Kɛzi Ɛbabua Ɛ?
1. Saa bɛbiza yɛ kpuyia a, duzu ati a ɔwɔ kɛ yɛsukoa Gyisɛse neazo ne ɛ?
1 Badwu ɛnɛ, adenle kpalɛ mɔɔ Gyisɛse vale zo buale kpuyia mɔɔ bɛbizale ye la tɛsi menli nwo. Saa bɛbiza yɛ kpuyia ngakyile wɔ daselɛlilɛ nu a, ɔle kpalɛ kɛ yɛkɛzukoa mɔɔ Gyisɛse yɛle la.—1 Pita 2:21.
2. Duzu a baboa yeamaa yɛabua kpuyia bie kpalɛ ɛ?
2 Dumua Tie: Ɛnee Gyisɛse suzu deɛmɔti awie kɛbiza ye kpuyia la anwo. Ɔdwu mekɛ ne bie a, ɔhyia kɛ ɔbiza kpuyia bie mɔ amaa yeanwu mɔɔ ahenle kulo kɛ ɔka la. Bie a awie mɔɔ kɛbiza kɛ, “Ɛdie Gyisɛse ɛdi ɔ?” la kulo kɛ amgba ɔnwu deɛmɔti ɛnli Bolonyia la. Saa ɛnwu mɔɔ ɛlɛgyegye ahenle mɔɔ ɛlɛbiza kpuyia ne la a, ɛbahola ɛ nee ye azuzu nwo wɔ adenle mɔɔ baboa ye kpalɛ la azo.—Luku 10:25-37.
3. Duzu a yɛlɛ mɔɔ boa yɛ maa yɛnyia Ngɛlɛlera ne anu mualɛ mɔɔ yɛ ahunlundwolɛ a?
3 Fa Nyamenle Edwɛkɛ Ne Bua: Fane dɔɔnwo ne ala ɔle kpalɛ kɛ ɛbava Baebolo ne wɔabua kpuyia mɔɔ bɛkɛbiza la. (2 Tem. 3:16, 17; Hib. 4:12) Reasoning buluku ne yɛɛ “Bible Topics for Discussion” mɔɔ wɔ New World Translation of the Holy Scriptures ne anu la ɛboa ɛmaa bɛnyia mualɛ mɔɔ fɛta la. Saa ahenle mɔɔ kɛbiza kpuyia ne la ɛnlie Baebolo ne ɛndo nu bɔbɔ a, ɛbahola wɔavi nrɛlɛbɛ nu wɔamaa yeanwu mɔɔ Ngɛlɛlera ne kilehile la. Maa ahenle anwosesebɛ maa ɔzuzu nrɛlɛbɛ edwɛkɛ mɔɔ wɔ Baebolo ne anu la anwo kpalɛ. Saa ɛsukoa Gyisɛse a, wɔ mualɛ ne bayɛ “kɛ ezukoa nvutuke ampolo mɔɔ la dwɛtɛ fufule pɛlɛte nu la.”—nidi wɔ nu, ɔle kɛnlɛma, yɛɛ nvasoɛ wɔ zo.—Mrɛ. 25:11.
4. Mekɛ boni a ɔle kpalɛ kɛ yɛnrɛbua kpuyia biala ɛ?
4 Ɔwɔ Kɛ Yɛbua Kpuyia Biala Ɔ? Saa ɛnze kpuyia bie mualɛ a mmase nyiane, ka kɛ: “Menze, noko mebayɛ neɛnleanu wɔ wɔ kpuyia ne anwo na mesia meba a, meaha mɔɔ menwunle ye la meahile wɔ.” Mɛlɛbɛnwoaze nee awie anwo anyelielɛ mɔɔ bɛkile ye zɛhae la bama suamenle ne aha kɛ ɛzia ɛrɛla. Saa ɛnwu kɛ kpuyia ne vi awie mɔɔ dwazo tia mɔɔ kulo kɛ su kpolera la a, sukoa Gyisɛse. (Luku 20:1-8) Zɔhane ala noko yɛɛ awie mɔɔ anye ɛnlie nɔhalɛ ne anwo la kulo kɛ ɔ nee wɔ su kpolera a, ɔwɔ kɛ ɛfi nrɛlɛbɛ nu ɛpɛ adawubɔlɛ ne azo na ɛfa wɔ mekɛ ne ɛkpondɛ menli mɔɔ anye die nwolɛ la.—Mat. 7:6.
5. Kɛzi bɛbua kpuyia la anwo neazo boni a Gyisɛse yɛle a?
5 Ɛnee Gyisɛse ze kɛ ɔhyia kɛ ɔfa ɔ nwo ɔto Gyihova anwo zo, amaa yeahola yeayɛ ye gyima mɔɔ ɔlɛ kɛ ɔdi “nɔhalɛ ne anwo daselɛ,” mɔɔ kpuyia mɔɔ menli mɔɔ lɛ ahonle kpalɛ kulo kɛ bɛte ɔ bo la mualɛ boka nwo la. (Dwɔn 18:37) Nea nwolɛ adenle mɔɔ yɛlɛ kɛ yɛbazukoa Gyisɛse na yɛabua ‘menli mɔɔ kulo kɛ bɛnyia ngoane mɔɔ ɛnlɛ awieleɛ la’ a!—Gyi. 13:48.