosi bwa mu Baibolo ubwakufwana nukuyipwelelela imbumba yinu. Linga mukukonga ubulongosi ubu, nalinga popakabalilo aka mukulonda ukuchenja ifindu pabumi bwinu, mubaghile ukunangisya ulughano ku nkasi winu nukukasya imbumba. Umulumbu yumo wa ku Vanuatu, uyu ikele pabweghi kwa fyinja ifyakukinda 20, atile: “Linga undume wangu ikukonga ubulongosi bwa Yehova, ngungindika fiyo.” w23.05 21 ¶5

Abayuda aba baghomwike ukufuma ku Babeloni, bayagha pakuya “bandu basunguliwa” kwa Kyala wabo. (Kukumbu. 7:6) Loli isi sikasanusyagha ukuti bakalondiwagha ukuchenja ukuti banhobosyeghe Yehova. Abayuda bingi bapapiliwe ku Babeloni, kangi bingi balisibile nutuyilo twa ku Babeloni. Bo ifyinja fingi fikindilepo ukufuma apa Abayuda bakwanda baghomokile ku Israeli, Undindililakisu Nehemiya, aswighile fiyo bo ikuketa abana aba bapapiliwe ku Israeli bakamanyisiwa injobelo ya Chiyuda. (Kukumbu. 6:​6, 7; Nehe. 13:​23, 24) Ngimba abakilumyana aba bayagha pakumanyila bulebule ukungana nukumwiputa Yehova linga bakapilikagha Ikihiburi injobelo iyi yo babombile ukulemba Amasyu gha Kyala? (Ezra 10:​3, 44) Polelo ku Israeli ko kuno kwayagha pakuya kupepe fiyo ukuti Abayuda bachenje nu kughomokesyapo ukwiputa kwa bwanaloli ukukinda apa bali ku Babeloni.—Nehe. 8:​8, 9. w23.05 15 ¶6-7

Nalinga ukuti utubalilo tumo tukukasiwa, loli tubaghile ukwaghana nifindu fimo ifi fibaghile ukutuwisya amaka. Mwakifwanikisyo, “ifindu ifi tukaghulilagha” fibaghile ukutupangisya ukutoliwa ukufwanisya ubwighane bwitu. (Ndumbi. 9:11) Tubaghile ukwaghana nindamyo iyi yibaghile ukutuwisya amaka. (Mbu. 24:10) Panongwa yakuti tuli basitabugholofu, tubaghile ukubomba ifindu ifibibi nukutoliwa ukufwanisya ubwighane bwitu. (Rom. 7:23) Lumo tubaghile ukukatala fiyo. (Mat. 26:43) Ngimba findu fiki fibaghile ukututula ukumalana nifindu ifi fibaghile ukutuwisya amaka? Linga simo sibawisisye amaka, sitikusanusya ukuti mutoliwe. Ibaibolo likuti utubalilo twingi tukwaghana nindamyo.” Linga mukukindilila ukuti mufwanisye ubwighane bwinu nalinga ukuti kubaghile ukuya kukafu, mukunangisya ukuti mukulonda ukunhobosya Yehova. Umwene ikuhoboka fiyo linga ikuketa ukuti mukughelaghela ukufwanisya ubwighane bwinu. w23.05 30 ¶14-15

Ukubomba ubupayiniya kukubatula abakamu abalumyana ukumanya muno babaghile ukubombela kanunu nabandu abakukindanakindana. Kukubatula kangi ukumanya muno babaghile ukubombela kanunu indalama isi bikukaba nukuleka ukubombela nyingi ukukinda isi bali nasyo. (Filip. 4:​11-13) Ukuti umundu abombe ubupayiniya bwa kabalilo kosa, ikulondiwa ukubomba tasi ubupayiniya bwakabalilo. Ukubomba ubupayiniya, kukutula ukuti baye nulusako lwakubomba ububombeli ubungi ubwakabalilo kosa, bo ububombeli ubwakuyenga pamo ukubombela pa Beteli. Abakamu bosa bikulondiwa ukuya nubwighane ubwakuti babatuleghe abakamu na balumbu pakuya bakulumba bakipanga. Ibaibolo likuyoba ukuti abanyambala aba bikwiyipa ukuti babombeghe ubudindo ubu, “bikunyonywa imbombo inunu.” (1 Tim. 3:1) Ikyakwanda, unkamu ikulondiwa ukuya ntuli wakipanga. Abatuli bakipanga bikubatula abakulumba munjila nyingi. Abakulumba na batuli bakipanga bosa bikubatula abakamu na balumbu mwakwiyisya kangi bikwiyipa ukufumusya. w23.12 28 ¶14-16

Umwalafyale Yosiya ali wakilumyana pakabalilo aka alyandile ukumanyila isya Yehova. Umwene alondagha ukumanyila isya Yehova nukubomba ubwighane bwake. Loli kukali kupepe ukubomba ifindu pakuya mwalafyale wakilumyana. Umwene alondiwagha ukubombapo simo ukuti aghomokesyepo ukwiputa kwa bwanaloli panongwa yakuti abandu bingi biputagha ku bakyala babutungulu. Kangi syo isi abombile. Bo Yosiya akali ukufwanisya ifyinja 20, alyandile ukusosyapo ukwiputa kwabutungulu mu Yuda. (2 Syambu. 34:​1, 2) Nalinga ukuti muli wakilumyana, mubaghile ukunkonga Yosiya mwakumanyila isya Yehova nukundaghisya utuyilo twake. Linga mukubomba isi, mukuya pakwiyipa kumyake. Ngimba isi sikuya pakupalamasya bulebule ubumi bwinu? Luke, uyu alyosiwe bo ali nifyinja 14, atile, “Ukwanda lino, nguya pakwiyipagha fiyo ukumbombela Yehova pabumi bwangu nukughelaghela ukunhobosya.” (Mar. 12:30) Nanumwe mukuya pakusayiwa fiyo linga muli nubwighane ubwakufwana itolo. w23.09 11 ¶12-13

Akabalilo aka Pauli alembile kalata uyu, ikipanga kya Bakristu ba ku Tesalonike kyamalile itolo ikyinja. Abanyambala aba balimikiwe nkipanga iki babaghile ukuti bakamenye nyingi kangi lumo basobagha pakubomba ifindu. Loli pope balondiwagha ukughindikiwa. Bo ubutolwe ubukulumba bukuseghelela, tukulondiwa ukubasubila fiyo abakulumba bapakipanga kyitu ukuti batulongosyeghe. Panongwa yakuti tukabaghila ukuyobesania na bakamu ba ku ofesi yitu inywamu pakisu kyosa pamo aba ku ofesi ya nkisu kitu, kwakulondiwa fiyo ukubaghana nu kubaghindika abakulumba bapakipanga kyitu lino. Kisita kuketa isi bikubomba, tungabikagha amahala ku isi bikusoba loli tusubileghe ukuti Yehova ikubalongosya abanyambala abasubiliwa aba ukwendela mwa Kristu. Bo muno ikitili kikughufighilila untu wa nsilikali, ulusubilo lwitu ulwakupokiwa, lukufighilila inyinong’ono syitu kangi lukututula ukuti twinong’oneghe kanunu. Tukusyaghania ukuti ifindu fya nkisu fya itolo. (Filip. 3:8) Ulusubilo lwitu lukututula ukuti tuyeghe bololo nukuya maso. w23.06 11-12 ¶11-12

Aba bikupilika amasyu gha “nkikulu unkonyofu” bikulondiwa ukusala ukwitika pamo ukukana. Filipo ififukwa ifinunu ifi tutikulondiwa ukubomba utuyilo twabulowe. “Unkikulu unkonyofu” ikuyobiwa ukuti: “Amisi gha mbuhiyi gho ghikunogha.” (Mbu. 9:17) Ngimba “amisi gha mbuhiyi” findu fiki? Ibaibolo likufwanikisya ukughonana kwa nnyambala nu nkasi wake na misi agha ghikupa ubutusyo. (Mbu. 5:​15-18 NWT) Unnyambala nu nkikulu aba beghene mwakukonga indaghilo bo aba bikwitikisiwa ukughonana. Loli ngimba fikindene bulebule na “misi gha mbuhiyi”? Amasyu agha ghikuyoba isya kughonana uku kukukanisiwa. Isi sikubombiwa mwakwibilila bo muno unhiyi ikubombela pakwiba ifindu. “Amisi gha mbuhiyi” ghabaghile ukufwana ghikunogha linga aba bikubomba isi bikuketa ukuti bafisile ubutulanongwa bwabo. Syakitima fiyo papo bikwisyoba bene. Loli Yehova ikuketa kilikyosa. Ukonanga ubumanyani bwitu na Yehova, kyo kindu ikyakubaba fiyo kangi ukubomba isi kukaya ‘kununu’ napanandi.—1 Kor. 6:​9, 10. w23.06 22 ¶7-9

Loli bule linga mukuketa ukuti inyiputo syinu sitikufuma pasi pandumbula pamo mutikuhoboka nubufumusi? Komma ukwinong’ona ukuti mbepo wa Yehova atikubatula. Panongwa yakuti tuli bandu basitabugholofu, utubalilo twingi aminong’ono ghitu ghabaghile ukuchenja. Linga mwandile ukuwa amaka, mwinong’oneleghe ikifwanikisyo kya ntumiwa Pauli. Nalinga ukuti aghelaghelagha ukunkonga Yesu loli umwene asimenye ukuti utubalilo tumo akafwanisyagha isi alondagha ukubomba. Pauli aliyipile ukuti afwanisye ububombeli bwake kisita kwinong’onela muno ipilikilagha pakabalilo kala. Mwakufwana itolo, komma ukusala ifyakubomba ukufwana namuno mukwipilikila. Amughelegheleghe ukubomba inunu kisita kwinong’onela muno mukwipilikila. Linga mukukindilila ukubomba inunu, panandinapanandi aminong’ono ghinu ghabaghile ukuchenja.—1 Kor. 9:16. w24.03 11-12 ¶12-13

Tubaghile ukubanangisya ulughano abakamu na balumbu bitu mwakuya nabo pabumanyani nukwangala nabo. Isi sikuya pakubapangisya ukuti bope batughaneghe. (2 Kor. 6:​11-13) Twe bingi tuli mfipanga ifi mukwaghiwa abakamu na balumbu aba tukindene nabo inyiho pamo uluko. Tukukusya ulughano lwitu ku myabo linga tukwinong’onela isya tuyilo twabo utununu. Linga tukubaketa abangi bo muno Yehova ikubaketela, tukunangisya ukuti tubaghanile. Twisakulondiwa ukubaghana abakamu na balumbu bitu pabutolwe ubukulumba. Linga ubutolwe ubukulumba bwandile, ngimba Yehova isakutufighilila bulebule? Inong’onela isi Yehova ababulile ababombi bake bo akaya ka Babeloni bakasambukile. Umwene atile: “Mwe bandu bangu, amwingileghe nnyumba syinu po mwende nukwighalako ku fifigho. Pakabalilo kanandi mwibilileghe mumo, sibuye sikinde ingalalisi sya Yehova Kyala.” (Yes. 26:20) Lumo nanuswe twisakulondiwa ukukonga ubulongosi ubwakufwana itolo pabutolwe ubukulumba. w23.07 6-7 ¶14-16

Munangisyeghe ukwendela mfyakubomba ukuti mukubomba ifindu mwamahala. Mwilalusyeghe ukuti: ‘Ngimba abandu bikuketa ukuti ngubomba ifindu mwamahala? Pamo ngimba bikungeta ukuya mundu wakutamya? Ngimba ngupilikisya bo abangi bikuyoba aminong’ono ghabo linga kwakulondiwa?’ Linga tukubomba ifindu mwamahala kokuti tukunkonga Yehova na Yesu. Ukubomba ifindu mwamahala kukongelelapo ukuchenja ifindu pabumi bwitu. Ukuchenja uku kubaghile ukupangisya indamyo isi tukaghulilagha. Mwakifwanikisyo, kisita kughulila tubaghile ukubina ububine ubunywamu. Pamo ukuchenja kwa kyuma pamo ifyandyali ifi fibaghile ukupangisya ukuti ubumi buyeghe bukafu fiyo. (Ndumbi. 9:11) Ukuchenja kwa bubombeli yope yibaghile ukuya ngelo. Tubaghile ukwitikisya ukuchenja uku kubombiwe linga tukukonga injila 4 isi: (1) twitikisyeghe linga ifindu fichenjile, (2) twinong’oneleghe isya nkyeni, (3) tuketeghe ifindu ifinunu ifi fibombiwe pabumi bwitu kangi (4) tubatuleghe abangi. w23.07 21-22 ¶7-8

Unsololi Danieli ali wakilumyana pakabalilo aka Abababeloni bankolagha ku Yerusalemu ukubuka nawe kubutali ku Babeloni. Nalinga ukuti ali wakilumyana, loli pope abakulumba ba ku Babeloni balinkolile. Abene bo bikunketa “mumo abonekelagha,” balyaghile ukuti Danieli “mmoghi kangi wamahala” kangi afumagha mumbumba iyi yamanyiwe. (1 Samu. 16:7) Pafifukwa ifi, Abababeloni balimmanyisye ukuti abombeghe nnyumba ya mwalafyale. (Dan. 1:​3, 4, 6) Yehova alinganile Danieli panongwa ya bundu ubu Danieli asalile ukuya. Pakabalilo aka Danieli abaghile ukuti ali nifyinja 20, Yehova anketagha ukuya ngolofu ukufwana na Noa na Yobu, aba balimbombile Kyala kwa fyinja fingi. (Bwa. 5:32; 6:​9, 10; Jobu 42:​16, 17; Eze.14:14.) Kangi Yehova akindilile ukungana Danieli pabumi bwake bosa.—Dan. 10:​11, 19. w23.08 2 ¶1-2

Linga mukulonda ukula inyumba, mubaghile ukulonda ukuketa tasi muno inyumba iyi mukulonda ukula yikubonekela. Tubaghile ukubomba mwakufwana itolo linga tukubelenga nu kumanyila Ibaibolo. Linga mukubelenga mwanakalinga, mubaghile ukumanya itolo ifundo imbepe “isya mbwandilo isya masyu gha Kyala.” (Hib. 5:12) Loli ukufwana namuno tukuyiketela inyumba nkati ukuti tumanye muno yiyilile, nanuswe tukulondiwa ukumanyila ifundo sya mu Baibolo ukuti tusipilikisyeghe kanunu. Injila inunu iyakumanyila Ibaibolo kokuketa muno amavesi ghamo agha mu Baibolo ghikukolelana na mavesi aghangi. Mughelegheleghe ukupilikisya isi mukusubila nukuketa inongwa iyi mukusubila ukuti syabwanaloli. Ukuti tupilikisyeghe kanunu Amasyu gha Kyala, tukulondiwa ukumanyila ifundo insolofu isya Kyala. Untumiwa Pauli abakasisye Abakristu abinake ukuti biyipeghe ukumanyila Amasyu gha Kyala ukuti “babwaghanieghe muno buyilile ubwelefu, ubutali, ubwinufu nubusolofu.” Isi syabatulagha ukuti “bikumbile nukwitoteka” ndwitiko. (Ef. 3:​14-19) Nanuswe syo tukulondiwa ukubomba. w23.10 18 ¶1-3

Ibaibolo likuyoba isya bandu bingi aba bali bololo. Kubaghile ukuya kwakutula ukumanyila isyakufwana nabandu aba. Mwakifwanikisyo, nalinga ukuti Davidi ali wakilumyana pakabalilo aka apakiwagha ukuti asaye mwalafyale wa Israeli nkyeni, umwene alondiwagha ukughulila kwa fyinja fingi. Simeoni na Ana bamwiputagha Yehova mbusubiliwa bo bikungulila Mesiya uyu ayobeliwe ngani. (Luka 2:​25, 36-38) Bo mukubelenga inkhani bo isi, mughagheghe amaansala gha malalusyo aghakukongapo agha: Ngimba findu fiki fyalintulile umundu uyu ukuya mololo? Ngimba asayiwe bulebule panongwa yakuya mololo? Ngimba mbaghile ukunkonga bulebule? Mubaghile ukumanyilako kangi simo ku bandu aba bakanangisyagha ubololo. (1 Samu. 13:​8-14) Mubaghile ukwilalusya ukuti: ‘Ngimba findu fiki fyabapangisyagha ukuti bangayagha bololo? Ngimba findu fiki ifibibi ifi balyaghene nafyo panongwa yakuleka ukuya bololo?’ w23.08 25 ¶15

Untumiwa Peteri ali mundu nsubiliwa; umwene akitikisyagha ikindu kilikyosa ukuti kintolesye ukunkonga Yesu. Umwene anangisye ukuti ali nsubiliwa pakabalilo aka Yesu ayobile ifundo yimo iyi abafundiwa bake bakayipilikisye kanunu. (Yoh. 6:68) Mmalo mwakughulila ukuti abalinganie kanunu, bingi balekile ukunkonga Yesu. Loli Peteri akalindekile. Umwene alinsubiliwa kangi ayobile ukuti yo Yesu mwene uyu “alinagho amasyu gha bumi ubusita kumalika.” Yesu asimenye ukuti Peteri na bafundiwa abangi bikuya pakumbopa. Loli Yesu alimbulile Peteri ukuti ali nulusubilo ukuti Peteri ikuya pakughomokela nukukindilila ukuya nsubiliwa. (Luka 22:​31, 32) Yesu asimenye ukuti “imbepo sya nkati . . . syo sitike loli umbili gho monywa.” (Mar.14:38) Yonongwa yake bo Peteri ankanile ukuti ankammanya, Yesu akalinkalalile untumiwa wake uyu. Bo asyukile, Yesu abonekile kwa Peteri pakabalilo aka ali mwene. (Mar. 16:7; Luka 24:34; 1 Kor. 15:5) Isi sibaghile ukuti syalinkasisye fiyo Peteri uyu asulumenie panongwa ya isi abombile. w23.09 22 ¶9-10

Kyala ikuhobokela pamo ukuti ikukupikila imbibi sya bandu aba bali nulwitiko mmyake. Ikubahobokela nindumbula yosa kangi atikusikumbuka imbibi syabo. (Sal. 32:​1, 2) Ikubaketa abandu aba ukuti bakaya ninongwa kangi bagholofu panongwa yalwitiko lwabo. Nalinga ukuti Abrahamu, Davidi nababombi ba Kyala abangi abasubiliwa bali bagholofu, loli bali batulanongwa. Loli panongwa yalwitiko lwabo, Kyala abaketagha ukuya bagholofu pakufwanikisya nabandu aba bakambombelagha. (Ef. 2:12) Mwakalata wake uwakubuka ku Baroma, untumiwa Pauli alingenie ukuti tukulondiwa ukuya nulwitiko ukuti tuye pabumanyani na Kyala. Abrahamu na Davidi bali bamanyani ba Kyala panongwa yakuti bali nulwitiko mmyake. Nanuswe tubaghile ukuya pabumanyani na Kyala panongwa yalwitiko lwitu. w23.12 3 ¶6-7

Amasiku agha, Abakristu bosa bali nulusako ulwakubika amakemo kwa Yehova mwakubombela akabalilo, amaka nifindu ifi bali nafyo ukuti bambombeleghe umwene. Tubaghile ukunangisya ukuti tukundaghisya ulusako ulwa kumwiputa Yehova mwakumpa amakemo ghitu amanunu. Untumiwa Pauli alembile isya findu ifi utubalilo tosa tukulondiwa ukubomba linga tukwiputa kwa Yehova. (Hib. 10:​22-25) Isi sikongelelapo, ukwiputa kwa Yehova, ukubafumukisya abangi, ukubungana pampene nukukasania, kangi “sisisi syo sikindilileghe itolo bo mukwagha ilisiku lya Yehova liseghelile.” Kubumalilo bwa ibuku lya Ubusetuli, uwandumi wa Yehova ayobile mwakwandisania amasyu aghakuti: “Mumbungulukileghe Kyala.” (Ubuset. 19:10; 22:9) Isagha tughelegheleghe ukukumbukila ifundo insolofu isya bwanaloli isyakufwana nitempile inywamu ilya mwambepo ilya Yehova nukundaghisya ulusako ulu tulinalo ulwakwiputa kwa Kyala witu unkulumba. w23.10 29 ¶17-18

Twesa tukulonda ukuti “tughananeghe.” Loli kwakulondiwa fiyo kumyitu ukuti tukumbukeghe isi Yesu atusokile. Umwene atile “ulughano lwa bingi lwisakutalalilagha.” (Mat. 24:12) Yesu akayobile ukuti abafundiwa bake bingi bisakuleka ukunangisania ulughano. Loli tukulondiwa ukuya maso ukuti tungasofanisiwagha nabandu ba nkisu aba batikunangisya ulughano. Bo tukwinong’onela ifundo iyi, isagha tuyobesanie ilalusyo ilyakulondiwa fiyo ilyakuti: Ngimba findu fiki fikuya pakututula ukumanya linga tubaghanile naloli abakamu bitu? Injila yimo iyakumanya linga tuli nulughano lwanaloli ko kuketa muno tukubombela ifindu pabumi bwitu. (2 Kor. 8:8) Kimo mwa kindu iki akiyobile untumiwa Peteri, kyokyakuti: “Pamwanya pali syosa, mwiyumbikeghe ukughanana mwe babo batupu, namanga ulughano lukusikupikila imbibi si nyingi itolo.” (1 Pet. 4:8) Yonongwa yake isi tukubomba linga abakamu bitu bonangile pamo babombile ifindu ifi fitukalalisye, sibaghile ukututula ukumanya linga tubaghanile naloli. w23.11 10-11 ¶12-13

Tukabaghila ukukonga ululaghilo lwa Yesu ulwa lughano linga tubaghanile abakamu bamo nkipanga nukuleka ukubaghana abangi. Syabwanaloli ukuti, tubaghile ukuya pabumanyani fiyo nabandu bamo nkipanga ukukinda abangi bo muno Yesu abombile. (Yoh. 13:23; 20:2) Loli untumiwa Peteri ikutukumbusya ukuti twiyuleghe ukubaghana “abitiki abininu,” pamo ukuti tukulondiwa ukubaghana abakamu na balumbu panongwa yakuti tuli mbumba yimoyene. (1 Pet. 2:17) Peteri atile, “amughananeghe bwila itolo nindumbula yosa.” (1 Pet. 1:22) Pivesi ili, ukughanana “bwila itolo” kukongelelapo ukungana umundu nalinga kubaghile ukuya kukafu. Mwakifwanisyo, bule linga unkamu atukalalisye munjila yimo? Pabwandilo tubaghile ukulonda ukuti tumbombele bo muno yope atubombile mmalo mwakunnangisya ulughano. Loli Peteri amanyile kwa Yesu ukuti ukubomba isi kutikunhobosya Kyala. (Yoh. 18:​10, 11) Peteri alembile ukuti: “Komma ukughomokesania imbibi pambibi, pamo amahelu pamahelu; mma loli musayaneghe itolo.” (1 Pet. 3:9) Linga mukunangisya ulughano bwila itolo, mukuya pakuya bololo nukubinong’onela abangi. w23.09 28-29 ¶9-11

Tukuswigha fiyo linga tukuketa umwana ikukula nukuya mundu nkusi. Ukukula uku kukubombiwa kwene itolo. Loli ukuti tukule nukuya Bakristu bakusi mwambepo kutikubombiwa kwene. (1 Kor. 13:11; Hib. 6:1) Ukuti tufwanisye ubwighane ubu, tukulondiwa ukuya pabumanyani ubwamaka na Yehova. Tukulondiwa kangi mbepo wake mwikemo ukuti ghututule ukukusya utuyilo utu tukunhobosya umwene, ukukusya amaluso nukwitendekesya ubudindo ubu twisakuya nabo nkyeni. (Mbu. 1:5) Yehova abapelile abandu abanyambala na bakikulu. (Bwa. 1:27.) Abanyambala na bakikulu aba bakindene muno bikubonekela, namunjila isingi. Mwakifwanikisyo, Yehova abapelile abanyambala na bakikulu ukuti bafwanisyeghe ububombeli bumo. Yonongwa yake bikulondiwa ukuya nutuyilo namaluso agha ghabaghile ukubatula ukuti bafwanisyeghe ububombeli bwabo.—Bwa. 2:18. w23.12 18 ¶1-2

Ngimba Yesu ikulonda ukuti abangi babombeleghe ingamu ya Tata wake? Ena. Abalongosi bamo bamatchalichi babaghile ukuti basubilagha ukuti lukaya lughindiko ukuyoba ingamu ya Kyala. Loli Yesu akalitikisye ukuti inyiho isi sitikukolelana namalemba, sintolesye ukuyighindika ingamu ya Tata wake. Inong’onela akabalilo aka alimbumbulwisye umundu uyu akoliwe nimbepo inyali nkisu kya Geraseni. Abandu balyandile ukutila kangi balimbulile Yesu ukuti asokemo nkisu iki kangi umwene asokilemo. (Mar. 5:​16, 17) Loli Yesu alondagha ukuti abandu bayimanye ingamu ya Yehova nkisu iki. Yonongwa yake mwakisa, alimbulile umundu uyu alimbumbulwisye ukuti akababule abandu, komma isi umwene abombile loli isi Yehova abombile. (Mar. 5:19) Yesu ikulonda ukuti nanuswe amasiku agha tuyifumusyeghe ingamu ya Tata wake ukuti abandu bayimanye pakisu kyosa. (Mat. 24:14; 28: 20) Linga tukubomba isi, tukunhobosya Umwalafyale witu, Yesu. w24.02 10 ¶10

Lusayo lunywamu fiyo ukuya mugulu lya Yehova mmasiku amapalapala naghabumalikisyo agha. Nkisu iki ubumi bukukindilila ukuya bukafu fiyo. Loli Yehova atupele abakamu na balumbu ukuti batutuleghe. (Sal. 133:1) Yehova ikututula ukuti tuyeghe nimbumba isya lusekelo. (Ef. 5:33–6:1) Mwakongelelapo, umwene ikutupa amahala agha tukulondiwa ukuti twifimbilisyeghe linga tukutamiwa naminong’ono kangi nukuya balusekelo. Loli tukulondiwa ukwiyipa fiyo ukuti tukindilileghe ukumbombela Yehova mbusubiliwa. Nongwa yafiki? Panongwa yakuti tubaghile ukukalala panongwa ya isi bamo bikuyoba nukubomba. Tubaghile kangi ukuwa amaka linga tukubomba ubutulanongwa mwakwandisania. Tukulondiwa ukukindilila ukumbombela Yehova (1) linga abakamu na balumbu bitu batonangile, (2) linga umwinitu wambweghi atonangile, kangi (3) linga tuwile amaka panongwa ya butulanongwa bwitu. w24.03 14 ¶1-2

Utubalilo twingi, mukuya pakupilika isi abakamu na balumbu balyaghene nasyo pakumbombela Yehova. Lumo abene balingile Isukulu ya Bafumusi ba Bunyafyale pamo babukile kuno kukulondiwa ubutuli bwa bafumusi bingi. Linga muli nubwighane bo ubu, mughelegheleghe ukubufwanisya. Ababombi ba Yehova bikwiyipa fiyo ukuti babombeghe nyingi mubufumusi. (Imbo. 16:9) Loli bule linga lino mukabaghila ukubomba isi? Komma ukwinong’ona ukuti mukaya bakulondiwa pakwifwanikisya na aba bikufwanisya. Ikyakulondiwa fiyo ko kukindilila ukwifimbilisya. (Mat. 10:22) Mukumbukeghe ukuti mukunhobosya fiyo Yehova linga mukubomba isi mubaghile ukufwanisya kisita kweghela muno ifindu fiyilile pabumi bwinu. Iyi yo njila inunu iyakunangisya ukuti mukukindilila ukunkonga Yesu linga mosiwe.—Sal. 26:1. w24.03 10 ¶11

Tata witu wakumwanya afingile ukuti ikuya pakutuhobokela linga tulapile. (Sal. 86:5) Yonongwa yake linga tulapile ubutulanongwa bwitu ukufuma pasi pandumbula, tubaghile ukusubila ukuti isi Yehova ayobile syabwanaloli kangi atuhobokile. Ngimba tubaghile ukumalana bulebule naminong’ono bo agha? Tukumbukeghe ukuti Yehova ikubomba ifindu mwamahala. Umwene atikughulila ukuti tukuya pakubomba nyingi isi tukabaghila ukufwanisya. Ikundaghisya kilikyosa iki tukumbombela, fiyofiyo linga tukubomba ukufuma pasi pandumbula. Kangi inong’onela isya bandu aba bikuyobiwa mu Baibolo aba bambombelagha Yehova nindumbula yabo yosa. Mwakifwanikisyo, inong’onela isya ntumiwa Pauli. Kwa fyinja fingi, umwene iyipagha ukwenda ubulendo ubutali kangi alyandisye ifipanga fingi. Loli bo ifindu fichenjile pabumi bwake, umwene akafumusyagha fiyo bo muno abombelagha pakwanda. Loli ngimba isi syasanusyagha ukuti Yehova akahobokagha nawe? Hayi. Pauli akindilile ukubomba isi abaghile ukufwanisya, kangi Yehova alinsayile fiyo. (Imbo. 28:​30, 31) Mwakufwana itolo, nanuswe utubalilo tumo ifi tubaghile ukumpa Yehova fibaghile ukuchenja. Loli ikyakulondiwa fiyo kumyake ko kuya nubwighane ubwakumbombela. w24.03 27 ¶7, 9

Ukwendela munyiputo syake kwa Yehova, Yesu abanangisye ikifwanikisyo abafundiwa bake iki balondiwagha ukukonga. Pabufumusi bwake bosa, Umwene iputagha akabalilo kosa. Yesu ayagha nakabalilo ka kwiputa nalinga ukuti utubalilo twingi ikolaniagha kangi ayagha nabandu bingi. (Mar. 6:​31, 45, 46) Umwene alembwike nulubunju fiyo ukuti ipute pamwene. Isiku limo, aliputile ikilo kyosa bo akali ukusala ikindu kimo ikyakulondiwa fiyo. (Luka 6:​12, 13) Kangi Yesu aliputile mwakwandisania ikilo kyakuti kilabo ikuya pakufwa bo ali pipi ukumalisya imbombo iyakutamya fiyo iyi apeliwe pakisu kyapasi. (Mat. 26:​39, 42, 44) Ikifwanikisyo kya Yesu kikutumanyisya ukuti nalinga twikolanie fiyo, tukulondiwa ukuya nakabalilo kakwiputa. Mwakufwana itolo na Yesu, tuyeghe nakabalilo ka kwiputa. Mwakifwanikisyo, tubaghile kwiputa nulubunju pamo namayolo. Linga tukubomba isi, tukunangisya ukuti tukunndaghisya Yehova panongwa ya kyabupe kyapamwanya fiyo iki atupele. w23.05 3 ¶4-5

Inong’onela amasyu aghakuti “onile itolo,” agha ghali mwilemba lya mwisyughu. Ibuku limo lighalingenie amasyu agha ukuti “onile itolo ukufwana lusoko.” Amasyu agha ghikunangisya pabwelu ukuti Yehova abaghanile fiyo abapakiwa. Abapakiwa basimenye ukuti “bali ndughano lwa Kyala.” (Yuda 1) Untumiwa Yohani alingenie muno abapakiwa bikwipilikila apa alembagha ukuti: “Keta ko kutughana kuki Tata, ukuti uswe tuyobiweghe ukuya banake.” (1 Yoh. 3:1) Ngimba Yehova abaghanile bene abapakiwa? Hayi. Yehova ikunangisya ukuti atughanile twesa. Ngimba njila yiliku iyakwanda iyi Yehova ikunangisya ukuti atughanile? Ikitabulilo, yo njila yakwanda iyi Yehova anangisye ukuti atughanile ukukinda umundu aliwesa.—Yoh. 3:16; Rom. 5:8. w24.01 28 ¶9-10

Ivesi lya pamwanya likunangisya ikindu iki kyalintulile Davidi pakabalilo aka atilagha. Ifundo yake yo yakuti: Nalinga ukuti ubumi bwake bwali pangozi, Davidi inong’onelagha pa findu ifi Yehova isakumbombela nkyeni. Davidi asimenye ukuti Yehova isakunsyusya pakabalilo kake. Mwakongelelapo, Yehova ayobile ngani ukuti Davidi isakuya mwalafyale wa Israeli panyuma pa Sauli. (1 Samu. 16:​1, 13) Davidi aketagha ukuti syosa isi Yehova afingile sifwanisiwe kale. Ngimba Yehova afingile ukuti ikuya pakutubombela isyafiki nkyeni? Tutikughulila ukuti umwene ikuya pakutufighilila kundamyo syosa. Loli tukumbukeghe ukuti indamyo yiliyosa iyi tubaghile ukwaghana nayo nkabalilo aka, Yehova isakuyisosyapo nkisu ikipya iki kikwisa. (Yes. 25:​7-9) Umpeli witu ali namaka fiyo kangi isakubasyusya aba bafwile, isakutubumbulusya kumbungo syosa kangi isakubasosyapo bosa abakususya.—1 Yoh. 4:4. w24.01 6 ¶12-13

Twinong’oneleghe ikifukwa iki twaliyipile kwa Yehova nukosiwa. Mwabombile isi panongwa yakuti mwalondagha ukuya kulubafu lwa Yehova. Kumbuka isi syabasimikisyile ukuti mubwaghile ubwanaloli. Mwalimmenye kanunu Yehova kangi mwalyandile ukungindika nukungana pakuya Tata winu wakumwanya. Mwanangisye ulwitiko lwamaka kangi mwalapile. Mwabikilepo indumbula ukuleka utuyilo utubibi nukwanda ukubomba ifindu mwakukolelana nubwighane bwa Kyala. Mwalyandile ukwipilika kanunu bo musyaghenie ukuti Kyala abahobokile. (Sal. 32:2) Mwalyandile ukufika pangomano sya Bukristu nukubabulako abangi ifindu ifinunu ifi mwamanyile. Panongwa yakuti lino mosiwe, mukwenda mu nsebo uwakubuka ku bumi, kangi mukughelaghela ukuti mungaghulekagha. (Mat. 7:​13, 14) Isagha tukindilileghe ukungana Yehova nukupilikila indaghilo syake. w23.07 17 ¶14; 19 ¶19

Linga mukwinong’onela isi mwalimbulile Yehova ndwiputo bo mukwiyipa kumyake, mwisakukaba amaka aghakukana ingelo yiliyosa. Mwakifwanikisyo, ngimba mubaghile ukwanda ukukopana nunnyambala pamo unkikulu wa mundu uyungi? Hayi. Panongwa yakuti mwafingile kale kwa Yehova ukuti mutikuya pakubomba isi. Linga mubombile isi, sisakubatula ukuti muleke ukulimbana nifinyonywa ifibibi linga fisile. Mukuya “pakwepuka” mu “njila ya bandu abaniongafu.” (Mbu. 4:​14, 15) Ukukonga ikifwanikisyo kya Yesu kubaghile ukututula. Umwene alondagha fiyo ukunhobosya Tata wake. Mwakufwana itolo na Yesu, mughelegheleghe ukukana mwanakalinga kilikyosa iki kibaghile ukunkalalisya Kyala uyu mwaliyipile kumyake. (Mat. 4:10; Yoh. 8:29) Ifundo yo yakuti, ingelo sikubapa ulusako ulwakunangisya ukuti mukulonda ukukindilila ukunkonga Yesu. Kangi mubaghile ukuya nulusubilo losa ukuti Yehova ikuya pakubatula. w24.03 9-10 ¶8-10