FOA 8

Kpo Adalɛ Ɛzonlenlɛ; Fa Nɔhalɛ Ɛzonlenlɛ Tɛnla Aze

1. Duzu kpɔkɛzilɛ a menli yia ye wɔ ɛzonlenlɛ nwo ɛnɛ a?

GYISƐSE hanle kɛ: “Awie biala mɔɔ ɛmboka me nwo la tia me.” (Mateyu 12:30) Saa yɛnle Gyihova afoa a ɛnee yɛwɔ Seetan afoa. Menli dɔɔnwo dwenle kɛ bɛlɛsonle Nyamenle wɔ adenle mɔɔ ɔdie ɔto nuhua la azo, noko Baebolo ne ka kɛ Seetan “ɛbɛlɛbɛla ewiade amra amuala.” (Yekile 12:9) Menli mgbe dɔɔnwo die di kɛ bɛlɛsonle Nyamenle, noko nɔhalɛ nu bɛlɛsonle Seetan Abɔnsam! Menli mɔɔ de aze ɛnɛ la yia kpɔkɛzilɛ: Kɛ bɛkɛzonle Gyihova, ‘nɔhalɛ Nyamenle ne’ anzɛɛ Seetan, “adalɛ kɔsɔɔti bɛ ze” ne.—Edwɛndolɛ 31:5; Dwɔn 8:44.

Twe Ɛ Nwo Fi Adalɛ Ɛzonlenlɛ Nwo

2. Adenle ko boni a Seetan fa zo bɔ mɔdenle kɛ ɔkɛzi menli adenle kɛ bɛkɛzonle Nyamenle ɛ?

² Kpɔkɛ mɔɔ awie si yeazonle Gyihova la le mɔɔ nrɛlɛbɛ wɔ nu, ɔle kpɔkɛzilɛ mɔɔ maa awie nyia Nyamenle anyunlu ɛlolɛ a. Noko Seetan anye ɛnlie awie biala mɔɔ sonle Nyamenle la anwo; ɔmaa bɛdabɛ mɔɔ bɛsonle Nyamenle la yia ngyegyelɛ na bɛnwu amaneɛ. Adenle ko mɔɔ ɔfa zo ɔyɛ ɛhye la a le kɛ ɔbamaa awie mɔ, bɛ gɔnwo mɔ nee bɛ mbusuafoɔ bɔbɔ agolo bɛ nwo na bɛadwazo bɛatia bɛ. Gyisɛse bɔle yɛ kɔkɔ kɛ: “Sonla biala kpɔvolɛma kpalɛ vi ɔdaye ye sua nu.”—Mateyu 10:36.

3. Saa wɔ abusua ne anzɛɛ ɛ gɔnwo mɔ dwazo tia Nyamenle mɔɔ ɛlɛsonle ye la a, boni ɛbayɛ a?

³ Saa zɔhane to wɔ a, kɛ ɛbazi wɔayɛ wɔ nyɛleɛ ɛ? Menli dɔɔnwo ze ye kɛ adenle mɔɔ bɛpe zo bɛsonle la ɛnle kpalɛ, noko bɛtwehwe bɛ bo aze kɛ bɛkɛgyakyi. Bɛdwenle kɛ bɛyɛ zɔ a ɔbahile kɛ bɛanli nɔhalɛ bɛammaa bɛ mbusuafoɔ. Asoo ɔle adwenle kpalɛ? Saa ɛnwu kɛ wɔ abusua ne anu amra mɔɔ bikye wɔ la no nyile ɛtane a, asoo ɛnrɛhakye bɛ kɛ nyile ne baboda bɛ? Ɛnrɛboka bɛ nwo bɛnrɛnlo zɔhane nyile ne, ɔnle zɔ ɔ?

4. Duzu a Dwɔhyua hanle hilele ye mekɛ zo Yizilayɛma wɔ ɛzonlenlɛ nwo a?

⁴ Dwɔhyua maanle Yizilayɛma anwosesebɛ kɛ bɛgyakyi ɛzonlenlɛ nu nyɛleɛ ɛtane nee bɛ nenyia mɔ ngilehilelɛ ne anzililɛ. Ɔhanle kɛ: “Ye zɔhane ati bɛli [Gyihova, NW] eni na bɛzonle ye nɔhalɛ nu. Awozonle ne mɔ mɔɔ bɛ nenyia mɔ zonlenle bɛ wɔ Mɛsɔpɔteemea nee Yigyibiti la, bɛgua bɛ lɔ na bɛzonle [Gyihova, NW] angomekye.” (Dwɔhyua 24:14) Dwɔhyua lile nɔhalɛ maanle Nyamenle, na Gyihova yilale ye. Saa yɛdi nɔhalɛ yɛmaa Gyihova a, ɔbayila yɛdayɛ noko.—2 Samoɛle 22:26.

Ɛzonlenlɛ Nu Ngilehilelɛ—Mɔɔ Le Nɔhalɛ Nee Mɔɔ Le Adalɛ

Nsa-Ko Ne: Ɛzonlenlɛ dɔɔnwo kilehile kɛ Nyamenle le Nsa-Ko. Bɛka kɛ “Selɛ ne le Nyamenle, Ralɛ ne [Gyisɛse] le Nyamenle, yɛɛ Sunsum Nwuanzanwuanza ne le Nyamenle, noko akee tɛ Nyamenle nsa a wɔ ɛkɛ a na emomu Nyamenle ko.”

Baebolo ne ɛmbɔ duma “Nsa-Ko” bɔbɔ , na yeahilehile kɛ Gyihova le menli nsa mɔɔ bɔ nu yɛ ko a. Gyihova angomekye a le Nyamenle a. Kɔlentema mɔɔ limoa tile 8:6 ka kɛ: “Yɛmɛ yɛze Nyamenle kokye ne ala, yemɔ a le Selɛ ne.” Gyihova a le Tumivolɛ ko ne a. Gyisɛse, ɛnle Nyamenle, ɔle “Nyamenle ara.” (1 Dwɔn 4:15) Zɔhane ala a sunsum nwuanzanwuanza ne noko ɛnle Nyamenle a. Sunsum nwuanzanwuanza ne ɛnle sonla bɔbɔ. Ɔle Nyamenle nyɛleɛ tumi.—Gyima ne 1:8; Ɛfɛsɛsema 5:18.
Ɛkɛla Ne: Ɛzonlenlɛ dɔɔnwo kilehile kɛ ɛkɛla ne le debie bie mɔɔ wɔ sonla nu mɔɔ ɛnwu ɛlɛ a. Baebolo ne kilehile kɛ ɛkɛla ne a le sonla ne yɛɛ, ɔle nɔhalɛ kɛ, sonla kola wu.—Mɔlebɛbo 2:7; Yizikeɛle 18:4.
Hellsenle: Adalɛ ɛzonlenlɛ kilehile kɛ bɛkile ɛtaneyɛvolɛma ɛkɛla nyane wɔ hell dahuu. Baebolo ne ka kɛ mowuamra “ɛnze ɛhwee.” (Nolobɔvo ne 9:5) Eza Baebolo ne kilehile kɛ “Nyamenle le ɛhulolɛ.” (1 Dwɔn 4:8) Gyihova, ɛlɔlɛ Nyamenle ne, ɛnrɛva senle ɛnrɛhile menli nyane ɛlɛ.

Ɛlɛka: Boni a Baebolo ne kilehile wɔ Nsa-Ko ne, ɛkɛla ne, yɛɛ hellsenle nwo a?

Ye Ninyɛne Mɔɔ Bɛfa Bɛdi Gyima Wɔ Adalɛ Ɛzonlenlɛ Nu La Fi Ɛ Nwo

Raalɛ bie ɛlɛyelɛ ye ngonyiayelɛ ninyɛne ne

5. Duzu ati a ɔwɔ kɛ yɛye ngonyiayelɛ ninyɛne yɛfi yɛ nwo a?

⁵ Yɛ nwo mɔɔ yɛtwe yɛavi adalɛ ɛzonlenlɛ nwo la noko kile kɛ yɛkɛzɛkye ngonyiayelɛ ninyɛne, mɔɔ le kɛ ateayela, banzɛlɛ, ngɛba, nee kiti, yɛɛ ninyɛne ɛhye mɔ biala mɔɔ yɛlɛ la. Ɛhye ɛyɛlɛ hyia, ɔluakɛ ɔkile kɛ yɛfa yɛ rɛle kɔsɔɔti yɛwula Gyihova anu.

6. Kɛ tete Kilisienema ne yɛle bɛ ngonyia mbuluku ne mɔ ɛ?

⁶ Suzu mɔɔ tete Kilisienema bie mɔ yɛle mekɛ mɔɔ bɛbɔle kpɔkɛ kɛ bɛfa nɔhalɛ ɛzonlenlɛ bɛadɛnla aze la anwo nea. Baebolo ne ka kɛ: “Ngonyiama dɔɔnwo ne ala vale bɛ mbuluku mɔɔ bɛfa bɛyɛ bɛ gyima la rale maanle bɛyelale bɛ wɔ bagua nu.”—Gyima ne 19:19.

7. Saa sunsum ɛtane gyegye yɛ a, boni a yɛbahola yɛayɛ a?

⁷ Sunsum ɛtane bahola agyegye bɛdabɛ mɔɔ bɛva bɛ nwo bɛwula ayɛne, sili, anzɛɛ ngonyia nyɛleɛ nu na bɛbɔ ɔ bo kɛ bɛsonle Gyihova la. Saa ɔba ye zɔ a, bɔ Gyihova duma ɛsesebɛ fɛlɛ ye wɔ asɔneyɛlɛ nu. Ɔbaboa wɔ.—Mrɛlɛbulɛ 18:10; Gyemise 4:7.

8. Kɛ Kilisienema si bu abaaba, ananze, nee nvoninli mɔɔ bɛfa bɛdi gyima wɔ adalɛ ɛzonlenlɛ nu la ɛ?

⁸ Ɔnle kɛ bɛdabɛ mɔɔ bɛkulo kɛ bɛsonle Gyihova la fa abaaba, ananze, anzɛɛ ɛzonlenlɛ nu nvoninli biala mɔɔ le adalɛ ɛzonlenlɛ foa la sie bɛ nwo anzɛɛ di gyima. Nɔhalɛ Kilisienema fa ‘diedi a bɔ bɛ ɛbɛla a, na tɛ deɛ mɔɔ ɛnyelɛ nwu ye la ɔ.’ (2 Kɔlentema 5:7) Bɛ nye sɔ Nyamenle mɛla mɔɔ tua ananze mɔɔ bɛfa bɛdi gyima wɔ ɛzonlenlɛ nu la.—Adendulɛ 20:4, 5.

Ɛ Nee Gyihova Menli Ɛdu

9. Duzu folɛdulɛ a Baebolo ne fa maa wɔ nrɛlɛbɛvolɛ mɔɔ awie bayɛ la anwo a?

⁹ Baebolo ne ka kɛ: “Sonla mɔɔ nee nrɛlɛbɛvolɛma tu la nwu nrɛlɛbɛ.” (Mrɛlɛbulɛ 13:20) Saa yɛkulo kɛ yɛyɛ nrɛlɛbɛvolɛma a, ɔwɔ kɛ yɛ nee Gyihova Alasevolɛ dua, anzɛɛ tu. Bɛmɛ a bɛle menli mɔɔ lua adenle ne mɔɔ kɔ dahuu ngoane nu la azo a.—Mateyu 7:14.

10. Kɛzi Gyihova Alasevolɛ bahola aboa wɔ bɛamaa wɔazonle Nyamenle ɛ?

¹⁰ Alasevolɛ ne mɔ dwenle menli nwo amgba. Bɛ gyima a le kɛ bɛbaboa ahonlekpalɛma bɛamaa bɛade Baebolo nu nɔhalɛ edwɛkɛ mɔɔ kɔ dahuu ngoane nu la abo. Bɛbahola bɛaboa wɔ ɔlua Baebolo ne mɔɔ bɛ nee wɔ bɛazukoa, mɔɔ bɛnlie ɛhwee la azo. Bɛbaye wɔ edwɛkɛbizalɛ biala anloa na bɛahile wɔ kɛ ɛbazi wɔava Baebolo nu ndelebɛbo wɔali gyima wɔ ɛbɛlabɔlɛ nu la.—Dwɔn 17:3.

11. Kɛzi Kilisiene ayia ne mɔ baboa wɔ ɛ?

¹¹ Ɛbazukoa Gyihova ndenle nwo ninyɛne dɔɔnwo wɔ bɛ ayia ne mɔ mɔɔ bɛyɛ ye wɔ Belemgbunli Asalo la abo. Bɛbawula wɔ anwosesebɛ wɔ ɛhulolɛ mɔɔ wɔnyia kɛ ɛfa nɔhalɛ ɛzonlenlɛ wɔadɛnla aze la anwo. Eza bɛbahilehile wɔ kɛzi bɛboa awie mɔ bɛmaa bɛsukoa Baebolo nu nɔhalɛ ne la.—Hibuluma 10:24, 25.

Asafo bie ɛyia nu wɔ Belemgbunlililɛ Asalo

12. Kɛzi asɔneyɛlɛ kola boa wɔ maa ɛsonle Nyamenle ɛ?

¹² Mekɛ mɔɔ ɛlɛsukoa Gyihova ɛhulolɛdeɛ nee ye bodane nwo ninyɛne dɔɔnwo la, ɛbaranyia anyezɔlɛ kpole wɔamaa ye ɛlɔlɛ ndenle ne mɔ. Eza ɔwɔ kɛ wɔ ɛhulolɛ mɔɔ ɛlɛ kɛ ɛsɔ ɔ nye na wɔahyi ninyɛne mɔɔ ɔnlie ɔndo nu la yɛ kpole. Kakye kɛ ɛkola ɛkɔ Gyihova ɛkɛ wɔ asɔneyɛlɛ nu na ɛsɛlɛ ye kɛ ɔboa wɔ ɔmaa ɛyɛ mɔɔ tenrɛ na ɛhyi mɔɔ ɛndenrɛ la.—1 Kɔlentema 6:9, 10; Felepaema 4:6.

Abusua bie ɛbɔ nu ɛlɛkenga Baebolo ne — Kɛzi ɛkola ɛfa nɔhalɛ ɛzonlenlɛ ɛtɛnla aze ɛ?

13. Adenle boni azo a ɛbamaa Gyihova anye alie a?

¹³ Kpolerazulɛ biala ɛnle nwolɛ kɛ, mekɛ mɔɔ ɛlɛnyia anyuhɔlɛ wɔ ɛzonlenlɛ nu la, ɛbanwu ɛhyianlɛ mɔɔ ɔhyia kɛ ɛbayɛ Gyihova Dasevolɛ mɔɔ ɛyila ɔ nwo zo, na bɛzɔne ye a. Gyihova menli mɔɔ ɛbaboka bɛ nwo la bamaa Gyihova anye alie. (Mrɛlɛbulɛ 27:11) Ɛbaraboka menli mɔɔ lɛ anyelielɛ mɔɔ Nyamenle ka ye bɛ nwo kɛ: “Mebabu me awuke wɔ me maanlema avinli na me nee bɛ adɛnla; Mebayɛ bɛ Nyamenle na bɛayɛ me menli” la anwo.—2 Kɔlentema 6:16.

Mendwenle Me Nwo Menvile Sunsum Ɛtane Ne Mɔ Anwo

Kenle ko nɔɔzo mɔɔ ɛnee me nee me hu yɛla la, mendele kɛ ɛnelɛ bie bɔle me duma vɛlɛle me fane nsa. Akee menwunle kɛ sua ne anwuma ne ɛbuke, na debie anwo kɔkɔlɛ kunguma bie radɔle me kunlu. Nɔhalɛ nu, me hu anwu ɛhye mɔ anu biala. Noko, me nwo lɔle wuluwulu wɔ siane dɔɔnwo anu.

Siane nsia anzi, ɛnelɛ ne vɛlɛle me bieko. Ɛkɛ ne ala sua ne amuala yɛle kɛ asɛɛ ɔwɔ azule bo la. Ɛnyenle bedevinli bie vi azule ne abo vindele na ɔbɛkɛbɛkale me sa. Mekpondenle ye biala kɛ ɔkɛvi me sa na yeanyɛ boɛ. Me ahonle dule. Akee azule ne nee ɛwɔlɛ ne amuala minliminlinle, na mendɔle aze kpole bie. Me nye zo bulule me hyɛle kpalɛ. Ɛnelɛ ne akee hanle hilele me kɛ menzia mengɔ tola bie mɔɔ wɔ namule ne azo mɔɔ bɛyɛ sunsum nu ewule ayile wɔ ɛkɛ la anu. Mɔɔ membizale sunsum ne ye duma la, ɔbɔle duma bie mɔɔ kile “mɔɔ lɛ anwonyia noko ɔnlɛ ralɛ.” Ɔbɔle me ɛwɔkɛ kɛ ɔbamaa meanyia me nwo ɔlua ayileyɛlɛ tumi zo.

Wuliravolɛma vi moamoa yɛɛ ɛleka ngakyile rale me ɛkɛ. Kolaa na bɛadwu me sua nu la, bɛdimoa bɛfinde me neanleɛ titili bie anu. Akee saa awie ba a, mefa me sa meto ɔ sa nu, ɛnee ɛkɛ ne ala bɛye ye ewule ne nee ye ayile anzɛɛ ye ngyegyelɛ nee ye sɔbelɛ bɛhile me. Sunsum ɛtane ne eza hanle ezukoa mɔɔ ɔwɔ kɛ menli tua la hilele me.

Ɔluakɛ ayile ne yɛ nla la ati menyianle ezukoa nee ahyɛlɛdeɛ dɔɔnwo. Membanyɛle awie “mɔɔ lɛ anwonyia,” noko eza mendele mɔɔ “ɔnlɛ ralɛ” kile la abo. Mekɛ biala mɔɔ mebawo la, ɛnee mɔɔ limoa la ɛwu. Ɛhye gyegyele me kpole. Wɔ ɛvolɛ 12 ne mɔɔ menzonlenle sunsum ne la anu, me mra nsia wule.

Membɔle ɔ bo kɛ mesɛlɛ Nyamenle ɛkɛ ne moalɛ. Menyɛle asɔne ɛsesebɛ. Kenle ko Gyihova Alasevolɛ rabɔle me anlenkɛ ne anu. Ɔwɔ nuhua kɛ dahuu mefoa bɛ ɛdeɛ, noko kenle ko ne menyɛle kɛ metie bɛ. Wɔ debiezukoalɛ ne mɔɔ doale zo la anu, membanwunle ye kɛ melɛsonle sunsum ɛtane! Menzile kpɔkɛ kɛ metwe me nwo meavi sunsum ɛtane nyɛleɛ nwo.

Mɔɔ menganle mengilele sunsum ne la, ɔhanle kɛ menea boɛ wɔ me kpɔkɛzilɛ ne anwo. Noko akee, menganle kɛ: “Me nee wɔ ɛnlɛ debie biala bieko ɛnyɛ.”

Menyelale ninyɛne mɔɔ ɛnee mefa mebiza la amuala. Me nee Alasevolɛ ne mɔ zukoale Baebolo ne, membanyɛle Gyihova sonvolɛ, na bɛzɔnenle me wɔ 1973. Kɛkala melɛ ngakula nnu mɔɔ te kpɔkɛ a. Me hu noko rayɛle Dasevolɛ mɔɔ bɛzɔne ye a.—Kɛ mɔɔ Josephine Ikezu hanle la.

Ɛlɛka: Kɛzi raalɛ ko hwenle ɔ nwo vile sunsum ɛtane ne mɔ anwo ɛ?