Nvasoɛ Wɔ Ɛzukoalɛ Zo

ASOO wɔnwu menli mɔɔ ɛlɛkpa baka ma nu la ɛlɛ? Kɛzi baka ma bie kɔla nee ye kpole de la a menli dɔɔnwo fa nwu ye kɛ yebolo a. Bie mɔ funvua. Bie mɔ mia ye. Bie mɔ noko fa gua bɛ sa nu nea bɛ ɛnlomboɛ. Duzu a menli ɛhye mɔ ɛlɛdwenle nwo a? Bɛlɛsuzu edwɛkɛ nwo, bɛlɛneɛnlea ngakyile mɔɔ wɔ nu, bɛlɛkakye mɔɔ bɛlumuale bɛkpale la yɛɛ bɛlɛfa mɔɔ bɛnwu ye kɛkala la bɛatoto mɔɔ bɛze ye dɛba la anwo. Bɛbanyia nvasoɛ kpole ɔluakɛ bɛnyianle mekɛ bɛnleɛnleanle nuhua kpalɛ.

Noko nvasoɛ kpole kpalɛ wɔ Nyamenle Edwɛkɛ ne ɛzukoalɛ zo. Saa yɛmaa debie ɛzukoalɛ zɛhae kyia yɛ wɔ yɛ asetɛnla nu a, ɔmaa yɛ diedi nu mia, ɛlɔlɛ mɔɔ yɛlɛ la yɛ kpole, yɛ ɛzonlenlɛ gyima ne so ma, yɛɛ kpɔkɛ mɔɔ yɛsi la da ye ali kɛ yɛlɛ nwunu nee nrɛlɛbɛ mɔɔ vi anwuma. Mɔɔ fane nvasoɛ ɛhye anwo la, Mrɛlɛbulɛ 3:15 ka kɛ: “Debie biala mɔɔ sonla nye die nwolɛ la nee ye ɛnzɛ.” Asoo ɛlɛnyia zɔhane nvasoɛ ne bie? Kɛzi ɛsukoa debie la a bahile a.​—Kɔl. 1:9, 10.

Ɛzukoalɛ a le duzu? Ɔkɔ moa ɔtɛla debie ɛgengalɛ ala. Wɔ adwenle mɔɔ ɛfa wɔazuzu edwɛkɛ nwo wɔahɔ moa la boka nwo. Eza ɔkile kɛ ɛbazuzu mɔɔ wɔgenga la anwo, wɔava wɔatoto mɔɔ ɛze ye dɛba la anwo, na wɔayɛ deɛmɔti edwɛkɛ ne le zɔ la nzonlɛ. Saa ɛlɛsukoa debie a, dwenle edwɛkɛ biala mɔɔ bie a ɔle ɛ nye zo fofolɛ la anwo kɔ moa. Eza dwenle kɛzi ɛbahola wɔava Ngɛlɛlera ne anu folɛdulɛ wɔali gyima bɔkɔɔ la anwo. Kɛ Gyihova Dasevolɛ la, eza ɛbahulo kɛ ɛbadwenle adenle mɔɔ ɛbalua zo wɔava edwɛkɛ ne wɔaboa awie mɔ la anwo. Ɔda ali kɛ edwɛkɛ nwo ɛdwenledwenlenlɛ boka ɛzukoalɛ nwo.

Siezie Wɔ Adwenle Kpalɛ

Saa ɛlɛboɔboa ɛ nwo wɔazukoa debie a, ɛsesa ninyɛne le kɛ wɔ Baebolo, buluku biala mɔɔ ɛkpondɛ kɛ ɛsukoa, pɛnsele anzɛɛ pɛne, yɛɛ bie a buluku mɔɔ ɛbahɛlɛ nu. Noko asoo ɛsiezie wɔ ahonle? Baebolo ne ka kile yɛ kɛ Ɛzela “zieziele ye ahonle kɛ ɔsukoa Gyihova mɛla ne na yeali zolɛ na yeahilehile pɛlepɛlelilɛ wɔ Yizilayɛ.” (Ɛzela 7:10, NW) Duzu a ahonle mɔɔ bɛsiezie ye zɛhae la kile a?

Asɔneyɛlɛ maa yɛfa subane kpalɛ yɛsukoa Nyamenle Edwɛkɛ ne. Yɛkulo kɛ yɛ ahonle ne, kɛzi yɛde la, die adehilelɛ mɔɔ Gyihova fa maa yɛ la to nu. Ɛbɔ debie ɛzukoalɛ biala abo a, sɛlɛ Gyihova sunsum ne maa ɔboa wɔ. (Luku 11:13) Sɛlɛ ye kɛ ɔboa wɔ ɔmaa ɛde mɔɔ ɛbazukoa la abo, kɛzi ɔfane ye bodane ne anwo, kɛzi ɔbaboa wɔ yeamaa wɔanwu kpalɛ nee ɛtane, kɛzi ɔwɔ kɛ ɛfa ye ngyinlazo ne ɛdi gyima wɔ wɔ ɛbɛlabɔlɛ nu, nee kɛzi edwɛkɛ ne baha ɛ nee ye agɔnwolɛvalɛ ne la. (Mrɛ. 9:10) Saa ɛlɛsukoa a, kɔ zo ‘sɛlɛ Nyamenle’ ɛkɛ ne nrɛlɛbɛ. (Gye. 1:5) Di nɔhalɛ na nwu kɛzi deɛ ne mɔɔ ɛlɛsukoa la fane ɛ nwo wɔ mekɛ mɔɔ ɛlɛkpondɛ Gyihova moalɛ wɔaye adwenle anzɛɛ atiakunluwɔzo ɛtane wɔavi ɛkɛ la. Yɛ Gyihova mo dahuu wɔ ninyɛne mɔɔ yemaa yɛnwu ye la anwo. (Edw. 147:7) Asɔneyɛlɛ ɛhye mɔɔ yɛfa yɛsukoa debie la maa yɛbikye Gyihova kpalɛ ɔluakɛ saa ɔdua ye Edwɛkɛ ne azo ɔtendɛ ɔkile yɛ a, ɔboa yɛ ɔmaa yɛtie.​—Edw. 145:18.

Zɔhane tieyɛ ne maa Gyihova menli yɛ ngakyile fi sukoavoma mɔɔ ɛha la anwo. Wɔ menli mɔɔ bɛnzonle Nyamenle kpalɛ la afoa nu, mɔɔ bɛ nye die nwo la a le kɛ bɛbazu mɔɔ bɛhɛlɛ la anwo kpolera. Noko yɛnle zɔ. Yɛlɛ Gyihova anu anwodozo. (Mrɛ. 3:5-7) Saa yɛnde debie bie abo a, yɛnva anwomemaazo yɛnga kɛ bɛvo. Yɛkendɛ Gyihova wɔ mekɛ mɔɔ yɛlɛbɔ mɔdenle yɛakpondɛ mualɛ ne mɔ la. (Mae. 7:7) Yɛ bodane a le kɛ yɛbava mɔɔ yɛsukoa la yɛali gyima na yɛahilehile awie mɔ kɛmɔ Ɛzela yɛle la. Saa yɛyɛ ye zɔ a, ɔbamaa yɛanyia mɔɔ yɛsukoa la azo nvasoɛ dɔɔnwo.

Kɛzi Bɛsukoa Debie La

Kɛ ɛbabɔ ɔ bo wɔ ɛdendɛkpunli 1 wɔazukoa toonwo wɔawie la, dumua nyia mekɛ suzu edwɛkɛ ne amuala anzɛɛ edwɛkɛtile ne anwo. Dumua nea kɛzi bɛhɛlɛ edwɛkɛtile ne la. Edwɛkɛtile ɛhye anwo debie a ɛbazukoa a. Nyia mekɛ suzu kɛzi edwɛkɛtile ngyikyi ne mɔ fane edwɛkɛtile ne anwo la. Suzu kɛzi nvoninli, mgbondabulɛ ne mɔ, anzɛɛ ngilehilelɛ ɛlɛka ne mɔ fane edwɛkɛ ne anwo la anwo. Biza ɛ nwo kɛ: ‘Ɔlua edwɛkɛ ɛhye mɔɔ mezuzu nwo la azo, duzu a me nye la kɛ mebazukoa a? Adenle boni azo a ɛhye baboa me a?’ Ɛhye maa ɛnwu mɔɔ ɛbazukoa la anye zo.

Akee kpondɛ nɔhalɛ edwɛkɛ mɔɔ wɔ nu la. Kpuyia wɔ Ɛzinzalɛ Arane ne mɔɔ yɛsukoa la nee mbuluku bie mɔ anu. Ɛlɛkenga ɛdendɛkpunli ko biala a, ɔbayɛ kpalɛ kɛ ɛbapepɛ mualɛ ne mɔ abo. Saa bɔbɔ kpuyia ɛnle nu a, ɛbahola wɔapepɛ nuhua edwɛkɛ titile mɔɔ ɛkpondɛ kɛ ɛkakye la abo. Saa ɛnwu edwɛkɛ fofolɛ bie a, nyia mekɛ ekyii suzu nwo na nwu ye kɛ wɔde ɔ bo kpalɛ. Nea kɛ ɛbanwu ndonwo bie mɔɔ baboa wɔ wɔ daselɛlilɛ nu anzɛɛ gyimalilɛ bie mɔɔ ɛbanyia anu la wɔ nu. Nwu menli mɔɔ saa ɛfa mɔɔ ɛlɛsukoa la ɛboa bɛ a, bɛ diedi nu bamia la. Yɛ edwɛkɛ titile mɔɔ ɛkulo kɛ ɛfa ɛyɛ gyima la nzonlɛ, na ɛsukoa ɛwie a, wɔadi nuhua.

Saa ɛlɛsukoa edwɛkɛ ne a, nea ngɛlɛlera mɔɔ wɔ nu la. Dwenle kɛzi ngɛlɛlera ko biala fane edwɛkɛ titile mɔɔ wɔ ɛdendɛkpunli ne anu anwo la anwo.

Bie a ɛbanwu edwɛkɛ titile bie mɔɔ ɛnrɛde ɔ bo ɛkɛ ne ala anzɛɛ ɛkpondɛ kɛ ɛyɛ nwolɛ neɛnleanu kpalɛ a. Kɛ anrɛɛ ɛbamaa bɛahwehwe wɔ adwenle la, yɛ ye nzonlɛ na ɛwie a wɔazuzu nwolɛ. Mekɛ mɔɔ ɛlɛkenga edwɛkɛ ne mɔɔ ɛha la, ɛbade edwɛkɛ titile bie mɔ abo kpalɛ. Saa bɛangilehile nu a, ɛbahola wɔayɛ nwolɛ neɛnleanu. Ninyɛne boni mɔ a ɛbahola wɔayɛ nwolɛ neɛnleanu a? Bie a ngɛlɛlera bie wɔ edwɛkɛ ne anu mɔɔ ɛnde ɔ bo kpalɛ. Anzɛɛ bie a ɛnrɛnwu kɛzi ɔfane edwɛkɛ mɔɔ ɛlɛsukoa la anwo a. Wɔannea a ɛbade nganeɛ kɛ ɛte edwɛkɛ bie mɔɔ wɔ nu la abo noko ɛnnwu kɛzi ɛkilehile nuhua wɔahile awie a. Kɛ anrɛɛ ɛbabu ɛ nye wɔagua ɛhye mɔ azo la, ɔbayɛ kpalɛ kɛ ɛwie mɔɔ wɔbɔ ɔ bo la sukoa a ɛbayɛ nwolɛ neɛnleanu.

Mɔɔ ɛzoanvolɛ Pɔɔlo kɛlɛ Hibulu Keleseɛnema ne kɛlata la, ɔgyinlanle ekyii ɔhanle kɛ: “Yemɔ a le ɛhye.” (Hib. 8:1) Asoo ɛkakyehakye ɛ nwo wɔ adenle ɛhye azo ɔvi mekɛ mɔɔ kɔ mekɛ la? Suzu deɛmɔti Pɔɔlo yɛle zɔ la anwo nea. Wɔ adile mɔɔ lumua wɔ ye kɛlata ɛhye anu la, ɛnee yela ye ali kɛ Kelaese mɔɔ le Nyamenle Ɛsɔfo Kpanyinli ne la ɛhɔdwu Nyamenle anyunlu. (Hib. 4:14–5:10; 6:20) Noko ɔlua edwɛkɛ ɛhye mɔɔ Pɔɔlo zile zo wɔ tile 8 ne mɔlebɛbo la ati, ɔzieziele ye kengavoma ne adwenle ɔmanle bɛnwunle deɛmɔti ɔwɔ kɛ bɛdwenle kɛzi ɔfane bɛ asetɛnla nwo la anwo kpalɛ. Ɔmanle ɔlale ali kɛ Kelaese ɛhɔdwu Nyamenle anyunlu wɔ bɛ ti na yebuke adenle amaa bɛawolo “nwuanzaanwu ɛleka” ne mɔɔ wɔ anwuma lɔ la. (Hib. 9:24; 10:19-22) Ɛnee anyelazo kpundii mɔɔ bɛlɛ la baboa bɛ yeamaa bɛava diedi, abotane, nee Keleseɛne ɛbɛlabɔlɛ kpalɛ nwo folɛdulɛ mɔɔ wɔ ye kɛlata ne anu la bɛali gyima. Zɔhane ala a saa yɛsukoa na yɛfa yɛ adwenle yɛsie edwɛkɛ titile ne azo a, ɔbaboa yɛ yeamaa yɛanwu kɛzi bɛhilehilele edwɛkɛtile ne anu la na yeamaa deɛmɔti ɔwɔ kɛ yɛfa yɛdi gyima kɛmɔ ɔfɛta la aha yɛ adwenle nu.

Asoo ɛ ti anwo debie ɛzukoalɛ ne baha wɔ yeamaa wɔayɛ nwolɛ debie? Kpuyia ɛhye hyia. Saa ɛsukoa debie a, biza ɛ nwo kɛ: ‘Kɛzi ɔwɔ kɛ ɛhye ka me subane nee me ɛbɛlabɔlɛ nu bodane ɛ? Kɛzi mebava edwɛkɛ ɛhye meali gyima wɔ ngyegyelɛ ɛziezielɛ, kpɔkɛzilɛ, anzɛɛ bodane mɔɔ medwu nwolɛ la anu ɛ? Kɛ ɔkɛyɛ na meava meali gyima wɔ me abusua ne, daselɛlilɛ nee asafo ne anu ɛ?’ Fa asɔneyɛlɛ suzu kpuyia ɛhye mɔ anwo, na dwenle tɛnlabelɛ mɔɔ ɛbahola wɔava nrɛlɛbɛ ne mɔɔ wɔnyia la wɔali gyima wɔ nu la anwo.

Saa ɛsukoa tile anzɛɛ edwɛkɛ bie ɛwie a, nyia mekɛ ti nuhua. Nea saa ɛbahola wɔahakye edwɛkɛ titile ne mɔ nee edwɛkɛ gyɛne mɔɔ boka nwo la a. Ɛhye bamaa edwɛkɛ ne aha ɛ ti anu na wɔava wɔali gyima kenlebie.

Ninyɛne Mɔɔ Ɛkola Ɛsukoa

Kɛ Gyihova menli la, yɛlɛ ninyɛne dɔɔnwo yɛsukoa. Noko nienwu a ɔwɔ kɛ yɛbɔ ɔ bo a? Ɔle kpalɛ kɛ yɛbazukoa Neɛnlea Ngɛlɛlera Ne Anu Dahuu ne anu edwɛkɛ ne alehyenlɛ biala. Yɛkɔ debiezukoalɛ dapɛne biala, na yɛ nwo mɔɔ yɛsiezie yɛmaa ɛhye mɔ la baboa yɛ kpole. Bieko, bie mɔ ɛkpondɛ mekɛ mɔɔ bɛfa bɛsukoa Keleseɛne mbuluku mɔɔ bɛyɛle kolaa na bɛanwu nɔhalɛ ne la. Bie mɔ noko kpa bɛ dapɛne Baebolo ɛgengalɛ ne foa bie na bɛyɛ nwolɛ neɛnleanu.

Na saa wɔ tɛnlabelɛ ne ɛnrɛmaa ɛnrɛhola ninyɛne mɔɔ bɛbazukoa ye dapɛne ne anu wɔ debiezukoalɛ bo la amuala sukoa ɛ? Koati kɛ ɛbapele ɛ nwo wɔagenga edwɛkɛ ne anu ala, anzɛɛ mɔɔ ɛnle kpalɛ fee la, kɛ ɛnrɛzukoa bie fee ɔluakɛ ɛnrɛhola ɔ muala sukoa la ati. Emomu, si mɔɔ ɛbahola ye sukoa la anwo kpɔkɛ na sukoa yemɔ kpalɛ. Yɛ ye zɔhane dapɛne biala. Mekɛ ne ɛlɛkɔ bie la, bɔ mɔdenle sukoa debiezukoalɛ ne anu ninyɛne mɔɔ ɛha la noko boka nwo.

Kyekye Wɔ Awuke

Gyihova ze kɛ ɔwɔ kɛ mbusua tile yɛ gyima ɛsesebɛ nea bɛ alɔvolɛ. Mrɛlɛbulɛ 24:27 ka kɛ: “Boɔboa ɛ nwo sie; duolua ɛbɔ nu kpondɛ nwolɛ ninyɛne ne amuala sie.” Noko ɛnrɛhola ɛnrɛbu ɛ nye ɛnrɛgua wɔ abusua ne sunsum nu gyinlabelɛ zo. Baebolo ne maa ɔda ali kɛ ɔwɔ kɛ mbusua tile ‘kola bɛ mra nwo zo nee bɛ awuke zo nea kpalɛ.’ (1 Tem. 3:5, 12) Kɛzi mbusua tile bahola ayɛ ɛhye ɛ? Mrɛlɛbulɛ 24:3 ka kɛ: “Bɛfa ndelebɛbo a bɛkyekye awuke a.”

Kɛ ɔkɛyɛ na ndelebɛbo anzɛɛ nwunu aboa wɔ awuke ne ɛ? Nwunu a le adwenle mɔɔ awie fa nwu ninyɛne tɛla mɔɔ ɛnyelɛ nwu ye la. Yɛbahola yɛaha kɛ, saa ɛdumua ɛnwu wɔ abusua ne a, ɔbaboa wɔ kpalɛ wɔ abusua debie ɛzukoalɛ nu. Kɛzi wɔ abusua ne ɛlɛnyia anyuhɔlɛ wɔ sunsum nu ɛ? Saa ɛ nee bɛ ɛlɛdi adwelie a, tie ye boɛ. Asoo bɛ nzo abo ɛdendɛlɛ anzɛɛ ɛyavalɛ sunsum wɔ bɛ nu? Asoo anwonyia ala a bɛdwenle nwo a? Saa ɛ nee ɛ mra ne mɔ lua daselɛlilɛ nu a, asoo ɔngyegye bɛ kɛ bɛbala bɛ nwo ali bɛahile bɛ tipɛnema kɛ bɛle Gyihova Alasevolɛ ɔ? Asoo bɛ nye die wɔ abusua Baebolo ɛgengalɛ nee debie ɛzukoalɛ ngyehyɛleɛ ne anwo? Asoo bɛlɛdua Gyihova adenle zo? Kɛ abusua tile la, saa ɛgua ɛ nye aze ɛnea bɛ kpalɛ a, ɔbamaa wɔanwu mɔɔ ɔhyia kɛ ɛyɛ amaa wɔ abusua ne anu amra anyia subane kpalɛ la.

Kpondɛ Ɛzinzalɛ Arane nee Awake! ne anu edwɛkɛ mɔɔ di ngyianlɛ titile bie anwo gyima la. Akee dumua ka mɔɔ bɛbazukoa la anwo edwɛkɛ kile abusua ne amaa bɛahola bɛadwenle nwo. Maa debie ɛzukoalɛ ne ɛyɛ anyelielɛ. Mmadua edwɛkɛ fɔɔnwo mɔɔ di abusua ne ngyianlɛ nwo gyima la azo ɛtea anzɛɛ ɛgua abusua ne anu amra biala anyunlu aze, si nvasoɛ mɔɔ wɔ edwɛkɛ ne mɔɔ bɛlɛsuzu nwo anu la azo. Maa awie biala ɛva ɔ nwo ɛwula nu. Boa awie biala maa ɔnwu kɛzi Gyihova Edwɛkɛ ne “di munli” na ɔfa mɔɔ yɛhyia wɔ asetɛnla nu ɔmaa yɛ la.​—Edw. 19:7.

Nyia Zolɛ Nvasoɛ

Menli mɔɔ nea debie kpalɛ noko bɛnlɛ sunsum nu ndelebɛbo la kola sukoa ewiade ne, ninyɛne mɔɔ ɛlɛsisi, nee bɛdabɛ mumua ne bɛ nwo debie noko bɛnde mɔɔ bɛnwu ye la abo kpalɛ. Noko, ɔlua Nyamenle sunsum ne moalɛ zo, menli mɔɔ bɛsukoa Nyamenle Edwɛkɛ ne la kola nwu Nyamenle asa anloa gyima wɔ ninyɛne ɛhye mɔ anu, Baebolo ngapezo mɔɔ ɔlɛpe zo, yɛɛ Nyamenle bodane mɔɔ kile kɛ ɔbayila alesama mɔɔ bɛyɛ tieyɛ mɔɔ yeye yehile la.​—Maake 13:4-29; Wulo. 1:20; Yek. 12:12.

Ɔnva nwo kɛ ɛhye mɔ yɛ nwanwane la, ɔnle kɛ bɛmaa yɛmemaa yɛ nwo zo. Emomu, Nyamenle Edwɛkɛ ne mɔɔ yɛsukoa ye dahuu la maa yɛbɛlɛ yɛ nwo aze. (Mɛla 17:18-20) Eza ɔbɔ yɛ nwo bane wɔ ‘ɛtane mbɛlɛbɛla’ nwo ɔluakɛ saa Nyamenle Edwɛkɛ ne yɛ gyima wɔ yɛ ahonle nu a, ɛtane nwo atiakunluwɔzo ne ɛnrɛvo kpɔkɛ mɔɔ yɛbɔ kɛ yɛko yɛatia ye la azo. (Hib. 2:1; 3:13; Kɔl. 3:5-10) Ɛhye bamaa ‘yɛabɔ yɛ ɛbɛla ne yɛamaa yeafɛta Awulae, dahuu yɛayɛ mɔɔ ɔkulo la, na yɛ ɛbɛlabɔlɛ ne anwo ara nvasoɛ wɔ gyima kpalɛ biala mɔɔ yɛyɛ la anu.’ (Kɔl. 1:10) Bodane mɔɔ ɔti yɛsukoa Nyamenle Edwɛkɛ ne la ɛne, na yɛdwu nwo a, yɛnyia nvasoɛ kpole.