Lo Luk Bee Ɛm

4 Lo sɔ̄ kaɛ edɔɔ̄ bee mma loo Jizɔs, e a bee aa Jɔdan, sa edɔɔ̄* ture ye kuma bu kpo-sagara-wii 2 loo 40 biradee, e Pɔrɔ-edɔɔ̄ bee ye doā-ɛp. Sɔ̄ lo 40 biradee etɛ̄na, nyɔnɛbee a naa bee de lɔgɔ nu bu lo gbo dee a, loo ye bee lɛɛ. 3 E Pɔrɔ-edɔɔ̄ bee ye kɔ nɛ kɔ: “Lo o lege nwiīnɛɛdam Bari, kiira ekpodɛm ama nua fituru.” 4 Mɛ Jizɔs bee ye ture nɛ kɔ: “Ebee lu e’ɛm, ‘Naale aba fituru na nɛɛ ede tɔ̄ma dum a.’”

5 Nyɔɔwo, a bee ye su kuma kɛ̄ a kii nyɔɔ sa ye tɔgɛ dɛ̄dɛɛ̄ buɛ̄-mɛnɛ loo nyɔuwe bu ziī nwī sɔ̄. 6 Lo sɔ̄ Pɔrɔ-edɔɔ̄ kɔ ye nɛ kɔ: “M gaa le nɛ a ekpo bee dɛ̄dɛɛ̄ nu ama le wa ka, nyɔnɛbee ebee lu enɛ mɛ, e m nɛ ɛrɛgebah nɛɛ m gbī enɛ. 7 Nyɔɔwo, m nɛ a dɛ̄dɛɛ̄ pya nu ama lo a le o taāŋa mɛ bah.”* 8 Jizɔs bee ye ture nɛ kɔ: “Ebee lu e’ɛm, ‘Aba Jɛhova* o Bari na o ɛrɛ etaāŋabah a, e aba alɛ na o ɛrɛ esitam a le kaɛ nɛ a.’”

9 Lo sɔ̄ a su ye kuma Jerusɛlɛm sa ye su wu kɛ̄ a kii nyɔɔ loo tɔkaɛ sa ye kɔ nɛ kɔ: “Lo o lege nwiīnɛɛdam Bari, pɛɛ aa akɛāma sira kɛ̄, 10 nyɔnɛbee a bee lu e’ɛm, ‘A gaa le nɛ lok pya ye ɛnjɛl a kumaloo kɔ ba a kpega a,’ 11 e ‘Ba gaa le taba a nyɔɔ baɛ bah wa, lokwa oo su tɔ a zima dɛm.’” 12 Jizɔs bee ye ture nɛ kɔ: “A bee lu e’ɛm, ‘O aa doā-ɛp Jɛhova* o Bari doo pippip.’” 13 Nyɔɔwo sɔ̄ Pɔrɔ-edɔɔ̄ edoā ye ɛp sah, a bee ye aaloo bama sɔ̄ esikɛ̄ ɛrɛ dee lo edoā ye ɛp.

14 Lo sɔ̄ edɔɔ̄ bee sikɛ̄ ture Jizɔs obara kuma Galilii. E a bee lu ekɔ le kpɛa a ye kiiloo tɛ̄ma ɛŋɛnɛ pya buɛ̄ a le waɛloo. 15 A bee bɔānagetɛ̄ etɔgɛ nu bu pya wa tɔ bɔŋanaloo, e dɛ̄dɛɛ̄ nɛɛ bee ye leera.

16 Lo sɔ̄ a bee kii Nazarɛt kɛ̄ a bee lu ekpɔā ye bie, e a bee yii bu tɔ bɔŋanaloo nyɔɔ Dee Fɛɛrɛloo dookɛ̄ a wee doo, e a bee yira yah lo ebuū kpa. 17 Nyɔɔwo, a bee lu enɛ ye ui-kpa nɛɛ mɔmanudɛɛ̄ Aizaia bee ɛm, e a yaari sa muɛ kɛ̄ alu e’ɛm kɔ: 18 “Edɔɔ̄ Jɛhova* le mɛ loo, nyɔnɛbee ebee mɛ tɔ̄ nɔɔ̄ bee kɔ m zue le yereue nɛ pya kporo. A bee mɛ yere kɔ m zue i’iye nɛ pya a bee lu e’aa le boa nɛ pya zimadɛɛ̄, le doo kɔ pya alu ebii nɛ kɛ̄ alu puɛ, 19 a bee mɛ yerenage kɔ m zue sɔ̄ ba esikɛ̄ ɛrɛ leelee Jɛhova.”* 20 Lo sɔ̄ a sikɛ̄ ui lo ui-kpa sa su nɛ nɛɛ kuūdɛɛ̄loo tɔ bɔŋanaloo lɛɛ a ɛŋɛtɛ̄ kɛ̄; e dɛ̄dɛɛ̄ nɛɛ a bee le bu tɔ bɔŋanaloo a bee ye ɛp doo tɔɔ. 21 Lo sɔ̄ a kɔ wa nɛ kɔ: “Nii’ee na dɔ kpa kaɛ bui dā ama dooa gbɔ̄mɛɛ a.”

22 E ba bɔātɛ̄ ekɔ le ye kumaloo, sa pya lele ue a bee kɔ bee wa lu nyɛŋia loo sa ba kɔ: “Ekɔ a naale nwiī Josɛf na ama ni?” 23 Lo sɔ̄ a bee wa kɔ nɛ kɔ: “Bu kaka, m suā kɔ bui kɔ mɛ nɛ kɔ, ‘Nɛɛ dambie, dasī bo oloo loo. Doo pya nu i bee dā kɔ o doo li Kapaniɔm a bie akɛāma, oloo buɛ̄.’” 24 Nyɔɔwo, a bee kɔ: “Kaka m kɔ i nɛ kɔ a naa wee lu esu baɛ bah suā lɔgɔ nɛɛ zue ue bie ye buɛ̄. 25 Bu edobah, m kɔ kaka i nɛ kɔ: Gbɛnɛ-edo pya waa ua dam bee le bu Izrɛl bu gbo dee Elaija sɔ̄ boo naa bee dɔɔ loo taa zua le ini’ī enɔɔ̄ sa gbɛnɛ kii bee le bu dɛ̄dɛɛ̄ buɛ̄ a. 26 Kerewo, a naa bee lu eyere ye ma lɔgɔ aba, mɛ taāwo, a bee lu eyere ye ma waa ua dam a le Zarɛfat li buɛ̄ Saidɔn. 27 Gbɛnɛ-edo pya ebiakpaŋ bee lenage Izrɛl bu dee nɛɛ mɔmanudɛɛ̄ Elaisha, kerewo, a naa bee lu edoo kɔ lɔgɔ aba a ɛɛ* mɛ aba Nɛaman alu Siria.” 28 E dɛ̄dɛɛ̄ pya a bee dā nu a bee kɔ bie bu tɔ bɔŋanaloo a bee si saŋ, 29 e ba bee aakɛ̄ sa ye aa lɛɛ bu wa buɛ̄, e ba su ye kuma bee egu kɛ̄ a bee lu ewu lo gbɛnɛ buɛ̄ lokwa ba ye top aā lo kɛ̄ tɛrɛ kɛ̄. 30 Mɛ a bee wa kiā tɛɛ̄ taɛyɛɛ kii.

31 Lo sɔ̄ a bee kii bu ziī buɛ̄ Galilii a kura Kapaniɔm. E a bee le aa wa tɔgɛ nu nyɔɔ Dee Fɛɛrɛloo, 32 e kɛ̄ a tɔgɛ nu doo bee wa lu nyɛŋia loo, nyɔnɛbee a bee kɔ ue doodoo nɛɛ a ɛrɛ ekpo. 33 E a ɛrɛ gbara a bee le bu tɔ bɔŋanaloo a lo edɔɔ̄ a naa ɛɛ bee ye le bu, e a bee su gbɛnɛ muɛ̄ wimakpā kɔ: 34 “Ena i ɛnia a, a Jizɔs nɛɛ Nazarɛt’? O elua wee gbee i sī ni? M suā taɛ nɛɛ o lu, o lu Nɛɛ A Le Kaɛ, e Bari na a a yere a.” 35 Mɛ Jizɔs bee ye kɔgara ue kɔ: “Ɔbɛpiī sa ye aabu.” Nyɔɔwo, sɔ̄ lo pɔrɔ-edɔɔ̄ etoba lo gbara tɛrɛ kɛnɛkɛ̄ wa kɛ̄sī sah, a bee ye aabu e a naa bee ye yere lɔgɔ muū loo. 36 Nyɔɔwo, a bee lu nyɛŋia loo dɛ̄dɛɛ̄ aba sa ba kɔ nɛ ɛnia aba kɔ: “Naa ɛpge dua ekpo a le bu ye ue a! Nyɔnɛbee a su ekpo nɛā lok pya edɔɔ̄ a naa ɛɛ sa ba aabu nɛɛ!” 37 Nyɔɔwo, kpɛa a ye kiiloo bee yaara bu dɛ̄dɛɛ̄ pya buɛ̄ a le lo barasī.

38 Sɔ̄ a bee aabu tɔ bɔŋanaloo, a bee kii tɔ Saimɔn. E e’agabah zuumiā aa bee yii loo ka-nwaa Saimɔn, e ba bara ye kɔ a yerebah ye nɛ. 39 Nyɔɔwo, a bee ye yira yah kpaɛ̄ sa kɔgara ue lo zuumiā, e lo zuumiā bee ye aaloo. E aba sɔ̄ a lo wa aakɛ̄ sa bɔātɛ̄ esitam wa nɛ.

40 Mɛ sɔ̄ zue edɛba kiikɛ̄, dɛ̄dɛɛ̄ pya a bee ɛrɛ pya keekee dumɛloo le loo bee wa su ye ma. E a dɛrɛ bah nyɔɔ ziī ziī aba sa wa bo. 41 Pɔrɔ-edɔɔ̄ bee aanage bu gbɛnɛ-edo nɛɛ sa wiikpā kɔ: “Olo na Nwiīnɛɛdam Bari a.” Mɛ a kɔgara wa ue sa a naa bee yiga kɔ ba a kɔ ue, nyɔnɛbee ba bee suā kɔ alɛ na Kraist a.

42 Kerewo, sɔ̄ dee eyira, a bee aa kii kɛ̄ etɔɔ̄ aba ɛɛ. Mɛ gbɛnɛkpo nɛɛ a bee bɔātɛ̄ egbī ye sa lu ina kɛ̄ a le, e ba bee gbī ekpaɛ̄ ye kɔ aa wa aae loo kii. 43 Mɛ a bee wa kɔ nɛ kɔ: “M ɛrɛnage ezue le yereue Buɛ̄-mɛnɛ Bari nɛ pya a le dɔɔ̄na buɛ̄, nyɔnɛbee nu anua a bee lu eyere mɛ nua lo.” 44 Nyɔɔwo, a bee kiisī lo ezue ue bu pya tɔ bɔŋanaloo a le Judia.