“Nea Nvoninli Ne!”

Ɛhye le edwɛkɛ mɔɔ yɛta yɛka wɔ mekɛ mɔɔ yɛkɛbuke magazine fofolɛ bie anu la. Nvoninli ngɛnlɛma ɛhye mɔ mɔɔ bɛtɔ bɛ rɛle aze bɛyɛ la di bodane bie mɔ anwo gyima. Nvoninli ɛhye mɔ maa edwɛkɛ ne ka yɛ ahonle na yɛdwenle nwo kpalɛ. Bɛboa yɛ kpalɛ wɔ mekɛ mɔɔ yɛlɛsiezie yɛ nwo yɛamaa Ɛzinzalɛ Arane Debiezukoalɛ ne la.

Kɛ neazo la, suzu deɛmɔti bɛkpa debiezukoalɛ edwɛkɛ ne anwo nvoninli ne mɔɔ ɔlumua la anwo kpalɛ. Duzu a ɔkile a? Kɛzi ɔfane debiezukoalɛ ne edwɛkɛtile ne anzɛɛ ngɛlɛlera ne mɔɔ edwɛkɛ ne gyi zo la anwo ɛ? Kɛmɔ yɛyɛ ye wɔ nvoninli kɔsɔɔti anwo la, suzu kɛzi ɔfane edwɛkɛ ne mɔɔ yɛlɛsuzu nwo anzɛɛ wɔ ɛbɛlabɔlɛ nwo la anwo.

Adiema ne mɔɔ nea Ɛzinzalɛ Arane Debiezukoalɛ ne azo la maa asafo ne anu amra ka nvoninli ko biala anwo edwɛkɛ. Ɔmaa bɛkile kɛzi ɔfane debiezukoalɛ ne anwo nee kɛzi ɔbaboa bɛ la. Fane dɔɔnwo ne ala, bɛkɛlɛ edwɛkɛ ekyi wɔ nvoninli ne anwo bɛmaa ɔtwe adwenle ɔkɔ ɛdendɛkpunli ne mɔɔ nvoninli ne fane nwolɛ la azo. Noko ɔdwu mekɛ ne bie a, adiema ne mɔɔ ɛlɛnea debiezukoalɛ ne azo la a bahile ɛdendɛkpunli mɔɔ ka nvoninli ne anwo edwɛkɛ a. Saa bɛyɛ zɔ a, ɔbaboa kengavolɛ biala yeamaa yeapɛ ɛzukoalɛdeɛ mɔɔ wɔ Nyamenle Edwɛkɛ ne anu la nvoninli wɔ ye adwenle nu.

Adiema nrenya ko hanle kɛ, “Mekɛ mɔɔ ɛkɛgenga edwɛkɛ kɛnlɛma bie ɛkɛwie la, nvoninli ne maa ɛte ɔ bo kpalɛ.”