Mele Mumule, Noko Ɔtɛsile Me Adenle Kɛ Mebahilehile Awie Mɔ

WƆ 1910, me awovolɛ vi Tbilisi, Georgia dule hɔle Canada hɔdɛnlanle namule ekyi bie mɔɔ bikye Pelly, Saskatchewan, mɔɔ wɔ Canada adɔleɛ la. Bɛwole me wɔ ɛvolɛ 1928, yɛle ngakula nsia na medame a mele kakula wɔ nu a. Me papa wule la ye siane nsia anzi yɛɛ bɛwole me a, yɛɛ me Mame wule la ɛnee mele kakula. Yeangyɛ, me diema raalɛ kpanyinli Lucy wule, ɛnee yenyia ɛvolɛ 17. Yemɔ anzi, me papa adiema nrenyia Nick maanle yɛhɔdɛnlanle ɔ nwo.

Kenle ko, wɔ me ngakula nu me abusua ne nwunle kɛ melɛtwe ɛkpɔnwɔ nyinli bie adua wɔ ɛya ne anu. Kɛmɔ ɛnee bɛsulo kɛ ɔbaboda me la ati, bɛdeɛdeanle nu kɛ mengyakyi​—noko meande. Ɛnee mehakyi me nzi mezi bɛ, yemɔti meande yɛɛ meannwu ye kɛ bɛlɛteɛdea nu. Me nye liele kɛ yeamboda me la, zɔhane mekɛ ne a me abusua ne nwunle kɛ mele mumule a.

Yɛ gɔnwo bie zuzule kɛ bɛmaa mengɔ mumulema sukulu, yemɔti me papa adiema nrenyia Nick maanle mengɔle mumulema sukulu mɔɔ wɔ Saskatoon, Saskatchewan la bie. Menvile me abusua ne anwo mengɔdɛnlanle moa ekyi, na kɛmɔ ɛnee meli ɛvolɛ nnu pɛ la ati, me ahonle dule. Ɛnee saa bɛmaa sukulu adenle a yɛɛ mekɔkpɔla me abusua ne a. Awieleɛ kolaa ne, menzukoale mumule aneɛ ne na ɛnee me nye die kɛ me nee ngakula gyɛne bali nwɔhoa.

MENZUKOALE BAEBOLO NE ANU NƆHALƐ NE

Wɔ 1939, Bill Danylchuck gyale me diema raalɛ kpanyinli Marion mɔɔ ɛnee de aze la, na bɛmaanle me nee me diema raalɛ Frances radɛnlanle bɛ nwo. Bɛdabɛ a bɛlimoa wɔ me abusua ne anu mɔɔ bɛ nee Gyihova Alasevolɛ zukoale debie a. Saa bɛmaa sukulu adenle na meba sua nu a, bɛbɔ mɔdenle bɛka mɔɔ bɛlɛsukoa bɛavi Baebolo ne anu la bie bɛkile me. Nɔhalɛ nu, kɛmɔ ɛnee bɛnde mumule aneɛ ne la ati, ɛnee ɔyɛ se kɛ me nee bɛ babɔ adawu. Noko bɛnwunle ye wienyi kɛ me nye die sunsum nu ninyɛne nwo. Menwunle kɛ mɔɔ Baebolo ne ka la a bɛyɛ a, yemɔti saa bɛlɛkɔ daselɛlilɛ a me nee bɛ kɔ. Yeangyɛ, ɛnee mekulo kɛ bɛsɔne me, na wɔ September 5, 1941, Bill zɔnenle me wɔ angola anzɛɛ keteke bie mɔɔ nzule wɔ nu la anu. Ɛnee nzule ne le weɛlɛkɔkɔ kpalɛ kpalɛ!

Mɔɔ bɛmaanle adenle na menziale mengɔle sua nu wɔ 1946 la, yɛhɔle nyianu bie wɔ Cleveland, Ohio, U.S.A. Kenle mɔɔ limoa la, me mediema mraalɛ ne mɔ yɛle kɛlɛtokɛ ngyikyi mɔɔ baboa me yeamaa meali gyimalilɛ ne anzi la. Kenle nwiɔ ne azo, menwunle mumule aneɛ ekpunli bie, na me nye liele kɛ awie wɔ ɛkɛ mɔɔ ɔkile ɛdendɛlɛ ne abo la. Akee me nye liele gyimalilɛ ne anwo, ɛnee ɔyɛ me fɛ kɛ melɛte Baebolo ne anu nɔhalɛ ne abo kpalɛ la!

MENGILEHILELE AWIE MƆ NƆHALƐ NE

Zɔhane mekɛ ne, ɛnee bɔ zo mɔɔ Ewiade Konle II ɛra awieleɛ a, na ɛnee maanle nwo ɛhulolɛ ɛlie ebia. Mɔɔ yɛwiele nyianu ne la, membɔle kpɔkɛ kɛ mebagyinla me diedi ne anzi kpundii wɔ sukulu. Yemɔti mengyakyile fɛlɛnra ahyebizalɛ nee maanle edwɛne ne ɛdolɛ. Eza mendwenle me nwo menvile ɛvoyialilɛ ngakyile nee asɔne ɛhɔlɛ mɔɔ bɛyɛ ye kyengye la anwo. Yeanyɛ sukulu mgbanyima ne mɔ fɛ na bɛbɔle mɔdenle kɛ bɛnwulonwunla me na bɛabɛlɛbɛla me amaa meahakyi me adwenle. Me gɔnwo mɔ sukuluma nwunle mɔɔ ɛlɛkɔ zo la, ɔti ɔmaanle menyianle adenle menlile bɛ daselɛ. Nzinlii, me gɔnwo mɔ sukuluma le kɛ Larry Androsoff, Norman Dittrick, nee Emil Schneider ranwunle nɔhalɛ ne, na bɛva nɔhalɛlilɛ bɛzonle Gyihova too yeradwu ɛnɛ.

Saa melɛkɔ azua gyɛne zo a, mebɔ kpɔkɛ kɛ mebali mumulema daselɛ. Kɛ neazo la, wɔ Montreal nwɔhoalilɛleka bie, menlile Eddie Tager, kpavolɛ bie mɔɔ ɛnee boka basabasayɛlɛ eku bie anwo la daselɛ. Kolaa na yeawu wɔ ɛkenle ɛvolɛ ne la, ɛnee ɔwɔ mumule aneɛ asafo mɔɔ wɔ Laval, Quebec la anu. Eza menyiale kpavolɛ Juan Ardanez, ɔbɔle mɔdenle ɔyɛle neɛnleanu amaa yeanwu Baebolo ne anu nɔhalɛ ne kɛmɔ Bɛliama ne yɛle la. (Gyi. 17:10, 11) Ɔdaye noko ɔrale nɔhalɛ ne anu na ɔvale nɔhalɛlilɛ ɔzonlenle kɛ asafo nu kpanyinli wɔ Ottawa, Ontario too ɔwule.

Wɔ 1950, mendule mengɔle Vancouver. Me nye die kɛ mebali mumulema daselɛ noko me rɛle ɛnrɛvi Chris Spicer, raalɛ bie mɔɔ ɔnle mumule mɔɔ menlile ye daselɛ wɔ gua zo la ɛlɛ. Ɔhanle kɛ mengɛla magazine ne bie memaa ye na ɛnee ɔkulo kɛ mekɔkpɔla ɔ hu Gary. Ɔti mengɔle bɛ sua nu, na yɛluale ngɛlata ɛhɛlɛlɛ zo yɛbɔle adawu yɛhyɛle kpalɛ. Yemɔ anzi yɛannyia bieko, na ɛvolɛ ekyi pɛle nu la, ɔzinle me nwo kɛ bɛnwunle me wɔ menli dɔɔnwo bie avinli wɔ Toronto, Ontario, nyianu bie abo la. Ɛnee bɛbazɔne Gary wɔ kenle zɔhane. Anyelielɛ edwɛkɛ zɔhane maanle menwunle deɛmɔti ɔhyia kɛ meka edwɛkɛ ne dahuu la, ɔluakɛ yɛnze ɛleka anzɛɛ mekɛ mɔɔ nɔhalɛ ne bazɔ ndinli la.

Nzinlii, menziale mengɔle Saskatoon. Menyiale raalɛ bie wɔ ɛkɛ na ɔzele me kɛ me nee ɔ mra mraalɛ ndalɛ Jean and Joan Rothenberger mɔɔ bɛle mumulema la ɛzukoa debie. Ɛnee bɛkɔ mumulema sukulu ne mɔɔ mengɔle la bie. Yeangyɛ, ngakula mraalɛ nwiɔ ne bɔle ɔ bo kɛ bɛka mɔɔ bɛlɛsukoa la bie bɛahile bɛ gɔnwo mɔ sukuluma. Awieleɛ kolaa ne, bɛ gɔnwo mɔ nnu rayɛle Gyihova Alasevolɛ. Bɛ nuhua ko a le Eunice Colin. Mekɛ mɔɔ limoa mɔɔ menyiale Eunice la, ɛnee ɔka ekyi mewie sukulu wɔ zɔhane mumulema sukulu ne anu. Mekɛ zɔhane, ɔmaanle me tɔfe na ɔzele me kɛ ɔkulo kɛ yɛyɛ agɔnwolɛ.

Mɔɔ Eunice mame nwunle kɛ ɔlɛsukoa Baebolo ne la, ɔhanle ɔhilele sukulu kpanyinli ne kɛ ɔzi ye adenle. Ɔzale ye ɔliele mbuluku bɔbɔ mɔɔ ɔfa ɔsukoa debie la. Noko, ɛnee Eunice ɛbɔ kpɔkɛ kɛ ɔbayɛ mɔɔ Gyihova kulo la. Mekɛ mɔɔ ɛnee ɔkulo kɛ bɛsɔne ye la, ye awovolɛ zele ye kɛ, “Saa ɛkulo kɛ ɛyɛ Gyihova Dasevolɛ a, ɛnee fi sua nu ɛke!” Eunice vile sua nu wɔ mekɛ mɔɔ ɛnee yeli ɛvolɛ 17 la, na Dasevolɛ bie mɔɔ de bikye bɛ la maanle ɔrabokale bɛ abusua ne anwo. Ɔdoale ye debiezukoalɛ ne azo na nzinlii bɛzɔnenle ye. Nzinlii, ɔrayɛle awie mɔɔ anwo hyia kpalɛ wɔ me ɛbɛlabɔlɛ nu​—ɔrayɛle me ye! Mɔɔ yɛgyale wɔ 1960 la, ye awovolɛ amba yɛ atɔfolɛlielɛ ne abo. Noko mekɛ ne ɛlɛkɔ la, bɛ nye raliele yɛ nwo ɔlua yɛ diedi nee kɛzi yɛtetele yɛ mra ne mɔ la ati.

GYIHOVA NLEANLE ME

Yɛle awovolɛ mɔɔ yɛle mumule noko yɛtetele ngakula mrenyia nsuu mɔɔ bɛte edwɛkɛ. Ɛnee ɔnla aze, noko yɛbɔle mɔdenle kɛ bɛbade mumule aneɛ ne amaa yɛahola yɛ nee bɛ abɔ adawu kpalɛ na yɛahilehile bɛ nɔhalɛ ne. Yɛ asafo ne anu amra boale yɛ kpalɛ. Kɛ neazo la, wovolɛ bie hɛlɛle yɛ kɛlata bɔle yɛ amaneɛ kɛ yɛ mra ne mɔ ko ɛlɛka ɛdendɛlɛ evinli wɔ Belemgbunlililɛ Asalo ɛkɛ. Yɛlile ngyegyelɛ ne anwo gyima ɛkɛ ne ala. Me mra mrenyia nna​—James, Jerry, Nicholas, yɛɛ Steven nee bɛ ye mɔ nee bɛ mbusua ɛlɛsonle Gyihova nɔhalɛ nu. Mrenyia nna ne amuala le asafo nu mgbanyima. Bieko, Nicholas nee ɔ ye Deborah, ɛlɛboa mumule aneɛ edwɛkɛbohilelɛ gyima ne wɔ Britain Bɛtɛle, yɛɛ Steven nee ɔ ye Shannan boka mumule aneɛ edwɛkɛbohilelɛ ekpunli ne mɔɔ wɔ United States Bɛtɛle la anwo.

Ɔka siane ko na yɛ agyalɛ ne anyia ɛvolɛ 40 la, anahɛlɛ hunle Eunice. Ɔlale akɛnrasesebɛ ali wɔ zɔhane ngyegyelɛ mekɛ ne anu. Ewudwazo anyelazo ne maanle ye anwosesebɛ. Me nye la mekɛ mɔɔ mebanwu ye bieko la.

Wɔ February 2012, mendɔle aze na me nze bule, yemɔti ɛnee mehyia moalɛ. Ɔti, mengɔndɛnlanle me mra mrenyia ne mɔ ko nee ɔ ye anwo. Yɛwɔ Calgary Mumule Aneɛ Asafo ne anu, na metɛde asafo nu kpanyinli. Nɔhalɛ nu, mekɛ mɔɔ limoa mɔɔ mehɔ mumule aneɛ asafo nu la ɛne. Dwenle nwolɛ nea! Wɔ ɛvolɛ zɔhane mɔ anu mɔɔ ɛnee mewɔ Nrelenza asafo nu​—ɔvi 1946 mɔɔ ba la​—kɛzi me sunsum nu gyinlabelɛ ne yɛle ɛ? Gyihova ɛli ɛwɔkɛ mɔɔ yebɔ kɛ ɔbanlea bɛdabɛ mɔɔ bɛnlɛ bɛ ze mɔ la azo. (Edw. 10:14) Me nye sɔ mɔdenle mɔɔ awie mɔ ɛbɔ ɛvi bɛ ɛhulolɛ nu ɛyɛ kɛlɛtokɛ, bɛzukoa mumule aneɛ na bɛbɔ mɔdenle bɛhile ɛdendɛlɛ ne mɔ abo bɛmaa me kɛmɔ bɛbahola la.

Nɔhalɛ nu, ɔdwu mekɛ ne bie a me sa nu to na mekpondɛ kɛ megyakyi ɔluakɛ ɛnee mende mɔɔ bɛlɛka la abo, anzɛɛ bie a ɛnee ɔzɔho kɛ bɛnde mumulema ngyianlɛ bo. Noko, zɔhane mekɛ ne, mengakyele edwɛkɛ mɔɔ Pita hanle hilele Gyisɛse la: “Awulae, nwane ɛkɛ a yɛkɔ a? Wɔmɔ a ɛlɛ edwɛkɛ mɔɔ maa dahuu ngoane a.” (Dwɔn 6:66-68) Noko, kɛ mɔɔ me mekɛ zo mediema mɔɔ bɛle mumule yɛle la, mezukoa kɛ mebazi abotane. Mezukoa kɛ mebava me nwo meado Gyihova nee ye ahyehyɛdeɛ ne azo, na ɛhye ɛboa me kpole! Kɛkala menyia sunsum nu aleɛ dɔɔnwo wɔ me aneɛ nu na me nye die debiezukoalɛ nee nyianu mɔɔ me nee me mediema kɔ ye wɔ ASL (America Mumule Aneɛ) nu la anwo. Nɔhalɛ nu, menyia ɛbɛlabɔlɛ mɔɔ yɛ ahunlundwolɛ nee anyelielɛ la wɔ Gyihova, yɛ Nyamenle kpole ne ɛzonlenlɛ nu.