Lo Luk Bee Ɛm
2 Bu lo gbo dee, Siza Ɔgɔstɔs bee nɛ lok kɔ dɛ̄dɛɛ̄ nɛɛ a le bu nyɔuwe a yere bee kpa. 2 (Lo tuatua yere bee ama bee sudɔ sɔ̄ Kwiriniɔs aa bee bɛɛ Siria.) 3 E dɛ̄dɛɛ̄ nɛɛ bee kii wa buɛ̄ wee yere bee. 4 Nyɔɔwo, Josɛf bee aanage Nazarɛt li Galilii sa kii buɛ̄ Devid alu ekure Bɛtlihɛm li Judia, nyɔnɛbee a bee le ziī nɛɛ a nuūna tɔ Devid. 5 E a bee aara ye wa* Meri lo ebee sah emaɛ̄ nwiī, siā wee yere bee. 6 E ye dee maɛ̄ nwiī bee era sɔ̄ ba bee lege lo kɛ̄. 7 E a bee maɛ̄ ye tua nwiīnɛɛdam, ye su bɛ koloo sa ye su maɛ̄ bu nu a wee lu eyere nuede nam-tɔ bu, nyɔnɛbee ba naa bee muɛna lɔgɔ tɛm etɔɔ̄ bie tɔ pya saanɛɛ.
8 Bie lo barasī, pya tɔɔ̄loo naana pee bee lenage ee aa kuūdɛɛ̄loo wa naana pee bu edɛɛ̄. 9 Ɛnjɛl Jɛhova* bee wa siraloo bu bugia, e nyɛŋia Jɛhova* bee wa mɔ̄ tɛɛ̄ ɛŋɛnɛ sa bɔɔ bee wa aa gbɛnɛ. 10 Mɛ lo ɛnjɛl bee wa kɔ nɛ kɔ: “Bɔɔ aa i aa, nyɔnɛbee ɛp! m gaa kɔ le yereue akiiloo gbɛnɛ ɛɛbu dɛ̄dɛɛ̄ nɛɛ gaa le ɛrɛ i nɛ. 11 Nyɔnɛbee elua emaɛ̄ ziī nɛɛ kpɔā i nɛ anii’ee bu buɛ̄ Devid, lo a le Kraist Nɛɛ-a-i-ɛrɛ. 12 E kɛ̄ bui tɛɛ̄ doo ye suā loo na ama: Bui muɛ ziī nwiī alu esu bɛ koloo alu emaɛ̄ bu nu a wee lu eyere nuede nam-tɔ bu.” 13 E aba lo sɔ̄, gbɛnɛ gbo nɔ̄ bunyɔɔ bee gbaaloo lo ɛnjɛl sa leera Bari kɔ: 14 “Ka a le nɛ Bari a le bunyɔɔ, e efɛɛloo a le nɛ pya nɛɛ le beenyiɛ* a le a kɛnɛkɛ̄.”
15 Sɔ̄ pya lo ɛnjɛl e’aara wa loo kii bunyɔɔ, pya a wee tɔɔ̄loo naana pee a bee kɔ nɛ ziī kɔ: “Dooraa i kii Bɛtlihɛm anyaawo lo emuɛ nu a sira, nu Jɛhova* edoora kɔ i suā ama.” 16 E ba bee nwaabah si sa muɛ Meri le Josɛf le nwiī a, a le ema bu nu a wee lu eyere nuede nam-tɔ bu. 17 Sɔ̄ ba emɔna doo wo, ba bee kɔ nu a bee lu ekɔ wa nɛ kumaloo nwiī a nɛ pya nɛɛ. 18 E nu pya tɔɔ̄loo naana pee a bee kɔ lu nyɛŋia loo dɛ̄dɛɛ̄ pya a dā, 19 mɛ Meri bee seea pya ue ama nyiɛ ye sa kiisī lo ekɛɛrɛ nu a kura. 20 Lo sɔ̄ pya tɔɔ̄loo naana pee a bee obia kii, e ba leera Bari sa ye nɛ ka loo dɛ̄dɛɛ̄ nu ba bee dā sa muɛ dookɛ̄ a bee lu ekɔ wa nɛ doo.
21 Sɔ̄ ɛrɛtaa biradee etɛ̄na, sɔ̄ e’ina sɔ̄ elu ekoo ye, ba bee ye kure Jizɔs lo alu bee lo ɛnjɛl bee kɔ alu ekure ye lɛɛ a gae yii bu ka.
22 Sɔ̄ a bee ina dee ɛɛ ɔ̄ŋia dookɛ̄ lok Mozis kɔ doo, ba bee ye su nua Jerusɛlɛm lo ebɛɛ ye kɛ̄sī Jɛhova,* 23 dookɛ̄ alu e’ɛm bu lok Jɛhova* doo kɔ: “Dɛ̄dɛɛ̄ tua nwiīnɛɛdam* ɛrɛ elu kaɛ nɛ Jɛhova.”* 24 E ba bee nɛ nu wɔma zɔɔ dookɛ̄ lok Jɛhova* kɔ doo, lo a kɔ: “Baɛ ka bɛmaakuku ale baɛ ka kukumkɛ̄.”
25 A ɛrɛ ziī gbara a bee le Jerusɛlɛm ye bee kura Simiɔn, alu nɛɛ kaāna dogo sa a wee sitam nɛ Bari aābu dɛ̄dɛɛ̄ ye beenyiɛ lo aa bee tɔɔ̄ baɛ sɔ̄ elu egbɔ̄ nyiɛ Izrɛl, e kaɛ edɔɔ̄ bee ye le loo. 26 Gbaāloo wo, kaɛ edɔɔ̄ bee ye muuna nɛ kɔ a naale e’u mmɛ sɔ̄ emɔna nɛɛ Jɛhova* tɔ̄ nɔɔ̄ bee.* 27 Sɔ̄ kaɛ edɔɔ̄ bee ye ture nua tɔkaɛ, tɛ Jizɔs le ye ka bee ye su nua lo edoo nu lok kɔ, 28 a bee taba nwiī a lɛɛ a nɛ ka Bari sa kɔ: 29 “Aa Nɛɛ-a-i-ɛrɛ A Eenyɔɔ Dɛ̄dɛɛ̄ Nu, doolo o zooro kii bu efɛɛloo dookɛ̄ o bee kɔ doo, 30 nyɔnɛbee baɛ na dɛɛ̄ emɔna sīdee o tɛ̄ma kpɔā pya nɛɛ 31 lo o edoora kɔ dɛ̄dɛɛ̄ nɛɛ a muɛ, 32 lo ɛɛdee a lɛɛ nu a kuɛ pya edonyɔɔ doodoo zii sa lu nu ka nɛ pya o nɛɛ Izrɛl.” 33 E nu a bee lu ekɔ kumaloo nwiī a bee lu nyɛŋia loo ye tɛ le ye ka. 34 Gbaāloo wo, Simiɔn bee wa nɛ leelee sa kɔ nɛ Meri alu ka nwiī a kɔ: “Ɛp! Elua etubobahloo nwiī ama kɔ a dana gbɛnɛ-edo nɛɛ lɛɛ kɛ̄, le lo edoo kɔ gbɛnɛ-edo nɛɛ a dɔ bu Izrɛl, e a elu edobah nu pya nɛɛ ekɔgara pɔrɔ nu kumaloo 35 (bu kaka, gɛ̄ nɔ̄ gaa le tubara a bu*), lokwa alu emuūna nu a le bu ekɛɛrɛ booboo nɛɛ.”
36 Kɛādoo, a bee ɛrɛ ziī waa mɔmanudɛɛ̄ a kura Anna, nwiīnɛɛwa Fanuɛl a aabu gā Asha. Lo wa ebee ana, e ye dam le ɛɛ ebee tɔ̄nia loo ɛrɛba zua aā dee a bee ye ii.* 37 E a bee le waa ua dam lo elua 84 zua. A wee le bu tɔkaɛ dɛ̄dɛɛ̄ sɔ̄, sa sitam a le kaɛ edɛɛ̄ le pie gbaāloo kaɛ nuede le bara bara. 38 A bee wa lu waɛloo taɛ lo sɔ̄ sa bɔātɛ̄ edoo yaa Bari sa kɔ nu akiiloo nwiī a nɛ dɛ̄dɛɛ̄ pya aa bee tɔɔ̄ baɛ a’agara Jerusɛlɛm.
39 Sɔ̄ ba edoora dɛ̄dɛɛ̄ nu dookɛ̄ lok Jɛhova* kɔ doo sah, ba bee obia kii wa buɛ̄ Nazarɛt li Galilii. 40 E lo nwiī bee kiisī lo enyim sa agaloo, e a bee suā nu kaāna sa kiisī lo e’ɛrɛ ewonu Bari.
41 Kɛādoo, ye tɛ le ye ka wee si Jerusɛlɛm dɛ̄dɛɛ̄ zua uwe doonu Tɛɛ̄yee. 42 E sɔ̄ ebee lu 12 zua, ba bee kii Jerusɛlɛm uwe doonu dookɛ̄ ba wee doo. 43 E sɔ̄ lo doonu bee ina kuma sa ba gaa obia kii, Jizɔs bee bia dumɛ li Jerusɛlɛm, e ye tɛ le ye ka naa bee suā. 44 Ba bee kɛɛrɛ kɔ a le yɛɛ eku pya nɛɛ le aba aa gbaa obia kii a, e sɔ̄ ba ekiā loo ziī biradee, ba bee bɔātɛ̄ egbī ye yɛɛ pya wa manamana le pya nɛɛ ba suāloo. 45 Mɛ sɔ̄ ba naa muɛ ye, ba bee obia kii Jerusɛlɛm sa ye gbī kaāna. 46 E sɔ̄ taa biradee etɛ̄na, ba bee ye muɛ bu tɔkaɛ a le ɛŋɛtɛ̄ yɛɛ pya tɔgɛnu sa gaa wa gbaɛ̄tɔ̄ sa wa bip ebip. 47 Mɛ kɛ̄ a dābeeloo nu sa ture ebip doo bee lu nyɛŋia loo dɛ̄dɛɛ̄ pya aa bee ye gbaɛ̄tɔ̄. 48 E sɔ̄ ye tɛ le ye ka emɔna ye, a bee wa lu nyɛŋia loo, e ye ka kɔ ye nɛ kɔ: “Na nwiī, ena o i doo loo doo wo ama a? Mda le o tɛ egbiā a tɛɛ̄ dɛ̄dɛɛ̄ kɛ̄.” 49 Mɛ a bee wa kɔ nɛ kɔ: “Ena anua bui aa bee mɛ gbī a? Ekɔ buii suā kɔ m ɛrɛ ele bu tɔ na Tɛ ni?” 50 Kerewo, ba naa bee dābeeloo nu aa bee wa kɔ nɛ.
51 Lo sɔ̄, a bee wa nyɔɔnɛ obia kii Nazarɛt, e a kiisī lo etɔɔ̄ wa kɛɛ̄.* Gbaāloo wo, ye ka bee su dɛ̄dɛɛ̄ ue ama seea nyiɛ ye. 52 E Jizɔs bee kiisī lo enyim bu suānu le bu gānyɔɔ sa ɛrɛ ewonu kɛ̄sī Bari le pya nɛɛ.