Lo Matiu Bee Ɛm
18 Lo sɔ̄ pya a wee nyɔɔnɛ dumɛ Jizɔs bee ye lu loo sa ye kɔ nɛ kɔ: “Mɛɛ na alu gbɛnɛ bu Buɛ̄-mɛnɛ bunyɔɔ a?” 2 Nyɔɔwo, a kue ziī nwīgbagbara nwiī yaaloo ye, e a su ye wa wu taɛ yɛɛ 3 sa kɔ: “Kaka m kɔ i nɛ, kɛɛrɛ kɔ bui kiiya* sa le doodoo gbomiɔŋɔ, lɔgɔ nu edoo kɔ bui yii bu Buɛ̄-mɛnɛ bunyɔɔ naale. 4 Nyɔɔwo, ɛrɛgebah nɛɛ a kumalookɛ̄ doodoo nwīgbagbara nwiī ama na elu gbɛnɛ bu Buɛ̄-mɛnɛ bunyɔɔ a. 5 E ɛrɛgebah nɛɛ a su ziī nɛɛ a le doodoo nwīgbagbara nwiī ama nyɔɔ mdaa bee esuanage mda. 6 Mɛ ɛrɛgebah nɛɛ a doo kɔ ziī yɛɛ pya lo nwīgbagbara a mɛ ɛrɛ yira bu ama a dɔ, ebee lee alu esu dɛm gbɛānu enyanya-toora-toh wee kigere ye kɔm oo sa alu etop ye tɛrɛ bu gbɛnɛ pɛnɛ.
7 “Ekiɛ̄nu a le nɛ nyɔuwe nyɔɔ pya nu a ye le bu a doo kɔ pya dɔɔ̄na a dɔ! Bu kaka, pya nɛɛ edoo kɔ pya dɔɔ̄na a dɔ ele, mɛ ekiɛ̄nu ele nɛ pya a le doo wo! 8 E lo a le bah a ale tɔ a edoo kɔ o dɔ, fii ye top bie lɛa loo. Elee o ɛrɛ boh ale lu kɔgah yii bu dum ee kɔ o ɛrɛ baɛ bah ale baɛ tɔ sa alu etop a tɛrɛ bu miā a naa wee zim. 9 Gbaāloo wo, lo a le dɛɛ̄ a edoo kɔ o dɔ, togara ye lɛa loo top bie. E lee o su ziī bee dɛɛ̄ nyima bu dum ee kɔ o ɛrɛ baɛ bee dɛɛ̄ sa alu etop a tɛrɛ bu miā Gɛhɛna.* 10 Mɔnaa kɔ buii ɛp ziī yɛɛ pya lo nwīgbagbara ama tɛrɛ nyɔnɛbee pya wa ɛnjɛl le kɛ̄sī na Tɛ dɛ̄dɛɛ̄ sɔ̄ li bunyɔɔ.* 11* ——
12 “Ena bui kɛɛrɛ a? Lo a le ziī nɛɛ ɛrɛ 100 naana pee sa ziī aba dag wa aaloo, ekɔ a naale elɛɛbahloo 99 elua a bie nyɔɔ kpokɛ̄ sa gbī lo a bee dag pe ani? 13 Kaka m kɔ i nɛ, lo a gbī ye muɛ, e’ɛrɛ ye gbɛnɛ ɛɛbu loo ee 99 pya lo a naa bee pe a. 14 Bu aba lo sīdee, a naa nia na* Tɛ a le li bunyɔɔ kɔ ziī yɛɛ pya lo nwīgbagbara ama a pe.
15 “Lo dɔɔ̄na, lo o wuga si pɔrɔ a pima, si ye loo sa kɔ kɛ̄ a naa doo leere ye nɛ bie kɛ̄ aba baɛ bui le, e lo a gbaɛ̄ a tɔ̄, o esiakɛ̄ ɛrɛ o wuga. 16 Mɛ lo a naa gbaɛ̄ a tɔ̄, aara ziī ale baɛ nɛɛ ye siāloo lokwa nyɔɔ ekeebee* baɛ ale taa nɛɛ elu esuā taɛ nu a bee sira. 17 Lo a naa gbaɛ̄ wa tɔ̄, kɔ nɛ bɔŋanaloo, e lo a naa gbaɛ̄nagetɔ̄ bɔŋanaloo, ɛp ye doodoo nɛɛ dɔɔ̄na buɛ̄ ale nɛɛ tup etup.
18 “Kaka m kɔ i nɛ, ɛrɛgebah nu bui bɔp a kɛnɛkɛ̄ elu nu ebee lu ebɔp li bunyɔɔ, e ɛrɛgebah nu bui yɔbara a kɛnɛkɛ̄ elu nu ebee lu eyɔbara li bunyɔɔ. 19 Kaka m kɔ i nɛ, lo baɛ bui gbaa yira a kɛnɛkɛ̄ bara ziī nu a kuī elu edoo i nɛ nyɔɔbee na Tɛ a le li bunyɔɔ. 20 Nyɔnɛbee kɛ̄ baɛ ale taa nɛɛ bɔŋia nyɔɔ na bee, m le wa taɛ yɛɛ a kɛ̄ a.”
21 Lo sɔ̄ Pita bee ye lu loo sa ye kɔ nɛ kɔ: “Nɛɛ-a-i-ɛrɛ, ku sɔ̄ na na wuga esi mɛ pɔrɔ loo sa m aaloo ye nɛ a? Ekɔ nu alu ɛrɛba sɔ̄ ni?” 22 Jizɔs ture ye nɛ kɔ: “Naale aba ɛrɛba sɔ̄, mɛ 77 sɔ̄.
23 “Nu anua lo sa Buɛ̄-mɛnɛ bunyɔɔ dap lu esu dooreloo nɛɛ mɛnɛ a bee gbī kɔ pya ye zooro a kpɛ kɔm ba bee ye de bah. 24 Sɔ̄ a bee bɔātɛ̄ esu kɔm ba bee ye de bah, a bee lu esu ziī gbara a bee ye aa kɔm 10,000 talɛnt* bah nua. 25 Mɛ nyɔɔbee a naa bee dap kpɛ lo kpugi a, ye tɛtɔ bee nɛ lok kɔ alu e’oo ye gbaāloo ye wa le pya ye miɔŋɔ le dɛ̄dɛɛ̄ nu a bee ɛrɛ lokwa alu esu kpɛā lo kɔm. 26 Lo sɔ̄ lo zooro dɔ uubeekɛ̄ sa ye bara kɔ: ‘Egerebu mɛ baɛ, m kpɛ dɛ̄dɛɛ̄ nu a nɛ.’ 27 Nyɔɔwo, tɛtɔ a bee ɛrɛ toesaɛ̄ loo ye zooro sa lɛɛbahloo dɛ̄dɛɛ̄ lo kɔm ye nɛ. 28 Mɛ lo zooro bee kii ee sa muɛ dɔɔ̄na nɛɛ le ɛɛ gbaa lu zooro lo a bee ye aa 100 denariɔs* bah, e a bee ye aa sa ye tuɔ bah oo sa kɔ: ‘Kpɛ dɛ̄dɛɛ̄ na kɔm a a le bee mɛ nɛ.’ 29 Nyɔɔwo, nɛɛ le ɛɛ gbaa lu zooro bee dɔ kɛ̄ sa bɔātɛ̄ ebara ye kɔ: ‘Ɛrɛ mɛ egerebu loo, mɛ m kpɛ dɛ̄dɛɛ̄ o kɔm a nɛ.’ 30 Kerewo, a naa bee yiga mɛ a kɔ alu etop ye tɛrɛ tɔ kpɔgɔrɔ mmɛ sɔ̄ ekpɛa dɛ̄dɛɛ̄ ye kɔm. 31 Mɛ sɔ̄ pya le ɛɛ gbaa lu zooro bee muɛ nu a sira, a bee wa kiɛ̄ gbɛnɛ, e ba bee si sa kɔ dɛ̄dɛɛ̄ nu a bee sira a nɛ wa tɛtɔ. 32 Lo sɔ̄ ye tɛtɔ bee kɔ ba a su ye nua, e a bee ye kɔ nɛ kɔ: ‘Olo pɔrɔ zooro, mda bee lɛɛbahloo dɛ̄dɛɛ̄ oloo kɔm a nɛ sɔ̄ o bee mɛ bara. 33 A naale ebee lee kɔ o ɛrɛ toesaɛ̄ loo nɛɛ le ɔɔ gbaa lu zooro dookɛ̄ mda bee a ɛrɛ toesaɛ̄ loo doo ni?’ 34 Nyɔɔwo, ye tɛtɔ bee ɛrɛ gbɛnɛ saŋ, e a bee kɔ alu etop ye tɛrɛ tɔ kpɔgɔrɔ mmɛ sɔ̄ ekpɛ dɛ̄dɛɛ̄ lo kɔm lɛɛ. 35 Kɛ̄ na Tɛ a le li bunyɔɔ edoonage loo bɔɔlo doo lo lo buii aaloo nɛ bui wuga aābu bui beenyiɛ.”