Boa Yɛ Neavolɛ Gyisɛse

1. Duzu a Gyihova kulo kɛ yɛyɛ ye ɛnɛ a?

ƐNƐ, Nyamenle kulo kɛ yɛbɔ Belemgbunlililɛ ne anwo edwɛkpa ne nolo wɔ azɛlɛ ye azo amuala. (Maake 13:10; 1 Tim. 2:3, 4) Gyima ɛhye le Gyihova ɛdeɛ, na kɛmɔ ɔhyia ye la ati, yekpa ye kulovolɛ Ralɛ ne kɛ ɔnlea zolɛ. Yɛbahola yɛanyia anwodozo kɛ, kɛmɔ Gyisɛse ɛlɛnea edwɛkɛhanlɛ gyima ne azo kpalɛ la ati, yɛbahola yɛawie kɛ mɔɔ Gyihova kpondɛ ye la kolaa na awieleɛ ne ara.​—Mat. 24:14.

2. Duzu a yɛbazuzu nwo wɔ edwɛkɛ ɛhye anu a?

² Wɔ edwɛkɛ ɛhye anu, yɛbanwu kɛzi Gyisɛse ɛlɛdua “akɛlɛ nɔhavo nee badwema ne” anwo zo amaa yɛ sunsum nu aleɛ na yeanlea yeamaa ye ɛdoavolɛma ayɛ edwɛkɛhanlɛ gyima kpole mɔɔ bɛlɛyɛ ye ɛnɛ la. (Mat. 24:45) Eza yɛbanwu mɔɔ yɛ nuhua ko biala bahola ayɛ aboa Gyisɛse nee ye akɛlɛ nɔhavo ne ɛnɛ la.

GYISƐSE NEA EDWƐKƐHANLƐ GYIMA NE AZO

3. Tumi boni a bɛva bɛmaa Gyisɛse a?

³ Gyisɛse ɛlɛnea edwɛkɛhanlɛ gyima ne azo. Kɛzi yɛkola yɛnwu ye zɔ ɛ? Mɔɔ ɔka ekyii Gyisɛse kɔ anwuma la, ɔ nee ye ɛdoavolɛma nɔhavoma bie yiale boka bie azo wɔ Galeli. Ɔzele bɛ kɛ: “Bɛva tumi muala bɛmaa me wɔ anwuma nee azɛlɛ ye azo.” Akee tie mɔɔ ɔhanle ɔdoale zo la: “Yemɔti, bɛhɔ, bɛyɛ maanle maanle kɔsɔɔti anu menli me ɛdoavolɛma.” (Mat. 28:18, 19) Ɔti eza bɛmaa Gyisɛse tumi kɛ ɔhile edwɛkɛhanlɛ gyima ne adenle.

4. Duzu a maa yɛdie yɛdi kɛ, Gyisɛse tɛnea edwɛkɛhanlɛ gyima ne azo a?

⁴ Gyisɛse hanle kɛ, bɛbayɛ edwɛkɛhanlɛ nee ɛdoavolɛyɛlɛ gyima ne wɔ “maanle maanle kɔsɔɔti anu,” na ɔ nee ye ɛdoavolɛma balua “dahuu kɔkpula mekɛ ɛhye awieleɛ.” (Mat. 28:20) Edwɛkɛ zɔhane mɔ kile kɛ, Gyisɛse bahɔ zo anlea edwɛkɛhanlɛ gyima ne azo too yearadwu yɛ mekɛ ye azo.

5. Kɛzi yɛlɛboa yɛamaa Edwɛne 110:3 ara nu ɛ?

⁵ Gyisɛse annyia adwenle kɛ, bie a bɛnrɛnyia gyimayɛvoma dɔɔnwo mɔɔ bayɛ gyima ne wɔ mekɛ mɔɔ li awieleɛ la anu. Ɛnee ɔze kɛ edwɛndolɛnli ne edwɛkɛ ɛhye bara nu: “Wɔ menli ne bavi bɛ ɛhulolɛ nu adu bɛ nwo amaa bɔkɔɔ wɔ kenle mɔɔ ɛbali wɔ ɛlɔnema ne anyunlu bɛahɔ konle la.” (Edw. 110:3) Saa ɛlɛyɛ edwɛkɛhanlɛ gyima ne bie a, ɛnee ɛlɛboa Gyisɛse nee akɛlɛ nɔhavo ne yɛɛ ɛlɛboa wɔamaa zɔhane ngapezo ne ara nu. Gyima ne ɛlɛkɔ ɔ nyunlu, noko yɛyia ngyegyelɛ.

6. Ngyegyelɛ ko mɔɔ Belemgbunlililɛ nolobɔlɛma yia ye ɛnɛ la a le boni?

⁶ Ngyegyelɛ ko mɔɔ Belemgbunlililɛ nolobɔlɛma yia la a le dwazotia. Kpɔkyevolɛma, ɛzonlenlɛ nu mgbanyima nee maanyɛlɛma ɛmaa menli dɔɔnwo ɛnyia yɛ gyima ne anwo adwenle ɛtane. Saa yɛ mbusuafoɔ, menli mɔɔ yɛze bɛ yɛɛ menli mɔɔ yɛ nee bɛ yɛ gyima la die adalɛ edwɛkɛ ɛhye mɔ di a, bie a bɛbatinlitinli yɛ nwo zo kɛ yɛgyakyi Gyihova ɛzonlenlɛ nee edwɛkɛhanlɛ gyima ne. Wɔ maanle bie mɔ anu, bɛdua ɛnwunlonwunlanlɛ nee mediema mɔɔ bɛkye bɛ bɛgua efiade la azo bɛdwazo bɛtia yɛ. Ɛhye ɛnzi yɛ nwo. Gyisɛse hanle kɛ: “Me duma ne ati maanle maanle kɔsɔɔti bakpɔ bɛ.” (Mat. 24:9) Ɛkpɔlɛ zɛhae mɔɔ bɛlɛfa bɛara yɛ nwo zo la maa ɔda ali kɛ Gyihova die yɛ to nu. (Mat. 5:11, 12) Abɔnsam a gyi dwazotia ɛhye anzi a. Noko Gyisɛse lɛ tumi tɛla ye! Kɛmɔ Gyisɛse ɛlɛboa yɛ la ati, yɛlɛka edwɛkpa ye yɛahile menli mɔɔ wɔ maanle maanle kɔsɔɔti anu la. Nea daselɛ bie mɔ.

7. Daselɛ boni a ɛnwu ye mɔɔ kile kɛ Yekile 14:6, 7 ɛlɛba nu a?

⁷ Kɛ Belemgbunlililɛ nolobɔlɛma la, ngyegyelɛ bieko mɔɔ yɛyia la a le aneɛ ngakyile mɔɔ menli ka la. Gyisɛse hanle ye wɔ yekile ne mɔɔ ɔvale ɔmaanle ɛzoanvolɛ Dwɔn la anu kɛ, wɔ yɛ mekɛ ye azo, edwɛkpa ne bali zɔhane ngyegyelɛ ne azo. (Kenga Yekile 14:6, 7.) Wɔ adenle boni azo? Yɛlɛboa menli dodo biala mɔɔ yɛbahola la yɛamaa bɛanyia nwolɛ adenle bɛadie Belemgbunlililɛ edwɛkɛ ne. Ɛnɛ, menli mɔɔ wɔ ewiade amuala la kola kɔ jw.org azo kɔkenga edwɛkɛ bie mɔɔ gyi Baebolo ne azo la ɔluakɛ ɔwɔ aneɛ mɔɔ bo 1,000 la anu! Neazo Eku ne maanle mediema adenle kɛ bɛhile Nyia Anyelielɛ Dahuu! buluku ne​—buluku titili mɔɔ yɛfa yɛkilehile menli yɛmaa bɛbayɛ ɛdoavolɛma la​—abo bɛhɔ aneɛ mɔɔ bo 700 la anu! Bɛdua vidio zo bɛfa sunsum nu aleɛ bɛmaa anzondilirama yɛɛ bɛyɛ mbuluku mɔɔ anyezinlirama kola kenga la bɛmaa bɛ. Yɛnwu kɛ Baebolo ngapezo ɛlɛba nu. Menli mɔɔ “bɛvi aneɛ mɔɔ maanle maanle ne mɔ ka la amuala anu la” ɛlɛsukoa kɛ bɛbaha Baebolo nu nɔhalɛ “aneɛ tagyee” ne. (Zɛk. 8:23; Zɛf. 3:9) Kɛmɔ Gyisɛse Kelaese ɛlɛnea gyima ne azo kpalɛ la ati a yɛkola yɛyɛ ɛhye mɔ amuala a.

8. Duzu a ɛvi yɛ edwɛkɛhanlɛ gyima ne anu ɛra a?

⁸ Ɛnɛ, menli mɔɔ bo 8,000,000 mɔɔ wɔ maanle 240 anu la wɔ Gyihova ahyehyɛdeɛ ne anu, na ɛvolɛ biala bɛsɔne menli apenle dɔɔnwo! Noko mɔɔ tɛla biala la a le subane ngɛnlɛma, “subane fofolɛ ne” mɔɔ ɛdoavolɛma fofolɛ ɛhye mɔ ɛnyia la na tɛ bɛ dodo ne ɔ. (Kɔl. 3:8-10) Bɛ nuhua dɔɔnwo ɛgyakyi ɛbɛlatane ɛbɔlɛ, basabasayɛlɛ, menli nwo adwenletane yɛɛ maanle nwo ɛhulolɛ. Ngapezo mɔɔ wɔ Ayezaya 2:4 la ɛlɛba nu; ‘bɛnzukoa konle ɛhonlɛ bieko.’ Kɛmɔ yɛlɛbɔ mɔdenle yɛawula subane fofolɛ ne la ati, ɔboa awie mɔ ɔmaa bɛba Nyamenle ahyehyɛdeɛ ne anu, yɛɛ yɛmaa ɔda ali kɛ yɛli yɛ neavolɛ Kelaese Gyisɛse anzi. (Dwɔn 13:35; 1 Pita 2:12) Ɛhye mɔ biala amba mgbane. Gyisɛse a ɛlɛboa yɛ a.

GYISƐSE KPALE AKƐLƐ BIE

9. Duzu a Mateyu 24:45-47 hanle kɛ ɔbazi wɔ awieleɛ mekɛ ne anu a?

⁹ Kenga Mateyu 24:45-47. Gyisɛse hanle kɛ wɔ awieleɛ mekɛ ne anu, ɔbakpa “akɛlɛ nɔhavo nee badwema” yeamaa bɛamaa ye menli sunsum nu aleɛ. Ɔti yɛ nye la kɛ zɔhane akɛlɛ ne bayɛ gyima ɛsesebɛ wɔ yɛ mekɛ ye azo. Na zɔhane ala a ɔlɛyɛ a. Yɛ neavolɛ ne ɛlɛdua mrenyia ekyi mɔɔ bɛkpokpa bɛ la anwo zo amaa Nyamenle menli ne nee anyelielɛma sunsum nu aleɛ “wɔ mekɛ kpalɛ nu.” Mrenyia ɛhye mɔ ɛmbu bɛ nwo kɛ bɛlɛ awie mɔ diedi ne azo tumi. (2 Kɔl. 1:24) Emomu bɛdie bɛto nu kɛ Gyisɛse Kelaese a le ye menli ne “adekilevolɛ nee bɛ kpanyinli” a.​—Aye. 55:4.

10. Mbuluku mɔɔ wɔ nvoninli ne anu la anu boni a boale wɔ maanle ɛvale dahuu ngoane adenle ne azo a?

¹⁰ Ɔvi 1919, akɛlɛ nɔhavo ne ɛyɛ mbuluku dɔɔnwo na yeboa anyelielɛma fofolɛ wɔ mekɛ mɔɔ limoa la yemaa bɛzukoa nɔhalɛ ne mɔɔ wɔ Nyamenle Edwɛkɛ ne anu la. Wɔ 1921, akɛlɛ ne yɛle The Harp of God buluku ne kɛ ɔfa yeaboa anyelielɛma yeamaa bɛazukoa Baebolo ne anu mɔlebɛbo ngilehilelɛ ne. Mekɛ ɛlɛkɔ la, ɔyɛle mbuluku ngakyile. Buluku boni a boale wɔ ɔmaanle ɛranwunle yɛ anwuma Selɛ ne na ɛhulole ye a? Asoo “Let God Be True,” The Truth That Leads to Eternal Life, You Can Live Forever in Paradise on Earth, Knowledge That Leads to Everlasting Life, Duzu A Baebolo Ne Kilehile Amgba A?, Duzu A Baebolo Ne Kola Kilehile Yɛ A?, anzɛɛ yɛ buluku fofolɛ kpalɛ ne, Nyia Anyelielɛ Dahuu! buluku ne ɔ? Bɛyɛle mbuluku ɛhye mɔ kɛ bɛfa bɛali ngyianlɛ fɔɔnwo bie anwo gyima na yemɔ a ɛnee yɛhyia nwo wɔ mekɛ mɔɔ bɛyele la a.

11. Duzu ati a ɔhyia kɛ yɛ muala yɛnyia sunsum nu aleɛ a?

¹¹ Tɛ anyelielɛma mɔɔ le fofolɛ la ala a hyia sunsum nu aleɛ mɔɔ anu yɛ ɛlomboɛ la a. Yɛ muala yɛhyia nwo. Ɛzoanvolɛ Pɔɔlo hɛlɛle kɛ: “Aleɛ mɔɔ anu yɛ ɛlomboɛ la wɔ ɛkɛ maa menli mɔɔ bɛnyi” la. Ɔvale ɔzɔle zolɛ kɛ, saa yɛdi sunsum nu aleɛ ɛhye a, ɔbaboa yɛ yeamaa yɛanwu “ngakyile mɔɔ wɔ kpalɛ nee ɛtane nu la.” (Hib. 5:14) Wɔ mekɛ ɛhye mɔɔ anu yɛ se la anu, ɔnla aze kɛ yɛbava Gyihova ngyinlazo ne mɔ yɛayɛ gyima, ɔluakɛ menli dɔɔnwo ɛmbɔ ɛbɛla kpalɛ. Noko Gyisɛse nea kɛ yɛbanyia sunsum nu aleɛ mɔɔ ɔbaboa yɛ yeamaa yɛ diedi nu amia la. Yɛnyia aleɛ ɛhye yɛfi Nyamenle Edwɛkɛ Baebolo ne mɔɔ bɛvale ye sunsum ne bɛhɛlɛle la anu. Gyisɛse a kile akɛlɛ ne adenle ɔmaa bɛto aleɛ ɛhye na bɛkyɛ bɛmaa yɛ a.

12. Kɛ mɔɔ Gyisɛse yɛle la, kɛzi yɛdayɛ noko yɛdi Nyamenle duma ne eni ɛ?

¹² Kɛ mɔɔ Gyisɛse yɛle la, yɛva anyunlunyia mɔɔ fɛta Nyamenle duma ne la yɛmaa ye. (Dwɔn 17:6, 26) Kɛ neazo la, wɔ 1931 yɛvale duma Gyihova Alasevolɛ mɔɔ wɔ Ngɛlɛlera ne anu la yɛdole yɛ nwo zo, na ɛhye maa ɔda ali kɛ Gyihova duma ne hyia yɛ na yɛkulo kɛ bɛfa yɛ anwuma Selɛ ne duma bɛfɛlɛ yɛ. (Aye. 43:10-12) Na ɔvi October 1931 mɔɔ ba la, Nyamenle duma ne finde Ɛzinzalɛ Arane biala mɔɔ ba la anyunlu. Eza bɛva Nyamenle duma ne bɛwula ɛleka biala mɔɔ ɔwɔ kɛ ɔfinde wɔ ye Edwɛkɛ ne anu la wɔ Ngɛlɛlera Nwuanzanwuanza​—Ewiade Fofolɛ Ngilebɛbo ne anu. Ɛhye le ngakyile fi Kilisienemaanle ne asɔne asɔne ne mɔ mɔɔ bɛye Nyamenle duma ne bɛvi bɛ Baebolo ngilebɛbo dɔɔnwo anu la anwo!

GYISƐSE KILE YE ƐDOAVOLƐMA ADENLE

13. Duzu a maa ɛdie ɛdi kɛ Gyisɛse ɛlɛfa “akɛlɛ nɔhavo nee badwema” ne ali gyima ɛnɛ a? (Dwɔn 6:68)

¹³ Gyisɛse ɛlua “akɛlɛ nɔhavo nee badwema ne” anwo zo ɛyɛ ahyehyɛdeɛ kɛnlɛma bie wɔ azɛlɛ ye azo mɔɔ ɛlɛboa amaa nɔhalɛ ɛzonlenlɛ ahɔ ɔ nyunlu a. Kɛzi ɛnwu zɔhane ahyehyɛdeɛ ne ɛ? Bie a ɛte nganeɛ kɛ ɛzoanvolɛ Pita mɔɔ hanle hilele Gyisɛse kɛ: “Nwane ɛkɛ a yɛkɔ a? Wɔmɔ a ɛlɛ edwɛkɛ mɔɔ maa dahuu ngoane a” la. (Dwɔn 6:68) Saa tɛ Gyihova ahyehyɛdeɛ ne a, anrɛɛ nienwu a yɛ nuhua biala wɔ ye ɛnɛ a? Kelaese dua ahyehyɛdeɛ ne azo ɔmaa yɛ ko yi wɔ sunsum nu. Eza ɔtete yɛ ɔmaa yɛyɛ yɛ ɛzonlenlɛ gyima ne kpalɛ. Yɛɛ ɔboa yɛ ɔmaa yɛnyia “subane fofolɛ ne” amaa yɛanyia Gyihova anyunlu ɛlolɛ.​—Ɛfɛ. 4:24.

14. Kɛzi Gyihova ahyehyɛdeɛ ne mɔɔ ɛboka nwolɛ la ɛboa wɔ wɔ COVID-19 ewulenzane ne anu ɛ?

¹⁴ Gyisɛse fa adehilelɛ mɔɔ nrɛlɛbɛ wɔ nu la maa wɔ ngyegyelɛ mekɛ nu. Nvasoɛ mɔɔ wɔ zɔhane adehilelɛ ne mɔ azo la lale ali wɔ mekɛ mɔɔ COVID-19 ewulenzane ne yele ɔ ti la. Mekɛ mɔɔ ewiade ne ɛnnwu mɔɔ bɛyɛ la, Gyisɛse nleanle kɛ yɛbanyia adehilelɛ mɔɔ nuhua la ɛkɛ la amaa yeabɔ yɛ nwo bane. Bɛmaanle yɛ anwosesebɛ kɛ saa yɛlɛkɔ menli nu a yɛwula nose mask yɛɛ yɛmmabikye menli somaa. Bɛhakyele asafo nu mgbanyima kɛ bɛda bɛvɛlɛ asafo ne anu amra amuala na bɛnwu mɔɔ bɛhyia nwolɛ wɔ nwonane nu nee sunsum nu la. (Aye. 32:1, 2) Eza yɛnyianle adehilelɛ nee anwosesebɛmaanlɛ bieko yɛvile Neazo Eku ne amaneɛbɔlɛ ne mɔ anu.

15. Adehilelɛ boni a bɛvale bɛmaanle wɔ debiezukoalɛ nee daselɛlilɛ ɛhɔlɛ nwo wɔ ewulenzane mekɛ ne anu a, na duzu a ɛvi nu ɛra a?

¹⁵ Wɔ ewulenzane mekɛ ne anu, eza yɛnyianle kɛzi yɛbayɛ debiezukoalɛ nee daselɛlilɛ gyima ne la anwo adehilelɛ mɔɔ nuhua la ɛkɛ la. Ndɛndɛ ne ala, yɛbɔle ɔ bo kɛ yɛdua videoconferencing zo yɛayɛ asafo debiezukoalɛ, maangyebakyi nee maanzinli nyianu. Eza yɛbɔle ɔ bo kɛ yɛdua ngɛlata ɛhɛlɛlɛ nee fonu zo yɛali daselɛ, ɛnee asɛɛ yemɔ ala a yɛfa yɛdi gyima a. Gyihova yilale yɛ mɔdenlebɔlɛ zo. Maanle dɔɔnwo anu nolobɔlɛma ne dodo ɛhɔ ɔ nyunlu. Nɔhalɛ nu, menli dɔɔnwo ɛnyia anwubielɛ mɔɔ maa anwosesebɛ la wɔ mekɛ ɛhye anu.​—Nea ɛlɛka, “Gyihova Yila Yɛ Edwɛkɛhanlɛ Gyima Ne Azo.”

16. Anwodozo boni a yɛbahola yɛanyia a?

¹⁶ Wɔannea a bie mɔ bade nganeɛ kɛ ahyehyɛdeɛ ne yɛle ninyɛne maanle ɔbole zo wɔ ewulenzane mekɛ ne anu. Noko mekɛ guale nu la, ɔlale ali kɛ nrɛlɛbɛ wɔ adehilelɛ mɔɔ bɛvale bɛmaanle yɛ la anu. (Mat. 11:19) Na saa yɛdwenledwenle ɛlɔlɛ adenle mɔɔ Gyisɛse ɛlɛdua zo ahile ye menli adenle la anwo a, ɔmaa yɛnyia anwodozo kɛ ɔnva nwo mɔɔ bazi kenle bie la, Gyihova nee ye kulovolɛ Ralɛ ne nee yɛ balua.​—Kenga Hibuluma 13:5, 6.

17. Kɛzi ɛte nganeɛ wɔ Gyisɛse mɔɔ ɛlɛkile yɛ adenle la anwo ɛ?

¹⁷ Ɔle nyilalɛ kpole kɛ Gyisɛse ɛlɛkile yɛ adenle la! Yɛwɔ ahyehyɛdeɛ mɔɔ amaamuo, maanle nee aneɛ ɛngola ɛmkpakyekpakye yɛ nu la anu. Yɛnyia sunsum nu aleɛ kpalɛ yɛdi yɛɛ bɛtete yɛ kpalɛ bɛmaa edwɛkɛhanlɛ gyima ne. Bɛlɛboa yɛ muala bɛamaa yɛawula subane fofolɛ ne yɛɛ yɛlɛsukoa kɛ yɛbahulo yɛ nwo ngoko. Ɔti ɔwɔ kɛ yɛmaa yɛ nye die kɛ Gyisɛse le yɛ neavolɛ la!