Hozia
14 “O Yizilayɛ, sia bɛla Gyihova wɔ Nyamenle ne ɛkɛ,+
Ɔluakɛ wɔ ɛtane ne ɛmaa wɔdɔ aze.
2 Bɛva edwɛkɛ ɛhye bɛzia bɛrɛla Gyihova ɛkɛ,
Bɛha bɛhile ye kɛ, ‘Fa yɛ ɛtane kyɛ yɛ+ na die mɔɔ le kpalɛ la,
Na yɛbava yɛ nloa yɛaye wɔ ayɛlɛ+ kɛ mɔɔ anrɛɛ yɛbava nlankɛ mralɛ nyinli yɛabɔ afɔle* yɛamaa wɔ la.
3 Aselea ɛnrɛlie yɛ.+
Yɛnrɛdɛnla mgbɔnwɔ zo yɛnrɛha,+
Na yɛnrɛha yɛnrɛhile yɛ sa anloa gyima bieko kɛ, “O yɛ Nyamenle!”
Ɔluakɛ wɔmɔ yɛɛ ɛse arisa ralɛ anwunvɔne a.’+
4 Mebayɛ bɛ ayile wɔ nɔhalɛ mɔɔ bɛanli la anwo.+
5 Mebayɛ kɛ ɛbɔlɛ meamaa Yizilayɛ;
Ɔbakpakye felawɔse kɛ aloa
Na mebamaa ye ndinli ahɔ moa kɛ Lɛbanɔn mbaka la.
6 Ɔbayeye ngane dɔɔnwo,
Ye kɛnlɛma bayɛ kɛ ɔlivi baka,
Yɛɛ ye evuanlɛ bayɛ kɛ Lɛbanɔn baka la.
7 Bɛbadɛnla ye alubo nu bieko.
Bɛbalua ma na bɛawɔlɔwɔlɔ ɛnyelɛ kɛ vanye.+
Ɔbalie duma* kɛ Lɛbanɔn nwanye la.
8 Yifelaem baha kɛ, ‘Duzu bieko a me nee ananze ne mɔ lɛ ye yɛ a?’+
Mebabua ye na meazinza ye.+
Mebayɛ kɛ dwunipa baka mɔɔ ɛlɛkpazi la.
Me nwo zo a bɛbanyia ma a.”
9 Nwane a ze nrɛlɛbɛ a? Maa ɔde ninyɛne ɛhye mɔ abo.
Nwane a le badwema a? Maa ɔnwu bɛ.