Adwulaleɛ Mɔɔ Fɛta

BIE a ɛyɛle neɛnleanu kpalɛ yɛɛ ɛzieziele edwɛkɛ mɔɔ wɔ wɔ ɛdendɛlɛ ne anu la kɛnlɛma. Bie a eza ɛzieziele mukenye mɔɔ yɛ anyelielɛ la. Noko, debie bieko anwo hyia​—adwulaleɛ mɔɔ fɛta. Mmabu ye kɛ ɔngyia. Bɛta bɛkakye adwulaleɛ edwɛkɛ ne kpalɛ. Saa wɔandwula wɔ edwɛkɛ ne kpalɛ a, ɔnrɛmaa bɛnrɛde mɔɔ ɛlumuale ɛhanle la abo kpalɛ.

Suzu ɛhye mɔ anwo nea: Ɔka ekyii Dwɔhyua wu la, ɔmanle ɛdendɛlɛ mɔɔ bɛkakye ye dahuu la ɔhilele mgbanyima mɔɔ bɛwɔ Yizilayɛ maanle ne anu la. Mɔɔ Dwɔhyua hanle kɛzi Gyihova nee Yizilayɛma lile ɔvi Ebileham anwo zo ɔwiele la, asoo ɔpɛle edwɛkɛ ne sikalɛ na ɔhanle edwɛkɛ titile mɔɔ wɔ nuhua la ala ɔ? Kyɛkyɛ. Emomu, ɔvale anwodozo ɔzele menli ne kɛ: “Bɛli [Gyihova] eni na bɛzonle ye nɔhalɛ nu.” Ɛdawɔ mumua ne kenga Dwɔhyua adwulaleɛ edwɛkɛ ne mɔɔ wɔ Dwɔhyua 24:14, 15 la.

Pita manle ɛdendɛlɛ titile bie hilele menli dɔɔnwo bie mɔɔ ɛnee bɛwɔ Gyɛlusalɛm wɔ Pɛntekɔso Ɛvoyia ne wɔ ɛvolɛ 33 Y.M. kɛmɔ yɛnwu ye wɔ Gyima ne 2:14-36 la. Ɔlumuale ɔhilehilele nuhua kɛ bɛlɛnwu Dwowɛle ngapezo ne mɔɔ fane Nyamenle sunsum ne mɔɔ ɔbawola yeagua bɛ nwo zo mɔɔ yera nu la. Eza ɔhilele kɛzi ɛhye nee Mɛzaya ngapezo ne mɔ mɔɔ wɔ Edwɛndolɛ ne anu mɔɔ ka Gyisɛse Kelaese ewudwazo nee kɛzi bɛbakpogya ye zo bamaa yeadɛnla Nyamenle asa fema zo yia la anu. Akee Pita dwula ye edwɛkɛ ne la, ɔhanle debie mɔɔ ɔwɔ kɛ awie biala mɔɔ ɛlɛtie ye la yɛ la anwo edwɛkɛ wienyi. Ɔhanle kɛ: “Zɔhane ati, bɛmaa Yizilayɛma amuala ɛnwu ye wienyi kɛ, Gyisɛse ɛhye mɔɔ bɛbɔle ye [baka] nu la, yemɔ ala yɛɛ Nyamenle ɛyɛ ye Awulae nee Mɛzaya a.” Na menli mɔɔ bɛwɔ ɛkɛ la bizale kɛ: “Ayi mɔ, duzu a ɔwɔ kɛ yɛyɛ a?” Pita zele bɛ kɛ: “Bɛnlu bɛ nwo na bɛgyakyi ɛtane ɛyɛlɛ, na bɛmaa bɛzɔne bɛ wɔ Gyisɛse Kelaese duma nu.” (Gyi. 2:37, 38) Mɔɔ ye tievolɛma ne dele la hanle bɛ ahonle, na nuhua kɛyɛ 3,000 liele Gyisɛse Kelaese anwo nɔhalɛ ne lile wɔ kenle zɔhane.

Kakye Ɛhye Mɔ. Ɔwɔ kɛ mɔɔ ɛbaha wɔ wɔ adwulaleɛ edwɛkɛ ne anu la fane wɔ ɛdendɛlɛ ne edwɛkɛtile ne anwo. Ɔwɔ kɛ ɔmaa edwɛkɛ titile ne mɔ mɔɔ wɔhilehile nuhua wɔwie la da ali kpalɛ. Bie a ɛbahulo kɛ ɛbava wɔ edwɛkɛtile ne anu edwɛkɛ agbɔkɛ bie mɔ wɔaboka nwo, noko saa ɛkulo kɛ ɛka ye bieko pɛpɛɛpɛ a, ɛbahola wɔayɛ ye zɔ.

Wɔ ɛdendɛlɛ ne bodane a le kɛ ɛbamaa awie mɔ anwosesebɛ wɔamaa bɛagyinla mɔɔ ɛlɛka wɔahile bɛ la azo bɛayɛ debie. Adwulaleɛ edwɛkɛ ne bodane titile ko a le kɛ ɔmaa bɛanwu mɔɔ ɔwɔ kɛ bɛyɛ la. Mekɛ mɔɔ ɛkpale wɔ edwɛkɛtile ne nee edwɛkɛ titile ne mɔ la, asoo ɛzuzule deɛmɔti edwɛkɛ ne baboa wɔ tievolɛma nee bodane mɔɔ ɛkulo kɛ ɛdua wɔ ɛdendɛlɛ ne azo ɛdwu nwo la anwo kpalɛ? Saa ɛyɛle ye zɔ a, ɛnee ɛze debie mɔɔ ɛkulo kɛ bɛyɛ la. Akee ɔwɔ kɛ ɛkilehile deɛ zɔhane nee bie a kɛzi bɛbayɛ ye la anu.

Saa ɛye debie mɔɔ ɛkulo kɛ wɔ tievolɛma yɛ la ɛsie ahane a, ɔwɔ kɛ wɔ adwulaleɛ edwɛkɛ ne maa anwosesebɛ. Ɔwɔ kɛ ɔfane debie titile mɔɔ yemɔti ɛkulo kɛ bɛyɛ zɔhane nee saa bɛyɛ a nvasoɛ mɔɔ bɛbanyia la anwo. Saa ɛsuzu ɛdendɛmunli mɔɔ li awieleɛ la nee kɛzi ɛbaha ye la anwo kpalɛ a, ɔbamaa wɔ ɛdendɛlɛ ne aha ahonle.

Kakye kɛ ɛlɛdwula wɔ ɛdendɛlɛ ne. Ɔwɔ kɛ mɔɔ ɛlɛka la kile kɛ ɛlɛdwula wɔ edwɛkɛ ne. Ɔwɔ kɛ kɛzi ɛka ye la noko fɛta. Saa ɛlɛdwula edwɛkɛ ne a, mmatendɛ ndɛndɛ na akee ɛgyinla arɛlevilɛ nu. Eza mmaka ɛ ne aze ngyikyi ngyikyi ɛfa ɛwie. Ɔwɔ kɛ ɛmaa ɛ ne zo noko ɔnle kɛ ɔ bo zolɛ. Ɔwɔ kɛ wɔ ɛdendɛmunli ne mɔ mɔɔ li awieleɛ la kile kɛ ɛlɛdwula ɛdendɛlɛ ne. Ɔwɔ kɛ ɛfa anwodozo ɛka ɛdendɛmunli zɔhane mɔ. Saa ɛlɛsiezie wɔ ɛdendɛlɛ ne a, sukoa wɔ adwulaleɛ edwɛkɛ ne boka nwo.

Kɛzi ɔwɔ kɛ adwulaleɛ edwɛkɛ ne tendenle yɛ ɛ? Yɛnva mekɛ yɛndo ɛhye anwo. Ɔnle kɛ ɛtwehwe adwulaleɛ edwɛkɛ nu. Ye tendenle ne bagyinla kɛzi ɔbanyia tievolɛma anwo zo tumi la azo. Bɛ nye ta die adwulaleɛ edwɛkɛ mɔɔ le ezinra, ɔ bo ɛdelɛ ɛnyɛ se na ɔle fɔɔnwo la anwo. Saa ɛfa ndonwo ɛboka adwulaleɛ edwɛkɛ mɔɔ wale ekyi la anwo na ɛsiezie ye kpalɛ a, ɔboa. Fa Nolobɔvo buluku ne amuala adwulaleɛ edwɛkɛ mɔɔ wɔ Nolobɔvo ne 12:13, 14 la toto Boka Zo Ɛdendɛlɛ ezinra ne adwulaleɛ edwɛkɛ mɔɔ bɛhɛlɛ wɔ Mateyu 7:24-27 la anwo nea.

Wɔ Daselɛlilɛ Nu. Ɛbada wɔadwula edwɛkɛ wɔ daselɛlilɛ nu wɔadɛla ɛleka biala. Saa ɛmaa ɛ nye die menli nwo na ɛsiezie ɛ nwo kpalɛ a, ɛbahola wɔayɛ ɛhye kpalɛ. Saa ɛfa folɛdulɛ mɔɔ wɔ mukelɛ mɔɔ li ɛhye anyunlu la ɛdi gyima a, ɔbaboa kpalɛ bɔbɔ wɔ mekɛ mɔɔ ɛ nee awie ɛlɛbɔ adawu la.

Adawubɔlɛ ne bahola ayɛ ezinra. Bie a ɛnee ahenle ɛnlɛ alagye yemɔti ɛbali mitini ko ala. Saa ɔbafɛta a, ɛbahola wɔaha edwɛkɛ zɛhae: “Menwu kɛ ɛnlɛ alagye. Noko maa menva edwɛkɛ mɔɔ maa anwosesebɛ la ko mengyakyi wɔ. Baebolo ne kilehile kɛ yɛ Bɔvolɛ ne lɛ bodane bie mɔɔ yɛ anyelielɛ la kɛ ɔbamaa azɛlɛ ne ayɛ ɛleka mɔɔ bamaa menli anyia anyelielɛ wɔ bɛ ɛbɛlabɔlɛ nu dahuu la. Yɛbahola yɛahɔ zɔhane Paladaese ne anu, noko ɔwɔ kɛ yɛsukoa mɔɔ Nyamenle kpondɛ la.” Anzɛɛ ɛbahola wɔaha wɔahile ye kɛ ɛkɔ na wɔara mekɛ mɔɔ fɛta la anu.

Saa suamenle ne gyakyi wɔ ɛkɛ arɛlevilɛ nu ɔkɔyɛ debie anzɛɛ yeanla subane kpalɛ ali na ɔmaa wɔ ɛkpɔlalɛ ne ba awieleɛ a, ɛbahola wɔayɛ debie kpalɛ bie. Maa folɛdulɛ mɔɔ wɔ Mateyu 10:12, 13 nee Wulomuma 12:17, 18 la ɛdɛnla wɔ adwenle nu. Mualɛ kɛnlɛma mɔɔ ɛbava wɔamaa ye la bahola ahakyi adwenle mɔɔ ɔlɛ wɔ Gyihova Alasevolɛ nwo la. Ɛhye le debie kpalɛ mɔɔ ɛbahola wɔayɛ a.

Noko bie a ɛ nee suamenle ne bɔle adawu kɛnlɛma. Duzu ati a ɛnga edwɛkɛ titile ne mɔɔ ɛkulo kɛ ɔkakye la bieko ɛ? Ka edwɛkɛ mɔɔ ɔbaboa ye yeamaa yeayɛ nwolɛ debie la.

Saa ɛnwu ye kɛ ɛbanyia nwolɛ adenle ɛ nee ahenle abɔ adawu bieko kenle fofolɛ a, maa ɔnwu ye kɛ ɛbazia wɔara. Biza kpuyia​—bie a mɔɔ bɛhilehile nu wɔ Reasoning From the Scriptures anzɛɛ buluku mɔɔ bɛfa bɛyɛ sua nu Baebolo ɛzukoalɛ la anu. Kakye wɔ bodane ne, kɛmɔ Gyisɛse yɛle mɔɔ bɛhɛlɛ ye wɔ Mateyu 28:19, 20 la.

Ɛlɛfa sua nu Baebolo ɛzukoalɛ bie wɔara awieleɛ ɔ? Saa ɛka edwɛkɛtile ne bieko a, ɔbaboa sukoavo ne yeamaa yeahakye mɔɔ bɛzuzule nwolɛ la. Saa ɛfa ndinu kpuyia ne mɔ ɛyɛ gyima a, ɔbaboa yeamaa edwɛkɛ titile ne mɔ aha sukoavo ne adwenle nu, titile wɔ mekɛ mɔɔ ɛbado ɛ rɛle aze wɔabiza la. Kpuyia mɔɔ le kɛ kɛzi edwɛkɛ mɔɔ bɛzukoa baboa sukoavo ne anzɛɛ kɛzi ɔbava yeaboa awie mɔ la bahola aboa ye yeamaa yeadwenle kɛzi ɔbava mɔɔ yezukoa la yeali gyima la anwo.​—Mrɛ. 4:7.

Kakye kɛ wɔ adwulaleɛ edwɛkɛ ne a bahile kɛzi debie mɔɔ bɛzuzu nwolɛ la baha ahonle la.