ƐZUKOALƐDEƐ 11

Fa Wuluwuluyɛlɛ Tendɛ

Wulomuma 12:11

MƆƆ ƆHYIA KƐ ƐYƐ: Maa wɔ tievolɛma anwosesebɛ ɔlua wuluwuluyɛlɛ mɔɔ ɛbava wɔadendɛ la azo.

Maa edwɛkɛ ne ɛha wɔ ahonle. Ɛlɛsiezie wɔ gyimalilɛ ne a, dwenle kɛzi wɔ edwɛkɛ ne anwo hyia la anwo kɔ moa kpalɛ. Te ɔ bo kpalɛ amaa wɔahola wɔavi ahonle nu wɔadendɛ.
Dwenle wɔ tievolɛma anwo. Dwenledwenle kɛzi menli gyɛne bɛanyia wɔ ɛgengalɛ anzɛɛ wɔ ngilehilelɛ ne azo nvasoɛ la anwo. Suzu ndenle mɔɔ ɛbalua zo wɔayɛ wɔ gyimalilɛ ne la amaa anyezɔlɛ mɔɔ bɛlɛ ye wɔ nwo la ayɛ kpole.
Mmamaa wɔ edwɛkɛ ne yɛ kpɔnɔlɔɔ. Fa wuluwuluyɛlɛ tendɛ. Fi ahonle nu keha ɛ nwo na fa ɛ nyunlu maanle ne da wɔ nganeɛdelɛ ali.

Amaa bɛ adwenle angɔ kɛzi ɛkeha ɛ nwo la azo somaa la, nea boɛ na wɔanlua adenle ko ne ala azo wɔangeha ɛ nwo. Maa ndelebɛbo ɛrɛla kɛzi ɛkeha ɛ nwo la anu. Da wuluwuluyɛlɛ ali wɔ mekɛ mɔɔ ɛlɛkilehile edwɛkɛ titili bie anu yɛɛ mekɛ mɔɔ ɛmaa wɔ tievolɛma ava ayɛ gyima la. Saa ɛda wuluwuluyɛlɛ ali somaa wɔ wɔ gyimalilɛ ne amuala anu a, ɔbayɛ wɔ tievolɛma ɛvɛlɛ.