Edwɛne

Devidi edwɛne. Ayɛlɛyelɛ edwɛne.

101 Mebado ɛlɔlɛ kpundii nee pɛlepɛlelilɛ nwo edwɛne.

O Gyihova, wɔmɔ a mebado* ayɛlɛyelɛ edwɛne meamaa wɔ a.

2 Mebayɛ me ninyɛne nrɛlɛbɛ nu na me nwo annyia ngehanleɛ.

Kenlenzu a ɛbara me nwo a?

Mebava ahonle mɔɔ di munli*+ la meadɛnla me sua nu.

3 Menrɛnlea ninyɛne mgbane mgbane* biala.

Mekyi bɛdabɛ mɔɔ bɛtwe bɛ nwo bɛfi mɔɔ le kpalɛ la anwo la nyɛleɛ;+

Me nee bɛ ɛnrɛyɛ debie biala.*

4 Ahonle mɔɔ le mɛlɛbɛla la ɛmbikye me;

Menrɛlie mɔɔ le ɛtane la menrɛdo nu.*

5 Awie biala mɔɔ fea sɛkye ɔ gɔnwo duma la,+

Mebaye ye meavi ɛkɛ.*

Awie biala mɔɔ lɛ adubɛnwo ɛnyelɛ nee anwomemaazo ahonle la,

Menrɛkponle ye.

6 Mebanlea nɔhavoma mɔɔ wɔ azɛlɛ ne azo la,

Amaa bɛ nee me adɛnla.

Sonla mɔɔ anwo ɛnlɛ ngehanleɛ* la bazonle me.

7 Mɛlɛbɛla sonla biala ɛnrɛdɛnla me sua nu,

Yɛɛ adalɛ sonla biala ɛnrɛgyinla me nyunlu.*

8 Nwonlomɔ biala mebaha amumuyɛma kɔsɔɔti mɔɔ wɔ azɛlɛ ne azo la anloa meado nu,*

Na meaye ɛtanevolɛma amuala meavi Gyihova suakpole ne azo.+