Nwu Kɛzi Ɔwɔ Kɛ Ɛbua Edwɛkɛ La

KPUYIA bie mɔ le kɛ ahule la. Kyesɛ ɛkpɔlɔ na wɔanwu mɔɔ wɔ nu la. Adwenle mɔɔ ɔti bɛbiza kpuyia la hyia tɛla kpuyia mumua ne.

Saa bizavolɛ ne anye ɛbolo kɛ ɔkpondɛ mualɛ ne bɔbɔ a, ɛnwu edwɛkɛ dodo mɔɔ ɔwɔ kɛ ɛka nee adenle mɔɔ ɔwɔ kɛ ɛfa zo ɛdi nwolɛ gyima la a, ɛbanwu kɛzi ɔwɔ kɛ ɛbua ye la. (Dwɔn 16:12) Kɛmɔ Gyisɛse manle ye ɛdoavolɛma ne nwunle ye la, wɔ tɛnlabelɛ bie mɔ anu, bie a awie babiza edwɛkɛ mɔɔ ɔngyia kɛ ɔnwu nwolɛ mualɛ ne anzɛɛ ɔnrɛboa ye la.​—Gyi. 1:6, 7.

Ngɛlɛlera ne tu yɛ folɛ kɛ: “Bɛmaa bɛ nloa edwɛkɛ ɛyɛ fɛ na ɔyɛ anyelielɛ, na bɛnwu nyelebɛnloa kpalɛ mɔɔ ɔwɔ kɛ bɛfa bɛye awie biala edwɛkɛ nloa la.” (Kɔl. 4:6) Ɛhye ati, kolaa na yɛabua edwɛkɛ la, ɔwɔ kɛ yɛsuzu mɔɔ yɛbaha nee kɛzi yɛbaha ye la anwo.

Nwu Bizavolɛ Ne Adwenle

Sadusiima ne bɔle mɔdenle kɛ bɛdua raalɛ bie mɔɔ hɔle agyalɛ fane dɔɔnwo la ewudwazo ne azo bɛado Gyisɛse agyiba. Noko ɛnee Gyisɛse ze kɛ bɛnlie ewudwazo ne bɛnli. Yemɔti ɔlile adwenle mɔɔ ɛndenrɛ mɔɔ bɛlɛ mɔɔ ɔmanle bɛbizale zɔhane kpuyia ne la anwo gyima wɔ ye mualɛ ne anu. Gyisɛse gyinlanle Ngɛlɛlera ne anu edwɛkɛ mɔɔ bɛze ye la azo ɔ nee bɛ zuzule edwɛkɛ nwo wɔ adenle kɛnlɛma zo, ɔhwenle adwenle ɔhɔle debie mɔɔ ɛnee bɛtɛsuzule nwolɛ ɛlɛ la azo​—daselɛ wienyi mɔɔ kile kɛ Nyamenle badwazo mɔwuamra la. Ye mualɛ ne zinle ye dwazotiama ne anwo kpalɛ yemɔti bɛzulole kɛ bɛbabiza ye kpuyia bieko.​—Luku 20:27-40.

Amaa wɔanwu kɛzi ɔwɔ kɛ ɛbua edwɛkɛ la, ɔwɔ kɛ ɛdawɔ noko ɛnwu bizavolɛma ne adwenle nee deɛmɔti bɛlɛbiza wɔ la. Kɛ neazo la, bie a awie mɔɔ ɛ nee ye kɔ sukulu anzɛɛ ɛ nee ye wɔ gyima nu la babiza wɔ deɛmɔti ɛnli Bolonyia la. Duzu ati a ɔlɛbiza a? Asoo ɔkulo kɛ ɔnwu deɛmɔti ɔle zɔ la amgba, anzɛɛ ɔngola ɔnwu ye saa bɛmaa wɔ adenle bɛmaa ɛdie ɛ nye a? Amaa wɔanwu ye la, ɛbahola wɔabiza ye deɛmɔti ɔlɛbiza zɔhane kpuyia ne la. Akee nea nwolɛ bua ye. Eza ɛbahola wɔamaa bɛanwu kɛzi bɛfa Baebolo adehilelɛ bɛdi gyima a ɔbɔ bɛ nwo bane wɔ ɛnwomenlelielɛ zɔhane mɔ anu ninyɛne bie mɔ mɔɔ gyegye menli na yeyɛ adesoa yemaa bɛ anwo la.

Fa ye kɛ bɛse ɛha Gyihova Alasevolɛ anwo edwɛkɛ ɛhile sukoavoma ekpunli bie. Bie a ɛka wɔ edwɛkɛ ne ɛwie a, bɛbabiza wɔ kpuyia. Saa bɛfa adwenle kpalɛ bɛbiza na nuhua la ɛkɛ a, ɔle kpalɛ kɛ ɛbabua bɛ wɔ adenle sikalɛ zo. Saa kpuyia ne fane adwenle ɛtane mɔɔ menli lɛ wɔ Gyihova Alasevolɛ anwo la anwo a, ɔbayɛ kpalɛ kɛ ɛbava edwɛkɛ sikalɛ bie mɔɔ ɔbahola yeaye adwenle ɛtane mɔɔ bɛlɛ, nee deɛmɔti bɛfa Baebolo ngyinlazo bɛdi gyima la wɔabɔ ɔ bo. Mekɛ dɔɔnwo ne ala, ɔbayɛ kpalɛ kɛ ɛbanwu kpuyia ɛhye mɔ kɛ ɔhyia na ɔnle ngyegyelɛ​—ɔnva nwo kɛ bɛbizale ye wɔ adenle zɔhane azo la. Yemɔti, wɔ mualɛ ne bamaa wɔanyia adenle wɔabuke wɔ tievolɛma adwenle nu, wɔaha nɔhalɛ edwɛkɛ wɔahile bɛ, na wɔahilehile Ngɛlɛlera mɔɔ yɛ diedi ne mɔ gyi zo la anu.

Kɛzi ɛbayɛ wɔ nyɛleɛ wɔ mekɛ mɔɔ gyima menle bie ɛnlie ɛndo nu kɛ ɔbamaa wɔ adenle yeamaa wɔahɔ nyianu bie la ɛ? Mɔɔ lumua, suzu kɛzi ɔdwenle ninyɛne nwo la anwo. Saa ɛka ɛkile ye kɛ ɛkɔ ɛba a ɛbava mekɛ gyɛne wɔayɛ gyima ne bie wɔazie nu a ɔbayɛ boɛ ɔ? Saa ɛkile nuhua ɛkile ye kɛ adehilelɛ mɔɔ bɛfa bɛmaa yɛ wɔ nyianu bo la boa yɛ maa yɛdi nɔhalɛ, ɔmaa bɛkola bɛfa bɛ nwo bɛto yɛ nwo zo a, bie a ɔbade ɔ bo ɔ? Saa ɛmaa ɔnwu kɛ ɛdwenle ɔ nwo a, bie a ɔdaye noko ɔbazuzu ninyɛne mɔɔ hyia wɔ wɔ ɛbɛlabɔlɛ nu la anwo. Na saa ɔkulo kɛ ɛyɛ debie mɔɔ ɔngile nɔhalɛlilɛ la noko ɛ? Saa ɛfa Ngɛlɛlera ne anu edwɛkɛ bie ɛsi wɔ ɛdeɛ ne azo wienyi kɛ ɛnrɛyɛ a, ɔbamaa yeanwu wɔ gyinlabelɛ. Noko saa ɛdumua ɛ nee ye suzu nwolɛ kɛ awie mɔɔ ɔdie ɔto nuhua kɛ ɔbabɔ adalɛ anzɛɛ ɔbawua debie yeamaa ye la eza bahola abɔ adalɛ ahile ye anzɛɛ awua ye a, ɔbaboa ɔ?

Eza bie a ɛle sukoavo mɔɔ ɛngulo kɛ ɛfa ɛ nwo ɛwula sukulu nu ninyɛne bie mɔ mɔɔ ɔngyi ngɛlɛlera ne azo la anu. Kakye kɛ bie a kilehilevolɛ ne ɛnze wɔ diedi, na ɔle ye ɛzonlelilɛ kɛ ɔbamaa ngakula ne mɔ abɔ ɛbɛla kpalɛ wɔ sukulu ɛkɛ. Ngyegyelɛ mɔɔ ɔwɔ kɛ ɛdi nwolɛ gyima la a le kɛ (1) ɛbabu mɔɔ ɔka la, (2) ɛbava ɛbulɛ wɔahilehile wɔ gyinlabelɛ ne anu, yɛɛ (3) ɛbagyinla kpundii wɔ mɔɔ ɛze kɛ ɔbazɔ Gyihova anye la anu. Amaa nvasoɛ dɔɔnwo ara zo la, saa ɛka wɔ diedi ne anwo edwɛkɛ fɔɔnwo a, ɛtɛwiele. (Mrɛ. 15:28) Saa ɛle kakula a, ye biala anu wɔ awovolɛ baboa wɔ bɛamaa wɔaziezie edwɛkɛ mɔɔ ɛbaha la.

Ɔdwu mekɛ ne bie a ɔwɔ kɛ ɛbɔ edwɛkɛ mɔɔ kpanyinli bie ɛva ɛdo ɛ nwo zo la ɛgua. Bie a kpolisi kpanyinli, arane kpanyinli, anzɛɛ ndɛnebuavolɛ bie baha kɛ ɛbua kpuyia mɔɔ fane mɛla titile bie mɔɔ bɛdi zo, wɔ gyinlabelɛ kɛ Keleseɛnenli mɔɔ ɛnle afoa biala, anzɛɛ wɔ nyɛleɛ wɔ maanle ɛvoyialilɛ nwo. Kɛzi ɔwɔ kɛ ɛbua ɛ? Baebolo ne tu yɛ folɛ kɛ ‘yɛva bɛtɛɛyɛlɛ.’ (1 Pita 3:15, 16) Eza biza ɛ nwo deɛmɔti edwɛkɛ ɛhye mɔ hyia bɛ la, na fi ɛbulɛ nu te bɛ edwɛkɛ ne abo. Boni bieko a ɛha a? Ɛzoanvolɛ Pɔɔlo hwenle adwenle hɔle adenle mɔɔ Wulomu mɛla ne maa ɔnyia la azo, yemɔti ɛbahola wɔahwe adwenle wɔahɔ mɛla bie mɔɔ fane wɔ edwɛkɛ ne anwo la azo. (Gyi. 22:25-29) Bie a ɛka kpɔkɛ mɔɔ alumua Keleseɛnema ne zile nee mɔɔ Gyihova Alasevolɛ mɔɔ bɛwɔ ewiade amuala la ɛyɛ la anwo edwɛkɛ a, ɔbamaa kpanyinli ne ade ɔ bo kpalɛ. Anzɛɛ ɛbahola wɔaha kɛzi Nyamenle tumililɛ ne mɔɔ yɛbu ye la boa menli ɔmaa bɛdi sonla mɛla mɔɔ ɔle kpalɛ azo la. (Wulo. 13:1-14) Mekɛ mɔɔ wɔhilehile edwɛkɛ nu wɔ adenle zɛhae azo wɔwie la, bie a ɔbamaa bɛadie Ngɛlɛlera ne anu edwɛkɛ mɔɔ ɛbava wɔahilehile wɔ diedi ne anu la kpalɛ.

Kɛzi Bizavolɛ Ne Bu Ngɛlɛlera Ne La

Saa ɛlɛdwenle kɛzi ɛbabua edwɛkɛ la anwo a, ɔwɔ kɛ ɛsuzu adwenle mɔɔ bizavolɛ ne lɛ wɔ Ngɛlɛlera Nwuanzanwuanza ne anwo la anwo. Gyisɛse yɛle ɛhye wɔ mekɛ mɔɔ ɔlɛbua Sadusiima kpuyia mɔɔ fane ewudwazo ne anwo la. Ɛnee Gyisɛse ze kɛ Mosisi ngɛlɛlera ne angome a bɛdie bɛdi a, yemɔti ɔ nee bɛ zuzule edwɛkɛ bie mɔɔ wɔ Mosisi ngɛlɛlera ne anu la anwo na ɔbɔle ye edwɛkɛ ne abo kɛ: “Mosisi noko kile nu wienyi kɛ bɛdwazo mɔwuamra bɛba ngoane nu.” (Luku 20:37) Bie a ɔbayɛ kpalɛ kɛ ɛbakpa Baebolo ne anu edwɛkɛ bie mɔɔ wɔ tievolɛ ne die to nu na ɔze ye kpalɛ la.

Na saa wɔ tievolɛ ne ɛmbu Baebolo ne kɛ tumi wɔ nu ɛ? Yɛ mɔɔ ɛzoanvolɛ Pɔɔlo yɛle wɔ ye ɛdendɛlɛ nu wɔ Alɛyɔpagɛse, kɛmɔ bɛhɛlɛ ye wɔ Gyima ne 17:22-31 la nzonlɛ. Ɔhanle Ngɛlɛlera ne anu nɔhalɛ edwɛkɛ ne ɔhilele bɛ mɔɔ yeanva edwɛkɛ ne yeanvi Baebolo ne anu fɔɔnwo a. Saa ɔhyia kɛ ɛyɛ ye zɔ a, ɛbahola wɔayɛ. Wɔ ɛleka bie mɔ, bie a ɔwɔ kɛ ɛ nee awie bɔ adawu fane dɔɔnwo kolaa na wɔaha Baebolo ne anu edwɛkɛ fɔɔnwo wɔahile ye. Saa ɛka Baebolo ne anwo edwɛkɛ a, bie a nrɛlɛbɛ wɔ nu kɛ ɛbalumua wɔaha deɛmɔti ɔhyia kɛ ɔsuzu nwo la tɛla kɛ ɛbaha ye kyengye kɛ ɔle Nyamenle Edwɛkɛ. Noko ɔwɔ kɛ ɛfa ɛyɛ wɔ bodane kɛ ɛdi Nyamenle bodane ne anwo daselɛ wienyi na mekɛ ɛlɛkɔ la wɔamaa wɔ tievolɛ mumua ne anwu mɔɔ Baebolo ne ka la. Baebolo ne maa menli adwenle kakyi kpalɛ tɛla edwɛkɛ biala mɔɔ yɛbaha la.​—Hib. 4:12.

“Bɛmaa Bɛ Nloa Edwɛkɛ Ɛyɛ Fɛ”

Nea kɛzi ɔle kpalɛ kɛ bɛha bɛhile Gyihova, mɔɔ le dovolɛ la azonvolɛ kɛ “bɛmaa bɛ nloa edwɛkɛ ɛyɛ fɛ na ɔyɛ anyelielɛ” a! (Kɔl. 4:6; Ade. 34:6) Ɛhye kile kɛ ɔwɔ kɛ yɛfa atiakunlukɛnlɛma a yɛtendɛ a, bɔbɔ wɔ tɛnlabelɛ mɔɔ yɛ se la anu. Ɔwɔ kɛ yɛ ɛdendɛlɛ maa anwosesebɛ, ɔnle kɛ ɔwowɔ anzɛɛ yɛka ye kputilii.

Menli dɔɔnwo ɛlɛyia ngyegyelɛ mɔɔ anu yɛ se, yɛɛ alehyenlɛ biala bɛte edwɛkɛ ɛtane. Saa yɛkɔ menli ɛhye mɔ ɛkɛ a, bie a bɛbadendɛ bɛahile yɛ wɔ adenle ɛtane zo. Duzu a ɔwɔ kɛ yɛyɛ a? Baebolo ne ka kɛ: “Nyelebɛnloa bɛtɛɛ maa ɛya dwo.” Eza mualɛ zɛhae bahola amaa awie mɔɔ dwazo tia yɛ la ahakyi ye adwenle. (Mrɛ. 15:1; 25:15) Wɔ menli mɔɔ bɛtendɛ ɛtane bɛkile bɛ alehyenlɛ biala la afoa nu, saa kɛzi yɛka edwɛkɛ nee ɛnelɛ mɔɔ yɛfa yɛka la da atiakunlukɛnlɛma ali a, bɛ nye balie nwolɛ kpalɛ na bie a bɛadie edwɛkɛ ne mɔɔ yɛlɛka yɛahile bɛ la.

Tɛ yɛ adwenle a le kɛ yɛ nee menli mɔɔ bɛmbu nɔhalɛ ne la bazu kpolera. Emomu, yɛkulo kɛ yɛ nee menli mɔɔ bɛbamaa yɛ adenle la suzu Ngɛlɛlera ne anwo. Ɔnva nwo tɛnlabelɛ mɔɔ yɛbayia la, yɛmaa ɔtɛnla yɛ adwenle nu kɛ ɔwɔ kɛ yɛfa atiakunlukɛnlɛma nee anwodozo yɛbua edwɛkɛ yɛmaa menli nwu kɛ yɛkola yɛfa yɛ nwo yɛto Nyamenle ɛwɔkɛ ne mɔ azo.​—1 Tɛs. 1:5.

Yɛ Ti Anwo Kpɔkɛzilɛ Nee Edwɛkɛ Mɔɔ Fane Yɛ Adwenle Nwo

Saa Baebolo sukoavo anzɛɛ ɛ gɔnwo diedinli bie biza wɔ mɔɔ ɔwɔ kɛ ɔyɛ wɔ tɛnlabelɛ bie anwo a, kɛzi ɔwɔ kɛ ɛbua ye ɛ? Bie a ɛdawɔ a, anrɛɛ ɛze mɔɔ ɛbayɛ a. Noko ɔwɔ kɛ awie biala di kpɔkɛ mɔɔ ɔbazi wɔ ye ɛbɛlabɔlɛ nu la anwo ɛzonle. (Gal. 6:5) Ɛzoanvolɛ Pɔɔlo hilehilele nuhua kɛ ɔmanle menli mɔɔ ɔhanle edwɛkɛ ne ɔhilele bɛ la anwosesebɛ “amaa bɛalie bɛali na bɛali zolɛ.” (Wulo. 16:26) Ɛhye le neazo kpalɛ mɔɔ ɔwɔ kɛ yɛsukoa a. Awie mɔɔ si kpɔkɛ kɛ ɔfa yeazɔ ye Baebolo kilehilevolɛ ne anzɛɛ awie gyɛne anye la ɛlɛsonle sonla na ɔnva diedi ɔmbɔ ye ɛbɛla. (Gal. 1:10) Yemɔti, bie a mualɛ sikalɛ mɔɔ nuhua la ɛkɛ mɔɔ ɛbava wɔamaa bizavolɛ ne la ɛnrɛboa ye.

Kɛ ɔkɛyɛ na wɔabua ye wɔamaa ɔ nee Baebolo ne adehilelɛ ayia ɛ? Ɛbahola wɔahwe ye adwenle wɔahɔ ngyinlazo nee neazo mɔɔ fɛta mɔɔ wɔ Baebolo ne anu la azo. Wɔ tɛnlabelɛ bie mɔ anu, ɛbahola wɔahile ye kɛzi bɛyɛ neɛnleanu la amaa ɔdaye mumua ne yeanwu zɔhane ngyinlazo ne nee neazo ne mɔ. Ɛbahola wɔahilehile ngyinlazo ne mɔ nee nvasoɛ mɔɔ wɔ neazo ne mɔ anu mɔɔ ɛmmaa ɔnvane ye edwɛkɛ ne anwo a. Biza ahenle ne saa ɔnwunle debie bie wɔ nuhua mɔɔ baboa ye yeamaa yeazi kpɔkɛ nrɛlɛbɛ nu a. Boa ye maa ɔgyinla ngyinlazo ne nee neazo ne mɔ azo ɔzuzu mɔɔ ɔyɛ a ɔbazɔ Gyihova anye la anwo. Saa ɛyɛ ɛhye a ɛnee ɛlɛboa ye wɔamaa ‘yeatete ye adwenle ne amaa yeanwu ngakyile mɔɔ wɔ kpalɛ nee ɛtane nu la.’​—Hib. 5:14.

Mualɛ Ɛmanlɛ Wɔ Debiezukoalɛ Bo

Ɔyɛ a Keleseɛne asafo ayia ne mɔ maa yɛnyia adenle yɛka yɛ diedi ne anwo edwɛkɛ wɔ bagua nu. Adenle ko mɔɔ yɛdua zo yɛyɛ ɛhye la a le kɛ yɛbabua kpuyia mɔɔ bɛbabiza la. Kɛzi ɔwɔ kɛ yɛ mualɛ ne yɛ ɛ? Adwenle ne a le kɛ yɛfa yɛaye Gyihova ayɛlɛ anzɛɛ yɛaha ɔ nwo edwɛkɛ kpalɛ. Zɔhane a edwɛndolɛnli Devidi yɛle wɔ mekɛ mɔɔ ɛnee ɔwɔ “menli ne ayia kpole ne anu” la. (Edw. 26:12) Ɔwɔ kɛ yɛdayɛ noko yɛmaa mualɛ wɔ adenle mɔɔ ɔbamaa yɛ mediema anwosesebɛ na yɛahwe bɛ yɛahɔ ‘ɛhulolɛ nu na yɛayɛ gyima kpalɛ’ la azo kɛmɔ ɛzoanvolɛ Pɔɔlo hanle kɛ yɛyɛ la. (Hib. 10:23-25) Saa yɛdumua yɛsukoa ɛzukoalɛdeɛ ne a ɔbaboa yɛ yeamaa yɛadwu ɛhye anwo.

Saa bɛfɛlɛ wɔ kɛ ɛmaa mualɛ a, maa wɔ edwɛkɛ ne ɛyɛ sikalɛ na nuhua ɛla ɛkɛ. Mmaka edwɛkɛ mɔɔ wɔ ɛdendɛkpunli ne anu la amuala; ka nuhua ko ala anwo edwɛkɛ. Saa ɛmaa mualɛ ne foa bie a, ɔbamaa awie mɔ noko anyia adenle aha bie. Ɔhyia kpalɛ kɛ ɛbaha ngɛlɛlera mɔɔ wɔ nu la anwo edwɛkɛ. Saa ɛlɛyɛ zɔ a, bɔ mɔdenle kɛ ɛbahwe adwenle wɔazie ngyɛnu ne foa mɔɔ fane edwɛkɛ ne mɔɔ bɛlɛsuzu nwo anwo la azo. Fa ɛdawɔ mumua ne wɔ edwɛkɛ maa mualɛ ne tɛla kɛ ɛbagenga wɔavi ɛdendɛkpunli ne anu. Saa ɛmaa mualɛ na yeangɔ boɛ kpalɛ a, mmamaa ɔgyegye wɔ. Ɔyɛ a ɛhye to awie biala mɔɔ maa mualɛ la.

Ɔda ali kɛ saa yɛbanwu kɛzi bɛbua edwɛkɛ la a, dɔɔnwo hyia tɛla kɛ yɛbanwu mualɛ ne ala. Ɔhyia nwunu. Noko nea kɛzi ɛfi wɔ ahonle nu ɛmaa mualɛ ɛmaa ɔka awie mɔ ahonle a ɛ nye die la!​—Mrɛ. 15:23.