EDWƐKƐ 15
Duzu A Yɛsukoa Yɛfi Gyisɛse Nwanwane Ninyɛne Ne Mɔ Anu A?
“Ɔkpɔsale ɔyɛle ninyɛne mgbalɛ na ɔyɛle menli . . . ayile.”—GYI. 10:38.
EDWƐNE 13 Kelaese Yɛ Neazo Maa Yɛ
MƆƆ YƐBAZUKOAa
1. Mekɛ boni anu a Gyisɛse yɛle ye nwanwane debie mɔɔ limoa la a?
PƐ MEKƐ mɔɔ ɛnee ɛvolɛ 29 Y.M. ɛlɛkɔ awieleɛ na Gyisɛse ɛbɔ ye ɛzonlenlɛ gyima ne abo la anwo nvoninli. Ɛnee bɛlɛyɛ atɔfolɛlielɛ ɛkponledolɛ bie wɔ Kana, namule bie mɔɔ wɔ Gyisɛse sua zo Nazalɛte sɔlɔ la azo. Bɛdole ɛsalɛ bɛvɛlɛle Gyisɛse nee ye mame Mɛle yɛɛ ye ɛdoavolɛma bie mɔ. Mɛle bikye abusua zɔhane, na ɔbayɛ kɛ ɛnee ɔlɛboa yeamaa bɛanlea nyɛvolɛ ne mɔ. Noko wɔ ɛkponledolɛ ne abo, bɛyiale ngyegyelɛ bie mɔɔ anrɛɛ ɔbahola yeagua abusua ne nee agyalɛma fofolɛ ne anyunlu aze kpalɛ a—bɛ nwanye ne wiele.b Bie a nyɛvolɛ mɔɔ rale la zonle tɛla mɔɔ ɛnee bɛ nye la la. Ndɛndɛ ne ala, Mɛle hɔle ɔ ra ne anwo ɛkɛ na ɔzele ye kɛ: “Bɛnlɛ nwanye.” (Dwɔn 2:1-3) Duzu a Gyisɛse yɛle a? Ɔyɛle nwanwane debie bie—ɔhakyile nzule “nwanye kpalɛ.”—Dwɔn 2:9, 10.
2-3. (a) Kɛzi Gyisɛse vale ye tumi ne lile gyima ɛ? (b) Saa yɛsuzu nwanwane ninyɛne mɔɔ Gyisɛse yɛle la anwo a, kɛzi ɔbaboa yɛ ɛ?
2 Gyisɛse yɛle nwanwane ninyɛne gyɛne dɔɔnwo wɔ ye ɛzonlenlɛ gyima ne anu.c Ɔvale tumi mɔɔ ɔfa ɔyɛ nwanwane ninyɛne la ɔlile gyima ɔboale menli apenle dɔɔnwo. Kɛ neazo la, wɔ nwanwane ninyɛne mɔɔ ɔyɛle la anu nwiɔ anu, ɔmaanle mrenyia 5,000 aleɛ, yɛɛ mekɛ fofolɛ noko ɔmaanle mrenyia 4,000 aleɛ. Bie a ɛtia mraalɛ nee ngakula mɔɔ ɛnee wɔ ɛkɛ la ɛboka nwo a, ɔbayɛ kɛ menli mɔɔ ɔmaanle bɛ aleɛ ne la babo 27,000. (Mat. 14:15-21; 15:32-38) Wɔ mekɛ zɔhane ala anu, eza ɔyɛle menli dɔɔnwo mɔɔ ɛnde kpɔkɛ la ayile. (Mat. 14:14; 15:30, 31) Mɔɔ menli dɔɔnwo ne nwunle kɛ Gyisɛse ɛlua nwanwane adenle zo ɛyɛ bɛ ayile na yemaa bɛ aleɛ la, nea kɛzi ɔbazi bɛ nwo a!
3 Yɛbahola yɛazukoa ninyɛne dɔɔnwo yɛavi Gyisɛse nwanwane ninyɛne ne mɔ anu ɛnɛ. Wɔ edwɛkɛ ɛhye anu, yɛbazuzu kɛzi bɛbamaa yɛ diedi nu amia la anwo. Akee yɛbanwu kɛzi yɛbahola yɛazukoa mɛlɛbɛnwoaze nee ahunluyelɛyelalɛ mɔɔ Gyisɛse lale ye ali wɔ mekɛ mɔɔ ɔlɛyɛ nwanwane ninyɛne ɛhye mɔ la.
MƆƆ BƐMAA YƐNWU YE WƆ GYIHOVA NEE GYISƐSE ANWO LA
4. Nwane a Gyisɛse nwanwane ninyɛne ne mɔ mɔɔ maa yɛ diedi nu mia la maa yɛnwu ye a?
4 Gyisɛse nwanwane ninyɛne ne mɔ maa yɛnwu ɔ nee ɔ Ze anwo ninyɛne mɔɔ maa yɛ diedi nu mia a. Ɔluakɛ ɔ muala vi Gyihova ɛkɛ. Gyima ne 10:38 ka kile yɛ kɛ: “Nyamenle vale sunsum nwuanzanwuanza kpokpale ye [Gyisɛse] na ɔmaanle ye tumi, yemɔti ɔkpɔsale ɔyɛle ninyɛne mgbalɛ na ɔyɛle menli mɔɔ wɔ Abɔnsam tumi bo na bɛlɛnwu amaneɛ la kɔsɔɔti ayile, ɔluakɛ ɛnee Nyamenle nee ye lua.” Eza kakye kɛ Gyisɛse lale ɔ Ze adwenle nee kɛzi ɔte nganeɛ la ali wɔ mɔɔ ɔhanle nee mɔɔ ɔyɛle—mɔɔ ye nwanwane ninyɛne ne mɔ boka nwo la—amuala anu. (Dwɔn 14:9) Nea ninyɛne nsa mɔɔ yɛbahola yɛazukoa yɛavi ye nwanwane ninyɛne ne mɔ anu la.
5. Duzu a hanle Gyisɛse maanle ɔyɛle nwanwane ninyɛne a? (Mateyu 20:30-34)
5 Mɔɔ limoa, Gyisɛse nee ɔ Ze kulo yɛ kpalɛ. Mɔɔ Gyisɛse wɔ azɛlɛ ye azo la, ɔvale ye tumi ne ɔboale menli mɔɔ ɛlɛnwu amaneɛ la ɔvale ɔhilele kɛzi ɔkulo menli la. Kenle ko bie, anyezinlirama nwiɔ deɛdeanle nu vɛlɛle ye kɛ ɔboa bɛ. (Kenga Mateyu 20:30-34.) Yɛ ye nzonlɛ kɛ, “alɔbɔlɛ hunle Gyisɛse” na akee ɔyɛle bɛ ayile. Wɔ ɛke, Giliki yɛkpɔkɛ mɔɔ bɛhile ɔ bo kɛ “alɔbɔlɛ hunle Gyisɛse” la kile ahunluyelɛyelalɛ kpole mɔɔ awie te wɔ ye nu la. Ahunluyelɛyelalɛ kpole zɛhae mɔɔ ɛlɔlɛ a maa bɛda ye ali la a hanle Gyisɛse maanle ɔmaanle menli mɔɔ ɛhɔne ɛlɛku bɛ la aleɛ na ɔyɛle kokobɛvolɛ bie ayile a. (Mat. 15:32; Maake 1:41) Yɛbahola yɛanyia anwodozo kɛ Gyihova, “anwunvɔnezelɛ” anzɛɛ ahunluyelɛyelalɛ Nyamenle ne nee ɔ Ra ne kulo yɛ kpalɛ na saa yɛlɛnwu amaneɛ a, bɛdi nyane. (Luku 1:78; 1 Pita 5:7) Nea kɛzi bɛ nye la kɛ bɛbaye ngyegyelɛ kɔsɔɔti mɔɔ maa alesama nwu amaneɛ la bɛavi ɛkɛ a!
6. Tumi boni a Nyamenle ɛva ɛmaa Gyisɛse a?
6 Mɔɔ tɔ zo nwiɔ, Nyamenle ɛmaa Gyisɛse tumi kɛ ɔva ɔli alesama ngyegyelɛ kɔsɔɔti anwo gyima. Gyisɛse ɛlua ye nwanwane ninyɛne ne mɔ azo ɛla ye ali kɛ ɔlɛ tumi mɔɔ ɔbava yeaye ngyegyelɛ biala mɔɔ yɛdayɛ mumua ne yɛnrɛhola yɛnrɛli nwolɛ gyima la yeavi ɛkɛ a. Kɛ neazo la, ɔlɛ tumi mɔɔ ɔbava yealie yɛ yeavi debie mɔɔ maa alesama yia ngyegyelɛ la anu a. Yemɔ a le ɛtane mɔɔ bɛvale bɛwole yɛ nee mɔɔ fi nu ba, mɔɔ bie a le anwodolɛ nee ewule la. (Mat. 9:1-6; Wlo. 5:12, 18, 19) Ye nwanwane gyima ne mɔ maa yɛnwu kɛ ɔbahola yeayɛ “ewule ngakyile” ayile na yeadwazo bɛdabɛ mɔɔ bɛwu la bɔbɔ. (Mat. 4:23; Dwɔn 11:43, 44) Eza ɔlɛ tumi ɔmaa ahumu mgbole gua dii na ɔdie menli ɔfi sunsum ɛtane atisesebɛma asa anu. (Maake 4:37-39; Luku 8:2) Nea kɛzi ɔyɛ arɛlekyekyelɛ kɛ Gyihova ɛva tumi zɛhae ɛwula ɔ Ra ne asa anu a!
7-8. (a) Anwodozo boni a Gyisɛse nwanwane ninyɛne ne mɔ maa yɛnyia a? (b) Nwanwane debie boni a ɛ nye la kɛ ɔbazi wɔ ewiade fofolɛ ne mɔɔ ɛlɛba la anu a?
7 Mɔɔ tɔ zo nsa, yɛbahola yɛanyia anwodozo kɛ nyilalɛ mɔɔ yɛbanyia ye kenle bie wɔ Nyamenle Belemgbunlililɛ ne abo la bara nu. Nwanwane ninyɛne mɔɔ Gyisɛse yɛle ye wɔ azɛlɛ ye azo la kilehile yɛ kɛ ɔbayɛ dɔɔnwo wɔ ewiade amuala wɔ mekɛ mɔɔ ɔlɛdi tumi wɔ anwuma kɛ Nyamenle Belemgbunlililɛ ne azo Belemgbunli la. Suzu mɔɔ ɔnrɛhyɛ yɛbanyia ye wɔ Kelaese tumililɛ ne abo la anwo. Yɛbanyia kpɔkɛdelɛ kpalɛ, ɔluakɛ ɔbaye anwodolɛ nee ewule biala mɔɔ ɛmaa alesama ɛnwu amaneɛ la yeavi ɛkɛ. (Aye. 33:24; 35:5, 6; Yek. 21:3, 4) Ɛhɔne ɛnrɛhu yɛ ɛlɛ yɛɛ esiane biala ɛnrɛmaa yɛnrɛnwu amaneɛ. (Aye. 25:6; Maake 4:41) Saa bɛdwazo yɛ alɔvolɛ bɛfi “ngakyelɛ nla ne mɔ anu” a, yɛ nye balie kpole. (Dwɔn 5:28, 29) Nwanwane debie titili boni a ɛ nye la kɛ ɔbazi wɔ ewiade fofolɛ ne mɔɔ ɛlɛba la anu a?
8 Mɔɔ Gyisɛse ɛlɛyɛ ye nwanwane ninyɛne ne mɔ la, ɔlale mɛlɛbɛnwoaze nee ahunluyelɛyelalɛ kpole ali, na ɛhye mɔ le subane mɔɔ ɔwɔ kɛ yɛbɔ mɔdenle yɛsukoa a. Maa yɛzuzu neazo nwiɔ anwo. Yɛbɔ ɔ bo wɔ Kana atɔfolɛlielɛ ɛkponledolɛ edwɛkɛ ne azo.
MƐLƐBƐNWOAZE NWO ƐZUKOALƐDEƐ
9. Duzu a Gyisɛse yɛle wɔ atɔfolɛlielɛ ɛkponledolɛ bie abo a? (Dwɔn 2:6-10)
9 Kenga Dwɔn 2:6-10. Mɔɔ nwanye ne wiele ɛkponledolɛ ne abo la, asoo ɛnee ɔle Gyisɛse ɛzonlelilɛ kɛ ɔbayɛ nwolɛ debie ɔ? Kyɛkyɛ. Ngapezo biala ɛngile kɛ Mɛzaya ne balua nwanwane adenle zo ayɛ nwanye. Noko saa ɛdawɔ a nza ɛwie wɔ wɔ atɔfolɛlielɛ bo a, anrɛɛ nea kɛzi ɛbade nganeɛ la. Ɔbayɛ kɛ Gyisɛse akunlu yelɛyelale ye maanle abusua ne, titili agyalɛma fofolɛ ne na ɛnee ɔngulo kɛ bɛ nyunlu gua aze. Ɔti kɛ mɔɔ yɛlimoale yɛhanle la, ɔyɛle nwanwane debie. Ɔhakyile nzule mɔɔ ɔbayɛ kɛ galɔn 103 la nwanye kpalɛ. Ɔbayɛ kɛ ɔyɛle nza ne dɔɔnwo amaa bie aha na bɛava bɛali gyima kenle bie anzɛɛ bie a bɛadɔne bie amaa agyalɛma ne anyia ezukoa dɔɔnwo. Nea kɛzi agyalɛma fofolɛ ne ahonle badɔ bɛ azule nu a!
Sukoa Gyisɛse, mmafa mɔɔ wɔhola wɔyɛ la ɛtu ɛ nloa anu (Nea ɛdendɛkpunli 10-11)e
10. Edwɛkɛ titili boni mɔ a wɔ Dwɔn tile 2 ne anu a? (Eza nea nvoninli ne.)
10 Suzu edwɛkɛ titili bie mɔ mɔɔ wɔ Dwɔn tile 2 ne anu la anwo. Ɛyɛle ye nzonlɛ kɛ tɛ Gyisɛse mumua ne a sesale nzule guale mbuakɛ ne mɔ anu ɔ? Amaa Gyisɛse andwe adwenle amba ɔ nwo zo la, ɔzele sonvolɛma ne kɛ bɛsesa nzule bɛgua mbuakɛ ne anu. (Ngyehyɛnu 6, 7) Mɔɔ Gyisɛse hakyile nzule ne nwanye wiele la, ɔdaye mumua ne yeanza bie yeangɔmaa ahenle mɔɔ ɛlɛnea atɔfolɛlielɛ ne azo la. Emomu, ɔhanle kɛ sonvolɛma ne ɛza bie ɛhɔmaa ye. (Ngyɛnu 8) Gyisɛse anva kanrɛlɛ anza bie ammaa ye zo wɔ nyɛvolɛ ne mɔ anyunlu andu ɔ nloa nu anga kɛ, ‘Bɛzɔ nwanye ne mɔɔ meyɛ ye kɛkala la bie bɛnlea!’
11. Duzu a yɛsukoa yɛfi nwanwane debie ɛhye mɔɔ Gyisɛse yɛle la anu a?
11 Duzu a yɛsukoa yɛfi nu a? Mɛlɛbɛnwoaze ɔ. Gyisɛse anva mɔɔ ɔyɛle la andu ɔ nloa anu; nɔhalɛ nu, yeanva debie biala mɔɔ ɔyɛle la yeandu ɔ nloa anu ɛlɛ. Emomu ɔbɛlɛle ɔ nwo aze ɔvale anyunlunyia nee nganvolɛ ne ɔmaanle ɔ Ze dahuu. (Dwɔn 5:19, 30; 8:28) Saa yɛsukoa Gyisɛse na yɛkɔ zo yɛbɛlɛ yɛ nwo aze a, ɔnrɛmaa yɛnrɛva debie biala mɔɔ yɛhola yɛyɛ la yɛnrɛdu yɛ nloa anu. Ɔnle kɛ yɛfa biala mɔɔ yɛkola yɛyɛ wɔ Gyihova ɛzonlenlɛ nu la yɛtu yɛ nloa anu, emomu ɔwɔ kɛ yɛfa Nyamenle mɔɔ yɛnyia nwolɛ adenle yɛlɛsonle ye la a yɛtu yɛ nloa anu a. (Gyɛ. 9:23, 24) Ɔwɔ kɛ yɛfa enililɛ mɔɔ fɛta ye la yɛmaa ye. Ɔluakɛ saa tɛ Gyihova moalɛ a, anrɛɛ debie kpalɛ boni a yɛbahola yɛayɛ a?—1 Kɔl. 1:26-31.
12. Adenle bieko mɔɔ yɛbahola yɛalua zo yɛazukoa Gyisɛse mɛlɛbɛnwoaze ne la a le boni? Maa neazo.
12 Nea adenle bieko mɔɔ yɛbahola yɛalua zo yɛazukoa Gyisɛse mɛlɛbɛnwoaze ne la. Pɛ tɛnlabelɛ ɛhye anwo nvoninli: Asafo nu kpanyinli bie vale mekɛ dɔɔnwo boale asafo nu sonvolɛ bie maanle ɔzieziele ye bagua nu ɛdendɛlɛ mɔɔ limoa la. Ɛhye maanle asafo nu sonvolɛ ne maanle ɛdendɛlɛ mɔɔ maa anwosesebɛ la na asafo ne amuala anye liele nwo. Mɔɔ bɛkpɔnenle debiezukoalɛ la, awie rale asafo nu kpanyinli ne ɛkɛ na ɔhanle kɛ: ‘Adiema Asomasi maanle ɛdendɛlɛ ne kɛnlɛma, ɔnle zɔ ɔ?’ Asoo ɔhyia kɛ asafo nu kpanyinli ne ka kɛ: ‘Ɔle zɔ, noko menvale mekɛ dɔɔnwo a memboale ye a’ ɔ? Anzɛɛ ɔwɔ kɛ ɔfi mɛlɛbɛnwoaze nu ɔka kɛ: ‘Amgba, ɔmaanle ye kɛnlɛma. Yemaa me nye ɛlie kpole’ ɔ? Saa yɛbɛlɛ yɛ nwo aze a, ɔnle kɛ yɛdie ninyɛne mgbalɛ mɔɔ yɛyɛ yɛmaa awie mɔ la anwo nganvolɛ yɛmaa yɛ nwo. Yɛ kunlu dwo yɛ nwo ɔluakɛ yɛze kɛ Gyihova nwu mɔɔ yɛyɛ la yɛɛ ɔ nye sɔ ye. (Fa toto Mateyu 6:2-4 anwo; Hib. 13:16) Saa yɛsukoa Gyisɛse na yɛbɛlɛ yɛ nwo aze a, ɔmaa Gyihova anye die yɛ nwo.—1 Pita 5:6.
AHUNLUYELƐYELALƐ NWO ƐZUKOALƐDEƐ
13. Mɔɔ Gyisɛse ɛlɛbikye Neeyen la, duzu a ɔnwunle ye a, na duzu a ɔyɛle ye wɔ nwolɛ a? (Luku 7:11-15)
13 Kenga Luku 7:11-15. Pɛ deɛ ɛhye mɔɔ hɔle zo wɔ mekɛ mɔɔ ɛnee Gyisɛse ɛyɛ ye ɛzonlenlɛ gyima ne ɛvolɛ ko siane nsia la anwo nvoninli. Ɔhɔle Galeli suakpole bie mɔɔ bɛfɛlɛ ye Neeyen la azo; ɔvi ɛkɛ ne mɔɔ kɔ Hyunɛm, ɛleka mɔɔ ngapezonli Yilaehya dwazole raalɛ bie ara nrenyia wɔ ɛvolɛ 900 mɔɔ ɛpɛ nu la anwa. (2 Arl. 4:32-37) Mɔɔ Gyisɛse bikyele sua ne anlenkɛ kpole ne anloa la, ɔnwunle menli bie mɔɔ bɛlɛkɔ bɛahɔzie awie la. Edwɛkɛ ne yɛ alɔbɔlɛ kpalɛ ɔluakɛ ɛnee kunlavolɛ raalɛ bie ara kokye mɔɔ ɔlɛ ye la a ɛwu a. Noko tɛ kunlavolɛ ne angomekye a ɛnee lua a; ɛnee menli dɔɔnwo mɔɔ vi suakpole ne azo la nee raalɛ ne lua. Gyisɛse maanle menli mɔɔ ɛlɛkɔ ahɔzie funli ne la gyinlanle na ɔyɛle debie mɔɔ yɛ nwanwane la ɔmaanle raalɛ ɛhye mɔɔ ɛlɛdi nyane la—ɔdwazole ɔ ra nrenyia ne! Ɛhye a le menli nsa mɔɔ Gyisɛse dwazole bɛ mɔɔ bɛhanle nwolɛ edwɛkɛ wɔ Edwɛkpa ne anu la anu mɔɔ limoa a.
Dimoa tudu agyakɛ da ahunluyelɛyelalɛ ali kile menli mɔɔ bɛ awie ɛwu la fa sukoa Gyisɛse (Nea ɛdendɛkpunli 14-16)
14. Edwɛkɛ titili boni mɔ a wɔ Luku tile 7 ne anu a? (Eza nea nvoninli ne.)
14 Suzu edwɛkɛ bie mɔɔ anwo hyia mɔɔ wɔ Luku tile 7 ne anu la anwo. Ɛyɛle ye nzonlɛ kɛ Gyisɛse “nwunle” raalɛ ne mɔɔ ɛlɛdi nyane la na “ɔ nwo yɛle ye alɔbɔlɛ” ɔ? (Ngyɛnu 13) Ɔti ɔbayɛ kɛ Gyisɛse nwunle kɛ ɔli ɔ ra ne funli ne anyunlu ɔlɛsu na ɛhye maanle ɔ kunlu yelɛyelale ye maanle raalɛ ne. Raalɛ ne anwo anyɛ Gyisɛse alɔbɔlɛ ala; emomu ɔlale ahunluyelɛyelalɛ ali ɔhilele ye. Ɔ nee ye dendɛle, bie a ɔdendɛle wɔ adenle mɔɔ ɔbamaa ɔ rɛle akyekye la azo, na ɔhanle kɛ: “Mmasu ko.” Akee ɔyɛle debie ɔboale ye. Ɔdwazole kpavolɛ ne na ‘ɔvale ye ɔmaanle ye mame.’—Ngyehyɛnu 14, 15.
15. Duzu a yɛsukoa yɛfi nwanwane debie mɔɔ Gyisɛse yɛle la anu a?
15 Duzu a yɛsukoa yɛfi nwanwane adenle mɔɔ Gyisɛse luale zo dwazole kunlavolɛ raalɛ ne ara nrenyia ne la anu a? Yɛnwu kɛ ɔwɔ kɛ yɛmaa yɛ kunlu yelɛyela yɛ maa menli mɔɔ ɛlɛdi alɔbɔlɛ la. Nɔhalɛ nu, yɛnrɛhola yɛnrɛdwazo mowuamra kɛ Gyisɛse la. Noko saa yɛgua yɛ nye aze a, yɛbanwu bɛdabɛ mɔɔ bɛlɛdi alɔbɔlɛ la na yɛala ahunluyelɛyelalɛ ali yɛahile bɛ kɛ mɔɔ Gyisɛse yɛle la. Yɛbahola yɛalimoa yɛadudu agyakɛ yɛayɛ mɔɔ yɛbahola anzɛɛ yɛaha edwɛkɛ bie mɔɔ baboa bɛ na yeakyekye bɛ rɛle la yɛava yɛala ahunluyelɛyelalɛ ali.d (Mrɛ. 17:17; 2 Kɔl. 1:3, 4; 1 Pita 3:8) Edwɛkɛ sikalɛ nee ninyɛne ngyikyi mɔɔ yɛbayɛ bɔbɔ la bahola akyekye bɛ rɛle.
16. Kɛ mɔɔ ɛnwu ye wɔ nvoninli ne anu la, duzu a ɛsukoa ɛfi ɛrɛladane bie mɔɔ ɔ ra wule kenlensa ye la anwubielɛ ne anu a?
16 Tie anwubielɛ bie. Ɛvolɛ bie mɔɔ ɛraze ɛhɔ la, ɛnee bɛlɛto edwɛne wɔ debiezukoalɛ bo na adiema raalɛ bie nwunle ɛrɛladane bie mɔɔ ɛnee ɔlɛsu wɔ alienwo lɔ la. Ɛnee edwɛne ne fale ewudwazo nwo anyelazo ne anwo na ɛnee ɛrɛladane zɔhane ara raalɛ wule la ɛtɛkyɛle. Mɔɔ adiema raalɛ ne nwunle ɛhye la, ɔhɔle ɔ nwo ɛkɛ ne ndɛndɛ, ɔvale ɔ sa ɔdole ɔ kɔme na ɔ nee ye bɔle nu dole edwɛne ne mɔɔ ɛha la. Nzinlii ɛrɛladane ne hanle kɛ: “Ɛhye maanle mengulole mediema ne mɔ kpalɛ.” Ɔ nye liele kpole kɛ ɔhɔle debiezukoalɛ la. Ɔhanle kɛ: “Belemgbunlililɛ Asalo ɛkɛ ne a yɛnyia moalɛ a.” Yɛbahola yɛanyia anwodozo kɛ Gyihova nwu ninyɛne ngyikyi bɔbɔ mɔɔ yɛyɛ yɛda ahunluyelɛyelalɛ ali yɛkile menli mɔɔ bɛ awie ɛwu na “bɛ sa nu ɛdo la” na ɔ nye sɔ ye.—Edw. 34:18.
DEBIE MƆƆ ƐBAHOLA WƆAZUKOA
17. Duzu a yɛzukoa wɔ edwɛkɛ ɛhye anu a?
17 Saa yɛsukoa mɔɔ Gyisɛse yɛle la anwo debie a, ɔbahola yeamaa yɛ anwosesebɛ kpalɛ. Bɛmaa yɛnwu kɛ Gyihova nee Gyisɛse kulo yɛ kpalɛ, yɛɛ Gyisɛse lɛ tumi mɔɔ ɔbava yeali alesama ngyegyelɛ kɔsɔɔti anwo gyima a. Yɛbahola yɛanyia anwodozo bɔkɔɔ wɔ nyilalɛ mɔɔ ɔnrɛhyɛ Belemgbunlililɛ ne bamaa yɛanyia la anu. Mɔɔ yɛlɛsukoa edwɛkɛ ɛhye mɔ la, yɛbahola yɛadwenledwenle ndenle mɔɔ yɛbalua zo yɛazukoa Gyisɛse subane ne mɔ la anwo. Sukoa Gyisɛse nwanwane ninyɛne mɔɔ ɛha la anwo debie wɔ ɛ ti anwo debiezukoalɛ nu anzɛɛ Abusua Ɛzonlenlɛ bo. Nea ninyɛne mɔɔ ɛbahola wɔazukoa wɔavi nu la na akee ka mɔɔ ɛbazukoa la anwo edwɛkɛ kile awie mɔ. Saa ɛyɛ ye zɔ a, ɔbamaa bɛahola bɛabɔ adawu mɔɔ maa anwosesebɛ la!—Wlo. 1:11, 12.
18. Duzu a yɛbazuzu nwo wɔ edwɛkɛ bieko anu a?
18 Mɔɔ Gyisɛse ɛzonlenlɛ gyima ne ɛlɛkɔ ye awieleɛ la, ɔdwazole awie mɔɔ tɔ zolɛ nsa la, na yemɔ a le awie mɔɔ li awieleɛ mɔɔ ɔdwazole ye a. Noko ɛhye le ngakyile—ɔdwazole ɔ gɔnwo kpalɛ bie, na ɔyɛle ye zɔ wɔ tɛnlabelɛ mɔɔ le ngakyile la anu. Duzu a yɛsukoa yɛfi nwanwane deɛ ɛhye mɔɔ wɔ Edwɛkpa ne anu la anu a? Na kɛ ɔkɛyɛ na yɛamia diedi mɔɔ yɛlɛ wɔ ewudwazo ne anu la anu ɛ? Edwɛkɛ bieko bahilehile kpuya ɛhye mɔ anu.
EDWƐNE 20 Ɛvale Ɛ Ra Ne Mɔɔ Sonle Bolɛ La Ɛmaanle
a Ɔmaanle ahumu kpole bie guale dii, ɔyɛle wuliravolɛma ayile na ɔdwazole menli mɔɔ ɛwu la. Saa ɛkenga nwanwane ninyɛne mɔɔ Gyisɛse yɛle la anwo debie a, ɔyɛ anyelielɛ kpalɛ! Bɛangɛlɛ nwanwane ninyɛne zɔhane mɔ wɔ Baebolo ne anu kɛ yɛva yɛlielie yɛ nye, emomu kɛ bɛfa bɛahilehile yɛ. Mekɛ mɔɔ yɛlɛsuzu bie mɔ anwo la, yɛbanwu Gyihova nee Gyisɛse anwo ninyɛne mɔɔ maa yɛ diedi nu mia, yɛɛ yɛbanwu subane ngɛnlɛma mɔɔ ɔwɔ kɛ yɛsukoa la.
b Baebolo nwo abɔlɔba bie hanle kɛ: “Ɛnee menli mɔɔ wɔ Aduduleɛ nehane la bu nyɛvolɛlielɛ kɛ ɔle gyima nwuanzanwuanza na ɛnee bɛbu ye kɛ ɔnle kpalɛ kɛ ɛbava aleɛ mɔɔ ɛsuzu kɛ ɔbaza nyɛvolɛ ne mɔ la ala wɔamaa bɛ. Saa ɛbahile kɛ ɛdie nyɛvolɛ kpalɛ, titili wɔ atɔfolɛlielɛ ɛkponledolɛ bo a, ɛnee ɔwɔ kɛ ɛfa aleɛ mɔɔ ɔbabo menli mɔɔ rale la anwo zo la ɛmaa bɛ.”
c Edwɛkpa ne ka Gyisɛse nwanwane ninyɛne fɔɔnwo mɔɔ bo 30 la anwo edwɛkɛ. Yɛɛ ɔyɛ a bɛka nwanwane ninyɛne gyɛne ngakyile mɔɔ ɔyɛle la bɛbɔ nuhua ko bɛka nwolɛ edwɛkɛ. Kenle ko bie, ‘sua bie azo amra amuala’ rale ɔ nwo ɛkɛ na “ɔyɛle bɛdabɛ mɔɔ ewule ngakyile wɔ bɛ nwo la ayile.”—Maake 1:32-34.
d Saa ɛkpondɛ edwɛkɛ mɔɔ ɛbahola wɔaha anzɛɛ debie mɔɔ ɛbayɛ wɔakyekye awie mɔɔ ɛlɛdi nyane la arɛle la anwo nzuzulɛ a, nea edwɛkɛ “Comfort the Bereaved, as Jesus Did,” mɔɔ wɔ November 1, 2010, The Watchtower ne anu la.
e NVONINLI NE ANWO NGILENU: Gyisɛse gyi ɔ nzi nehane na agyalɛma ne nee bɛ nyɛvolɛ ne mɔ ɛlɛno nwanye kpalɛ ne bie.