Ditilɔnomi

11 “Ɔwɔ kɛ bɛkulo Gyihova bɛ Nyamenle ne+ na bɛdi ye edwɛkɛ, ye adehilelɛ, ye ngyehyɛleɛ nee ye mɛla ne mɔ azo dahuu. 2 Bɛze kɛ ɛnɛ melɛtendɛ meahile bɛ na tɛ bɛ mra mɔɔ ɛtɛtele anzɛɛ ɛtɛnwunle Gyihova bɛ Nyamenle ne ndeanlɛ,+ ye kpoleyɛlɛ,+ ɔ sa mɔɔ tumi wɔ nu+ yɛɛ ɔ sa mɔɔ yedende la. 3 Bɛannwu ye sɛkɛlɛneɛ nee ye gyima mɔɔ ɔyɛle ye wɔ Yigyibiti ɔhilele Yigyibiti Belemgbunli Falo nee ye azɛlɛ ne amuala la;+ 4 anzɛɛ mɔɔ ɔvale ɔyɛle Yigyibiti ɛlɔnema, Falo mgbɔnwɔ ne mɔ nee ye konle ehwili ne mɔ mɔɔ Nyevile Kɔkɔlɛ ne anu nzule hedale bɛ nwo zo wɔ mekɛ mɔɔ ɛnee bɛlɛfoa bɛ na Gyihova zɛkyele bɛ bɔkɔɔ* la.+ 5 Bɛannwu mɔɔ ɔyɛle ɔmaanle bɛ* wɔ fienemgbole ne anu kɔkpula kɛ bɛradwule ɛke, 6 anzɛɛ mɔɔ ɔvale ɔyɛle Wulubɛn ara Ɛlayabe amra Deetan nee Abaelam wɔ mekɛ mɔɔ azɛlɛ ne kpakyele na ɔmenle bɛ nee bɛ sua nu amra nee bɛ ɛdanlɛ azua yɛɛ abɔdeɛ biala mɔɔ boka bɛ nwo wɔ Yizilayɛma amuala anye zo la.+ 7 Bɛnwunle ninyɛne mgbole mɔɔ Gyihova yɛle la amuala wɔ bɛdabɛ mumua ne bɛ nye zo.

8 “Ɔwɔ kɛ bɛdi mɛla mɔɔ melɛfa meamaa bɛ ɛnɛ la amuala azo, amaa bɛ nwo ayɛ se na bɛapɛ bɛahɔva azɛlɛ ne bɛayɛ bɛ agyapadeɛ, 9 na eza bɛadɛnla azɛlɛ ne mɔɔ Gyihova hanle nwolɛ ndane hilele bɛ nenyia mɔ nee bɛ bo zo amra, azɛlɛ mɔɔ meleke nee wolɛ se zolɛ la azo bɛahyɛ.+

10 “Azɛlɛ ne mɔɔ bɛlɛkɔ bɛahɔva bɛayɛ bɛ agyapadeɛ la ɛnle kɛ Yigyibiti azɛlɛ ne mɔɔ bɛvi zolɛ bɛrale mɔɔ ɛnee bɛdua ma wɔ zo a kyesɛ bɛfa bɛ gyakɛ* bɛgugua zolɛ nzule kɛ ninyɛne mɔɔ bɛlua wɔ tola nu la. 11 Noko azɛlɛ ne mɔɔ ɔka ekyii bɛpɛ bɛkɔfa la le azɛlɛ mɔɔ awoka nee mbɔnza wɔ zo.+ Ɔno ezule mɔɔ tɔ fi anwuma la;+ 12 ɔle azɛlɛ mɔɔ Gyihova bɛ Nyamenle ne a nea zolɛ a. Gyihova bɛ Nyamenle ne anye wɔ nwolɛ dahuu, ɔvi ɛvolɛ ne mɔlebɛbo kɔdwu ɛvolɛ ne awieleɛ.

13 “Na saa bɛbabɔ mɔdenle bɛadie me mɛla ne mɔ mɔɔ melɛfa meamaa bɛ ɛnɛ la boɛ na bɛahulo Gyihova bɛ Nyamenle ne na bɛava bɛ ahonle muala nee bɛ ɛkɛla* muala bɛazonle ye a,+ 14 eza mebamaa ezule adɔ bɛ azɛlɛ ne azo wɔ ye mekɛ nloa, bokile nee nyenyesuo, na bɛbanyia ma nee nwanye fofolɛ yɛɛ nwole.+ 15 Na mebamaa bɛ nyɛmoa ne mɔ ndile wɔ bɛ ɛya ne mɔ anu, na bɛdabɛ noko bɛbali aleɛ na bɛ ko ayi.+ 16 Bɛnlea boɛ na debie andwehwe bɛ ahonle na bɛangɔzonle nyamenle gyɛne na bɛambɔ bɛ ti aze bɛammaa bɛ.+ 17 Saa bɛyɛ ye zɔ a, Gyihova bava bɛ nwo ɛya na yeatoto anwuma anu amaa ezule andɔ,+ yɛɛ azɛlɛ ne noko ɛnrɛhye aleɛ na bɛ bo zo baminli ndɛndɛ wɔ azɛlɛ kpalɛ ne mɔɔ Gyihova ɛlɛfa amaa bɛ la azo.+

18 “Bɛva me edwɛkɛ ɛhye bɛbeta bɛ ahonle nee bɛ ɛkɛla* nwo na bɛva bɛyɛ ngakyedeɛ bɛkyekye bɛ sa, na bɛva bɛyɛ abotile bɛbɔ bɛ nwoma azo.*+ 19 Bɛva bɛhilehile bɛ mra, bɛha nwolɛ edwɛkɛ wɔ mekɛ mɔɔ bɛde bɛ azua nu anzɛɛ bɛlua adenle nu anzɛɛ bɛla anzɛɛ bɛdwazo la.+ 20 Bɛhɛlɛ bɛ wɔ bɛ nlenkɛ felɛmo ne mɔ nee bɛ nlenkɛ mgbole ne mɔ anwo, 21 amaa bɛ nee bɛ mra ahyɛ+ wɔ azɛlɛ ne mɔɔ Gyihova hanle ndane kɛ ɔbava yeamaa bɛ nenyia mɔ la azo,+ wɔ mekɛ ala mɔɔ azɛlɛ ye tɛbɔ anwuma abo la.

22 “Saa bɛdi mɛla ɛhye mɔɔ melɛfa meamaa bɛ la azo bɔkɔɔ, bɛkulo Gyihova bɛ Nyamenle ne,+ bɛdua ye ndenle ne mɔ kɔsɔɔti anu na bɛbeta ye a,+ 23 Gyihova bavoa maanle maanle ɛhye mɔ amuala avi bɛ nyunlu,+ na bɛbavoa maanle maanle mɔɔ bɛle mgbole na bɛ nwo zonle tɛla bɛ la.+ 24 Ɛleka biala mɔɔ bɛbadu bɛ gyakɛ bɛazie la bayɛ bɛ ɛdeɛ.+ Ɔvi fienemgbole ne anu kɔdwu Lɛbanɔn, ɔvi Azule ne, Yufileti azule ne anloa kɔdwu adɔleɛ nyevile ne* anloa bayɛ bɛ ɛweɛne.+ 25 Awie biala ɛnrɛhola bɛ nyunlu gyinla.+ Gyihova bɛ Nyamenle ne bamaa bɛ nwo ɛzulolɛ nee anwowosolɛ adɔ azɛlɛ ne mɔɔ bɛlua zo la amuala anwo zo+ kɛ mɔɔ ɔbɔle bɛ ɛwɔkɛ la.

26 “Bɛnlea, melɛfa nyilalɛ nee munzule meazie bɛ nyunlu ɛnɛ:+ 27 nyilalɛ mɔɔ bɛdi Gyihova bɛ Nyamenle ne mɛla ne mɔ mɔɔ melɛfa meamaa bɛ ɛnɛ la azo a bɛbanyia la,+ 28 yɛɛ munzule mɔɔ saa bɛanli Gyihova bɛ Nyamenle ne mɛla ne mɔ mɔɔ melɛfa meamaa bɛ ɛnɛ la azo+ na bɛtwe bɛ nwo bɛfi nwolɛ bɛkɔsonle nyamenle gyɛne mɔɔ bɛnze bɛ la a ɔbara bɛ nwo zo la.

29 “Saa Gyihova bɛ Nyamenle ne fa bɛ ba azɛlɛ ne mɔɔ bayɛ bɛ ɛdeɛ la azo a, ɔwɔ kɛ bɛgyinla Gɛlaezem Boka ne azo bɛyila menli na bɛgyinla Yibale Boka ne azo bɛwa amonle.+ 30 Asoo bɛnle Dwɔdan ne foa ko nehane mɔɔ kɔne adɔleɛ, wɔ Keenama mɔɔ de Alaba nehane la azɛlɛ ne mɔɔ nee Gelegale anye bɔ zo na ɔwɔ Moolɛ mbaka mgbole ne mɔ anwo ɛkɛ ne la azo ɔ?+ 31 Ɔluakɛ bɛlɛpɛ Dwɔdan ne bɛahɔva azɛlɛ ne mɔɔ Gyihova bɛ Nyamenle ne ɛlɛfa amaa bɛ la.+ Saa bɛkɔfa na bɛtɛnla zo a, 32 ɔwɔ kɛ bɛnea boɛ na bɛdi adehilelɛ nee ngyehyɛleɛ biala mɔɔ melɛfa meado bɛ nyunlu ɛnɛ la azo.+