“Bɛmaa Bɛ Nloa Edwɛkɛ Ɛyɛ Fɛ”
1. Duzu a kile kɛ “yɛ nloa edwɛkɛ yɛ fɛ” a?
1 “Bɛmaa bɛ nloa edwɛkɛ ɛyɛ fɛ na ɔyɛ anyelielɛ, na bɛnwu nyelebɛnloa kpalɛ mɔɔ ɔwɔ kɛ bɛfa bɛye awie biala edwɛkɛ nloa la.” (Kɔlɔ. 4:6) Yɛ nloa edwɛkɛ mɔɔ yɛmaa yɛayɛ fɛ la kile kɛ ɔwɔ kɛ yɛkpa edwɛkɛ kpalɛ na yɛka ye wɔ adenle mɔɔ bamaa yɛ edwɛkɛ ne adɔ ahenle mɔɔ ɛlɛtie la anzo nu. Nwolɛ hyia kpalɛ kɛ yɛyɛ ɛhye wɔ daselɛlilɛ nu.
2. Kɛzi Gyisɛse holale lile Samɛlea raalɛ bie daselɛ ɛ?
2 Gyisɛse Neazo Ne: Mekɛ mɔɔ Gyisɛse ɛlɛdie ye ɛnwomenle wɔ bula bie anwo la, ɔbɔle ɔ bo ɔ nee Samɛlea raalɛ bie mɔɔ rale kɛ ɔbado bula la dendɛle. Wɔ bɛ adawubɔlɛ ne anu raalɛ ne hanle ɛkpɔlɛ mɔɔ la Dwuuma nee Samɛleama avinli mekɛ tendenle la anwo edwɛkɛ fane dɔɔnwo. Eza ɔhanle kɛzi ɔdie ɔdi kɛ Samɛleama le Gyekɔbo abo zo amra ɔnva nwo kɛ Dwuuma te nganeɛ kɛ bɛle nyɛvolɛ la anwo edwɛkɛ. Kɛ anrɛɛ Gyisɛse kɛva ye edwɛkɛ ne anwo ɛya la, yeanyɛ zɔ, emomu, ɔmanle edwɛkɛ ne yɛle anyelielɛ. Mɔɔ vi nu rale la a le kɛ ɔholale ɔlile daselɛ mɔɔ boale ye nee ye sua ne azo amra la.—Dwɔn 4:7-15, 39.
3. Saa yɛwɔ daselɛlilɛ nu a, kɛzi yɛbahola yɛali Gyisɛse neazo ne azo ɛ?
3 Yɛlɛka edwɛkɛ ne a ɔwɔ kɛ yɛkakye yɛ bodane ne—kɛ yɛbɔ “edwɛkɛ kpalɛ” ne nolo. (Wulo. 10:15) Yɛkulo kɛ yɛka Baebolo ne anu edwɛkɛ mɔɔ yɛ fɛ na ɔmaa anwosesebɛ la yɛkile suamenle ne, na tɛ kɛ yɛtendɛ yɛatia ye diedi ne. Saa ɔka edwɛkɛ mɔɔ ɔndenrɛ la a, ɔnle kɛ yɛbua ye kɛ yɛ nee ye ɛlɛsu kpolera la. Asoo debie wɔ ye edwɛkɛ ne anu mɔɔ yɛbahola yɛagyinla zo yɛ nee ye ayɛ adwenle anzɛɛ yeahanvo ye? Bie a yɛbahola yɛaha ngɛlɛlera bie anwo edwɛkɛ na yɛabiza kɛ, “Wɔzuzu nwo kɛ ɛhye bahola ayɛ boɛ ɔ?”
4. Saa suamenle ne bɔ yɛ aholoba a duzu a ɔwɔ kɛ yɛyɛ a?
4 Na saa suamenle ne bɔ yɛ aholoba anzɛɛ ɔda ye ali kɛ ɔkulo kɛ ɔ nee yɛ su kpolera ala ɛ? Ɔwɔ kɛ yɛkɔ zo yɛto yɛ rɛle aze wɔ yɛ ɛdendɛlɛ nu. (2 Tem. 2:24, 25) Saa ahenle anye ɛnlie Belemgbunlililɛ nrɛlaleɛ ne anwo a, ɔkɛyɛ kpalɛ kɛ yɛkɛzɛlɛ adenle yɛkɛvi ɛkɛ.—Mat. 7:6; 10:11-14.
5. Debie kpalɛ boni a vi adiema raalɛ ko nyelebɛnloa bɛtɛɛ nu rale a?
5 Debie Kpalɛ Fi nu Ba: Mekɛ mɔɔ adiema raalɛ bie bɔle mɔdenle kɛ ɔdi ɔ gɔnwo bie daselɛ la, ɔ gɔnwo raalɛ ne vale ɛya na ɔbɔle ye aholoba. Adiema raalɛ ne hanle ye wɔ adenle kɛnlɛma zo kɛ: “Ɔyɛ me nyane kɛ ɛte nganeɛ zɔ a. Mesɛlɛ wɔ kenle fofolɛ.” Dapɛne nwiɔ anzi, raalɛ ne rabɔle adiema raalɛ ne anlenkɛ na ɔkpale kyɛlɛ wɔ mɔɔ ɔyɛle la anwo na ɔhanle kɛ ɔkulo kɛ ɔtie mɔɔ adiema raalɛ ne kɛha la. Debie kpalɛ ta fi nyelebɛnloa bɛtɛɛ nu ba!—Mrɛ. 15:1; 25:15.
6. Duzu ati a ɔhyia kɛ yɛmaa yɛ ɛdendɛlɛ yɛ fɛ wɔ daselɛlilɛ nu ɛ?
6 Saa ɛlɛka edwɛkpa ne a bɔ mɔdenle maa wɔ ɛdendɛlɛ ɛyɛ fɛ. Saa suamenle ne andie wɔ bɔbɔ a, kenle fofolɛ mɔɔ Gyihova Alasevolɛ kɛhɔ ye ɛkɛ ne la ɔbadie bɛ.