Gyɛhɔyada Akɛnrasesebɛ Ne

Gyɛzɛbɛle ara raalɛ a le Atalaya, na ɔ ti yɛ se kɛ ye mame la. Dwuda belemgbunli ne gyale Atalaya. Mɔɔ ɔ hu wule la, ɔ ra nrenyia a lile ebia ne a. Noko, mɔɔ ɔ ra ne wule la, ɔdaye mumua ne ɔlile Dwuda ebia ne. Ɔbɔle mɔdenle kɛ ɔku abusua ne mɔɔ bɛdi ebia ne la anu menli ne amuala, ɔhunle awie biala mɔɔ ɔbahola yeayɛ belemgbunli la, bɔbɔ ɔdaye mumua ne ye nlɔnra mrenyia. Ɛnee awie biala sulo ye.

Ɛsɔfo Kpanyinli Gyɛhɔyada nee ɔ ye Gyihɔhyɛba nwunle kɛ mɔɔ Atalaya ɛlɛyɛ la ɛnle kpalɛ fee. Bɛvale bɛ ngoane bɛdole esiane nu na bɛvale Atalaya nlɔnra ne mɔ anu ko mɔɔ bɛfɛlɛ ye Dwowahye la bɛziele. Bɛtetele ye wɔ ɛzonlenlɛsua ne anu.

Mɔɔ Dwowahye lile ɛvolɛ nsuu la, Gyɛhɔyada vɛlɛle mgbanyima ne mɔ nee Livaema kɔsɔɔti na ɔzele bɛ kɛ: ‘Bɛzinza ɛzonlenlɛsua nlenkɛ ne mɔ na bɛmmamaa awie biala ba ɛke.’ Akee Gyɛhɔyada ziele Dwowahye Dwuda belemgbunli na ɔzoale ye belemgbunli kyɛlɛ. Dwudama deanle nu kɛ: “Belemgbunli ɛnyi ɛhyɛ!”

Mɔɔ Ɔbahyema Atalaya dele kɛ menli ne ɛlɛteɛdea nuhua la, ɔhɔle ɛzonlenlɛsua ne anu. Mɔɔ ɔnwunle belemgbunli fofolɛ ne la, ɔdeanle nu kɛ: “Maamɔvo! Maamɔvo!” Mgbanyima ne mɔ hyele ye ɛkɛ ne ala na bɛhɔhunle ye. Na ninyɛndane mɔɔ ɔyɛle ye wɔ maanle ne anu la noko ɛ?

Gyɛhɔyada boale maanle ne ɔmaanle bɛ nee Gyihova yɛle ngyekyeleɛ, na bɛbɔle Gyihova ɛwɔkɛ kɛ bɛbazonle ɔ ngomekye. Gyɛhɔyada maanle bɛzɛkyele Beeyale ɛzonlenlɛsua ne nee ye ananze ne mɔ. Ɔkpale ɛsɔfoma nee Livaema ɔmaanle bɛyɛle gyima wɔ ɛzonlenlɛsua ne anu amaa menli ne ahola azonle wɔ ɛkɛ ne bieko. Ɔkpale sinzavolɛma ɔmaanle bɛzinzale ɛzonlenlɛsua ne amaa awie biala mɔɔ anwo ɛnde la angɔ ɛkɛ. Akee Gyɛhɔyada nee mgbanyima ne mɔ vale Dwowahye hɔle belemgbunli sua nu ɛkɛ na bɛdɛnlanle ye wɔ belemgbunli ebia ne azo. Dwudama anye liele. Akee bɛholale bɛzonlenle Gyihova kpalɛ, ɔluakɛ bɛzɛkyele Atalaya atisesebɛ ne nee Beeyale ɛzonlenlɛ. Wɔnwu kɛzi Gyɛhɔyada akɛnrasesebɛ ne boale menli dɔɔnwo la ɔ?