Gyɛlɛmaya
31 “Mekɛ zɔhane,” Gyihova a se a, “mebayɛ Yizilayɛ mbusua kɔsɔɔti Nyamenle na bɛdabɛ noko bɛbayɛ me menli.”+
2 Mɔɔ Gyihova ɛha la ɛne:
“Nyamenle nwunle menli mɔɔ konle dadeɛ angu bɛ la anwunvɔne wɔ fienemgbole ne anu
Wɔ mekɛ mɔɔ ɛnee Yizilayɛ ɛlɛkɔ ye ɛnwomenlelielɛ ɛleka ne la.”
3 Gyihova yele ɔ nwo hilele me wɔ moamoa na ɔhanle kɛ:
“Meva ɛlɔlɛ mɔɔ ɛnlɛ awieleɛ la mehulo wɔ.
Ɛhye ati a meva ɛlɔlɛ kpundii mehwe wɔ mebikye me nwo la.*+
4 Mebakyekye wɔ bieko amaa wɔagyinla bieko.+
5 Bɛbayɛ vanye egyinli wɔ Samɛlea awoka ne mɔ azo bieko;+
Bɛdabɛ mɔɔ bɛbayɛ vanye egyinli ne la bɛali nuhua ma ne bie.+
6 Ɔluakɛ mekɛ bara mɔɔ sinzavolɛma mɔɔ wɔ Yifelaem awoka ne mɔ azo la badea nu kɛ:
‘Bɛdwazo, bɛmaa yɛhɔ Zayɔn, yɛhɔ Gyihova yɛ Nyamenle ne ɛkɛ.’”+
7 Ɔluakɛ mɔɔ Gyihova ɛha la ɛne:
“Bɛva fɛlɛkolilɛ bɛdo edwɛne bɛmaa Gyekɔbo.
Na bɛva anyelielɛ bɛdea nu ɔluakɛ maanle maanle ne mɔ wɔ bɛ bo.+
Bɛbɔ ye nolo; bɛye ayɛlɛ na bɛha kɛ,
‘O Gyihova, die wɔ menli ne, Yizilayɛma mɔɔ ɛha la.’+
8 Melɛfa bɛ meavi sɔlɔ azɛlɛ ne azo meazia meara.+
Mebaboɔboa bɛ nloa meavi azɛlɛ ne ɛleka biala.+
Anyezinlirama nee abuburama baboka bɛ nwo,+
Yɛɛ nrenzɛvolɛ nee raalɛ mɔɔ ako ɛha ye la amuala.
Asafo kpole a bazia ara ɛke a.+
9 Ɛzunlɛ a bɛbava bɛara a.+
Me nee bɛ ɛlɛba a bɛbazɛlɛ ɛtanefakyɛ.
Mebava bɛ meahɔ azudenle nloa,+
Bɛbalua azɛlɛ sɛsɛ zo na bɛnrɛkpula.
Ɔluakɛ mele Selɛ memaa Yizilayɛ, na me belamunli ralɛ a le Yifelaem.”+
10 Bɛmɛ maanle maanle, bɛdie Gyihova edwɛkɛ,
Na bɛbɔ ye nolo wɔ mbɔra mɔɔ wɔ moamoa la azo:+
“Mɔɔ bɔle Yizilayɛ asande la baboɔboa ɔ nloa.
Ɔbazinza ye kɛ mɔɔ mboaneneavolɛ sinza ye mboane ekpunli la.+
12 Bɛbara bɛarado edwɛne anyelielɛ nu wɔ Zayɔn boka ne azo+
Na bɛali fɛlɛko wɔ Gyihova kpalɛyɛlɛ ne* anwo,
Wɔ ma nee nwanye fofolɛ+ nee nwole nwo,
Nee mboane mralɛ nee nlankɛ mralɛ nwo.+
13 “Mekɛ zɔhane bɛlɛra mɔɔ ɛnze nrenyia la bazi agole anyelielɛ nu,
Mgbavolɛ nee mgbanyinli kɔsɔɔti.+
Mebamaa bɛ ɛzunlɛ ahakyi anyelielɛ.+
Mebakyekye bɛ rɛle na meamaa bɛ nyanelilɛ ne ahakyi fɛlɛkolilɛ.+
14 Mebamaa ɛsɔfoma ne anyia aleɛ dɔɔnwo,
Na me kpalɛyɛlɛ ne bamaa me menli ne akunlu adwo bɛ nwo,”+ Gyihova a se a.
15 “Mɔɔ Gyihova ɛha la ɛne:
‘Bɛdele ɛnelɛ bie wɔ Releema,+ awolɛyelɛ nee alɔbɔlɛ ɛzunlɛ:
Relahyɛle ɛlɛsu ɔ mra,+
Bɛkyekye ɔ rɛle wɔ ɔ mra ne mɔ ati a ɔmkponle,
Ɔluakɛ bɛnle ɛkɛ ne bieko.’”+
16 Mɔɔ Gyihova ɛha la ɛne:
“‘Gyakyi ɛzunlɛ na kyikyi ɛ nye anwo monle,
Ɔluakɛ wɔ gyima ne anwo ahatualɛ wɔ ɛkɛ,’ Gyihova a se a.
‘Bɛbavi kpɔvolɛ ne azɛlɛ ne azo bɛara.’+
17 ‘Anyelazo wɔ ɛkɛ ne maa wɔ kenle bie,’+ Gyihova a se a.
‘Ɛ mra ne mɔ bɛazia ara bɛdabɛ mumua ne bɛ azɛlɛ zo.’”+
18 “Mede kɛ Yifelaem ɛlɛdi nyane kɛ,
‘Wɔdea me, na melie ndeanlɛ ne medo nu,
Mele kɛ ɛnlankɛ ralɛ mɔɔ bɛtɛtetele ye la.
Fa me sia bɛla na mebazia meara ndɛndɛ,
Ɔluakɛ wɔmɔ a ɛle Gyihova me Nyamenle ne a.
19 Mɔɔ menziale membale la, menunle me nwo;+
Na bɛmaanle mendele ɔ bo la, nyanelilɛ ti mempɛle me ɛzɔlɛ anwo tɛka.
Ɔluakɛ ninyɛne mɔɔ menyɛle bɛ me ngakula nu la
Maanle nyiane hunle me na me nyunlu guale aze.’”+
20 “Asoo Yifelaem ɛnle ralɛ mɔɔ sonle bolɛ maa me nee kakula mɔɔ mekulo ye edwɛkɛ ɔ?+
Metea ye fane kɛyɛ nyɛ bɔbɔ a, me rɛle ɛnrɛvi ye.
Ɛhye ati a me kunlu* yelɛyela me maa ye la.+
Na nɔhalɛ nu, mebanwu ye anwunvɔne,” Gyihova a se a.+
21 “Yɛ adenle nloa sɛkɛlɛneɛ siezie ɛkɛ ne maa ɛ nwo,
Na kpɔnla mpila.+
Yɛ ademgbole ne nzonlɛ, adenle ne mɔɔ ɛbava zo wɔahɔ la.+
Sia ɛ nzi, O Yizilayɛ, sia ɛ nzi bɛla wɔ azuamgbole ɛhye mɔ azo.
22 O raalɛ mɔɔ ɛnli nɔhalɛ, ɛbahɔ ɛke nee ɛke wɔahɔdwu kenlenzu?
Ɔluakɛ Gyihova ɛbɔ debie fofolɛ wɔ azɛlɛ ne azo:
Raalɛ bamaa ɔ nye abolo akpondɛ nrenyia.”
23 Mɔɔ ɛlɔne Gyihova, Yizilayɛ Nyamenle ne ɛha la ɛne: “Saa meboɔboa bɛdabɛ mɔɔ bɛhɔ akɛlɛzonlenlɛ nu la anloa a, bɛbaha edwɛkɛ ɛhye bieko wɔ Dwuda azɛlɛ ne azo nee ye azuamgbole ne mɔ azo kɛ: ‘Gyihova ɛyila wɔ, O tenlene tɛnlabelɛ,+ O boka nwuanzanwuanza.’+ 24 Na ye nuhua a Dwuda nee bɛdabɛ mɔɔ bɛde ye azuamgbole ne mɔ azo la babɔ nu adɛnla a, ɛyazonlɛma nee mboaneneavolɛma.+ 25 Mebamaa mɔɔ ɛvɛ la alie ɔ menle, na meamaa mɔɔ ɛhɔne ɛhu ye ɛmaa ɔ nwo ɛbɛlɛ ye la aleɛ.”+
26 Ɛhye ati mendunwuele na membukele me nye, na me nafelɛ ne yɛle me fɛ.
27 “Nea! Mekɛ ɛlɛba,” Gyihova a se a, “mɔɔ mebalua menli nee nyɛmoa wɔ Yizilayɛ nee Dwuda kɛ ma a.”+
28 “Kɛ mɔɔ meneanle memaanle bɛdudule bɛ bo, bɛhwenle bɛ bɛguale aze, bɛbubule bɛ, bɛzɛkyele bɛ na bɛbodɛbodale bɛ la,+ zɔhane ala noko a mebanlea meamaa bɛakpazi na mealua bɛ a,”+ Gyihova a se a. 29 “Zɔhane mekɛ ne, bɛnrɛha ye bieko kɛ, ‘Papa mɔ ɛli vanye ma nyinyianlera, noko mralɛ agye ɛnyia.’+ 30 Emomu awie biala bawu wɔ ɔdaye mumua ne ye nvonleɛ nwo. Awie biala mɔɔ ɔbali vanye ma nyinyianlera la, ɔdaye mumua ne ɔ gye a banyia a.”
31 “Nea! Mekɛ ɛlɛba,” Gyihova a se a, “mɔɔ me nee Yizilayɛma nee Dwudama bayɛ ngyekyeleɛ fofolɛ a.+ 32 Ɔnrɛyɛ kɛ ngyekyeleɛ ne mɔɔ me nee bɛ nenyia mɔ yɛle wɔ kenle mɔɔ menzɔle bɛ sa menyele bɛ menvile Yigyibiti azɛlɛ zo la,+ ‘me ngyekyeleɛ ne mɔɔ bɛzɛkyele ye,+ wɔ mekɛ mɔɔ ɛnee mele bɛ menle* nɔhalɛ nu la,’ Gyihova a se a.”
33 “Ɛhye a le ngyekyeleɛ ne mɔɔ me nee Yizilayɛma bayɛ wɔ mekɛ zɔhane anzi a,” Gyihova a se a. “Mebava me mɛla ne meawula bɛ nu,+ na meahɛlɛ ye wɔ bɛ ahonle nu.+ Na mebayɛ bɛ Nyamenle, na bɛayɛ me menli.”+
34 “Na awie biala ɛnrɛhilehile ɔ gɔnwo anzɛɛ ɛnrɛze ɔ diema bieko kɛ, ‘Nwu Gyihova!’+ ɔluakɛ bɛ muala bɛbanwu me, ɔvi mɔɔ le ekyi kɔdwu mɔɔ le kpole la anwo zo,”+ Gyihova a se a. “Ɔluakɛ mebava bɛ nvonleɛ meahyɛ bɛ, na menrɛhakye bɛ ɛtane ne bieko.”+
35 Mɔɔ Gyihova,
Mɔɔ maa sɛnzɛne ne fi alehyenlɛ nu,
Na ɔmaa siane ne nee nwɔlɔra mɛla ɔmaa bɛta nɔsolɛ nu,
Mɔɔ ɔka nyevile ne anu ɔmaa ye azɛlɛkye bu mgbole,
Mɔɔ ye duma a le ɛlɔne Gyihova la, ɛha la ɛne:+
36 “‘Saa ngyehyɛleɛ ɛhye mɔ anyɛ gyima bieko a,’ Gyihova a se a,
‘Yɛɛ Yizilayɛ abozoamra ɛnrɛyɛ maanle bieko wɔ me nye zo dahuu a.’”+
37 Mɔɔ Gyihova ɛha la ɛne: “‘Saa bɛbahola bɛazuzu anwuma na bɛahola bɛanleɛnlea azɛlɛ ne adiabo ne anu a, yɛɛ mebahola meakpo Yizilayɛ abozoamra kɔsɔɔti ɔlua mɔɔ bɛyɛ la ati a,’ Gyihova a se a.”+
38 “Nea! Mekɛ ɛlɛba,” Gyihova a se a, “mɔɔ bɛbazi suakpole+ bɛamaa Gyihova ɔvi Hananile Tawa ne+ anwo yeahɔdwu Muleɛ Anlenkɛ Kpole ne anwo a.+ 39 Ɛzuzunyɛma ne+ bala ɛkɛ ne too yeahɔdwu Geelɛbe boka ne anwo, na yeabele yeahɔdwu Gowa. 40 Na ɔvi avunli bɔnza ne nee nzonle* bɔnza ne amuala yɛɛ egyinli ne mɔ amuala anu ɔkɔdwu Kedelɔn Bɔnza ne anu,+ ɔkɔ Ɛkpɔnwɔ Anlenkɛ Kpole ne anwo+ wɔ aduduleɛ afoa nu, ɔbayɛ debie nwuanzanwuanza yeamaa Gyihova.+ Bɛnrɛbubu ye bɛnrɛgua aze bieko yɛɛ bɛnrɛzɛkye ye bieko ɛlɛ.”