Ngonyia Nee Ayɛne Ɛbɛla Ɛnle Kpalɛ

Seetan kpondɛ kɛ ɛye ngonyia. Menli dɔɔnwo bɔ afɔle maa bɛ nenyia mɔ mɔɔ bɛwu anzɛɛ sunsum ngakyile kɛ bɛbɔ bɛ nwo bane bɛvi ngyegyelɛ nu. Bɛyɛ ɛhye ɔluakɛ bɛsulo sunsum ewiade ne anu tumi ne. Bɛwula ngonyia mgbɔdelera anzɛɛ ngɛba. Bɛno “nyile” mɔɔ bɛsuzu kɛ ngonyia tumi wɔ nuhua la na bɛfa bie bɛkpokpa bɛ nwo. Bie mɔ fa ninyɛne mɔɔ bɛsuzu kɛ ɔkola ɔbɔ bɛ nwo bane la fea azɛlɛ nwo anzɛɛ bɛ azua nu. Bie mɔ noko tu ayile ɔluakɛ bɛdie bɛdi kɛ ɔbamaa bɛali konim wɔ gyima nu, sukulu sɔnea nu, anzɛɛ wɔ ɛdulɛ mɔɔ li agyalɛ nyunlu la anu.

Ɛfa Gyihova agɔnwolɛ a, ɔbabɔ ɛ nwo bane yeavi Seetan anwo. Gyihova Nyamenle nee ye anwumabɔvolɛ ne mɔ lɛ tumi kpole kpalɛ tɛla Seetan nee ye sunsum ɛtane ne mɔ. (Gyemise 2:19; Yekile 12:9) Gyihova kulo kɛ ɔfa ye tumi ne ɔboa ɔ gɔnwo mɔ​—bɛdabɛ mɔɔ bɛdi nɔhalɛ bɔkɔɔ bɛmaa ye la.​—2 Edwɛkɛsisilɛ 16:9.

Nyamenle Edwɛkɛ ne se: “Ɔnle kɛ bɛye ngonyia.” Gyihova tendɛ tia ngonyia nee ayɛne ɛbɛla ɔluakɛ zɛhae nyɛleɛ ne mɔ bahola amaa awie ava ɔ nwo awula Seetan Abɔnsam tumi bo.​—Sɛlɛvolɛma 19:26.