Gyɛnɛsese
48 Ɛhye anzi bɛhanle bɛhilele Dwosefi kɛ: “Nea, wɔ papa ɛnla boɛ.” Na Dwosefi vale ɔ mra mrenyia nwiɔ ne, Manasɛ nee Yifelaem na ɔhɔle ɛkɛ.+ 2 Akee bɛhanle bɛhilele Gyekɔbo kɛ: “Ɛ ra Dwosefi ɛra ɛ nwo ɛke.” Ɔti Yizilayɛ bɔle mɔdenle dwazole dɛnlanle ye ɛkpa ne azo. 3 Na Gyekɔbo zele Dwosefi kɛ:
“Nyamenle Tumivolɛ Bedevinli ne yele ɔ nwo hilele me wɔ Lɛɛze mɔɔ wɔ Keena azɛlɛ zo la na ɔyilale me.+ 4 Na ɔzele me kɛ, ‘Mebamaa ɛ bo zo amra anwo azo na meamaa wɔayɛ menli* ekpunli ekpunli dɔɔnwo,+ na mebava azɛlɛ ɛhye meamaa ɛ bo zo amra na yeayɛ bɛ agyapadeɛ dahuu.’+ 5 Kɛkala ɛ mra mrenyia nwiɔ ne mɔɔ bɛwole bɛ bɛmaanle wɔ wɔ Yigyibiti azɛlɛ zo kolaa na meara Yigyibiti la le me ɛdeɛ.+ Yifelaem nee Manasɛ bayɛ me ɛdeɛ, kɛ mɔɔ Wulubɛn nee Semɛyɔn le me ɛdeɛ la.+ 6 Noko mralɛ mɔɔ bɛbawo bɛ bɛamaa wɔ wɔ ɛhye mɔ anzi la bayɛ wɔ ɛdeɛ. Bɛbanyia agyapadeɛ ne mɔɔ bɛ mediema ne mɔ aluma la zolɛ la bie.+ 7 Na mame, mɔɔ mevi Padan melɛba la, Relahyɛle wule+ dɔle me sa zo wɔ Keena azɛlɛ zo, na ɛnee ɛleka mɔɔ yɛwɔ la nee Ɛfelate avinli wale.+ Ɔti menziele ye wɔ Ɛfelate, mɔɔ le Bɛtelɛhɛm+ la adenle nu.”
8 Akee Yizilayɛ nwunle Dwosefi amra mrenyia ne mɔ na ɔbizale kɛ: “Nwane mɔ ɛne?” 9 Na Dwosefi zele ye papa kɛ: “Me mra mrenyia mɔɔ Nyamenle ɛva bɛ ɛmaa me wɔ ɛke la ɛne.”+ Na Gyekɔbo hanle kɛ: “Mesɛlɛ wɔ, fa bɛ bɛlɛ me maa menyila bɛ.”+ 10 Noko kɛmɔ ɛnee Yizilayɛ ɛyɛ ɛrelera la ati, ɛnee ɔ nye zo ɛyɛ monzomonzo yɛɛ ɔnnwu debie kpalɛ. Ɔti Dwosefi vale bɛ bikyele ye, na ɔvole bɛ nloa anwo na ɔvale bɛ ɔbɔle ye ɛbolɛ. 11 Yizilayɛ zele Dwosefi kɛ: “Meandwenle nwolɛ ɛlɛ kɛ mebanwu ɛ nyunlu,+ noko Nyamenle eza ɛmaa menwu ɛ mra.” 12 Akee Dwosefi yele bɛ vile Yizilayɛ agyakɛ anwo ɛkɛ, na ɔhotole ɔvale ɔ nyunlu ɔbutule aze.
13 Akee Dwosefi zɔle bɛ mu nwiɔ, ɔvale ɔ sa fema ne ɔzɔle Yifelaem+ ɔhɔle Yizilayɛ bɛne zo yɛɛ ɔvale ɔ sa bɛne ne ɔzɔle Manasɛ+ ɔhɔle Yizilayɛ fema zo, na ɔvale bɛ ɔbikyele ye. 14 Noko Yizilayɛ vale ɔ sa fema ne dole Yifelaem mɔɔ le kakula la ati zo, yɛɛ ɔvale ɔ sa bɛne ne ɔdole Manasɛ ati zo. Ɔ nye fuu a ɔyɛle ye zɔhane a, ɔluakɛ Manasɛ a le kpanyinli a.+ 15 Akee ɔyilale Dwosefi na ɔhanle kɛ:+
“Nɔhalɛ Nyamenle ne mɔɔ me nenyia Ebileham nee me papa Ayezeke nee ye luale,+
Nɔhalɛ Nyamenle ne mɔɔ ɛnlea me wɔ me ɛbɛlabɔlɛ kɔsɔɔti anu too yeradwu ɛnɛ,+
16 Anwumabɔvolɛ ne mɔɔ ɛlie me ɛvi me ngyegyelɛ kɔsɔɔti anu la+ ɛyila ngakula ne mɔ.+
Maa bɛva me duma nee me nenyia Ebileham yɛɛ me papa Ayezeke duma bɛdo bɛ nwo zo,
Maa bɛzo bɛyɛ dɔɔnwo wɔ azɛlɛ ne azo.”+
17 Mɔɔ Dwosefi nwunle kɛ ye papa ɛva ɔ sa fema ɛdo Yifelaem ati zo la, ɔ nye anlie nwolɛ, ɔti ɔbɔle mɔdenle kɛ ɔye ye papa asa yeavi Yifelaem ati zo yeava yeado Manasɛ ati zo. 18 Dwosefi zele ye papa kɛ: “Me papa, mmayɛ ye zɔ, ɔluakɛ ɛhye a le kpanyinli a.+ Fa ɛ sa fema ne to ɔ ti zo.” 19 Noko ye papa andie na ɔhanle kɛ: “Me ra meze ye zɔ. Ɔdaye noko ɔ nwo bazo na yeayɛ kpole. Noko ɔ diema ekyi ne bayɛ kpole adɛla ye,+ na ɔ bo zo amra bazo mɔɔ bɛbahola bɛayɛ maanle kpole.”+ 20 Ɔti ɔhɔle zo ɔyilale bɛ wɔ kenle zɔhane+ na ɔhanle kɛ:
“Saa Yizilayɛma ɛlɛyila bɛ nwo a, bɛbabɔ wɔ duma na bɛaha kɛ,
‘Nyamenle ɛmaa ɛyɛ kɛ Yifelaem nee Manasɛ.’”
Ɔti ɔvale Yifelaem ɔlile Manasɛ anyunlu.
21 Akee Yizilayɛ zele Dwosefi kɛ: “Nea, ɔka ekyii mewu,+ noko Nyamenle nee wɔ balua na yeava wɔ yeazia yeahɔ wɔ nenyia mɔ azɛlɛ zo.+ 22 Na mebava azɛlɛ ne mɔɔ menvale me konle dadeɛ nee me ɛda menliele menvile Amɔlema ɛkɛ la ko meaboka wɔ ɛdeɛ ne anwo meamaa yeadɛla mɔɔ mebava meamaa ɛ mediema ne mɔ la.”